مَرْكُسْ 16 - أَتَّوْرَتْ دَ أَنَّبَاوَاتَاشِنْ عِيسَىٰ دَغَ مَتَتُّو ﴿ مَتْ 28.1-8 ؛ لُكْ 24.1-12 ؛ يَحـ 20.1-10 ﴾ 1 دَ رَانَرْ هُوتُ تَمَكُواْ تَوُثٜىٰ، مَرْيَمُ دَغَ مَغَدَلَ دَ مَرْيَمُ مَامَرْ يَعْڧُوبَ دَ كُمَ سَلُواْمِ، سُكَ سَيُواْ كَايَنْ ڧَنْشِ دُواْمِنْ سُجٜىٰ سُشَاڢَ وَ جِكِنْ عِيسَىٰ؞ 2 أَ رَانَرْ ڢَرْكُواْ تَمَكُواْ دَ سَسَّڢٜىٰ وَجٜىٰنْ ڢِتُواْوَرْ رَانَ سُكَ تَڢِے كَبَرِنْ؞ 3 دَ سُكٜىٰ كَنْ حَنْيَ، سُكَثٜىٰ وَجُونَ «وَ ذَيْ تُرٜىٰ مَنَ دُوڟٜىٰنْ دَغَ بَاكِنْ كَبَرِنْ؟» 4 عَمَّا دَ سُكَ كَيْ وُرِنْ، سُكَ طَغَ كَيْ سُكَغَ، أَشٜىٰ، أَنْرِغَا أَنْتُرٜىٰ دُوڟٜىٰنْ؞ بَبَّنْ دُوڟٜىٰ نٜىٰ كُوَ؞ 5 دَ سُكَ شِغَ كَبَرِنْ، سَيْ سُكَغَ وَنِ سَوْرَيِ أَ ظَوْنٜىٰ أَغٜىٰڢٜىٰنْ دَامَ دَ ڢَرَرْ رِغَا أَجِكِنْسَ، سَيْ سُكَجِڟُواْرُواْ؞ 6 سَيْ سَوْرَيِنْ يَثٜىٰ مُسُ «كَدَ كُيِ مَامَاكِ؞ كُنَ نٜىٰمَنْ عِيسَىٰ بَنَظَرٜىٰتْ وَنْدَ عَكَ غِثِّيٜىٰ؟ أَيْ، يَتَاشِ؞ بَايَ نَنْ؞ غَا عِنْدَ عَكَ ݣُونْتَرْ دَشِ! 7 يَنْذُ سَيْ كُتَڢِے كُغَيَوَ أَلْمَجِرَنْسَ، حَرْ دَ بِتْرُسْ، ثٜىٰوَ ذَيْ رِغَاسُ ذُوَا غَلِيلِ، عَثَنْ نٜىٰ ذَاسُ غَنْشِ كَمَرْ يَدَّ يَڢَطَا مُسُ؞» 8 مَاتَانْ كُوَ سُكَ ڢِتَ دَ غُدُ، سُنْ رُوطٜىٰ سُنَ ضَوَرْ جِكِے؞ بَسُ كُمَ ڢَطَا وَكُواْوَ كُواْمٜىٰبَ، دُواْمِنْ سُنَ جِنْ ڟُواْرُواْ؞ [ عِيسَىٰ يَبَيَّنَ كَنْسَ غَ مَرْيَمُ ﴿ مَتْ 28.9-10 ؛ يَحـ 20.11-18 ﴾ 9 دَ عِيسَىٰ يَتَاشِ دَغَ مَتَتُّو دَ سَسَّڢٜىٰ أَ رَانَ تَڢَرْكُواْ تَمَكُواْ، يَڢَارَ نُونَ كَنْسَ غَ مَرْيَمُ دَغَ مَغَدَلَ، وَتُواْ مَثٜىٰنَّنْ دَ عِيسَىٰ يَڢِتَرْ مَتَ دَ أَلْجَنُ بَݣَويْ؞ 10 عِتَ كُوَ تَتَڢِے تَڢَطَا وَمُتَنٜىٰنْ دَسُكٜىٰ تَرٜىٰدَشِ تُنْدَا، وَطَنْدَ سُكٜىٰ بَڧِنْ ثِكِ سُنَ تَكُوكَا؞ 11 عَمَّا دَ سُكَجِ ثٜىٰوَ عِيسَىٰ يَنَدَ رَيْ، حَرْ مَا تَغَنْشِ، بَسُ بَادَ غَسْكِيَابَ؞ عِيسَىٰ يَنُونَ كَنْسَ غَ أَلْمَجِرَيْ بِيُ ﴿ لُكْ 24.13-35 ﴾ 12 بَايَنْ حَكَ عِيسَىٰ يَثَنْجَ كَمَنِّ يَنُونَ كَنْسَ غَ وَطَنْسُ بِيُ دَغَ ثِكِنْ أَلْمَجِرَنْ أَ لُواْكَثِنْ دَسُكٜىٰ تَڢِيَ ڧَوْيٜىٰ؞ 13 سَيْ بِيُنَّنْ سُكَ كُواْمَ سُكَ ڢَطَا وَسَوْرَنْ، عَمَّا حَرْ يَنْذُ سُكَڧِ سُيَرْدَ دَ لَابَرِنْ؞ عَيْكِنْدَ عِيسَىٰ يَبَا أَلْمَجِرَنْسَ ﴿ مَتْ 28.16-20 ؛ لُكْ 24.36-49 ؛ يَحـ 20.19-23 ؛ أَيُّكَنْ 1.6-8 ﴾ 14 دَغَ بَايَ عِيسَىٰ يَنُونَ كَنْسَ غَ شَا طَيَنْ أَدَيْدَيْ لُواْكَثِنْ دَسُكٜىٰثِنْ عَبِنْثِ؞ سَيْ يَڟَاوَتَا مُسُ عَكَنْ رَشِنْ بَنْغَسْكِيَرْسُ دَ تَوْرِنْ كَنْسُ، دُوانْ بَسُ غَسْكَتَ وَطَنْدَ سُكَ غَنْشِ بَايَنْ تَاشِنْسَبَ؞ 15 يَكُمَ ثٜىٰمُسُ «كُتَڢِے كُواْعِنَ أَدُكَنْ دُونِيَا، كُيِ وَدُكَنْ یَنْ أَدَمْ شٜىٰلَرْ لَابَرِنَّنْ مَيْ دَاطِے؞ 16 دُكْ وَنْدَ يَبَادَ غَسْكِيَ، عَكَ كُمَيِ مَسَ بَڢْتِسْمَ، ذَيْسَامِ ثٜىٰتُواْ؞ عَمَّا دُكْ وَنْدَ يَڧِ بَادَ غَسْكِيَ ذَاعَ حُكُنْتَ شِ؞ 17 غَا أَبُبُوَنْ دَ مَاسُبِينَ ذَاسُيِ دُوانْ شَيْدَرْ غَسْكِيَرْسُ؞ عَثِكِنْ سُونَنَ ذَاسُ ڢِتَرْدَ أَلْجَنُ، ذَاسُ كُمَيِ مَغَنَ دَ سَابَبِّنْ هَرْسُنَ؞ 18 ذَاسُ طَوْكِ مَثِيظَيْ دَ حَنُّوَنْسُ؞ عِدَنْ كُمَ سُكَشَا دَڢِ، بَذَيْ يِمُسُ كُواْمٜىٰبَ؞ ذَاسُ كُمَسَا حَنُّوَنْسُ عَكَنْ مَرَسَ لَاڢِيَ، سُوَرْكٜىٰ؞» أَنْ طَوْكِ عِيسَىٰ ذُوَا سَمَ ﴿ لُكْ 24.50-53 ؛ أَيُّكَنْ 1.9-11 ﴾ 19 بَايَنْدَ عُبَنْغِجِ عِيسَىٰ يَيِ مُسُ وَنَّنْ جَوَابِے، سَيْ عَكَ طَوْكٜىٰشِ عَكَ كَيْشِ ثِكِنْ سَمَ، يَذَوْنَ أَ حَنُّنْ دَامَ نَ اللَّهْ؞ 20 أَلْمَجِرَنْ كُوَ سُكَ ڢِتَ، سُكَيِ تَوَعَظِ كُواْعِنَ؞ عُبَنْغِجِ كُوَ يَيِ عَيْكِ تَرٜىٰدَسُو، يَنَ تَبَّتَرْ دَ غَسْكِيَرْ مَغَنَرْسُ تَوُرِنْ عَلَمُ مَاسُ بَنْ مَامَاكِنْدَ يَسَاسُ سُكَيِ تَرٜىٰدَ مَغَنَرْ؞] |
Hausa Common Language Ajami Bible © The Bible Society of Nigeria, 2020
Bible Society of Nigeria