نٜىٰهٜىٰمِيَ 9 - أَتَّوْرَتْ دَ أَنَّبَاوَاجَمَعَ سُنْ ڢُرْتَ ذُنُبَنْسُ 1 عَكَنْ رَانَ تَعَشِرِنْ دَ حُطُ غَ وَنَّنْ وَتَنْ بَݣَويْ، مُتَنٜىٰنْ إِسْرَٰٓءِيلَ سُكَسَاكٜىٰ تَارُوَ سُكَيِ أَظُمِ سَنْيٜىٰ دَ رِيغُنَنْ نُونَ بَڧِنْ ثِكِ دَ تُوبَ سَبُواْدَ ذُنُبَنْسُ، سُكَ كُمَ ظُبَ ڧَسَا عَكَوُنَنْسُ؞ 2 وَطَنْدَ تُوشٜىٰنْسُ إِسْرَٰٓءِيلَ نٜىٰ سُنْ رِغَا سُنْ وَارٜىٰ كَنْسُ دَغَ دُكَنْ وَطَنْدَ دَ بَ إِسْرَٰٓءِيلَاوَا بَ؞ سَيْ سُكَ مِيڧٜىٰ أَڟَيٜىٰ سُكَ ڢَطِ ذُنُبَنْسُ دَ لَيْڢُواْڢِنْ كَاكَنِّنْسُ؞ 3 سَعَدَّ سُكٜىٰ نَنْ أَڟَيٜىٰ، عَكَ طَوْكِ أَوَ عُكُ أَنَ كَرَنْتَ مُسُ دَغَ ثِكِنْ لِتَّڢِنْ كُواْيَرْوَرْ يَهْوٜىٰهْ اللَّهْ نْسُ؞ عَكَ كُمَ طَوْكِ وَنِ أَوَ عُكُ مُتَنٜىٰ سُنَ تَڢُرْتَ ذُنُبَنْسُ، سُنَيِ وَ يَهْوٜىٰهْ اللَّهْ نْسُ سُجَّدَ، سُنَ رُسُنَاوَ دَ ڢُسْكَرْسُ حَرْ ڧَسَا؞ 4 لَوِيَاوَا سُكَ ڟَيَ عَكَنْ مَتَاكَلَنْ بَبَّنْ تٜىٰبُرِنْ دَ عَكَيِ دُواْمِنْسُ؞ عَثِكِنْسُ كُوَ أَݣَويْ يٜىٰشُوَ دَ بَنِ دَ كَدْمِيٜىٰلْ دَ شٜىٰبَنِيَ دَ بُنِّ دَ شٜىٰرٜىٰبِيَ دَ بَنِ دَ كٜىٰنَنِ؞ وَطَنَّنْ سُكَيِ أَدُّعَ دَ بَبَّرْ مُرْيَ ذُوَاغَ يَهْوٜىٰهْ اللَّهْ نْسُ؞ 5 سَيْ وَطَنَّنْ لَوِيَاوَا وَتُواْ، يٜىٰشُوَ دَ كَدْمِيٜىٰلْ دَ بَنِ دَ هَشَبْنٜىٰيَ دَ شٜىٰرٜىٰبِيَ دَ هُواْدِيَ دَ شٜىٰبَنِيَ دَ ڢٜىٰتَهِيَ سُكَيِ كِرَنْ سُجَّدَ سُكَثٜىٰ، «تَاشِ ڟَيٜىٰ كُيَبِے يَهْوٜىٰهْ اللَّهْ نْكُ، اللَّهْ نْكُ مَرَرْ ڢَرْكُواْ مَرَرْ ڧَرْشٜىٰ!» «أَلْبَرْكَ تَا تَبَّتَا غَ سُونَنْكَ مَيْ دَرَجَ، سُونَنْدَ يَڢِ دُكَنْ أَلْبَرْكَ دَ يَبُواْ! أَدُّعَرْ ڢُرْثِنْ ذُنُبَيْ 6 يَا يَهْوٜىٰهْ، كَيْ كَطَيْ نٜىٰ يَهْوٜىٰهْ، كَيْ كَايِ سَمَ، دَ سَمَنْ سَمَّيْ دَ تَوْرَرِنْ سَمَ؞ كَيْ كَايِ ڧَسَا دَ دُكَنْ أَبِنْدَ يَكٜىٰ ثِكِنْتَ؞ كَيْ كَايِ تٜىٰكُ دَ دُكَنْ أَبِنْدَ يَكٜىٰ ثِكِنْتَ؞ كَيْ كَا كِيَايٜىٰ رَنْسُ دُكَ؞ حَلِتُّنْ سَمَ كُمَ سُنَيِ مَكَ سُجَّدَ؞ 7 يَا يَهْوٜىٰهْ اللَّهْ، كَيْنٜىٰ كَا ذَاٻِ إِبْرَمْ؞ كَيْ كَا ڢِتَرْدَشِ دَغَ ڧَسَرْ عُرْ تَ كَلْدِيَاوَا، كَيْ كَا ثَنْجَ سُونَنْسَ ذُوَا إِبْرَٰهِيمْ؞ 8 كَا سَامٜىٰشِ مَيْ أَمِنْثِنٜىٰ أَغَرٜىٰكَ، كَايِ يَرْجٜىٰجٜىٰنِيَ دَشِ، يَرْجٜىٰجٜىٰنِيَ تَبَا ذُرِيَرْسَ ڧَسَرْ كَنْعَنِيَاوَا، دَ ڧَسَرْ هِتِّيَاوَا دَ تَ أَمُواْرِيَاوَا، دَ ڧَسَرْ ڢٜىٰرِظِّيَاوَا دَ تَ يٜىٰبُسِيَاوَا دَ تَ غِرْغَشِيَاوَا؞ كَيْ كَا ثِكَ مَغَنَرْكَ، غَمَا كَيْ مَيْ أَدَلْثِنٜىٰ؞ 9 «كَا لُورَ دَ وَهَلَرْ كَاكَنِّنْمُ عَڧَسَرْ مَصَرْ، كَاجِ كُوكَنْسُ عَبَاكِنْ تٜىٰكُنْ ثِيَوَرْ إِوَ؞ 10 كَا عَيْكَتَ عَلَمُ دَ أَيُّكَنْ بَنْ مَامَاكِ عَكَنْ سَرْكِے ڢِرْعَوْنَ دَ دَتَّاوَنْسَ دَ مُتَنٜىٰنْ ڧَسَرْسَ، غَمَا كَاسَنْ يَدَّ سُكَ دَنّٜىٰ كَاكَنِّنْمُ؞ تَهَكَ كَيِ سُونَ، سُونَنْ دَ كَكٜىٰ دَشِ حَرْ يَوْ؞ 11 كَارَبَ تٜىٰكُ أَغَبَنْ كَاكَنِّنْمُ، سُكَبِے تَڟَكِيَرْ تٜىٰكُ عَكَنْ بُوسَشِّيَرْ ڧَسَا؞ كَا جٜىٰڢَرْ دَ مَاسُبِنْسُ ثِكِنْ ظُرْڢِنْ تٜىٰكُ، كَمَرْ دُوڟٜىٰ ثِكِنْ ضُوً تٜىٰكُ مَيْ هَوْكَ؞ 12 «دَ رَانَ كَا بِيدَسُو دَ ڧُنْشِنْ غِرْغِجٜىٰ، دَ دَرٜىٰ دَ ڧُنْشِنْ وُتَا، دُواْمِنْ أَ حَصْكَكَ حَنْيَرْ دَ ذَاسُبِے؞ 13 «كَا سَوْكَ عَكَنْ بَبَّنْ تُدُنْ سِنَيْ، كَيِ مَغَنَ دَ كَاكَنِّنْمُ دَغَ سَمَ؞ كَابَاسُ كُواْيَرْوَا دَ عُمَرْنَنْ دَسُكٜىٰ دَيْدَيْ، كَابَاسُ ڧَٰعِدُواْدِ دَ دُواْكُواْكِ مَاسُ ݣَوْ؞ 14 كَا بَيَّنَ مُسُ رَانَرْكَ تَهُوتُ تَمَكُواْ سُكِيَايٜىٰتَ دَ ڟَرْكِے، كَا كَڢَ مُسُ دُواْكُواْكِنْكَ دَ عُمَرْنَنْكَ دَ كُواْيَرْوَرْكَ تَهَنُّنْ بَاوَنْكَ مُوسَٰى؞ 15 دَسُكٜىٰ جِنْ يُنْوَ، كَبَاسُ عَبِنْثِ دَغَ سَمَ، دَسُكٜىٰ جِنْ ڧِشِنْ ضُوَ، كَڢِتَرْدَ ضُوَ دَغَ دُوڟٜىٰ؞ كَا ڢَطَا مُسُ سُمَلَّكِ ڧَسَرْ، ڧَسَرْ غَادُوانْدَ كَرَنْڟٜىٰ ذَاكَبَاسُ؞ 16 «عَمَّا سُو كَاكَنِّنْمُ سُكَ نُونَ غِرْمَنْ كَيْ، سُكَ كُمَ تَوْرَرٜىٰ كَنْسُ، سُكَڧِ يِنْ بِيَيَّ دَ دُواْكُواْكِنْكَ؞ 17 أَيُّكَنْ بَنْ مَامَاكِنْدَ كَيِ مُسُ، سُكَ مَنْتَادَسُو؞ سُكَيِ ڧِنْجِ، سُكَ تَوْرَرٜىٰ كَنْسُ؞ عَثِكِنْ تَاوَيٜىٰنْسُ، سُكَ ذَاٻِ شُوغَبَا يَكُواْمَرْ دَسُو غَ بَوْتَرْسُ أَ مَصَرْ؞ عَمَّا كَيْ اللَّهْ مَيْيِنْ غَاڢَرَ نٜىٰ، مَيْ أَلْحٜىٰرِ، كُمَ مَيْ جِنْڧَيْ، مَرَرْ سَوْرِنْ ڢُشِے، مَيْ يَوَنْ ڧَوْنَ مَرَرْ ثَنْجَاوَا؞ كَيْ، اللَّهْ، بَكَ يَاشٜىٰسُبَ؞ 18 كُواْ دَ سُكَيِ وَكَنْسُ غُنْكِنْ ڧَرْڢٜىٰ مَيْ صِڢَّرْ طَنْ بِجِمِ، سُكَثٜىٰ، ‹غَا اللَّهْ وَنْدَ يَڢِتَرْ دَكُو دَغَ ڧَسَرْ مَصَرْ،› تَهَكَ سُكَيِ مَكَ صَاٻُواْ مَيْ يَوَ، 19 كَيْ بَكَيَاشٜىٰسُ أَدَاجِبَ، غَمَا جِنْڧَنْكَ مَيْغِرْمَنٜىٰ؞ ڧُنْشِنْ غِرْغِجٜىٰ بَيْ دَيْنَ بِيدَسُو دَ رَانَبَ، ڧُنْشِنْ وُتَا بَيْ دَيْنَ حَصْكَكَ حَنْيَرْسُ دَ دَرٜىٰبَ؞ 20 كَبَاسُ رُوحُنْكَ مَيْ أَلْحٜىٰرِ يَكُواْيَرْ دَسُو، بَكَ دَيْنَبَاسُ مَنَّرْكَ سُثِبَ، كُواْ ضُوَ لُواْكَثِنْ دَسُكٜىٰ جِنْ ڧِشِ؞ 21 شٜىٰكَرُ أَرْبَعِنْ كَنَ لُورَ دَسُو أَدَاجِ، بَسُ رَسَ كُواْمٜىٰبَ، رِيغُنَنْسُ بَسُ ڟُوڢَبَ، كُمَ ڧَڢَاڢُنْسُ بَسُ كُمْبُرَبَ؞ 22 «كَبَاسُ مُلْكُواْكِ دَ ڧَبِيلُ، كَرَرَّبَ مُسُ ڧَسَاشٜىٰ؞ سُكَثِ ڧَسَرْ هٜىٰشْبُوانْ نَ سَرْكِے سِهُوانْ دَ يَاڧِ، دَ ڧَسَرْ بَشَنْ نَ سَرْكِے عُواغْ؞ 23 كَا سَا یَیَنْسُ سُيِيَوَ كَمَرْ تَوْرَرِ أَسَرَرِنْ سَمَ؞ كَا كَٰوُاْسُ ثِكِنْ ڧَسَرْ، ڧَسَرْدَ دَا كَا ڢَطَا وَكَاكَنِّنْسُ سُشِغَ سُمَلَّكٜىٰتَ؞ 24 یَیَنْسُ سُكَ شِغَ سُكَ مَلَّكِ ڧَسَرْ كَنْعَنَ، كَا شَا غَبَنْسُ كَاثِ ڧَبِيلُنْ ڧَسَرْدَ يَاڧِ؞ كَا بَادَ مَذَوْنَنْ كَنْعَنَ أَ حَنُّنْسُ، دَ ڧَبِيلُ دَ سَرَاكُنَنْ دُكَ، سُيِ مُسُ يَدَّ سُنْ غَ دَامَ؞ 25 مُتَنٜىٰنْكَ سُكَ ڨُوثٜىٰ بِرَنٜىٰ مَاسُ كَتَنْغَ دَ ڧَسَا مَيْ يَوَنْ أَمْڢَانِ؞ سُكَ ڨُوثٜىٰ غِدَاجٜىٰ ثِكٜىٰ دَ كَايَ مَاسُ ݣَوْ إِرِ إِرِ، دَ رِجِيُواْيِنْ دَ أَنْرِغَا أَنْتُواْنَ، دَ عِتَتُوَنْ إِنَبِے دَ عِتَتُوَنْ ظَيْتُنْ، دَ عِتَتُوَ دَيَوَ مَاسُ یَیَ؞ سُكَثِ، سُكَ ڧُواْشِ، سُكَيِ ڧِبَ، سُكَجِ دَاطِنْ أَلْحٜىٰرِنْدَ كَيِ مُسُ عَيَلْوَثٜىٰ؞ 26 «عَمَّا سُكَڧِ يِنْ بِيَيَّ سُكَيِ تَاوَيٜىٰ، سُكَ جُويَاوَا كُواْيَرْوَرْكَ بَايَ؞ سُكَ كَكَّشٜىٰ أَنَّبَاوَنْكَ، أَنَّبَاوَنْ دَ سُكَ غَرْغَطٜىٰسُ سُجُويُواْ وُرِنْكَ؞ تَهَكَ سُكَيِ مَكَ صَاٻُواْ مَيْيَوَ؞ 27 «سَبُواْدَ حَكَ كَبَادَسُو أَ حَنُّنْ أَبُواْكَنْ غَابَنْسُ وَطَنْدَ سُكَ دَنّٜىٰسُ؞ أَ ذَمَنْ دَنِّيَرْسُ، مُتَنٜىٰنْكَ سُكَيِ كُوكَا غَرٜىٰكَ، كَيْ كَكُوَ جِيسُ دَغَ سَمَ؞ بِسَغَ يَوَنْ جِنْڧَنْكَ كَعَيْكَ مُسُ مَاسُ ثٜىٰتُواْ وَطَنْدَ سُكَثٜىٰثٜىٰسُ دَغَ حَنُّنْ أَبُواْكَنْ غَابَنْسُ؞ 28 عَمَّا سَعَدَّ سُكَ سَامِ سَوْڧِ، سَيْ سُكَسَاكٜىٰ عَيْكَتَ مُغُنْتَا أَغَبَنْكَ؞ سَيْ كَبَرْسُ أَ حَنُّنْ أَبُواْكَنْ غَابَنْسُ سُيِ مُلْكِ عَكَنْسُ؞ دُكْدَهَكَ دَ سُكَ جُويَا سُكَيِ كِرَا غَرٜىٰكَ، كَا كُوَ جِيسُ دَغَ سَمَ، سَوْ دَيَوَ كَكَنْ كُٻُتَرْ دَسُو بِسَغَ يَوَنْ جِنْڧَنْكَ؞ 29 كَا غَرْغَطٜىٰسُ دُواْمِنْ كَجُويٜىٰسُ غَ كُواْيَرْوَرْكَ، عَمَّا سُكَ نُونَ غِرْمَنْ كَيْ سُكَڧِ يِنْ بِيَيَّ غَ دُواْكُواْكِنْكَ؞ سُكَيِ ذُنُوبِ سُكَ رٜىٰنَ عُمَرْنَنْكَ، كُواْدَيَكٜىٰ تَوُرِنْ كِيَايٜىٰ سُونٜىٰ مُتُمْ ذَيْ رَايُ؞ سُكَيِ ڧِنْجِ، سُكَ تَوْرَرٜىٰ كَنْسُ، سُكَڧِ يِنْ بِيَيَّ؞ 30 كَايِ حَڧُرِ دَسُو شٜىٰكَرَا دَ شٜىٰكَرُ، كَغَرْغَطٜىٰسُ دَ رُوحُنْكَ تَوُرِنْ أَنَّبَاوَنْكَ؞ عَمَّا مُتَنٜىٰنْكَ سُكَ تُواْشٜىٰ كُنُّوَنْسُ؞ سَبُواْدَ حَكَ كَبَادَسُو أَ حَنُّنْ ڧَبِيلُنْ ڧَسَاشٜىٰ كٜىٰوَيٜىٰ دَسُو؞ 31 حَرْ يَنْذُ سَبُواْدَ يَوَنْ جِنْڧَنْكَ، بَكَبَرْسُ كُواْ هَلَكَاسُبَ؞ غَمَا كَيْ اللَّهْ مَيْ أَلْحٜىٰرِ نٜىٰ مَيْ جِنْڧَيْ! 32 «يَنْذُ ڢَا، يَا اللَّهْ نْمُ، اللَّهْ مَيْغِرْمَ، مَيْ إِيكُواْ دَ مَيْ بَنْ ڟُواْرُواْ، مَيْ كِيَايٜىٰ يَرْجٜىٰجٜىٰنِيَ دَ مَيْ ڧَوْنَ مَرَرْ ثَنْجَاوَا، كَدَ كَرٜىٰنَ وَهَلَرْمُ أَعِدُوانْكَ! وَهَلَرْ دَ تَذُواْ كَنْمُ دَ كَنْ سَرَاكُنَنْمُ دَ كَنْ شُوغَبَنِّنْمُ، دَ كَنْ ڢِرِسْتُواْثِنْمُ دَ كَنْ أَنَّبَاوَنْمُ، دَ كَنْ كَاكَنِّنْمُ دَ كَنْ دُكَنْ مُتَنٜىٰنْكَ، تُنْدَغَ زَامَانِنْ سَرَاكُنَنْ أَسُّرِيَ حَرْ ذُوَا يَوْ؞ 33 عَمَّا كَيِ أَدَلْثِے ثِكِنْ دُكَنْ أَبُبُوَنْ دَ سُكَ ڢَرُ دَمُو، غَمَا كَايِ أَمِنْثِ، كُواْدَيَكٜىٰ مُو مُنْيِ مَكَ مُغُنْتَا؞ 34 سَرَاكُنَنْمُ دَ شُوغَبَنِّنْمُ دَ ڢِرِسْتُواْثِنْمُ دَ كَاكَنِّنْمُ بَسُ كِيَايٜىٰ كُواْيَرْوَرْكَبَ؞ بَسُ كَسَ كُنّٜىٰ غَ دُواْكُواْكِنْكَ، كُواْ غَرْغَطِنْكَ دَ كَشَيْدَ عَكَنْسُبَ؞ 35 بَسُيِ مَكَ حِدِمَ كُواْ سُرَبُ دَ مُغُنْتَارْسُبَ؞ كُواْدَيَكٜىٰ سُنَدَ مُلْكِنْسُ، سُنْ كُمَجِ دَاطِنْ يَوَنْ أَلْحٜىٰرِنْكَ عَكَنْسُ، دَ ڧَسَا مَيْ ڢَاطِ دَ أَمْڢَانِ وَدَّ كَبَاسُ؞ 36 «غَاشِ، يَوْ مُو بَايِنٜىٰ، كُمَ ڧَسَرْدَ كَبَا كَاكَنِّنْمُ سُثِ یَیَنْ عِتَتُوَنْتَ دَ سَوْرَنْ أَمْڢَانِنْتَ، غَاشِ، مُو بَايِنٜىٰ عَثِكِنْتَ؞ 37 سَبُواْدَ ذُنُبَنْمُ، أَمْڢَانِ مَيْ يَوَ نَڧَسَرْ يَنَ تَڢِيَ أَ حَنُّنْ سَرَاكُنَ، سَرَاكُنَنْدَ كَسَا عَكَنْمُ، دَ عَكَنْ جِكُنَنْمُ دَ دَبُّواْبِنْمُ، سَرَاكُنَنْ دَسُكٜىٰيِ يَدَّ سُكَغَ دَامَ؞ مُو كُوَ مُنَ ثِكِنْ بَڧِنْ ثِكِ سُواْسَيْ؞» جَمَعَ سُنْ رُبُوتَ أَلْڧَوَرِ 38 «سَبُواْدَ دُكَنْ وَنَّنْ، مُو جَمَعَرْ إِسْرَٰٓءِيلَ مُكٜىٰيِنْ مُهِمِّنْ أَلْڧَوَرِ، مُنَ كُمَ رُبُوتَشِ؞ شُوغَبَنِّنْمُ دَ لَوِيَاوَنْمُ دَ ڢِرِسْتُواْثِنْمُ كُمَ سُنَ بُغَ هَاتِمِنْسُ عَكَيْ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria