مَرْكُسْ 6 - أَتَّوْرَتْ دَ أَنَّبَاوَاأَنْڧِ عِيسَىٰ أَ نَظَرٜىٰتْ ﴿ مَتْ 13.53-58 ؛ لُكْ 4.16-30 ﴾ 1 عِيسَىٰ يَبَرْ وُرِنْ يَكُواْمَ غَرِنْسَ، أَلْمَجِرَنْسَ كُوَ سُكَ تَڢِے تَرٜىٰدَشِ؞ 2 دَ رَانَرْ هُوتُ تَمَكُواْ تَيِ، سَيْ يَڢَارَ كُواْيَرْوَا أَ مَجَمِعَ؞ مُتَنٜىٰ دَيَوَ دَ سُكَ سَوْرَرٜىٰشِ، سُكَيِ مَامَاكِ سُنَ ثٜىٰوَ «إِنَا مُتُمِنَّنْ يَسَامِ وَطَنَّنْ أَبُبُوَ؟ وَثٜىٰ حِكِمَثٜىٰ عَكَ بَاشِ حَكَ حَرْ يَنَيِنْ أَبُبُوَنْ بَنْ مَامَاكِ؟» 3 «وَنَّنْ بَشِينٜىٰ كَاڢِنْتَنَّنْبَ، طَنْ مَرْيَمُ، طَنْعُوَنْ سُو يَعْڧُوبَ دَ يُوسُڢَ دَ يَهُودَ دَ كُمَ سِيمَنْ؟ یَنْعُوَنْسَ مَتَ كُمَ بَ غَا سُو تَرٜىٰدَمُوبَ؟» سَيْ سُكَجِ هَوْشِنْسَ؞ 4 سَيْ عِيسَىٰ يَثٜىٰ مُسُ «أَيْ، أَنَّبِے بَايَ رَسَ دَرَجَ، سَيْدَيْ أَغَرِنْسَ دَ ثِكِنْ یَنْعُوَنْسَ دَ كُمَ مُتَنٜىٰنْ غِدَنْسَ؞» 5 عِيسَىٰ بَيْ عِيَيِنْ وَنِ عَيْكِنْ بَنْ مَامَاكِ عَثَنْبَ، سَيْدَيْ يَوَرْكَرْدَ وَطَنْسُ مَرَسَ لَاڢِيَ كَطَنْ نٜىٰ كَوَيْ تَوُرِنْ تَٻَسُ؞ 6 يَيِ مَامَاكِ سَبُواْدَ رَشِنْ بَنْغَسْكِيَرْسُ؞ سَيْ عِيسَىٰ يَظَظْذَاغَ ڧَوْيُكَ يَنَ كُواْيَرْوَا؞ عِيسَىٰ يَعَيْكِ أَلْمَجِرَنْسَ ﴿ مَتْ 10.5-15 ؛ لُكْ 9.1-6 ﴾ 7 سَيْ يَكِرَا شَا بِيُنَّنْ، يَعَيْكٜىٰسُ بِيُ بِيُ، يَكُمَبَاسُ إِيكُواْ عَكَنْ ڧَظَامَنْ رُوحُواْحِ؞ 8 يَ عُمَرْثٜىٰسُ ثٜىٰوَ «كَدَ كُطَوْكِ وَنِ أَبُ دُواْمِنْ تَڢِيَرْ، كُواْ عَبِنْثِ، كُواْ جَكَ، كُواْ كُطِ مَا ءَأَلْجِهُنْكُ، سَنْدَا كَوَيْ ذَاكُ رِڧٜىٰ؞ 9 عَمَّا كُسَا تَاكَلْمِ، كَدَ كُمَ كُرِڧٜىٰ وَتَ رِغَا بَنْدَ وَدَّ تَكٜىٰ جِكِنْكُ؞ 10 دُكْ غِدَنْ دَ كُكَ سَوْكَ، كُذَوْنَ أَوُرِنْ حَرْ لُواْكَثِنْ دَ ذَاكُ بَرْ وَنَّنْ غَرِنْ؞ 11 دُكْ عِنْدَ بَعَ كَرْٻٜىٰكُبَ، عَكَ كُمَڧِ جِنْكُ، إِنْ ذَاكُ تَاشِ، سَيْ كُكَكَّٻٜىٰ ڧُورَرْ ڧَڢَاڢُنْكُ دُواْمِنْ يَذَمَ شَيْدَ عَكَنْسُ؞» 12 حَكَ ڢَا سُكَتَاشِ، سُنَ وَعَظِ ثٜىٰوَ مُتَنٜىٰ سُتُوبَ؞ 13 سُكَ ڢِتَرْدَ أَلْجَنُ دَيَوَ، سُكَ كُمَ شَڢَاوَا مَرَسَ لَاڢِيَ دَيَوَ مَيْ، سُكَ كُمَ وَرْكَرْ دَسُو؞ مُتُوَرْ يَحْيَى مَيْ بَڢْتِسْمَ ﴿ مَتْ 14.1-12 ؛ لُكْ 9.7-9 ﴾ 14 سَيْ سَرْكِے هِرُدُسْ يَجِ لَابَرِنْ، سَبُواْدَ سُونَنْ عِيسَىٰ يَبَظُو كُواْعِنَ؞ حَرْ وَطَنْسُ سُكَثٜىٰ «يَحْيَى مَيْ بَڢْتِسْمَ نٜىٰ عَكَ تَادَشِ دَغَ مَتَتُّو، شِے يَسَا يَكٜىٰدَ إِيكُوانْ يِنْ وَطَنَّنْ أَيُّكَنْ بَنْ مَامَاكِ؞» 15 عَمَّا وَطَنْسُ سُكَثٜىٰ «أَنَّبِے إِلْيَاسُ نٜىٰ؞» وَطَنْسُ كُوَ سُكَثٜىٰ «أَعَ، وَنِ أَنَّبِے نٜىٰ دَبَمْ دَغَ ثِكِنْ أَنَّبَاوَنْ دَا؞» 16 دَ هِرُدُسْ يَجِ مَغَنَرْ، سَيْيَثٜىٰ «أَيْ، يَحْيَى نٜىٰ، وَنْدَ نَثِرٜىٰ مَسَ كَيْ، عَكَ تَادَ شِ دَغَ مَتَتُّو!» 17 غَمَا دَا هِرُدُسْ دَ كَنْسَ يَبَادَ عُمَرْنِ عَكَ كَمُواْ يَحْيَى، يَطَوْرٜىٰ شِ عَكُرْكُكُ؞ هِرُدُسْ يَيِ حَكَ سَبُواْدَ هِرُدِيَ، مَاتَرْ طَنْعُوَنْسَ ڢِلِبُسْ، وَدَّ شِ هِرُدُسْ يَ عَوْرَ؞ 18 دُوانْ دَا يَحْيَى يَيِ تَغَيَ وَ هِرُدُسْ ثٜىٰوَ «بَيْ كَمَاتَ كَعَوْرِ مَاتَرْ طَنْعُوَنْكَبَ؞» 19 أَشٜىٰ، عِتَ هِرُدِيَ كُوَ تَنَ جِنْ ڢُشِنْ يَحْيَى أَ ذُوثِيَارْتَ، حَرْ تَاسُواْ تَكَشٜىٰشِ، عَمَّا بَتَسَامِ دَامَبَ، 20 غَمَا هِرُدُسْ يَنَ ڟُواْرُوانْ يَحْيَى؞ يَسَنِ شِے مُتُمْ مَيْ أَدَلْثِے نٜىٰ، مَيْ ڟَرْكِے كُمَ، شِے يَسَا هِرُدُسْ يَرِڧٜىٰ يَحْيَى دَݣَوْ؞ يَكَنْ دَامُ دَيَوَ دُكْ لُواْكَثِنْ دَ يَحْيَى يَكٜىٰ مَغَنَ دَشِ، عَمَّا دُكْدَهَكَ يَكَنْجِ دَاطِنْ جِنْ مَغَنَرْسَ؞ 21 عَڧَرْشٜىٰ دَيْ تَسَامِ ظَرَڢِ؞ أَ رَانَرْ حَيْڢُوَرْ هِرُدُسْ، يَيِ بِكِ دُواْمِنْ هَكِمَنْسَ دَ سَرَاكُنَنْ يَاڧِنْسَ دَ كُمَ مَنْيَنْ غَلِيلِ؞ 22 دَ یَرْ هِرُدِيَ تَشِغُواْ تَيِ ضَوَ أَغَبَنْ هِرُدُسْ دَ بَڧِنْسَ، سُكَجِ دَاطِے ڨُورَيْ؞ سَيْ يَثٜىٰ «مٜىٰ كِكٜىٰسُواْ؟ كُواْمٜىٰ دَ كِكَ ضُواْڧَا، سَيْ إِنْ بَاكِ»؞ 23 حَرْ دَ ضَنْڟُوَا، سَرْكِے يَثٜىٰ وَيَارِنْيَرْ «دُكْ أَبِنْدَ كِكَ ضُواْڧَا ذَنْبَاكِ، كُواْ دَ رَبِنْ مُلْكٍ نٜىٰ؞» 24 سَيْ تَڢِتَ تَثٜىٰ وَمَامَرْتَ «مٜىٰ ذَنْ ضُواْڧَا؟» مَامَرْ تَثٜىٰ «كَنْ يَحْيَى مَيْ بَڢْتِسْمَ؞» 25 نَنْ دَ نَنْ تَغُدُ تَكُواْمَ وُرِنْ سَرْكِے تَثٜىٰ «إِنَ سُواْ يَنْذُ يَنْذُ كَبَانِ كَنْ يَحْيَى مَيْ بَڢْتِسْمَ عَثِكِنْ ݣُونُواْ؞» 26 دَجِنْ وَنَّنْ، سَرْكِے يَدَامُ ڨُورَيْ، عَمَّا سَبُواْدَ ضَنْڟُوَارْدَ يَارِغَا يَايِ دَ كُمَ بَڧِنْسَ، بَيْسُواْ يَحَنَ مَتَبَ؞ 27 سَيْ يَعَيْكِ دُواْغَرِنْسَ دَ عُمَرْنِ يَكَٰوُاْ كَنْ يَحْيَى؞ مُتُمِنْ كُوَ يَتَڢِے يَثِرٜىٰ كَنْ يَحْيَى عَكُرْكُكُ؞ 28 يَكَٰوُاْ عَثِكِنْ ݣُونُواْ، يَبَا يَارِنْيَرْ، عِتَ كُوَ تَبَا مَامَرْتَ؞ 29 دَ أَلْمَجِرَنْ يَحْيَى سُكَجِ لَابَرِنْ، سَيْ سُكَذُواْ سُكَ طَوْكِ غَاوَرْسَ، سُكَبِنّٜىٰ؞ عِيسَىٰ يَثِيَرْ دَ مُتُمْ دُبُو بِيَرْ ﴿ مَتْ 14.13-21 ؛ لُكْ 9.10-17 ؛ يَحـ 6.1-14 ﴾ 30 مَنْذَنِّےنْ دَ عِيسَىٰ يَعَيْكَ أَدَا سُكَ كُواْمُواْ وُرِنْسَ، سُكَ ڢَطَا مَسَ دُكَنْ أَبُبُوَنْ دَ سُكَيِ دَ أَبِنْدَ سُكَ كُواْيَرْ؞ 31 غَاشِ كُوَ مُتَنٜىٰ دَيَوَ سُنَ تَكَيْوَ دَ كَٰوُاْوَ، حَرْ مَنْذَنِّےنْ بَسُ سَامِ دَامَرْ ثِنْ عَبِنْثِبَ، سَيْيَثٜىٰ مُسُ «كُذُواْ مُتَڢِے وُرِنْ دَ بَا كُواْوَ، دُوانْ كُطَنْ هُوتَ؞» 32 سَيْ سُكَ شِغَ جِضْغٍ ضُوَ سُكَ تَڢِے وُرِنْدَ بَا كُواْوَ، سَيْ سُو كَطَيْ؞ 33 عَمَّا دَسُكٜىٰ بَرِنْ وُرِنْ، وَطَنْسُ مُتَنٜىٰ دَيَوَ سُكَ غَنْسُ، سُكَ كُمَ غَانٜىٰسُ؞ سَيْ سُكَبِے تُدُ سُنَ تَغُدُ دَ ڧَڢَا دَغَ غَرُرُوَ دُكَ، سُكَ رِغَاسُ ذُوَا؞ 34 دَسَوْكَرْ عِيسَىٰ سَيْ يَغَ تَارُواْ مَيْ يَوَ، يَكُمَجِ تَوْسَيِنْسُ، دُواْمِنْ سُنَ كَمَرْ تُمَكِنْ دَ بَاسُدَ مَكِيَايِ؞ سَيْ يَڢَارَ كُواْيَ مُسُ أَبُبُوَ دَيَوَ؞ 35 كُسَنْ ڢَاطُوَرْ رَانَ سَيْ أَلْمَجِرَنْسَ سُكَذُواْ وُرِنْسَ، سُكَثٜىٰ مَسَ «وَنَّنْ وُرِے ڢَا بَا كُواْوَ؞ غَاشِ كُوَ رَانَ تَكُسَنْ ڢَاطُوَ؞ 36 كَسَلَّمِ مُتَنٜىٰنْ سُشِغَ كَرْكَرَ دَ ڧَوْيُكَ نَكُرْكُسَ، سُسَيَ وَكَنْسُ أَبِنْدَ ذَاسُثِ؞» 37 عَمَّا عِيسَىٰ يَأَمْسَ مُسُ يَثٜىٰ «كُو دَيْ، كُبَاسُ وَنِ أَبُ سُثِ مَنَ؞» سَيْ سُكَثٜىٰ مَسَ «وَتُواْ مُجٜىٰ مُسَيُواْ عَبِنْثِ نَكُطِنْ دَ عَكٜىٰ بِيَنْ لٜىٰبُرَ يِنِ طَرِے بِيُ، مُثِيَرْ دَسُو؟» 38 يَثٜىٰ مُسُ «غُرَاسَ نَوَ كُكٜىٰ دَسُو؟ كُجٜىٰ كُدُوبَ؞» دَ سُكَ بِنْثِكَ سُكَثٜىٰ «غُرَاسَ بِيَرْ نٜىٰ دَ كِيڢِ بِيُ؞» 39 سَعَنً عِيسَىٰ يَسَا أَلْمَجِرَنْسَ سُسَا مُتَنٜىٰنْ سُذَوْنَ ڧُنْغِيَ ڧُنْغِيَ أَطَنْيَرْ ثِيَوَ؞ 40 سَيْ سُكَ ذَوْنَ ڧُنْغِيَ ڧُنْغِيَ، وَطَنْسُ طَرِے طَرِے، وَطَنْسُ كُمَ حَمْسِنْ حَمْسِنْ؞ 41 دَ يَطَوْكِ غُرَاسَ بِيَرْ طِنْ دَ كِيڢِ بِيُنْ، سَيْ يَطَغَ كَيْ سَمَ، يَيِ غُواْدِيَ غَ اللَّهْ، يَرَرَّبَ، يَيِتَبَا أَلْمَجِرَنْ، سُنَ كَيْوَ مُتَنٜىٰنْ؞ يَكُمَ رَبَوَ دُكَنْ مُتَنٜىٰنْ كِيڢِنَّنْ بِيُ؞ 42 دُكَ كُوَ سُكَثِ سُكَ ڧُواْشِ، 43 حَرْ سُكَ تَتَّارَ غُڟَڟَّرِنْ غُرَاسَرْ دَ كِيڢِنْ، عَكَ سَامِ ݣُونْدُواْ غُواْمَشَا بِيُ ثِكٜىٰ؞ 44 يَوَنْ مُتَنٜىٰنْ دَ سُكَثِ وَنَّنْ عَبِنْثِ كُوَ مَظَا دُبُو بِيَرْ نٜىٰ؞ عِيسَىٰ يَيِ تَڢِيَ عَكَنْ ضُوَ ﴿ مَتْ 14.22-33 ؛ يَحـ 6.16-21 ﴾ 45 نَنْ دَنَنْ عِيسَىٰ يَسَا أَلْمَجِرَنْسَ سُشِغَ جِضْغٍ ضُوَ سُرِغَاشِ حَيٜىٰوَ ذُوَا بٜىٰڟَيْدَ، شِيكُمَ يَسَلَّمِ تَارُوانْ؞ 46 بَايَنْدَ يَسَلَّمٜىٰسُ، سَيْيَهَوْ وَنِ تُدُ دُواْمِنْ يَيِ أَدُّعَ؞ 47 دَرَانَ تَڢَاطِ، جِضْغٍ يَنَ ڟَكِيَرْ تٜىٰكُ، عِيسَىٰ كُوَ يأَنَانً عَكَنْ تُدُ شِے كَطَيْ؞ 48 دَيَغَ سُنَ ڢَامَ دَ تُوڧِ، دُواْمِنْ إِسْكَ تَنَ غَابَادَسُو، مِصَالِنْ ڧَرْڢٜىٰ عُكُ نَدَرٜىٰ، سَيْغَاشِ يَنَ ذُوَا وُرِنْسُ، يَنَ تَاكَاوَ عَكَنْ ضُوً تٜىٰكُ؞ يَيِ كَمَرْ ذَيْ وُثٜىٰسُ؞ 49 عَمَّا دَ سُكَ غَنْشِ يَنَ تَڢِيَ عَكَنْ ضُوً، سَيْ سُكَيِ ڟَمَّنِ ڢَتَلْوَثٜىٰ، سُكَيِ إِيهُ، 50 دُواْمِنْ دُكْ سُنْ غَنْشِ، سُكَ ڢِرْغِتَ؞ سَيْ نَنْ دَنَنْ يَيِ مُسُ مَغَنَ يَثٜىٰ «كَدَ كُدَامُ! نِنٜىٰ، كَدَ كُجِڟُواْرُواْ!» 51 سَعَنً يَشِغَ ثِكِنْ جِضْغٍ دَسُو، إِسْكَرْ كُمَ تَݣُونْتَ؞ سَيْ مَامَاكِ يَكَامَسُ ڨُورَيْ، 52 سَبُواْدَ بَسُسَنْ مٜىٰنٜىٰنٜىٰ مَعَنَرْ ثِيَرْدَ مُتَنٜىٰ دُبُو بِيَرْ نَنْبَ، غَمَا ذُوثِيَارْسُ بَتَڢَهِمْثِ مَعَنَرْبَ؞ عِيسَىٰ يَوَرْكَرْ دَ مَرَسَ لَاڢِيَ أَ جَنِيسَرَتْ ﴿ مَتْ 14.34-36 ﴾ 53 سَعَدَّ عِيسَىٰ دَ أَلْمَجِرَنْسَ سُكَ ڧٜىٰتَرٜىٰ تٜىٰكُنْ، سُكَ سَوْكَ عَيَنْكِنْ جَنِيسَرَتْ، سُكَ طَوْرٜىٰ جِضْغٍ عَبَاكِنْ تٜىٰكُنْ؞ 54 دَ ڢِتَرْسُ دَغَ جِضْغٍ ضُوً، سَيْ نَنْ دَنَنْ مُتَنٜىٰ سُكَ غَانٜىٰ، أَشٜىٰ، عِيسَىٰ نٜىٰ؞ 55 سُكَ يِتَغُدُ دَغَ كُواْعِنَ عَثِكِنْ يَنْكِنْ، سُكَيِ تَكَٰوُاْ مَرَسَ لَاڢِيَ عَكَنْ أَبِنْ ݣُونْثِيَرْسُ ذُوَا دُكْ عِنْدَ سُكَجِ عِيسَىٰ يَكٜىٰ؞ 56 دُكْ عِنْدَ يَتَڢِے كُمَ، بِرْنِ كُواْ ڧَوْيٜىٰ كُواْ ڢِيلَيٜىٰنْ ڧَوْيٜىٰ، سُكَنْ ݣُونْتَرْدَ مَرَسَ لَاڢِيَ عَبَاكِنْ كَاسُوَ، سُضُواْڧٜىٰشِ يَيَرْدَ مَرَسَ لَاڢِيَرْ سُتَٻَ كُواْ دَ بَاكِنْ رِغَرْسَ مَا؞ دُكَنْ وَطَنْدَ سُكَ تَٻَشِ كُوَ سُكَ وَرْكٜىٰ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria