كَرِنْ مَغَنَ 12 - أَتَّوْرَتْ دَ أَنَّبَاوَا

¹ دُكْ مَيْ سُوانْ هُواْرَرْوَ، مَيْ سُوانْ سَنِ نٜىٰ، عَمَّا مَيْ ڧِنْ ڟَاوَتَرْوَ وَاوَا نٜىٰ؞

² مَيْ كِرْكِ يَنَ سَامُنْ ڢَضٍ جِنِ أَوُرِنْ يَهْوٜىٰهْ، عَمَّا مَيْشِرْيَ مُغُنْتَا، يَهْوٜىٰهْ يَكَنْ حُكُنْتَ شِ؞

³ تُوشٜىٰنْ مُغُنْتَا بَذَيْ كَڢُ عَڧَسَابَ، عَمَّا تُوشٜىٰنْ مَاسُ أَدَلْثِے ذَيْ كَڢُ دَرَمْ؞

⁴ ثِكَكِّيَرْ مَثٜىٰ هُولَرْ دَرَجَ ثٜىٰ غَ مِجِنْتَ، عَمَّا مَثٜىٰ مَيْ جَٰوُاْ كُنْيَا تَذَمَ مَسَ كَمَرْ رُٻٜىٰوَ عَڧَسُسُوَنْسَ؞

⁵ تُنَانِنْ مَاسُ أَدَلْثِے تُنَانِنْ غَسْكِيَ نٜىٰ، عَمَّا شَوَرَرْ مُوغُ شَوَرَرْ ثُوتَا ثٜىٰ؞

⁶ كَلْمُواْمِنْ مُوغُ كَمَرْ تَرْكُواْ نٜىٰ، عَمَّا مَغَنَرْ مَيْ غَسْكِيَ أَ ظُوثِ تَكَنْ كُٻُتَرْ دَشِ دَغَ تَرْكُوانْ؞

⁷ أَنَ تُمْٻُكٜىٰ مُوغَيٜىٰ كَكَڢْ، عَمَّا غِدَنْ مَيْ أَدَلْثِے ذَيْ كَڢُ دَرَمْ؞

⁸ عَكَنْ يَبِے مَيْ حَنْكَلِ، عَمَّا عَكَنْ رٜىٰنَ مَيْ رَايُوَرْ ݣُونَ ݣُونَ؞

⁹ ڠُومَّ مُتُمِنْ دَ بَعَطَوْكٜىٰشِ كُواْمٜىٰبَ عَمَّا يَنَدَ مَيْيِ مَسَ حِدِمَ، دَ مُتُمِنْ دَيَكٜىٰ طَوْكَكَ كَنْسَ عَمَّا يَنَ ڢَامَ دَ يُنْوَ؞

¹⁰ مَيْ أَدَلْثِے يَنَ كُلَ دَ لَاڢِيَرْ دَبُّواْبِنْسَ، عَمَّا ڧٜىٰتَ عِتَثٜىٰ عَيْكِ مَڢِے تَوْسَيِ نَمُوغُ؞

¹¹ مَيْ نُواْمٜىٰ غُواْنَرْسَ ذَيْسَامِ عَبِنْثِ مَيْ يَوَ، عَمَّا مَيْبِنْ أَبِنْ بَنْظَ بَ شِ دَ حَنْكَلِ؞

¹² مُوغُ يَنَ ݣُوطَيِنْ كَايَنْ دَ مُوغُ يَسَاتَا، عَمَّا مَيْ أَدَلْثِے يَنَ بَادَ یَیَ كَمَرْ إِتَاثٜىٰ؞

¹³ ذُنُوبِنْ بَاكِنْ مُوغُ ذَيْ ذَمَ مَسَ تَرْكُواْ، عَمَّا مَيْ أَدَلْثِے ذَيْڢِتَ دَغَ ثِكِنْ وَهَلَ؞

¹⁴ كَلْمُواْمِنْ مُتُمْ سُكَنْ حَيْڢِ أَلْحٜىٰرِ مَيْ يَوَ، حَڧِيڧَ، مُتُمْ ذَيْسَامِ لَادَنْ عَيْكِنْ حَنُّوَنْسَ؞

¹⁵ وَاوَا يَنَ غَنِنْ حَنْيَرْ رَايُوَرْسَ دَيْدَيْنٜىٰ، عَمَّا مَيْ حِكِمَ يَكَنْ كَسَ كُنّٜىٰ غَ شَوَرَا؞

¹⁶ وَاوَا يَكَنْ نُونَ ڢُشِنْسَ نَنْ دَنَنْ، عَمَّا مَيْ حَنْكَلِ بَيْ نُونَ يَكُلَ دَ ذَاغِبَ؞

¹⁷ مَيْ ڢَطِنْ غَسْكِيَ يَنَ شٜىٰلَرْ أَدَلْثِے، عَمَّا مَيْ شَيْدَرْ ڧَضْيَا يَنَ شٜىٰلَرْ ثُوتَا؞

¹⁸ مَغَنَرْ دَ أَنْيِ دَ رَشِنْ تُنَانِ تَنَ سَا رَوْنِ كَمَرْ سُواْكِنْ تَكُواْبِے، عَمَّا هَرْشٜىٰ مَيْ حِكِمَ يَكَنْ كَٰوُاْ وَرْكٜىٰوَ؞

¹⁹ غَسْكِيَ ذَاتَ كَسَنْثٜىٰ حَرْ أَبَدَا، عَمَّا نَنْ دَنَنْ ڧَضْيَا تَنَ شُوطٜىٰوَ؞

²⁰ مَاسُ شِرْيَ ثِنْ أَمَانَ، تُنَانِنْسُ ثِكٜىٰ يَكٜىٰدَ ڧَضْيَا، عَمَّا مَاسُ بَادَ شَوَرَا تَسَلَمَ مَاسُ ڢَضٍ ثِكِ نٜىٰ؞

²¹ بَا وَنِ مُوغُنْ أَبِنْدَ ذَيْسَامِ مَيْ أَدَلْثِے، عَمَّا وَهَلَ ذَاتَ شَا كَنْ مُوغُ سُواْسَيْ؞

²² يَهْوٜىٰهْ يَنَ ڨَمَرْ بَاكِ مَيْ ڧَضْيَا، عَمَّا يَنَ جِنْ دَاطِنْ مَاسُ أَمِنْثِ؞

²³ مَيْ حَنْكَلِ يَكَنْ ٻُواْيٜىٰ سَنِنْسَ، عَمَّا ذُوثِيَارْ وَاوَا تَكَنْ بَظَ وَوَنْثِنْسَ؞

²⁴ مَيْ ڨُوظُوانْ عَيْكِ ذَيْ يِمُلْكِ، عَمَّا مَيْ ڧِوِيَ ذَيْ ذَمَ بَاوَ؞

²⁵ دَامُوَ أَ ذُوثِيَا تَكَنْ حَنَ مُتُمْ سَكٜىٰوَ، عَمَّا كَلْمَرْ ڧَرْڢَڢَاوَا تَكَنْ ڢَرَنْتَ رَيْ؞

²⁶ مَيْ أَدَلْثِے يَكَنْ بَادَ شَوَرَا مَيْݣَوْ غَ أَبُواْكَنْسَ، عَمَّا أَيُّكَنْ مُوغُ سُكَنْ سَا يَٻَاتَ حَنْيَ؞

²⁷ مَيْ ڧِوِيَ بَايَ عِيَ غَسَ نَامَنْ ڢَرَوْتَرْسَ، عَمَّا مَيْ ڨُوذُواْ يَكَنْيِ أَمْڢَانِ دَ دُكْ أَبِنْدَ يَسَامُ؞

²⁸ أَدَلْثِے حَنْيَرْ رَيْ نٜىٰ، تَڢِيَ عَثِكِنْسَ بَاتَكَيْ غَ مُتُوَ؞