ڧِدَايَ 23 - أَتَّوْرَتْ دَ أَنَّبَاوَا

¹ سَيْ بَلَعَمْ يَثٜىٰ وَ سَرْكِے بَلَكْ ‏«‏كَغِنَ مِنِ بَغَدَيْ غُدَا بَݣَويْ أَنَنْ، كَكُمَ شِرْيَ مِنِ بِجِمَيْ بَݣَويْ دَ رَغُنَ بَݣَويْ؞»‏

² سَرْكِے بَلَكْ يَيِ يَدَّ بَلَعَمْ يَڢَطَا مَسَ؞ سَرْكِے بَلَكْ دَ بَلَعَمْ سُكَ مِيڧَ هَدَايَ تَبِجِمِ دَ ضَغُواْ عَكَنْ كُواْوَنٜىٰ بَغَدٜىٰ؞

³ سَيْ بَلَعَمْ يَثٜىٰ وَ سَرْكِے بَلَكْ ‏«‏ڟَيَ كُسَدَ هَدَايَرْكَ تَڧُواْنَاوَا، نِے كُوَ ذَنْ تَڢِے ثَنْ؞ وَتَڧِيلَ يَهْوٜىٰهْ ذَيْذُواْ يَسَدُ دَنِے؞ إِنْ كُوَ يَذُواْ، دُكْ أَبِنْدَ يَبَيَّنَ مِنِ، ذَنْ ڢَطَا مَكَ؞»‏ سَيْ يَتَڢِے وَنِ ڢِيلِ عَكَنْ تُدُ؞

أَنَّبْثِنْ أَلْبَرْكَ نَ بَلَعَمْ نَڢَرْكُواْ

⁴ دَ اللَّهْ يَذُواْ يَسَدُ دَ بَلَعَمْ، سَيْ بَلَعَمْ يَثٜىٰ مَسَ ‏«‏نَارِغَا نَا شِرْيَ بَغَدَيْ بَݣَويْ، نَاكُوَ مِيڧَ بِجِمِ طَيَ دَ ضَغُواْ طَيَ عَكَنْ كُواْوَنٜىٰ بَغَدٜىٰ؞»‏

⁵ سَيْ يَهْوٜىٰهْ يَسَا مَغَنَرْ أَنَّبْثِ عَبَاكِنْ بَلَعَمْ، بَايَنْ حَكَ يَثٜىٰ ‏«‏كُواْمَ وُرِنْ سَرْكِے بَلَكْ، كَكُمَ ڢَطَا مَسَ أَبِنْدَ نَڢَطَا مَكَ؞»‏

⁶ سَيْ يَكُواْمَ وُرِنْ سَرْكِے بَلَكْ، يَسَامٜىٰشِ أَڟَيٜىٰ كُسَدَ هَدَايَرْسَ تَڧُواْنَاوَا تَرٜىٰدَ دُكَنْ دَتَّاوَنْ مُواْوَبْ؞

⁷ بَلَعَمْ كُوَ يَڢَطِ مَغَنَرْ أَنَّبْثِنْسَ، يَثٜىٰ، ‏«‏دَغَ أَرَمْ سَرْكِے بَلَكْ يَكَٰوُاْنِ، دَغَ تُدَّنْ غَبَسْ سَرْكِنْ مُواْوَبْ يَكِرَنِ؞ ‏‹‏ذُواْ، كَلَعَنْتَ مِنِ يَعْڧُوبَ،›‏ يَثٜىٰ مِنِ، ‏‹‏ذُواْ، كَيِ وَ إِسْرَٰٓءِيلَ ذَاغِ!‏›‏

⁸ يَيَ ذَنْعِيَ لَعَنْتَ وَنْدَ اللَّهْ بَيْ لَعَنْتَرْ بَ؟ يَيَ ذَنْعِيَ ذَاغِنْ وَنْدَ يَهْوٜىٰهْ بَيْ ذَاغٜىٰ شِيبَ؟

⁹ عِ، دَغَ كَنْ دُووَڟُنْ تُدُ نَغَنْتَ، دَغَ كَنْ تُدَّيْ نَهَنْ‌غٜىٰتَ؞ جَمَعَ ثٜىٰ وَدَّ تَكٜىٰ ظَوْنٜىٰ عِتَ كَطَيْ، بَتَلِسَّڢْتَ كَنْتَ ثِكِنْ سَوْرَنْ أَلْعُمَّيْبَ؞

¹⁰ وَ ذَيْ عِيَ لِسَّڢْتَا ذُرِيَرْ يَعْڧُوبَ؟ يَوَنْسُ كَمَرْ ڧُورَرْ ڧَسَا نٜىٰ!‏ وَ ذَيْ عِيَ ڧِرْغَ مُتَنٜىٰنْ إِسْرَٰٓءِيلَ؟ كُواْ كَشِ طَيَ ثِكِنْ حُطُ مَا، وَ ذَيْ عِيَ؟ بَرِ مُتُوَتَ تَذَمَ إِرِ تَمَيْ أَدَلْثِے، ڧَرْشٜىٰنَ كُمَ، إِرِنَّ يَعْڧُوبَ مُتُمِنْ اللَّهْ؞»‏

¹¹ سَيْ سَرْكِے بَلَكْ يَثٜىٰ وَ بَلَعَمْ ‏«‏مٜىٰ كٜىٰنَنْ كَيِ مِنِ؟ نَكَٰوُاْكَ دُواْمِنْ كَلَعَنْتَ أَبُواْكَنْ غَابَنَ، غَاشِ، سَيْ أَلْبَرْكَ كَكٜىٰسَا مُسُ!‏»‏

¹² بَلَعَمْ كُوَ يَثٜىٰ ‏«‏أَيْ، بَايَدَّ ذَنْ تَٻَ ڢَطَرْ وَنِ أَبُ دَبَمْ دَ أَبِنْدَ يَهْوٜىٰهْ يَڢَطَا مِنِ؞»‏

أَنَّبْثِنْ أَلْبَرْكَ نَ بَلَعَمْ نَبِيُ

¹³ سَيْ سَرْكِے بَلَكْ يَثٜىٰ مَسَ ‏«‏ذُواْ، مُتَڢِے وَنِ وُرِے دَبَمْ عِنْدَ ذَاكَ غَنْسُ؞ وَطَنْدَ سُكَڢِے كُسَ كَطَيْ نٜىٰ ذَاكَ غَنِ، عَمَّا بَذَاكَ عِيَ غَنِنْسُ دُكَبَ؞ كَلَعَنْتَ مِنِسُ دَغَ ثَنْ؞»‏

¹⁴ يَكُوَ كَيْشِ ڢِيلِنْ ذُواْڢِمْ عَكَنْ بَبَّنْ تُدُنْ ڢِسْغَ؞ أَوُرِنْ يَغِنَ بَغَدَيْ بَݣَويْ، يَمِيڧَ بِجِمِ طَيَ دَ ضَغُواْ طَيَ عَكَنْ كُواْوَنٜىٰ بَغَدٜىٰ؞

¹⁵ سَيْ بَلَعَمْ يَثٜىٰ وَ سَرْكِے بَلَكْ ‏«‏ڟَيَ نَنْ كُسَدَ هَدَايَرْكَ تَڧُواْنَاوَا، نِے كُوَ إِنْتَڢِے إِنْسَدُ دَ يَهْوٜىٰهْ عَثَنْ؞»‏

¹⁶ يَهْوٜىٰهْ كُوَ يَسَدُ دَ بَلَعَمْ، يَسَا مَغَنَرْ أَنَّبْثِ عَبْكِنْسَ، بَايَنْ حَكَ يَثٜىٰ ‏«‏كُواْمَ وُرِنْ سَرْكِے بَلَكْ، كَكُمَ ڢَطَا مَسَ أَبِنْدَ نَڢَطَا مَكَ؞»‏

¹⁷ سَيْ يَكُواْمَ وُرِنْ سَرْكِے بَلَكْ، يَسَامٜىٰشِ أَڟَيٜىٰ كُسَدَ هَدَايَرْسَ تَڧُواْنَاوَا تَرٜىٰدَ دُكَنْ دَتَّاوَنْ مُواْوَبْ؞ سَرْكِے بَلَكْ كُوَ يَثٜىٰ مَسَ ‏«‏مٜىٰ يَهْوٜىٰهْ يَڢَطَا؟»‏

¹⁸ بَلَعَمْ كُوَ يَڢَطِ مَغَنَرْ أَنَّبْثِنْسَ، يَثٜىٰ، ‏«‏تَاشِ ڟَيٜىٰ، يَا سَرْكِے بَلَكْ، كَجِنِ، كَكَسَ كُنّٜىٰ غَرٜىٰنِ، يَا طَنْ ظِڢُّوارْ؞

¹⁹ اللَّهْ بَمُتُمْ بَنٜىٰ، دَ ذَيْ يِڧَضْيَا!‏ بَكُوَ طَنْ أَدَمْ بَنٜىٰ، دَ ذَيْ ثَنْجَ نِيَّرْسَ؞ يَتَٻَ يِنْ أَلْڧَوَرِ، يَكَاسَ ثِكَاوَنٜىٰ؟ يَتَٻَ ڢَطِنْ وَنِ أَبُ، يَكَاسَيِ نٜىٰ؟

²⁰ غَاشِ، أَنُمَرْثٜىٰنِ إِنْسَا أَلْبَرْكَ؞ يَسَا أَلْبَرْكَ، بَذَنْ عِيَ جَنْيٜىٰتَبَ؞

²¹ بَعَغَا يَعْڧُوبَ دَ دَامُوَبَ، بَعَكُمَ غَا إِسْرَٰٓءِيلَ دَ وَهَلَبَ؞ يَهْوٜىٰهْ اللَّهْ نْسُ يَنَ تَرٜىٰدَسُو، سُنَ شٜىٰلَ شِے سَرْكِنْسُنٜىٰ؞

²² اللَّهْ وَنْدَ يَڢِتَرْ دَسُو دَغَ مَصَرْ، شِ كَمَرْ ڧَهُوانْ ٻَوْنَ نٜىٰ دُواْمِنْسُ؞

²³ بَا وَنِ دَبُوانْ دَ ذَيْ ثُوثِ يَعْڧُوبَ، بَا كُوَ دُوبَانْدَ ذَيْ ثُوثِ إِسْرَٰٓءِيلَ؞ غَمٜىٰ دَ يَعْڧُوبَ دَ إِسْرَٰٓءِيلَ ذَاعَ ثٜىٰ، ‏‹‏دُوبِے إِرِنْ أَبِنْدَ اللَّهْ يَيِ!‏›‏

²⁴ غَاشِ، جَمَعَرْ إِسْرَٰٓءِيلَ كَمَرْ مَاتَرْ ذَاكِ، تَاسُواْوَرْسُ دَ تَاكَاوَرْسُ كَمَرْ تَذَاكِ!‏ بَذَيْ ݣُونْتَبَ، سَيْ يَثِنْيٜىٰ أَبِنْدَ يَكَامَ، سَيْ يَلَشٜىٰ جِنِنْ نَامَنْ دَاجِنْدَ يَكَشٜىٰ؞»‏

²⁵ سَيْ سَرْكِے بَلَكْ يَثٜىٰ وَ بَلَعَمْ ‏«‏عِدَنْ بَذَاكَ لَعَنْتَسُبَ، تُواْ كَدَ مَا كَسَا مُسُ أَلْبَرْكَ كُواْ كَطَنْ؞»‏

²⁶ عَمَّا بَلَعَمْ يَأَمْسَ وَسَرْكِے بَلَكْ يَثٜىٰ ‏«‏بَنْ ڢَطَا مَكَبَ؟ أَيْ، دُكْ أَبِنْدَ يَهْوٜىٰهْ يَڢَطَا مِنِ، شِے ذَنْ ڢَطَا؞»‏

أَنَّبْثِنْ أَلْبَرْكَ نَ بَلَعَمْ نَعُكُ

²⁷ سَيْ سَرْكِے بَلَكْ يَثٜىٰ وَ بَلَعَمْ ‏«‏إِنْكَا يَرْدَ كَذُواْ إِنْكَيْكَ وَنِ وُرِے دَبَمْ؞ وَتَڧِيلَ أَوُرِنْ نٜىٰ ذَيْ غَمْشِ اللَّهْ يَيَرْدَ كَلَعَنْتَ مِنِسُ؞»‏

²⁸ سَرْكِے بَلَكْ كُوَ يَكَيْ بَلَعَمْ عَكَنْ بَبَّنْ تُدُنْ ڢٜىٰيُوارْ، وَنْدَ يَكٜىٰ ڢُسْكَنْتَرْ هَمَادَ؞

²⁹ سَيْ بَلَعَمْ يَثٜىٰ وَ سَرْكِے بَلَكْ ‏«‏كَغِنَ مِنِ بَغَدَيْ بَݣَويْ أَنَنْ، كَشِرْيَ مِنِ بِجِمَيْ بَݣَويْ دَ رَغُنَ بَݣَويْ؞»‏

³⁰ سَرْكِے بَلَكْ كُوَ يَيِ يَدَّ بَلَعَمْ يَڢَطَا مَسَ؞ سَعَنً يَمِيڧَ هَدَايَ بِجِمِ طَيَ دَ ضَغُواْ طَيَ عَكَنْ كُواْوَنٜىٰ بَغَدٜىٰ؞