زَبُورَا 10 - أَتَّوْرَتْ دَ أَنَّبَاوَا

أَدُّعَ تَكُوكَا غَمٜىٰدَ مُوغَيٜىٰ

¹ يَا يَهْوٜىٰهْ، مٜىٰيَسَا كَڟَيَ ثَنْ دَنٜىٰسَ؟ مٜىٰيَسَا كَٻُواْيٜىٰ كَنْكَ لُواْكَثِنْ دَمُكٜىٰ وَهَلَ؟

² مُوغَيٜىٰ سُنَ طَغَ كَيْ سُنَ ڟَنَنْتَاوَ مَرَسَ ڧَرْڢِے؞ بَرِ مُوغُنْ شِرِنْسُ يَكُواْمَ كَنْسُ؞

³ مُوغَيٜىٰ سُنَ تَاڧَمَ دَ مُوغُوَرْ شَعَوَرْ ذُوثِيَارْسُ؞ مَاسُ يَوَنْ ݣُوطَيِ سُكَنْ ذَاغِ يَهْوٜىٰهْ، سُكَنْ كُمَ رٜىٰنَشِ؞

⁴ مُوغَيٜىٰ سُنَدَ غِرْمَنْ كَيْ، بَاسَ دَامُوَ دَ اللَّهْ؞ عَتُنَانِنْسُ دُكَ سُكَنْثٜىٰ ‏«‏بَا اللَّهْ؞»‏

⁵ مُوغَيٜىٰ سُكَنْ ثِ نَصَرَا كُلُّمْ؞ بَاسَ غَانٜىٰ حُكُنْثِنْ اللَّهْ، سُكَنْيِ وَ أَبُواْكَنْ غَابَنْسُ كَلُّوانْ رٜىٰنِ؞

⁶ عَتُنَانِنْ ذُوثِيَارْسُ سُكَنْثٜىٰ، ‏«‏بَذَامُ تَٻَ ڢِرْغِتَبَ، دَغَ ڟَارَا ذُوَا ڟَارَا بَذَامُ شِغَ وَهَلَبَ؞»‏

⁷ بَاكِنْسُ ثِكٜىٰ سُكٜىٰ دَ ذَاغٜىٰ ذَاغٜىٰ، دَ ڧَضْيَا دَ ڢِتِنَ؞ هَرْشٜىٰنْسُ سُنَدَ بَڧَرْ مَغَنَ دَ مُغُنْتَا؞

⁸ سُكَنْ ٻُيَ أَ لُنْ‌غُ، سُكَنْيِ ݣُونْتُوانْ ٻَوْنَ سُكَشٜىٰ مَرَسَ لَيْڢِے؞ عِدَنُونْسُ كُوَ سُنَ عَكَنْ مَرَسَ ڧَرْڢِے؞

⁹ سُكَنْ ٻُيَ أَ لُنْ‌غُ كَمَرْ ذَاكِ، سُكَنْيِ ݣُونْتُوانْ ٻَوْنَ سُنَ ڢَكُوانْ مَرَسَ ڧَرْڢِے؞ دَ تَرْكُوانْسُ سُكَنْ كَامَ مَرَسَ ڧَرْڢِے سُتَڢِے دَسُو؞

¹⁰ سُكَنْ تَتَّاكٜىٰ مَرَسَ ڧَرْڢِے سُرُرُّشٜىٰسُ، سُدَنّٜىٰسُ ڧَرْڧَشِنْ ڧَڢَاڢُنْسُ؞

¹¹ عَتُنَانِنْ ذُوثِيَارْسُ سُكَنْثٜىٰ، ‏«‏أَيْ، اللَّهْ بَيْكُلَبَ!‏ يَرُڢٜىٰ عِدَنُونْسَ، بَايَغَنِ سَمْ!‏»‏

¹² تَاشِ، يَا يَهْوٜىٰهْ!‏ نُونَ ڧَرْڢِنْ حَنُّنْكَ، يَا اللَّهْ!‏ كَدَ كَمَنْتَادَ مَرَسَ ڧَرْڢِے!‏

¹³ دُوانْمٜىٰ مُوغَيٜىٰ سُكٜىٰ رٜىٰنَ اللَّهْ؟ دُوانْمٜىٰ سُكٜىٰثٜىٰ أَ ذُوثِيَارْسُ، ‏«‏بَذَيْ بِنْثِكٜىٰمُبَ»‏؟

¹⁴ عَمَّا يَا يَهْوٜىٰهْ، لَلَّيْ كَنَ غَنِ!‏ عِ، كَنَ دُوبَنْ دَامُوَ دَ وَهَلَ، كُلُّمْ كَنَ أَشِرْيٜىٰ كَتَيْمَكَ؞ أَغَرٜىٰكَ مَرَسَ ڧَرْڢِے سُكٜىٰ دُواْغَضَ، كَيْنٜىٰ مَيْ تَيْمَكُوانْ مَرَايُ؞

¹⁵ بَرِ كَكَرْيَ إِيكُوانْ مُوغَيٜىٰ دَ مَاسُ عَيْكَتَ مُغُنْتَا؞ كَحُكُنْتَ مُوغَيٜىٰ سَيْ حَرْ أَنْتُواْنٜىٰ دُكَنْ مُغُنْتَارْسُ؞

¹⁶ يَهْوٜىٰهْ سَرْكِے نٜىٰ حَرْ أَبَدَا أَبَدِنْ!‏ أَلْعُمَّنْ دَ بَسُيِ مَسَ سُجَّدَبَ ذَاعَ كَوَرْ دَسُو دَغَ ڧَسَرْسَ؞

¹⁷ يَا يَهْوٜىٰهْ، ذَاكَ جِ كُوكَنْ مَرَسَ ڧَرْڢِے؞ ذَاكَ سَوْرَرٜىٰسُ، كَبَاسُ ڧَرْڢِنْ ذُوثِيَا؞

¹⁸ ذَاكَيِ شَرِيعَرْ غَسْكِيَ غَ مَرَايُ دَ وَطَنْدَ عَكَ دَنّٜىٰ، دُواْمِنْ كَدَ یَنْ أَدَمْ سُڧَارَ بَاسُ ڟُواْرُواْ؞