زَبُورَا 109 - أَتَّوْرَتْ دَ أَنَّبَاوَاكُوكَنْ نٜىٰمَنْ رَامُوَا عَكَنْ أَبُواْكَنْ غَابَا ﴿عُمَرْنِ غَ شُوغَبَنْ مَوَاڧَ: زَبُورَا تَ دَاوُدَ؞﴾ 1 يَا اللَّهْ وَنْدَ نَكٜىٰ يَبُواْ، كَدَ كَيِ شِضُ! 2 غَمَا مُوغَيٜىٰ دَ مَڧَضْيَاتَ سُنَ بُوطٜىٰ بَكُنَ عَكَيْنَ، سُنَ ڢَطِنْ ڧَضْيَا غَمٜىٰدَنِ؞ 3 دَ مَغَنْغَنُنْ ڧِيَيَّ سُنَ كٜىٰوَيٜىٰنِ، سُنَ تَاسَرْ مِنِ بَادَلِيلِ؞ 4 سُنَ مَيَرْ مِنِ ڧَوْنَتَ دَ زَرْغِ، كُواْدَيَكٜىٰ إِنَ أَدُّعَ دُواْمِنْسُ؞ 5 سُكَنْ سَاكَ أَلْحٜىٰرِنَ دَ مُغُنْتَا، ڧَوْنَتَ كُمَ دَ ڧِيَيَّ؞ 6 سَا مُوغُنْ مُتُمْ يَيِ مُوغُوَرْ شَيْدَ عَكَنْسَ؞ بَرِ مَيْ ڟَيَ مَسَ يَذَمَ مَيْ زَرْغِنْسَ، 7 أَ شَرِيعَرْسَ كُوَ أَ سَامٜىٰشِ دَ لَيْڢِے، بَرِ أَدُّعَرْسَ كُمَ تَذَمَ ذُنُوبِ! 8 بَرِ ݣُونَكِنْسَ سُذَمَ كَطَنْ، مَڟَيِنْسَ كُمَ بَرِ وَنِ يَطَوْكَ؞ 9 بَرِ یَیَنْسَ سُذَمَ مَرَايُ، مَاتَرْسَ كُمَ مَرَرْ مِجِ! 10 بَرِ یَیَنْسَ سُيِ تَيَٰوُاْ سُنَ بَرَ، عَكُمَ كُواْرٜىٰسُ دَغَ كُڢَيْ عِنْدَ سُكٜىٰ ذَمَ! 11 بَرِ مَيْبِنْسَ بَاشِ يَڨُوثٜىٰ كُواْمٜىٰنْسَ، بَاڧِ كُمَ سُݣُوشِ عَيْكِنْ ظُڢَرْسَ؞ 12 كَدَ وَنِ يَنُونَ مَسَ أَلْحٜىٰرِ، كُواْ يَجِ تَوْسَيِنْ یَیَنْسَ مَرَايُ؞ 13 بَرِ دُكَنْ ذُرِيَرْسَ تَمُتُ، حَرْ أَمَنْتَادَ سُونَيٜىٰنْسُ أَڟَارَ مَيْ ذُوَا؞ 14 بَرِ يَهْوٜىٰهْ يَتُنَ دَ لَيْڢِنْ كَاكَنِّنْسَ، كَدَ كُمَ عَكَوَرْ دَ ذُنُوبِنْ مَامَرْسَ؞ 15 بَرِ يَهْوٜىٰهْ يَتُنَ دَ ذُنُبَنْسُ كُلُّمْ، عَمَّا أَمَنْتَادَ سُونَنْسُ طُنْغُمْ دَغَ دُونِيَا، 16 غَمَا مُتُمِنَّنْ بَيْتَٻَ تُنَانِنْ يِنْ أَلْحٜىٰرِ بَ، يَكَنْ ڟَنَنْتَاوَ مَتَلَوْتَ دَ مَاسُ بُڧَاتَ، دَ مَاسُ ڢِدَّ ذُوثِيَا حَرْ يَكَشٜىٰسُ؞ 17 يَنَ سُوانْ يِنْ لَعَنَ، بَرِ لَعَنَ تَكُواْمَ كَنْسَ! بَايَسُوانْ أَلْبَرْكَ، بَرِ أَلْبَرْكَ تَيِ نٜىٰسَ دَشِ! 18 يَسَنْيَ لَعَنَ كَمَرْ رِغَرْسَ، بَرِ لَعَنَ تَجِڧٜىٰشِ كَمَرْ ضُوَ، تَشِغَ ڧَسُسُوَنْسَ كَمَرْ مَيْ! 19 بَرِ لَعَنَ تَطَوْرٜىٰشِ كَمَرْ ذَانِ، كَمَرْ طَمَرَرْ دَيَكٜىٰ طَوْرٜىٰ دَشِ كُلُّمْ! 20 بَرِ يَهْوٜىٰهْ يَسَاكَ وَمَاسُ زَرْغِنَ حَكَ، يَسَاكَ وَمَاسُ مُوغَيٜىٰنْ مَغَنْغَنُ عَكَيْنَ! 21 عَمَّا كَيْ يَهْوٜىٰهْ عُبَنْغِجِنَ، يِدَنِے دُواْمِنْ أَغِرْمَمَ سُونَنْكَ، سَبُواْدَ أَلْحٜىٰرِنْ ڧَوْنَرْكَ مَرَرْ ثَنْجَاوَا، كُٻُتَرْ دَنِے! 22 غَمَا نِے مَتَلَوْثِ نٜىٰ كُمَ مَيْ بُڧَاتَ، نَجِ ذَاڢِ سُواْسَيْ ثِكِنْ ذُوثِيَاتَ؞ 23 إِنَ ٻَثٜىٰوَ كَمَرْ إِنُوَرْ يَمَّ، أَنَ كَكَّٻٜىٰنِ كَمَرْ ڢَارَ؞ 24 ڠُوِوُاْيِنَ سُنْ مُتُ تَوُرِنْ أَظُمِ، جِكِينَ يَرَمٜىٰ كَكَڢْ؞ 25 نَذَمَ أَبِنْ دَارِيَا غَ مَاسُ زَرْغِنَ، سُكَنْ كَطَ كَوُنَنْسُ إِنْ سُنْ غَنْ نِے؞ 26 تَيْمَكٜىٰنِ، يَا يَهْوٜىٰهْ اللَّهْ نَا! ثٜىٰثٜىٰنِ سَبُواْدَ ڧَوْنَرْكَ مَرَرْ ثَنْجَاوَا! 27 دُواْمِنْ سُسَنِ ثٜىٰوَ وَنَّنْ حَنُّنْكَ نٜىٰ، كُمَ كَيْ، يَا يَهْوٜىٰهْ، كَا عَيْكَتَ حَكَ؞ 28 سُو سُيِ تَلَعَنْتَاوَا، عَمَّا كَيْ كَيِ تَسَا أَلْبَرْكَ، ذَاسُ تَاسُواْ مِنِ، عَمَّا كَيْ كَيِ تَكُنْيَتَرْ دَسُو، نِے بَاوَنْكَ كُوَ إِنْيِ ڢَضٍ ثِكِ! 29 بَرِ كُنْيَا تَرُڢٜىٰ مَاسُ زَرْغِنَ، أَ رُڢٜىٰسُ دَ ذَنٜىٰنْ كُنْيَا؞ 30 دَ بَاكِنَ ذَنْ غُواْدٜىٰ وَ يَهْوٜىٰهْ سُواْسَيْ، ذَنْ يَبٜىٰشِ ثِكِنْ تَارُوانْ جَمَعَ، 31 غَمَا يَكَنْ ڟَيَاوَا مَرَرْ ڧَرْڢِے يَثٜىٰثٜىٰشِ دَغَ مَاسُ مَسَ شَرِيعَرْ كِسَا؞ |
Hausa Common Language Ajami Bible © The Bible Society of Nigeria, 2020
Bible Society of Nigeria