كَرِنْ مَغَنَ 6 - أَتَّوْرَتْ دَ أَنَّبَاوَا

دَرَسِ عَكَنْ رَايُوَا تَيَوْ دَ كُلُّمْ

¹ طَانَ، كَا تَٻَ سَا حَنُّنْ شَيْدَ دُواْمِنْ أَبُواْكِنْكَ يَكَرْٻِ بَاشِ؟ كَا تَٻَ كَرْٻَرْ حَكِّنْ بِيَ وَبَڧُواْ بَاشِنْدَ يَثِ؟

² كَا تَٻَيِ وَكَنْكَ تَرْكُواْ تَوُرِنْ أَلْڧَوَرِنْكَ، حَرْ مَغَنَرْ بَاكِنْكَ تَكَامَكَ؟

³ تُواْ، يَنْذُ طَانَ، غَ أَبِنْدَ ذَاكَيِ دُواْمِنْ كَڢِدَّ كَنْكَ؞ كَارِغَا كَا شِغَ حَنُّنْ وَنِ كٜىٰنَنْ، كَا تَڢِے كَا ڧَسْڧَنْتَرْ دَكَنْكَ أَغَبَنْسَ، كَا مَاڟَ مَسَ دَ ضُواْڧُواْ سُواْسَيْ!‏

⁴ كَدَ كَبَا عِدَنُونْكَ بَرْثِ، كُواْ كَڟَيَ كَبَا كَنْكَ هُوتُ، سَيْ كَڢِدَّ كَنْكَ؞

⁵ كَڢِتَرْدَ كَنْكَ، كَمَرْ يَدَّ ڟُنْڟُ يَكٜىٰ ڟِيرَا دَغَ تَرْكُواْ، كَمَرْ يَدَّ بَرٜىٰوَ تَكٜىٰ كُٻُتَ دَغَ حَنُّنْ مَيْ ڢَرَوْتَ؞

⁶ يَا مَيْ ڧِوِيَ، تَڢِے وُرِنْ تُوضُرُوَ، كَكُواْيِ حِكِمَرْ رَايُوَا؞

⁷ بَاسُ دَ سَرْكِے، كُواْ شُوغَبَا، كُواْ مَيْ مُلْكِ،

⁸ دُكْدَهَكَ، سُكَنْ تَتَّارَ وَكَنْسُ عَبِنْثِ، سُكَنْ شِرْيَ أَ لُواْكَثِنْ غِرْبِے دُواْمِنْ تَنَدِنْ دَامِنَ؞

⁹ حَرْ يَوْشٜىٰ ذَاكَيِ تَݣُونْثِيَ، يَا كَيْ مَيْ ڧِوِيَ؟ يَوْشٜىٰ ذَاكَ تَاشِ دَغَ بَرْثِنْكَ؟

¹⁰ جِمْ كَطَنْ بَرْثِ، جِمْ كَطَنْ ڠَنْ‌ڠَطِ، جِمْ كَطَنْ نَطَ حَنُّ دُواْمِنْ هُوتُ،

¹¹ تَهَكَ تَلَوْثِ ذَيْ يِمَكَ ڨُوثٜىٰ كَمَرْ طَنْ ڢَشِ، رَشِ كُمَ ذَيْ ڢَاطُواْ مَكَ كَمَرْ ٻَرَوُاْ؞

¹² طَنْ إِسْكَ كُواْ مُوغُنْ مُتُمْ يَكَنْ ذَاغَ يَنَ مَغَنَرْ ݣُونَ ݣُونَ؞

¹³ يَنَ يِنْ عَلَمَ دَ عِدَنُونْسَ، يَنَ مَغَنَ دَ مُواْڟِنْ ڧَڢَرْسَ، يَنَ يِنْ أَمْڢَانِ دَ يَڟَرْسَ عَٻُواْيٜىٰ؞

¹⁴ أَ ذُوثِيَارْسَ تَرُوطُ يَنَ ڧُلَّ مُغُنْتَا، عَكُلُّمْ يَنَ تَادَ ڢَطَ؞

¹⁵ عَكَنْ إِرِنْ وَنَّنْ، عَذَابَ ذَاتَذُواْ مَسَ بَا ظَتُواْ، ثِكِنْ ڨِڢْتَوَرْ عِدُواْ، ذَاعَ هَلَّكَ شِ كَكَڢْ؞

¹⁶ أَݣَويْ أَبُبُوَ شِدَ وَنْدَ يَهْوٜىٰهْ يَڧِ، عِ، حَرْ بَݣَويْ دَ سُكٜىٰ ذَمَ مَسَ أَبِنْ ڨَمَ؞

¹⁷ سُونٜىٰ، كَلُّوانْ رٜىٰنِ، دَ هَرْشٜىٰ مَيْ ڢَطِنْ ڧَضْيَا، دَ حَنُّوَ مَاسُ ظُبْدَ جِنِنْ مَرَسَ لَيْڢِے،

¹⁸ دَ ذُوثِيَا مَيْ ڧُلّٜىٰ ڧُلّٜىٰنْ مُغُنْتَا، دَ ڧَڢَا مَيْ سَوْرِنْ عَيْكَتَ مُغُنْتَا،

¹⁹ دَ مَيْ شَيْدَرْ ڧَضْيَا وَنْدَ يَبَظَ ڧَضْيَا، دَ كُمَ مَيْ تَادَ ڢَطَ ڟَكَانِنْ یَنْعُوَ؞

غَرْغَطِ عَكَنْ ظِنَ

²⁰ طَانَ، كَكِيَايٜىٰ عُمَرْنَنْ بَابَنْكَ، كُمَ كَدَ كَڧِ كُواْيَرْوَرْ مَامَرْكَ؞

²¹ كَرِڧٜىٰسُ دَ ڧَرْڢِے أَ ذُوثِيَارْكَ حَرْ أَبَدَا، كَطَوْرٜىٰسُ أَوُيَنْكَ؞

²² سَعَدَّ كَكٜىٰ تَڢِيَ، ذَاسُيِ تَبِے دَكَيْ؞ سَعَدَّ كَكٜىٰ ݣُونْثِيَ، ذَاسُيِ تَكِيَايٜىٰكَ؞ سَعَدَّ كَڢَرْكَ، ذَاسُيِ تَبَاكَ شَوَرَا؞

²³ غَمَا وَطَنَّنْ عُمَرْنَيْ ڢِتِلَثٜىٰ، وَنَّنْ كُواْيَرْوَا حَصْكٜىٰنٜىٰ، ڟَاوَتَرْوَ دَ هُواْرَرْوَ كُوَ حَنْيَرْ رَيْ ثٜىٰ؞

²⁴ ذَاتَ ڟَرٜىٰكَ دَغَ مُوغُوَرْ مَثٜىٰ، دَغَ كُمَ ذَاڧِنْ بَاكِنْ مَاتَرْ وَنِ؞

²⁵ كَدَ كَيِ شَعَوَرْ مَاتَرْ وَنِ أَ ذُوثِيَارْكَ، كُواْ كَبَرْ عِدَنُونْتَ سُطَوْكِ حَنْكَلِنْكَ؞

²⁶ عَكَنْ سَامِ كَارُوَ عَكَنْ كُطِنْ طَنْ عَبِنْثِ، عَمَّا مَاتَرْ وَنِ تَكَنْ نٜىٰمِ رَنْ مُتُمْ؞

²⁷ ذَيْ يِوُ مُتُمْ يَكِڢٜىٰ وُتَا عَڧِرْجِنْسَ، بَاتَرٜىٰدَ رِغَرْسَ تَڧُواْنٜىٰ بَ؟

²⁸ كُواْ ذَيْ يِوُ مُتُمْ يَيِ تَڢِيَ عَكَنْ غَرْوَشِنْ وُتَا، بَاتَرٜىٰدَ ڧَڢَاڢُنْسَ سُنْ ڧُواْنٜىٰ بَ؟

²⁹ حَكَ يَكٜىٰ غَ مَيْ ݣُونَ دَ مَاتَرْ وَنِ، دُكْ وَنْدَ يَيِ حَكَ، بَذَيْ كُٻُتَبَ؞

³⁰ مُتَنٜىٰ بَاسَ رٜىٰنَ مَيْسَاتَا سَعَدَّ يَيِ سَاتَا سَبُواْدَ يُنْوَ؞

³¹ دُكْدَهَكَ، سَعَدَّ عَكَ كَامَ شِ، دُواْلٜىٰنٜىٰ يَمَيَرْ حَرْ سَوْ بَݣَويْ، كُواْ دَ ذَيْسَا يَرَسَ دُكَنْ أَرْزِڧِنْ غِدَنْسَ؞

³² عَمَّا مُتُمِنْدَ يَݣُونَ دَ مَاتَرْ وَنِ، بَاشِ دَ حَنْكَلِ، هَلَّكَ كَنْسَ يَكٜىٰيِ؞

³³ دُوكَ دَ كُنْيَا ذَيْ شَا، كُنْيَا بَذَاتَ تَٻَ بَرِنْسَبَ؞

³⁴ غَمَا كِيشِ يَكَنْ تَادَ ڢُشِنْ مِجِ، بَا يَجَنْيٜىٰوَ سَعَدَّ يَكٜىٰ رَامُوَا؞

³⁵ بَذَيْ تَٻَ كَرْٻَرْ بِيَنْ هَسَرَ بَ، بَذَيْ كَرْٻِ ثِنْ حَنْثِ بَ، كُواْ يَيَ عَكَيِ؞