نٜىٰهٜىٰمِيَ 5 - أَتَّوْرَتْ دَ أَنَّبَاوَا

نٜىٰهٜىٰمِيَ يَتَيْمَكِ تَلَكَاوَا

¹ أَنَانً سَيْ مَظَا دَ مَاتَنْسُ سُكَ ڢَارَ غُنَغُنِ مَيْ يَوَ عَكَنْ یَنْعُوَنْسُ يَهُودَاوَا؞

² غَمَا وَطَنْسُ سُنْيِ مَغَنَ سُنْثٜىٰ ‏«‏مُو دَ یَیَنْمُ مَظَا دَ مَاتَا، مُنَدَ يَوَ، مُنَ بُڧَاتَرْ حَڟِ دُواْمِنْ مُثِ مُرَايُ؞»‏

³ وَطَنْسُ كُمَ سُكَيِ مَغَنَ سُكَثٜىٰ ‏«‏مُنْ جِنْ‌غِنَرْ دَ غُواْنَكِنْمُ دَ غُواْنَكِنْ إِنَبِنْمُ دَ غِدَاجٜىٰنْمُ دُواْمِنْ مُسَامِ حَڟِ كَدَ مُشَا يُنْوَ؞»‏

⁴ أَݣَويْ كُمَ وَطَنْدَ سُكَيِ مَغَنَ سُكَثٜىٰ ‏«‏مُنْثِ بَاشِنْ كُطِ دُوانْ مُبِيَ هَرَاجِنْ سَرْكِے عَكَنْ غُواْنَكِنْمُ دَ غُواْنَكِنْ إِنَبِنْمُ؞

⁵ غَاشِ كُوَ مُو یَنْعُوَ نٜىٰ نَامَ دَ جِنِ؞ أَيْ یَیَنْمُ دَ نَاسُ دُكْ طَيَنٜىٰ؞ دُكْدَهَكَ أَنْتِلَسْتَمُ مُسَا یَیَنْمُ مَظَا دَ مَاتَا سُذَمَ بَايِ؞ وَطَنْسُ یَیَنْمُ مَتَ أَنْرِغَا أَنْسَيَرْ دَسُو غَ ذَمَنْ بَايِ؞ عَمَّا بَامُ دَ إِيكُواْ مُيِ كُواْمٜىٰ عَكَيْ، سَبُواْدَ أَنْڨُوثٜىٰ مَنَ غُواْنَكِنْمُ دَ غُواْنَكِنْ إِنَبِنْمُ؞»‏

⁶ سَعَدَّ نِے نٜىٰهٜىٰمِيَ نَجِ غُنَغُنِنْسُ دَ كُمَ وَطَنَّنْ مَغَنْ‌غَنُ، سَيْ نَيِ ڢُشِے سُواْسَيْ؞

⁷ بَايَنْدَ نَيِ تُنَانِ أَ ذُوثِيَاتَ، سَيْ نَبَا مَنْيَنْ مُتَنٜىٰ دَ دَتَّاوَا لَيْڢِے؞ نَثٜىٰمُسُ ‏«‏كُنَ ثُوتَرْ یَنْعُوَنْكُ تَوُرِنْ بَاسُ بَاشِ كُنَ كَرْٻَرْ ڧَظَامَرْ رِيبَ!‏»‏ سَيْ نَكِرَا بَبَّنْ تَارُوانْ جَمَعَ سَبُواْدَ وَنَّنْ دَامُوَ؞

⁸ سَيْ نَڢَطَا مُسُ نَثٜىٰ ‏«‏دَيْدَيْ ڠُورْڠُودُوانْ عِيَوَرْمُ مُنْيِ ڧُواْڧَرِ مُنْ ڢَنْشِ یَنْعُوَنْمُ يَهُودَاوَا وَطَنْدَ عَكَ سَيَرْ دَسُو غَ وَطَنْدَ بَا يَهُودَاوَا بَ؞ عَمَّا غَاشِ حَرْ يَنْذُ كُنَ سَيَرْ دَ یَنْعُوَنْكُ؞ سَوْ نَوَ ذَامُ سَاكٜىٰ سَيٜىٰنْسُ؟»‏ شُوغَبَنِّنْ سُكَيِ شِضُ سُكَ رَسَ أَبِنْ ڢَطِ؞

⁹ سَيْ نِے نٜىٰهٜىٰمِيَ نَڢَطَا مُسُ نَثٜىٰ ‏«‏أَبِنْ دَ كُكٜىٰيِ بَاشِ دَݣَوْ؞ يَا كَمَاتَ كُيِ تَڢِيَ ثِكِنْ ڟُواْرُوانْ اللَّهْ، دُواْمِنْ كَدَ أَبُواْكَنْ غَابَنْمُ وَطَنْدَ بَا يَهُودَاوَا بَسُسَامِ دَلِيلِنْ يِمَنَ بَعَ؞

¹⁰ نِے مَا دَ یَنْعُوَنَ دَ سَمَارِنَ مَاسُ يِمِنِ عَيْكِ مُنَبَاسُ بَاشِنْ كُطِ دَ حَڟِ؞ عَمَّا يَنْذُ، سَيْ مُبَرْ ذَنْثٜىٰنْ بَادَ بَاشِ مُنَ كَرْٻَرْ ڧَظَامَرْ رِيبَ؞

¹¹ يَوْ طِنَّنْ كُمَيَرْ مُسُ دَ غُواْنَكِنْسُ دَ غُواْنَكِنْسُ نَ إِنَبِے دَ غُواْنَكِنْسُ نَ إِتَاثٜىٰنْ ظَيْتُنْ دَ غِدَاجٜىٰنْسُ دَ ڧَظَامَرْ رِيبَرْكُ، وَتُواْ سَاشٜىٰ طَيَ بِسَ طَرِے نَكُطِ دَ نَهَڟِ دَ نَضُوً إِنَبِے دَ نَمَنْ ظَيْتُنْ؞»‏

¹² سَيْ شُوغَبَنِّنْ سُكَ أَمْسَ سُكَثٜىٰ ‏«‏ذَامُيِ كَمَرْ يَدَّ كَڢَطَا؞ ذَامُ مَيَرْ مُسُ دَ كَايَنْسُ، بَذَامُ كَرْٻِ وَنِ بَاشِ دَغَ غَرٜىٰسُبَ كُمَ؞»‏ سَيْ نَكِرَا ڢِرِسْتُواْثِے، نَسَا شُوغَبَنِّ سُرَنْڟٜىٰ أَغَبَنْ ڢِرِسْتُواْثِے ثٜىٰوَ ذَاسُثِكَ أَلْڧَوَرِنْ دَ سُكَ طَوْكَ؞

¹³ سَيْ نَكَكَّٻٜىٰ رِغَاتَ نَثٜىٰ ‏«‏تَهَكَ بَرِ اللَّهْ يَكَكَّٻٜىٰ دُكْ وَنْدَ بَيْ ثِكَ أَلْڧَوَرِنْسَبَ؞ وَتُواْ، بَرِ اللَّهْ يَكَكَّٻٜىٰ غِدَنْسَ دَ دُكَنْ أَبِنْدَ يَكٜىٰدَشِ، يَبَرْ شِ بَا كُواْمٜىٰ؞»‏ سَيْ دُكَنْ تَارُوانْ جَمَعَرْ سُكَ أَمْسَ سُكَثٜىٰ ‏«‏أَمِينْ!‏»‏ سُكَ كُمَ يَبِے يَهْوٜىٰهْ؞ شُوغَبَنِّنْ كُوَ سُكَ ثِكَ أَلْڧَوَرِنْ دَ سُكَيِ؞

أَمِنْثِنْ نٜىٰهٜىٰمِيَ أَ عَيْكِنْسَ نَڠُومْنَ

¹⁴ بَنْدَ حَكَمَا تُنْ لُواْكَثِنْ دَ عَكَ نَطَنِ ڠُومْنَنْ ڧَسَرْ يَهُودَ، شٜىٰكَرُ غُواْمَشَا بِيُنْ دَ سُكَ وُثٜىٰ، وَتُواْ دَغَ شٜىٰكَرَا تَعَشِرِنْ تَمُلْكٍ سَرْكِے أَرْتَظٜىٰكْظٜىٰسْ حَرْ ذُوَا شٜىٰكَرَرْسَ تَتَلَتِنْ دَ بِيُ، كُواْ نِے كُواْ یَنْعُوَنَ بَاوَنْدَ يَكَرْٻِ رَبُوانْ عَبِنْثِ إِرِنْ نَڠُومْنَ؞

¹⁵ ڠُومْنُواْنِنْ دَ سُكَ رِغَانِ سُنْ بَا مُتَنٜىٰ وَهَلَ سُواْسَيْ تَوُرِنْ كَرْٻَرْ عَبِنْثِ دَ ضُوً إِنَبِے دَغَ غَرٜىٰسُ، بَنْدَ كُطِنْ أَظُرْڢَا أَرْبَعِنْ؞ حَرْ مَا سَمَارِ مَاسُ يِمُسُ عَيْكِ سُكَ نُونَ وَمُتَنٜىٰنْ إِيكُواْ؞ عَمَّا نِے بَنْ يِهَكَبَ سَبُواْدَ إِنَ ڟُواْرُوانْ اللَّهْ؞

¹⁶ أَ مَيْمَكُوانْ حَكَ نَسَا دُكَنْ ڧَرْڢِينَ ثِكِنْ عَيْكِنْ غِنِنْ كَتَنْ‌غَرْ؞ دُكَنْ سَمَارِنَ مَاسُ يِمِنِ عَيْكِ سُكَ تَارُ دُواْمِنْ عَيْكِنْ غِنِنْ، دُكَنْمُ كُوَ بَمُسَيِ غُواْنَكِبَ؞

¹⁷ دُكْدَهَكَمَا مُتَنٜىٰنْ يَهُودَ دَ دَتَّاوَا طَرِے دَ حَمْسِنْ سُكَنْثِ تَرٜىٰدَنِ، بَنْدَ مُتَنٜىٰنْ دَ سُكَنْ ذُواْ دَغَ وُرَارٜىٰنْ دَسُكٜىٰ كٜىٰوَيٜىٰ دَمُو؞

¹⁸ غَا يَدَّ عَكَنْ شِرْيَ مِنِ عَبِنْثِ كُواْوَثٜىٰ رَانَ؞ عَكَنْ يَنْكَ بِجِمِ طَيَ دَ تُمَكِ شِدَ مَڢِے ݣَوْ دَ كُمَ كَجِ مَاسُيَوَ؞ عَكُواْوَثٜىٰ رَانَ غُدَا عَثِكِنْ ݣُونَكِے غُواْمَ، عَكَنْ بَادَ سَابُوانْ ضُوً إِنَبِے عَيَلْوَثٜىٰ؞ عَمَّا دُكْدَهَكَ بَنْ كَرْٻِ رَبُوانْ عَبِنْثِ إِرِنْ نَڠُومْنَبَ، سَبُواْدَ وَهَلَ تَيِ وَمُتَنٜىٰ يَوَ؞

¹⁹ ‏«‏يَا اللَّهْ نَا، كَتُنَ كَيِ مِنِ أَلْحٜىٰرِ دُواْمِنْ دُكَنْ أَبِنْدَ نَيِ وَمُتَنٜىٰنَّنْ؞»‏