كَرِنْ مَغَنَ 1 - أَتَّوْرَتْ دَ أَنَّبَاوَا

أَمْڢَانِنْ كَرِنْ مَغَنَ

¹ غَا كَرِنْ مَغَنَ نَ سُلَيْمَٰنُ طَنْ دَاوُدَ، سَرْكِنْ إِسْرَٰٓءِيلَ؞

² كَرِنْ مَغَنَ سُنَدَ أَمْڢَانِ دُواْمِنْ سَنِنْ حِكِمَ دَ هُواْرَرْوَ، عَكُمَ غَانٜىٰ ظُرْڢِنْ مَعَنَرْ مَغَنَ،

³ دُواْمِنْ أَ سَامِ هُواْرَرْوَ تَحِكِمَ، دَ أَدَلْثِے دَ شَرِيعَرْ غَسْكِيَ، دَ أَبِنْدَ يَكٜىٰ دَيْدَيْ،

⁴ دُواْمِنْ مَرَرْ تُنَانِ يَسَامِ وَيُواْ، مَتَاشِ كُمَ يَسَامِ سَنِ دَ حَنْكَلِ؞

⁵ بَرِ مَيْ حِكِمَ يَجِ يَڧَارَ كَرْٻَرْ كُواْيَرْوَا، مَيْ غَانٜىٰوَ كُمَ يَسَامِ حِكِمَرْ بَادَ شَوَرَا،

⁶ دُواْمِنْ أَغَانٜىٰ مَعَنَرْ كَرِنْ مَغَنَ دَ مِصَلَيْ، كَلْمُواْمِنْ مَاسُ حِكِمَ كُمَ دَ ظُرْڢِنْسُ؞

⁷ ڟُواْرُوانْ يَهْوٜىٰهْ شِينٜىٰ مَڢَارِنْ سَنِ، عَمَّا وَاوَا يَرٜىٰنَ حِكِمَ دَ هُواْرَرْوَ؞

غَرْغَطِنْ ضُنْ‌غُمَرْ حِكِمَ

⁸ طَانَ، كَكَسَ كُنّٜىٰ غَ هُواْرَرْوَرْ بَابَنْكَ، كَدَ كُمَ كَڧِ كُواْيَرْوَرْ مَامَرْكَ؞

⁹ غَمَا كُواْيَرْوَرْسُ ذَاتَ غِنَكَ، تَنَ ڧَارَ مَكَ ݣَوْ كَمَرْ هُولَرْ دَرَجَ، كُواْ ݣَكْݣَوَنْ كَايَنْ أَدُواْ أَوُيَنْكَ؞

¹⁰ طَانَ، عِدَنْ مَاسُ ذُنُوبِ سُنْ جَرَّبْثٜىٰكَ، كَدَ كَيَرْدَ؞

¹¹ مَيْ يِوُوَ بَادَلِيلِ ذَاسُثٜىٰ، ‏«‏ذُواْ، بَرِ مُهَطَكَيْ، مُكَشٜىٰ وَنِ، بَرِ مُيِ ݣُونْتُوانْ ٻَوْنَ، مُڢَاطَوَ مَرَسَ لَيْڢِے؞

¹² بَرِ مُهَطِيٜىٰسُ كَمَرْ يَدَّ وُرِنْ ذَمَنْ مَتَتُّو يَكٜىٰيِ، مُهَطِيٜىٰسُ طُنْ‌غُمْ كَمَرْ يَدَّ رَامِنْ مَتَتُّو يَكٜىٰيِ!‏

¹³ ذَامُ سَامِ أَبُبُوَ إِرِ إِرِ مَاسُ ڟَادَ، ذَامُ ثِكَ غِدَاجٜىٰنْمُ دَ رَبُوانْ عَيْكِنْمُ؞

¹⁴ كَذُواْ كَهَطَكَيْ دَمُو، ذَامُ كُوَ رَبَ أَبِنْدَ مُكَ سَتُواْ؞»‏

¹⁵ طَانَ، كَدَ كَبِے حَنْيَرْ مُتَنٜىٰنَّنْ، كَيِ نٜىٰسَ دَ حَنْيَرْسُ؞

¹⁶ غَمَا سُنَدَ سَوْرِنْ عَيْكَتَ مُغُنْتَا، سُنَ غَغَّاوَرْ ظُبْدَ جِنِ؞

¹⁷ عَبَنْظَ يَكٜىٰ عَكَڢَ تَرْكُواْ أَعِدُوانْ ڟُنْڟُنْ دَ عَكٜىٰسُواْ عَكَامَ،

¹⁸ عَمَّا مُتَنٜىٰنَّنْ سُكٜىٰيِ وَكَنْسُ تَرْكُواْ، سُكٜىٰيِنْ ݣُونْتُوانْ ٻَوْنَ سُكَامَ رَايُكَنْسُ؞

¹⁹ حَكَ ڧَرْشٜىٰنْ هَنْيُواْيِنْ مَاسُ ݣُوطَيِنْ ثِنْ رِيبَ يَكٜىٰ، ݣُوطَيِ يَنَ ذَمَ دَلِيلِنْ مُتُوَرْسُ؞

حِكِمَ تَنَ كِرَا

²⁰ كُجِ!‏ حِكِمَ تَنَ كِرَا عَكَنْ تِيتُنَ، تَنَ تَادَ مُرْيَ أَ ڢِيلِ نَثِكِنْ غَرِ،

²¹ تَنَ كِرَا عِنْدَ مُتَنٜىٰ سُنْثِكَ، عَڧُواْڢَرْ شِغَ بِرْنِ تَنَ ثٜىٰوَ،

²² ‏«‏حَرْ يَوْشٜىٰ، كُو مَرَسَ تُنَانِ، ذَاكُ سُواْ كُكَسَنْثٜىٰ مَرَسَ تُنَانِ؟ حَرْ يَوْشٜىٰ، كُو مَاسُ رٜىٰنِ، ذَاكُجِ دَاطِنْ بَعَرْ دَ كُكٜىٰيِ، كُو وَوَيٜىٰ كُمَ كُنْڧِ سَنِ؟

²³ دَاكُنْ كَسَ كُنّٜىٰ غَ ڟَاوَتَرْوَتَ، دَا نَظُبَ مُكُ رُوحٌ حِكِمَتَ، إِنْسَاكُ كُسَنْ مَغَنَاتَ؞

²⁴ دَيَكٜىٰ نَايِ تَكِرَا كُكَڧِ، نَا مِيڧَ هَنُّونَ غَرٜىٰكُ، بَاوَنْدَ يَدَامُ،

²⁵ دَيَكٜىٰ كُنْ يَاشٜىٰ دُكَنْ شَوَرَاتَ، بَكُو مَا يَرْدَ دَ ڟَاوَتَرْوَتَ بَ،

²⁶ نِے مَا ذَنْيِ دَارِيَارْكُ أَ رَانَرْ عَذَابَرْكُ؞ نِے مَا ذَنْيِ مُكُ بَعَ، لُواْكَثِنْ دَ أَبِنْ ڟُواْرُواْ يَڢَاطُواْ مُكُ،

²⁷ دَ أَبِنْ ڟُواْرُواْ يَذُواْ مُكُ كَمَرْ بُغُنْ هَدَرِ مَيْ إِسْكَ، عَذَابَ كُمَ تَذُواْ مُكُ كَمَرْ غُوغُوَ، سَعَدَّ ٻَثِنْ رَيْ دَ عَذَابَ سُكَ ڢَاطُواْ عَكَنْكُ؞

²⁸ سَعَنً ذَاكُ كِرَا غَرٜىٰنِ، عَمَّا بَذَنْ أَمْسَبَ، ذَاكُ نٜىٰمٜىٰنِ دَ دُكَنْ ڧَرْڢِنْكُ، عَمَّا بَذَاكُ سَامٜىٰنِبَ؞

²⁹ دَيَكٜىٰ كُنْڧِ سَنِ، بَكُ كُوَ ذَاٻِ ڟُواْرُوانْ يَهْوٜىٰهْ بَ؞

³⁰ بَكُ يَرْدَ دَ شَوَرَاتَ بَ، كُكَ كُمَ رٜىٰنَ دُكَنْ ڟَاوَتَرْوَتَ؞

³¹ سَبُواْدَ حَكَ، ذَاكُ غِرْبِے سَكَمَكُوانْكُ ذَاكُ ڧُواْشِ دَ بَڧِنْ ثِكِ نَنَاكُ دَبَرُنْ؞

³² غَمَا ڧِنْ حِكِمَ يَكَنْ كَشٜىٰ مَرَسَ تُنَانِ، جِنْ دَاطِنْ وَوَيٜىٰ يَكَنْ كَٰوُاْ مُسُ هَلَّكَ؞

³³ عَمَّا وَطَنْدَ سُكَ سَوْرَرَتَ ذَاسُ ذَوْنَ لَاڢِيَ؞ ذَاسُ كُوَ ذَوْنَ رَيْ عَݣُونْثٜىٰ، بَابُ ڟُواْرُوانْ عَذَابَ؞»‏