زَبُورَا 116 - أَتَّوْرَتْ دَ أَنَّبَاوَا

وَاڧَرْ غُواْدِيَ غَ اللَّهْ مَيْ أَمْسَ أَدُّعَ

¹ إِنَ ڧَوْنَرْ يَهْوٜىٰهْ غَمَا يَنَ جِنْ مُرْيَتَ تَنٜىٰمَنْ جِنْڧَيْ،

² غَمَا يَنَ كَسَ كُنّٜىٰ غَرٜىٰنِ، ذَنْ كِرَا غَرٜىٰشِ حَرْ إِيَاكَرْ ݣُونَكِنَ؞

³ إِغِيُواْيِنْ مُتُوَ سُنْ طَوْرٜىٰنِ، عَذَابَرْ كَبَرِ تَشَا كَيْنَ؞ وَهَلَ دَ بَڧِنْ ثِكِ سُنْ سَامٜىٰنِ؞

⁴ سَيْ نَيِ كِرَا غَ سُونَنْ يَهْوٜىٰهْ، ‏«‏يَا يَهْوٜىٰهْ، ثٜىٰثِ رَيْنَ!‏»‏

⁵ يَهْوٜىٰهْ مَيْ تَوْسَيِ نٜىٰ مَيْ غَسْكِيَ كُمَ، اللَّهْ نْمُ مَيْ جِنْڧَيْ نٜىٰ؞

⁶ يَهْوٜىٰهْ يَكَنْ كِيَايٜىٰ مَاسُ ڧَسْڧَنْتَرْ دَكَيْ؞ سَعَدَّ نَڢِدَّ ذُوثِيَا، يَثٜىٰثٜىٰنِ؞

⁷ يَا ذُوثِيَاتَ، كُواْمَ كِݣُونْتَ، غَمَا يَهْوٜىٰهْ يَايِ مِكِ أَلْحٜىٰرِ سُواْسَيْ؞

⁸ غَمَا يَهْوٜىٰهْ يَاثٜىٰثِ رَيْنَ دَغَ مُتُوَ، عِدَنُونَ دَغَ هَوَيٜىٰ، ڧَڢَاڢُنَ كُمَ دَغَ تُنْتُٻٜىٰ؞

⁹ يَنْذُ ذَنْيِ تَڢِيَ أَغَبَنْ يَهْوٜىٰهْ، عَدُونِيَرْ مَاسُ رَيْ؞

¹⁰ إِنَ رِڧٜىٰ دَ بَنْ‌غَسْكِيَتَ، كُواْ دَنَثٜىٰ، ‏«‏نَاجِ جِكِے ڨُورَيْ؞»‏

¹¹ ثِكِنْ ضِكِثِيوَاتَ نَثٜىٰ، ‏«‏دُكَنْ مُتَنٜىٰ مَڧَضْيَاتَ نٜىٰ؞»‏

¹² مٜىٰ ذَنْبَا يَهْوٜىٰهْ سَبُواْدَ دُكَنْ أَلْحٜىٰرَنْسَ غَرٜىٰنِ؟

¹³ ذَنْ طَغَ ݣُوڢْ عَلَمَرْ نُونَ غُواْدِيَرْ ثٜىٰتُواْ، ذَنْ كِرَا غَ سُونَنْ يَهْوٜىٰهْ؞

¹⁴ ذَنْ ثِكَ رَنْڟُوَاتَا غَ يَهْوٜىٰهْ أَغَبَنْ دُكَنْ مُتَنٜىٰنْسَ؞

¹⁵ أَ عِدُوانْ يَهْوٜىٰهْ مُتُوَرْ مَاسُ ڧَوْنَرْسَ أَبُ مَيْ ذَاڢِ نٜىٰ؞

¹⁶ يَا يَهْوٜىٰهْ، حَڧِيڧَ نِے بَاوَنْكَ نٜىٰ، طَنْ بَيْوَرْكَ، كَيْ كَكُنْثٜىٰنِ دَغَ سَرْڧُواْڧِنَ؞

¹⁷ ذَنْ مِيڧَ مَكَ هَدَايَ تَغُواْدِيَ، ذَنْ كِرَا غَ سُونَنْ يَهْوٜىٰهْ؞

¹⁸ ذَنْ ثِكَ رَنْڟُوَاتَا غَ يَهْوٜىٰهْ أَغَبَنْ دُكَنْ مُتَنٜىٰنْسَ،

¹⁹ عَثِكِنْ ڢِيلِنْ غِدَنْ يَهْوٜىٰهْ، أَڟَكِيَرْ عُرُوشَلِيمَ؞ يَبِے يَهْوٜىٰهْ!‏