نَهُمْ 2 - أَتَّوْرَتْ دَ أَنَّبَاوَا

رُشٜىٰوَرْ بِرْنِنْ نِنٜىٰبَ

¹ مَيْ رُشٜىٰوَ يَتَاسُواْ مِكِ، يَا نِنٜىٰبَ، يَكَكَّڢَ سُواْجُواْجِ عَكَنْ كَتَنْ‌غَرْ بِرْنِ؞ عَيِ غَادِنْ وُرَارٜىٰنْ ٻُيَ مَاسُ كَتَنْ‌غَ، يِ طَمَرَ سُواْسَيْ، كِتَتَّارَ سُواْجُواْجِنْكِ دُكَ؞

² غَمَا يَهْوٜىٰهْ يَنَ مَيْدَ دَرَجَرْ يَهُودَ دَ تَ إِسْرَٰٓءِيلَ دُكَ، كُواْ دَ مَاسُ ݣُوشٜىٰ أَرْزِڧِ سُنْ ݣُوشٜىٰ أَرْزِڧِنْ ڧَسَرْسُ، كُواْ دَ سُنْ لَلَتَرْدَ رَسَّنْ إِنَبِنْسُ؞

³ غَرْكُوُاْيِنْ مَاسُ عِيَ يَاڧِ نَ نِنٜىٰبَ سُنْيِ جَاوُرْ، سُواْجُواْجِنْسَ سُنَ سَنْيٜىٰ دَ جَجَّيٜىٰنْ رِيغُنَ؞ كٜىٰكُنَنْ دُواْكِ سُنَ تَوَلْڧِيَ كَمَرْ هَرْشٜىٰنْ وُتَا، أَنَ تَكَطَ مَاسُ دَ بَنْ ڟُواْرُواْ؞

⁴ دَوَكِ مَاسُ كٜىٰكُنَنْ يَاڧِ سُنَ غُدُنْ هَوْكَ عَكَنْ تِيتُنَ؞ سُنَ ذَاڢِنْ غُدُنْ كَيْ دَ كَٰوُاْوَ عَثِكِنْ ڢِيلَيٜىٰ نَثِكِنْ غَرِ؞ ٻُلُّواْوَرْسُ كَمَرْ حَصْكٜىٰنْ ڢِتِلَ نٜىٰ، سُنَ وُثٜىٰوَ كَمَرْ وَلْڧِيَ؞

⁵ سَرْكِنْ نِنٜىٰبَ يَكِرَا مَنْيَنْ سُواْجُواْجِنْسَ، سُنَ تَتُنْتُٻٜىٰ ثِكِنْ ذُوَانْسُ؞ سُنَيِنْ سَوْرِ ذُوَا وَجٜىٰنْ كَتَنْ‌غَرْ بِرْنِنْ، سُنْ كَكَّڢَ أَبُبُوَنْ دَ ذَاسُ ڟَرٜىٰ كَنْسُ؞

⁶ أَنْبُوطٜىٰ هَنْيُواْيِنْ ضُوً ڟَرُوانْ بِرْنِ، غِدَنْ سَرْكِے يَضِكِثِے؞

⁷ أَنْ تُوٻٜىٰ سَرَوْنِيَ، أَنْتَڢِے دَ عِتَ؞ یَنْ مَاتَنْتَ بَايِ سُنَ كُوكَا، كُوكَنْ مَكُواْكِنْسُ كَمَرْ مُرْيَرْ كُرْثِيَنٜىٰ، سُنَ سَا حَنُّ عَكَيْ؞

⁸ كَمَرْ ضُوَنْدَ يَٻَرْكٜىٰ دَغَ دَمْ، مُتَنٜىٰنْ نِنٜىٰبَ سُنَ غُدُ دَغَ ثِكِنْتَ؞ أَنَ تَثٜىٰوَ ‏«‏ڟَيَ!‏ ڟَيَ!‏»‏ عَمَّا بَاوَنْدَ يَجُويَ بَايَ؞

⁹ كُݣُوشٜىٰ أَظُرْڢَا!‏ كُݣُوشٜىٰ ظِينَارِيَ!‏ بِرْنِنْ ثِكٜىٰ تَكٜىٰدَ أَجِيَرْ أَرْزِڧِ إِرِ إِرِ، أَرْزِڧِنْتَ بَابُ إِيَاكَ؞

¹⁰ نِنٜىٰبَ تَلَلَثٜىٰ، تَهَلَّكَ، تَذَمَ كُڢَيْ!‏ ظُكَاتَنْ مُتَنٜىٰنْتَ سُنْ نَرْكٜىٰ، ڠُوِوُاْيِنْسُ سُنَ كَطَوَ، ݣُونْݣُوسُوانْسُ كُمَ سُنَ ثِيوُاْ ڢُسْكُواْكِنْسُ دُكَ سُنْ بُوشٜىٰ؞

¹¹ مٜىٰيَڢَرُ دَ بِرْنِنَّنْ نِنٜىٰبَ وَدَّ دَا كَمَرْ كُواْغُوانْ ذَاكِ تَكٜىٰ؟ كُواْغُواْنَّنْ دَ عَكٜىٰ ثِيَرْدَ یَیَنْ ذَاكِ، عِنْدَ ذَاكِ دَ ظَكَنْيَ سُكَنْيِ يَٰوُاْ، تَرٜىٰدَ یَیَنْ ذَاكِ بَابُ ڟُواْرُواْ؟

¹² ذَاكِ يَيَيَّاغٜىٰ أَبِنْ دَ يَ إِشٜىٰشِ دَ یَیَنْسَ، يَكُمَ كَشٜىٰ وَ ظَكَنْيَرْسَ دَبَّ؞ يَثِكَ كُواْغُوانْسَ دَ غَنِمَ، كُواْڠُونِّنْسَ كُمَ دَ نَمُواْمِنْ دَاجِ؞

¹³ إِنْجِ يَهْوٜىٰهْ مَيْ ضُنْدُنَا، ‏«‏غَاشِ، إِنَغَابَادَكٜىٰ نِنٜىٰبَ!‏ ذَنْ ڧُواْنٜىٰ كٜىٰكُنَنْ دُواْكِنْكِ نَيَاڧِ؞ تَكُواْبِنْ يَاڧِ ذَيْثِ سُواْجُواْجِنْكِ، وَطَنْدَ سُكٜىٰ كَمَرْ ذَاكُواْكِ مَاسُ ڧَرْڢِے؞ ذَنْ هَنَكِ كِهَلَّكَ أَلْعُمَّنْ دُونِيَا، إِنْكُمَ حَنَ وَكِلَنْكِ سُكَيْ سَڧُوانْ بَنْ ڟُواْرُواْ؞»‏