زَبُورَا 146 - أَتَّوْرَتْ دَ أَنَّبَاوَا

وَاڧَرْ يَبُواْ غَ اللَّهْ مَيْ تَيْمَكُواْ

¹ يَبِے يَهْوٜىٰهْ!‏ يَبِے يَهْوٜىٰهْ، يَا رَيْنَ!‏

² ذَنْ يَبِے يَهْوٜىٰهْ دُكَنْ ݣُونَكِنْ رَيْنَ، ذَنْ رٜىٰرَ يَبُواْ غَ اللَّهْ نَا حَرْ إِيَاكَرْ رَيْنَ؞

³ كَدَ كَدُواْغَرَ غَ شُوغَبَنِّ، كُواْ غَ طَنْ أَدَمْ وَنْدَ بَايَ ثٜىٰتُواْ؞

⁴ دَ نُمْڢَشِنْسَ يَبَرْ شِ سَيْ يَكُواْمَ تُرْٻَيَا عِنْدَ يَڢِتُواْ، أَ رَانَرْ نَنْ دُكَنْ شِرْيٜىٰ شِرْيٜىٰنْسَ سُنْ ذَمَ بَنْظَ؞

⁵ مَيْ أَلْبَرْكَ نٜىٰ وَنْدَ اللَّهْ نَ يَعْڧُوبَ نٜىٰ تَيْمَكُوانْسَ، وَنْدَ يَهْوٜىٰهْ اللَّهْ نْسَ نٜىٰ سَا ذُوثِيَارْسَ،

⁶ اللَّهْ وَنْدَ يَيِ سَمَ دَ دُونِيَا، دَ تٜىٰكُ دَ كُمَ دُكَنْ أَبِنْدَ يَكٜىٰ عَثِكِنْسُ، وَنْدَ يَكَنْ كِيَايٜىٰ غَسْكِيَ حَرْ أَبَدَا،

⁷ وَنْدَ يَكَنْ يَنْكٜىٰ شَرِيعَ غَ وَطَنْدَ عَكٜىٰ مُسُ دَنِّيَ، وَنْدَ يَكَنْ بَادَ عَبِنْثِ غَ مَاسُ جِنْ يُنْوَ؞ يَهْوٜىٰهْ يَكَنْ یَنْتَرْدَ طَوْرَرُّ،

⁸ يَهْوٜىٰهْ يَكَنْ بُوطٜىٰ إِدَانُنْ مَكَڢِ؞ يَهْوٜىٰهْ يَكَنْ طَغَ وَطَنْدَ سُكٜىٰ ڧَرْڧَشِنْ دَنِّيَ، يَهْوٜىٰهْ يَكَنْ ڧَوْنَثِ مَاسُ أَدَلْثِے؞

⁹ يَهْوٜىٰهْ يَكَنْ كِيَايٜىٰ بَاڧِ، يَكَنْ تَيْمَكِ مَرَايُ دَ مَاتَانْدَ مَذَنْسُ سُكَ مُتُ، عَمَّا يَكَنْ لَلَتَرْدَ حَنْيَرْ مُوغَيٜىٰ؞

¹⁰ يَهْوٜىٰهْ ذَيْ يِمُلْكِ حَرْ أَبَدَا، اللَّهْ نْكِ، يَا كٜىٰ سِهِيُواْنَ، دَغَ ڟَارَا ذُوَا ڟَارَا؞ يَبِے يَهْوٜىٰهْ!‏