زَبُورَا 141 - أَتَّوْرَتْ دَ أَنَّبَاوَا

أَدُّعَرْ نٜىٰمَنْ كِيَايٜىٰوَا دَغَ مُغُنْتَا

﴿زَبُورَا تَ دَاوُدَ؞﴾

¹ يَا يَهْوٜىٰهْ، نَيِ كِرَا غَرٜىٰكَ؞ ذُواْ غَرٜىٰنِ دَ سَوْرِ، سَوْرَرَتَ سَعَدَّ نَيِ كِرَا!‏

² كَرْٻِ أَدُّعَتَ كَمَرْ تُرَارٜىٰنْ ڧُواْنَاوَا، بَرِ طَغَوَرْ حَنُّوَنَ تَذَمَ كَمَرْ هَدَايَ تَيَمَّ؞

³ يَا يَهْوٜىٰهْ، سَا إِنْ كَمٜىٰ بَاكِنَ، كُلَ دَ ڧُواْڢَرْ بَاكِنَ؞

⁴ كَدَ ذُوثِيَاتَ تَجُويَا غَ مَغَنَرْ مُغُنْتَا، كُواْ غَ عَيْكَتَ أَيُّكَنْ مُغُنْتَا تَرٜىٰدَ مُوغَيٜىٰ، كُواْمٜىٰ دَاطِنْ عَبِنْثِنْ بِكِنْسُ؞

⁵ بَرِ مُتُمِنْ أَدَلْثِے يَڟَاوَتَا مِنِ، أَبِنْ كِرْكِ نٜىٰ؞ بَرِ يَغَرْغَطٜىٰنِ، شِ كَمَرْ مَيْ نٜىٰ عَكَيْنَ؞ كَيْنَ بَذَيْ ڧِشِبَ؞ حَرْ يَنْذُ أَدُّعَتَ تَنَ غَابَادَ مَاسُ عَيْكَتَ مُغُنْتَا؞

⁶ دَ عَكَ تُتُّرٜىٰ مَاسُ مُلْكِنْسُ ڧَسَا دَغَ كَنْ دُوَڟُو، سَيْ سُكَ غَانٜىٰ ثٜىٰوَ مَغَنَاتَ تَنَدَ دَاطِے؞

⁷ كَمَرْ دُوڟٜىٰنْ دَ مُتُمْ يَڢَرْڢَشٜىٰ يَوَاڟَرْ عَڧَسَا، حَكَمَا ذَاعَ وَرْوَاڟَرْ دَ ڧَسُسُوَنْسُ عَبَاكِنْ كَبَرِ؞

⁸ عَمَّا أَغَرٜىٰكَ نَسَا عِدُواْنَ، يَا يَهْوٜىٰهْ عُبَنْ‌غِجِنَ، أَغَرٜىٰكَ نَكٜىٰ نٜىٰمَنْ وُرِنْ ٻُيَ، كَدَ كَبَرْ رَيْنَ ثِكِنْ حَڟَرِ؞

⁹ كِيَايٜىٰنِ دَغَ تَرْكُوانْ دَ سُكَسَا مِنِ، دَغَ كُمَ تَرْكُنَنْ مَاسُ مُغُنْتَا؞

¹⁰ بَرِ مُوغَيٜىٰ سُڢَاطَ ثِكِنْ تَرْكُنَنْسُ، نِے كَطَيْ كُوَ إِنْكُٻُتَ؞