ڧِدَايَ 21 - أَتَّوْرَتْ دَ أَنَّبَاوَاأَنْ ثِ كَنْعَنِيَاوَا دَ يَاڧِ أَ هُوارْمَ 1 سَعَدَّ سَرْكِنْ أَرَدْ، وَتُواْ سَرْكِنْ يَنْكِنْ كَنْعَنَ تَكُدُ، وَنْدَ يَكٜىٰدَ ذَمَ أَ نٜىٰغٜىٰبْ، يَجِ لَابَرِ ثٜىٰوَ إِسْرَٰٓءِيلَاوَا سُنَ ذُوَا عَتَهَنْيَرْ أَتَرِمْ، سَيْ يَڢِتَ يَڢَاطُواْ مُسُ دَ يَاڧِ يَكَكَّامَ وَطَنْسُنْسُ؞ 2 سَيْ إِسْرَٰٓءِيلَاوَا سُكَيِ ضَنْڟُوَا غَ يَهْوٜىٰهْ سُكَثٜىٰ «عِدَنْ حَڧِيڧَ ذَاكَ بَادَ مُتَنٜىٰنَّنْ أَ حَنُّنْمُ، لَلَّيْ ذَامُ كٜىٰٻٜىٰ مَكَسُ دَ دُكَنْ غَرُرُوَنْسُ دُواْمِنْ هَلَّكَرْوَ، ذَامُ هَلَّكَرْ دَسُو كَكَڢْ؞» 3 يَهْوٜىٰهْ كُوَ يَجِ ضَنْڟُوَارْ دَ إِسْرَٰٓءِيلَاوَا سُكَيِ يَكُمَ بَادَ كَنْعَنِيَاوَنَّنْ أَ حَنُّنْسُ؞ إِسْرَٰٓءِيلَاوَا سُكَ هَلَّكَرْ دَ مُتَنٜىٰنَّنْ دَ غَرُرُوَنْسُ غَبَاطَيَ؞ تُنْدَغَ لُواْكَثِنْ، أَنْكِرَا سُونَنْ وُرِنْ هُوارْمَ، وَتُواْ هَلَّكَرْوَ؞ مَثِيجِنْ دَ عَكَيِ دَ ڧَرْڢٜىٰنْ تَغُلَّ 4 إِسْرَٰٓءِيلَاوَا سُكَتَاشِ سُكَ كَامَ حَنْيَ دَغَ بَبَّنْ تُدُنْ هُوارْ سُكَبِے تَبَاكِنْ تٜىٰكُنْ ثِيَوَرْ إِوَ دُواْمِنْ سُكَوْثٜىٰ وَ ڧَسَرْ عٜىٰدُوامْ؞ عَمَّا دَسُكٜىٰ ثِكِنْ تَڢِيَ، سَيْ حَڧُرِ يَكَاسَ مُسُ؞ 5 مُتَنٜىٰنْ سُكَ ڢَارَ غُنَغُنِ عَكَنْ اللَّهْ دَ مُوسَٰى سُنَ ثٜىٰوَ «دُوانْمٜىٰ كَڢِتَرْ دَمُو دَغَ ڧَسَرْ مَصَرْ دُواْمِنْ مُمُتُ أَوَنَّنْ دَاجِ؟ غَاشِ، بَا عَبِنْثِ بَا ضُوَ! وَنَّنْ مَنَّ مَرَرْ أَمْڢَانِ كُمَ، مُنْ غَجِ دَشِ!» 6 سَيْ يَهْوٜىٰهْ يَعَيْكَ دَ مَثِيظَيْ مَاسُ ذَاڢِنْ دَڢِ عَثِكِنْ مُتَنٜىٰنْ، سُكَ سَسَّارٜىٰ مُتَنٜىٰ؞ إِسْرَٰٓءِيلَاوَا دَيَوَ كُوَ سُكَ مُتُ؞ 7 سَيْ جَمَعَرْ سُكَذُواْ وُرِنْ مُوسَٰى سُكَثٜىٰ «مُنْيِ ذُنُوبِ دَ مُكَيِ غُنَغُنِ عَكَنْ يَهْوٜىٰهْ دَ كُمَ عَكَنْكَ؞ ضُواْڧِ يَهْوٜىٰهْ يَطَوْكِ وَطَنَّنْ مَثِيظَيْ دَغَ غَرٜىٰمُ؞» مُوسَٰى كُوَ يَضُواْڧَا أَمَدَدِنْ جَمَعَرْ؞ 8 سَيْ يَهْوٜىٰهْ يَعُمَرْثِ مُوسَٰى يَيِ مَثِيجِ مَيْ دَڢِ نَتَغُلَّ يَكَڢَ شِ عَكَنْ وَنِ دُواْغُوانْ سَنْدَا وَنْدَ عَكَ كَڢَ أَڟَيٜىٰ، دُواْمِنْ دُكْ وَنْدَ مَثِيجِنْ يَسَارٜىٰشِ، إِنْ مُتُمِنْ يَطَغَ عِدُوانْسَ يَدُوبِے مَثِيجِنْ، سَعَنً ذَيْ وَرْكٜىٰ؞ 9 سَيْ مُوسَٰى يَيِ مَثِيجِ نَتَغُلَّ يَكُمَ كَڢَشِ عَكَنْ وَنِ دُواْغُوانْ سَنْدَا؞ عِدَنْ كُوَ مَثِيجِ يَسَارٜىٰ مُتُمْ، عِدَنْ مُتُمِنْ يَطَغَ عِدُوانْسَ سَمَ يَدُوبِے مَثِيجِ نَتَغُلَّ، مُتُمِنْ ذَيْ وَرْكٜىٰ؞ تَڢِيَرْ إِسْرَٰٓءِيلَاوَا ذُوَا يَنْكُنَنْ ڧٜىٰتَرٜىٰنْ كُواْغِنْ يُواْدَنْ 10 سَيْ جَمَعَرْ إِسْرَٰٓءِيلَ سُكَتَاشِ سُكَ كَامَ حَنْيَ، سُكَيِ ذَنْغُواْ عَ عُواْبُواتْ؞ 11 سَعَنً سَيْ سُكَتَاشِ دَغَ عُواْبُواتْ، سُكَ كَامَ حَنْيَ، سُكَيِ ذَنْغُواْ عَكُڢَيْ نَ أَبَرِمْ، أَدَاجِنْ دَيَكٜىٰ عَ إِيَاكَرْ ڧَسَرْ مُواْوَبْ تَغَبَسْ وَجٜىٰنْ ڢِتُواْوَرْ رَانَ؞ 12 دَغَ ثَنْ سُكَتَاشِ سُكَ كَامَ حَنْيَ سُكَيِ ذَنْغُواْ أَ ݣُورِنْ ظٜىٰرٜىٰدْ؞ 13 دَغَ ثَنْ سُكَتَاشِ سُكَ كَامَ حَنْيَ سُكَ ڧٜىٰتَرٜىٰ كُواْغِنْ أَرْنُوانْ؞ سُكَيِ ذَنْغُواْ عَثِكِنْ دَاجِنْ دَيَكٜىٰ كُسَدَ ڧَسَرْ أَمُواْرِيَاوَا؞ غَمَا كُواْغِنْ أَرْنُوانْ شِينٜىٰ إِيَاكَرْ مُواْوَبْ، وَتُواْ ڟَكَانِنْ مُواْوَبْ دَ ڧَسَرْ أَمُواْرِيَاوَا؞ 14 سَبُواْدَ حَكَنٜىٰ لِتَّڢِنْ لَابَرِنْ يَاڧٜىٰ يَاڧٜىٰنْ يَهْوٜىٰهْ يَيِ مَغَنَ ثٜىٰوَ «غَرِنْ وَهٜىٰبْ عَيَنْكِنْ سُڢَ، دَ ݣُورُضُوً كُواْغِنْ أَرْنُوانْ، 15 دَ غَنْغَرٜىٰنْ ݣُورُرُوَ وَنْدَ يَمِيڧٜىٰ ذُوَا غَرِنْ أَرْ، وَنْدَ يَبِے تَ إِيَاكَرْ غَرِنْ مُواْوَبْ؞» 16 دَغَ وُرِنْ سَيْ سُكَ ثِيغَبَدَ تَڢِيَ ذُوَا بٜىٰيٜىٰرْ، وَتُواْ رِجِيَرْ دَ يَهْوٜىٰهْ يَثٜىٰ وَ مُوسَٰى «كَتَتَّارَ مُتَنٜىٰ وُرِے طَيَ، ذَنْ كُوَبَاسُ ضُوَ؞» 17 سَيْ جَمَعَرْ إِسْرَٰٓءِيلَ سُكَ رٜىٰرَ وَنَّنْ وَاڧَا، «يَا رِجِيَ! كِٻُلْٻُلُّواْ دَ ضُوَ! أَ رٜىٰرَ مَتَ وَاڧَا! 18 عِ، أَ رٜىٰرَ غَمٜىٰدَ رِجِيَرْ نَنْ، رِجِيَرْ دَ یَنْ سَرَاكُنَ سُكَ حَڧَ، رِجِيَرْ دَ مَنْيَنْ مُتَنٜىٰ سُكَ تُواْنَ، دَ سَنْدُنَنْ مُلْكِنْسُ دَ سَنْدُنَنْ تَڢِيَرْسُ؞» دَغَ دَاجِنَّنْ سَيْ سُكَتَاشِ سُكَ كَامَ حَنْيَ ذُوَا مَتَّنَ، 19 دَغَ مَتَّنَ سُكَتَاشِ سُكَ كَامَ حَنْيَ ذُوَا نَحَلِيٜىٰلْ دَغَ نَحَلِيٜىٰلْ سُكَتَاشِ سُكَ كَامَ حَنْيَ ذُوَا بَمُواتْ، 20 دَغَ بَمُواتْ سُكَتَاشِ سُكَ كَامَ حَنْيَ ذُوَا ݣُورِ عَيَنْكِنْ مُواْوَبْ عِنْدَ ذَاعَ عِيَ غَنِنْ كَنْ بَبَّنْ تُدُنْ ڢِسْغَ وَنْدَ يَكٜىٰ ڢُسْكَنْتَرْ هَمَادَ؞ نَصَرَا عَكَنْ سَرْكِے سِهُوانْ دَ سَرْكِے عُواغْ ﴿ مَيْ شَـ 2.26—3.11 ﴾ 21 سَيْ جَمَعَرْ إِسْرَٰٓءِيلَ سُكَ عَيْكَ دَ یَنْ عَيْكَ ذُوَا وُرِنْ سَرْكِے سِهُوانْ نَ أَمُواْرِيَاوَا ثٜىٰوَ 22 «رَنْكَيَدَطٜىٰ! كَيَرْدَ مَنَ مُبِے تَڧَسَرْكَ؞ بَذَامُبِے تَثِكِنْ غُواْنَكِنْكَبَ، كُواْ غُواْنَكِنْ إِنَبِنْكَبَ؞ بَذَامُ شَا ضُوَ دَغَ وَتَ رِجِيَرْكَبَ؞ ذَامُبِے تَهَنْيَرْ سَرْكِے كَوَيْ، حَرْ مُڢِتَ دَغَ يَنْكِنْكَ؞» 23 عَمَّا سِهُوانْ بَيْ يَرْدَ وَ إِسْرَٰٓءِيلَاوَا سُبِے تَڧَسَرْسَبَ؞ أَ مَيْمَكُوانْ حَكَ، سَيْ يَتَتَّارَ دُكَنْ سُواْجُواْجِنْسَ يَتَڢِے دَاجِ دُواْمِنْ يَيِ يَاڧِ دَ إِسْرَٰٓءِيلَاوَا؞ دَ يَسَامٜىٰسُ أَ يَهَظَ، سَيْ يَيِ يَاڧِ دَسُو؞ 24 عَمَّا إِسْرَٰٓءِيلَاوَا سُكَ يَاڧٜىٰشِ سُكَ كَكَّشٜىٰ دَيَوَ دَغَ ثِكِنْسُ دَ تَكُواْبِے، سُكَ كُمَ مَلَّكِ ڧَسَرْسُ، تُنْدَغَ كُواْغِنْ أَرْنُوانْ ذُوَا أَرٜىٰوَ حَرْ كُواْغِنْ يَبُّواكْ، عَمَّا سُنْ ڟَيَ عَ إِيَاكَرْ يَنْكِنْ أَمُّواْنَاوَا، غَمَا أَنْڟَرٜىٰ إِيَاكَرْ يَنْكِنْ أَمُّواْنَاوَا دَ ڧَرْڢِے سُواْسَيْ؞ 25 إِسْرَٰٓءِيلَاوَا كُوَ سُكَثِ دُكَنْ غَرُضُوً أَمُواْرِيَاوَا، سُكَ كُمَ ذَوْنَ عَثِكِ، تَرٜىٰدَ بِرْنِنْ هٜىٰشْبُوانْ دَ دُكَنْ ڧَوْيُكَنْ دَسُكٜىٰ كٜىٰوَيٜىٰ دَ عِتَ؞ 26 غَمَا هٜىٰشْبُوانْ بَبَّنْ بِرْنِنْ سَرْكِے سِهُوانْ نَ أَمُواْرِيَاوَا نٜىٰ؞ وَنَّنْ سَرْكِے سِهُوانْ شِينٜىٰ يَيِ يَاڧِ دَ سَرْكِنْ مُواْوَبْ نَدَا، يَكُمَ ڨُوثٜىٰ دُكَنْ ڧَسَرْسَ حَرْ ذُوَا كُواْغِنْ أَرْنُوانْ؞ 27 شِيَسَا مَاسُ بَادَ لَابَرِ أَوَاڧَا سُكَنْثٜىٰ، «ذُواْ ثِكِنْ هٜىٰشْبُوانْ، أَ سَاكٜىٰ غِنَتَ! بَرِ عَكَڢَ بِرْنِنْ سَرْكِے سِهُوانْ! 28 غَمَا دَا وُتَا تَٻَرْكٜىٰ دَغَ هٜىٰشْبُوانْ، هَرْشٜىٰنْ وُتَادَغَ بِرْنِنْ سَرْكِے سِهُوانْ؞ تَا ثِنْيٜىٰ بِرْنِنْ أَرْ تَ مُواْوَبْ، تَهَلَّكَرْ دَ مَاسُ مُلْكٍ يَنْكِنْ أَرْنُوانْ؞ 29 «كَيْتُوانْكُ، يَا مُتَنٜىٰنْ مُواْوَبْ! تَاكُتَاڧَارٜىٰ، يَا كُو مُتَنٜىٰنْ غُنْكِنْ كٜىٰمُواشْ! يَمَيْدَ یَیَنْسَ یَنْ غُدُنْ ڟِيرَا، یَیَنْسَ مَاتَا مَا، وَطَنْدَ عَكَ ڨُوثٜىٰ دَ يَاڧِ تَهَنُّنْ سَرْكِے سِهُوانْ نَ أَمُواْرِيَاوَا؞ 30 «غَاشِ يَنْذُ أَنْهَلَّكَ ذُرِيَرْ أَمُواْرِيَاوَا، تُنْدَغَ هٜىٰشْبُوانْ ذُوَا دِبُوانْ، وُتَرْمُ تَثِنْيٜىٰسُ تُنْدَغَ نُواْڢَ حَرْ ذُوَا مٜىٰدٜىٰبَ؞» 31 تَهَكَ إِسْرَٰٓءِيلَاوَا سُكَ ذَوْنَ عَيَنْكِنْ أَمُواْرِيَاوَا؞ 32 سَيْ مُوسَٰى يَعَيْكَ دَ یَنْ لٜىٰڧٜىٰنْ أَسِيرِ سُجٜىٰ سُنٜىٰمِ حَنْيَ مَڢِے ݣَوْ دُواْمِنْ سُڢَاطَوَ يَنْكِنْ يَظٜىٰرْ دَ يَاڧِ؞ إِسْرَٰٓءِيلَاوَا كُوَ سُكَ تَڢِے سُكَثِ يَظٜىٰرْ دَ ڧَوْيُكَنْتَ، سُكَ كُمَ كُواْرِ أَمُواْرِيَاوَنْ دَسُكٜىٰ أَوُرِنْ؞ 33 سُكَ جُويَا سُكَ هَوْرَ تَهَنْيَ ذُوَا بَشَنْ؞ عَمَّا سَرْكِے عُواغْ نَ بَشَنْ دَ دُكَنْ سُواْجُواْجِنْسَ سُكَ ڢِتَ سُكَ ڢَاطُواْ مُسُ دَ يَاڧِ أَ عٜىٰدِرَيْ؞ 34 يَهْوٜىٰهْ كُوَ يَثٜىٰ وَ مُوسَٰى «كَدَ كَجِڟُواْرُوانْسَ، غَمَا نَارِغَا نَا بَادَشِ أَ حَنُّنْكَ، دُكْ دَ سُواْجُواْجِنْسَ دَ ڧَسَرْسَ؞ كَيِمَسَ يَدَّ كَيِ وَ سَرْكِے سِهُوانْ نَ أَمُواْرِيَاوَا، وَنْدَ دَا يَيِ مُلْكِ أَ هٜىٰشْبُوانْ؞» 35 حَكَ سُكَ كَشٜىٰ سَرْكِے عُواغْ دَ یَیَنْسَ مَظَا دَ دُكَنْ مُتَنٜىٰنْسَ، حَرْ بَابُوَنْدَ يَڟِيرَا؞ إِسْرَٰٓءِيلَاوَا كُوَ سُكَ مَلَّكِ ڧَسَرْسَ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria