كَرِنْ مَغَنَ 2 - أَتَّوْرَتْ دَ أَنَّبَاوَا

سَكَمَكُوانْ نٜىٰمَنْ حِكِمَ

¹ طَانَ، كَرْٻِ مَغَنَاتَ، كَكُمَ ٻُواْيٜىٰ عُمَرْنَيْنَ أَ ذُوثِيَارْكَ؞

² كَسَ كُنّٜىٰ غَ حِكِمَ، كَبَادَ ذُوثِيَارْكَ دُواْمِنْ سَامُنْ ڢَهِمْتَ؞

³ عِ، كَنَاثٜىٰ دُواْمِنْ كَكَيْ غَ غَانٜىٰوَ، كَتَادَ مُرْيَ دُواْمِنْ كَنٜىٰمِ بَسِيرَ؞

⁴ نٜىٰمٜىٰتَ كَمَرْ نٜىٰمَنْ أَظُرْڢَا، كَنٜىٰمَ كَمَرْ نٜىٰمَنْ دُوكِيَرْ دَتَكٜىٰ عَٻُواْيٜىٰ؞

⁵ عِدَنْ كَايِ حَكَنَنْ، ذَاكَ غَانٜىٰ أَبِنْدَ عَكٜىٰ نُڢِ دَ ڟُواْرُوانْ يَهْوٜىٰهْ، ذَاكَ كُمَ سَامِ سَنِنْ اللَّهْ؞

⁶ غَمَا يَهْوٜىٰهْ يَنَ بَادَ حِكِمَ، سَنِ دَ غَانٜىٰوَ مَا دَغَ بَاكِنْسَ سُكٜىٰ ڢِتُواْوَ؞

⁷ يَكَنْيِ تَبَا مَاسُ غَسْكِيَ أَ ظُوثِ عَيْنِحِنْ حِكِمَ، شِے غَرْكُوَ نٜىٰ غَ مَاسُ تَڢِيَ ثِكِنْ غَسْكِيَ،

⁸ غَمَا يَنَ كُلَ دَ حَنْيَرْ شَرِيعَرْ غَسْكِيَ، يَنَ كِيَايٜىٰ هَنْيُواْيِنْ مَاسُ ڧَوْنَرْسَ؞

⁹ تَهَكَ ذَاكَ غَانٜىٰ أَدَلْثِے دَ شَرِيعَرْ غَسْكِيَ، دَ يَدَّ ذَاكَ عَيْكَتَ أَبِنْدَ يَكٜىٰ دَيْدَيْ؞ ذَاكَ كُمَ غَانٜىٰ كُواْوَثٜىٰ حَنْيَ مَيْݣَوْ؞

¹⁰ غَمَا حِكِمَ ذَاتَ شِغَ ذُوثِيَارْكَ، سَنِ كُمَ ذَيْ ذَمَ دَ دَاطِے غَ رَنْكَ؞

¹¹ حَنْكَلِ ذَيْ يِتَڟَرٜىٰكَ، ڢَهِمْتَ كُمَ تَيِ تَكِيَايٜىٰكَ؞

¹² حِكِمَ ذَاتَثٜىٰثٜىٰكَ دَغَ حَنْيَرْ مُوغَيٜىٰ، دَغَ مُتَنٜىٰ مَاسُ كَلْمُواْمِنْ رُوطُ،

¹³ دَغَ مَاسُ ڧِنْ حَنْيَرْ غَسْكِيَ، دُواْمِنْ سُيِ تَڢِيَ أَ حَنْيَرْ دُهُ،

¹⁴ مَاسُ مُرْنَ ثِكِنْ عَيْكَتَ مُغُنْتَا، سُنَ كُمَ جِنْ دَاطِنْ رُوطِنْ مُغُنْتَا،

¹⁵ تَڢِيَرْسُ كُوَ تَݣُونَ ݣُونَ ثٜىٰ، هَنْيُواْيِنْسُ نَحَلِنْ رُوطُ نٜىٰ؞

ڟَرٜىٰوَ دَغَ مَثٜىٰ مَيْ ظِنَ

¹⁶ حِكِمَ كُوَ ذَاتَثٜىٰثٜىٰكَ دَغَ حَنُّنْ مَاتَرْ وَنِ، دَغَ وَتَ مَثٜىٰ مَيْ ذَاڧِنْ بَاكِ،

¹⁷ مَرَرْ أَمِنْثِ غَ مِجِنْتَ نَڧُرُثِيَ، مَيْ كَرْيَ يَرْجٜىٰجٜىٰنِيَرْ دَ تَيِ أَغَبَنْ اللَّهْ؞

¹⁸ غَمَا غِدَنْتَ حَنْيَرْ مُتُوَ ثٜىٰ، هَنْيُواْيِنْتَ سُنَ كَيْ غَ وُرِنْ رُوحُواْحِنْ مَتَتُّو؞

¹⁹ دُكْ وَنْدَ يَتَڢِے وُرِنْتَ بَايَ كُواْمُواْوَ، بَايَ كُمَ ڧَارَ بِنْ حَنْيَرْ رَيْ؞

²⁰ سَبُواْدَ حَكَ كَدِنْ‌غَ تَڢِيَ أَ حَنْيَرْ مَاسُ كِرْكِ، كَبِے هَنْيُواْيِنْ مَاسُ أَدَلْثِے؞

²¹ غَمَا مَيْ غَسْكِيَ أَ ظُوثِ ذَيْذَوْنَ عَڧَسَرْ، مَرَرْ لَيْڢِے نٜىٰ ذَيْ كَسَنْثٜىٰ عَثِكِنْتَ،

²² عَمَّا ذَاعَ كَوَرْدَ مُوغَيٜىٰ دَغَ ڧَسَرْ، مَرَسَ أَمِنْثِ كُمَ ذَاعَ تُمْٻُكٜىٰ دَغَ ثِكِنْتَ؞