زَبُورَا 140 - أَتَّوْرَتْ دَ أَنَّبَاوَا

كُوكَنْ نٜىٰمَنْ كُٻُتَ دَغَ مُوغَيٜىٰ

﴿عُمَرْنِ غَ شُوغَبَنْ مَوَاڧَ:‏ زَبُورَا تَ دَاوُدَ؞﴾

¹ يَا يَهْوٜىٰهْ، كُٻُتَرْ دَنِے دَغَ مُوغَيٜىٰ، كَڟَرٜىٰنِ دَغَ مَاسُ تَاوَيٜىٰ،

² وَطَنْدَ ذُوثِيَارْسُ ثِكٜىٰ سُكٜىٰ دَ مُوغَيٜىٰنْ شِرْيٜىٰ شِرْيٜىٰ، كُلُّمْ سُنَ كَٰوُاْ تَاشِنْ حَنْكَلِ؞

³ هَرْشٜىٰنْسُ كُوَ كَمَرْ مَثِيظَيْ مَاسُ ذَاڢِنْ دَڢِ، كَلْمُواْمِنْ بَاكِنْسُ كَمَرْ دَڢِنْ مُوغُنْ مَثِيجِ نٜىٰ؞

⁴ يَا يَهْوٜىٰهْ، كِيَايٜىٰنِ دَغَ حَنُّوَنْ مُوغَيٜىٰ، ڟَرٜىٰنِ دَغَ مَاسُ تَاوَيٜىٰ، وَطَنْدَ سُكَ شِرْيَ ڢَاطُوَتَ؞

⁵ مَاسُ طَغَ كَيْ سُنْسَا مِنِ تَرْكُواْ، دَ إِغِيُواْيِ سُنْ شِمْڢِطَا مِنِ تَرْكُواْ، أَ حَنْيَ سُنْ سَا تَرْكُواْ دُواْمِنْ سُكَامَنِ؞

⁶ نَثٜىٰ وَ يَهْوٜىٰهْ، ‏«‏كَيْ نٜىٰ اللَّهْ نَا؞»‏ جِ مُرْيَتَ تَنٜىٰمَنْ جِنْڧَيْ، يَا يَهْوٜىٰهْ!‏

⁷ يَا يَهْوٜىٰهْ عُبَنْ‌غِجِنَ، مَيْ ثٜىٰتُواْنَ مَيْ ڧَرْڢِے، كَمَرْ غَرْكُوَ كَڟَرٜىٰ كَيْنَ أَ رَانَرْ يَاڧِ؞

⁸ يَا يَهْوٜىٰهْ، كَدَ كَبَا مُوغَيٜىٰ أَبِنْدَ سُكٜىٰسُواْ، كَدَ كَبَرْ شِرِنْسُ يَيِ نَصَرَا، دُواْمِنْ كَدَ سُطَوْكَكَ كَنْسُ؞

⁹ بَرِ كَوُنَنْ مَاسُ كٜىٰوَيٜىٰنِ سُرُڢُ دَ مَغَنَرْ بَنْظَ نَبَكُنَنْسُ؞

¹⁰ بَرِ غَرْوَشِنْ وُتَا مَيْ ذَاڢِ سُڢَاطُواْ عَكَنْسُ، بَرِ أَ جٜىٰڢَرْ دَسُو أَ رَامِ حَرْ سُكَاسَ ڢِتَ؞

¹¹ كَدَ مَاسُ ٻَاتَ سُونَ سُكَڢُ عَثِكِنْ ڧَسَرْ، مَاسُ تَاوَيٜىٰ كُوَ بَرِ مُغُنْتَا تَڢَرَوْثٜىٰسُ حَرْ تَهَلَكَاسُ؞

¹² نَا سَنِ يَهْوٜىٰهْ ذَيْ دَيْدَيْتَ وَمَتَلَوْتَ حَكِّنْسُ، ذَيْ كُمَيِ أَدَلْثِے غَ مَاسُ بُڧَاتَ؞

¹³ حَڧِيڧَ، مَاسُ أَدَلْثِے ذَاسُيِ وَسُونَنْكَ غُواْدِيَ، مَاسُ غَسْكِيَ أَظُوثِ كُمَ ذَاسُ ذَوْنَ أَغَبَنْكَ؞