مَرْكُسْ 14 - أَتَّوْرَتْ دَ أَنَّبَاوَاشُوغَبَنِّ سُنْيِ شَوَرَا سُكَشٜىٰ عِيسَىٰ ﴿ مَتْ 26.1-5 ؛ لُكْ 22.1-2 ؛ يَحـ 11.45-53 ﴾ 1 سَوْرَنْ ݣُونَ بِيُ عَيِ بِكٍ ڧٜىٰتَرٜىٰوَ دَ بِكٍ غُرَاسَرْ مَرَرْ يِسْتِ، سَيْ مَنْيَنْ ڢِرِسْتُواْثِے دَ مَلَمً كُواْيَرْوَرْ مُوسَٰى سُكَ نٜىٰمِ حَنْيَ سُكَامَ عِيسَىٰ عَٻُواْيٜىٰ، سُكَشٜىٰشِ؞ 2 عَمَّا سُنَ ثٜىٰوَ «بَدَيْ أَ لُواْكَثِنْ بِكِبَ، دُواْمِنْ كَدَ مُتَنٜىٰ سُتَادَ ضِكِثِ؞» أَنْ شَڢَاوَا عِيسَىٰ مَنْ ڧَنْشِ أَ بٜىٰتَنِ ﴿ مَتْ 26.6-13 ؛ يَحـ 12.1-8 ﴾ 3 عِيسَىٰ يَنَ بٜىٰتَنِ أَغِدَنْ وَنِ مُتُمْ وَنْدَ عَكٜىٰثٜىٰدَشِ سِيمَنْ مَيْ ثُوتَرْ ڢَتَرْ جِكِے؞ يَنَ ثِنْ عَبِنْثِ كٜىٰنَنْ، سَيْغَا وَتَ مَثٜىٰ تَذُواْ دَ وَتَ یَرْ ݣُولَبَرْ دَ عَكَيِ دَ دُوڟٜىٰنْ عُواْنِسْ ثِكٜىٰ دَ مَنْ ڧَنْشِ مَيْ ڟَادَ سُواْسَيْ وَنْدَ عَكَيِ دَ نَرْدِ ظَلَّ؞ سَيْ تَڢَشٜىٰ ݣُولَبَرْ تَظُبَ مَنْ عَكَنْ عِيسَىٰ؞ 4 وَطَنْسُ كُوَ دَسُكٜىٰ وُرِنْ سُكَجِ هَوْشِ، سُكَثٜىٰوَ جُونَ «يَيَ عَكَ ٻَاتَ وَنَّنْ مَيْ حَكَ؟ 5 دَ أَنْسَيَرْ دَشِ كُوَ دَ أَنْسَامِ يَوَنْ كُطِنْ دَ عَكٜىٰ بِيَنْ لٜىٰبُرَ يِنِ طَرِے عُكُ عَبَا تَلَكَاوَا، أَيْ دَيَڢِ!» سَيْ سُكَ ڟَاوَتَا وَمَاتَرْ سُواْسَيْ؞ 6 عَمَّا عِيسَىٰ يَثٜىٰ «كُبَرْتَ مَنَ؞ دُوانْمٜىٰ كُكٜىٰ دَامُنْتَ؟ أَيْ، أَبُ مَيْݣَوْ نٜىٰ تَيِمِنِ؞ 7 مَاسُ بُڧَاتَ سُنَ تَرٜىٰدَكُو كُلُّمْ؞ كُواْ يَوْشٜىٰ كُكٜىٰسُواْ، كُنَ عِيَيِ مُسُ أَلْحٜىٰرِ، عَمَّا بَكُلُّمْ نٜىٰ نَكٜىٰ تَرٜىٰدَكُوبَ؞ 8 تَايِ إِيَاكَثِنْ ڧُواْڧَرِنْتَ؞ تَا شَاڢَ جِكِينَ دَ مَيْ دُواْمِنْ شِرِنْ بِنّٜىٰوَتَ؞ 9 حَڧِيڧَ إِنَ غَيَ مُكُ، دُكْ عِنْدَ ذَاعَيِ شٜىٰلَرْ لَابَرِنَّنْ مَيْ دَاطِے عَدُونِيَا دُكَ، ذَاعَ دِنْغَ ڢَطِنْ أَبِنْدَ مَثٜىٰنَّنْ تَيِ دُواْمِنْ تُنَاوَا دَ عِتَ؞» يَهُودَ يَيَرْدَ يَبَادَ عِيسَىٰ ﴿ مَتْ 26.14-16 ؛ لُكْ 22.3-6 ﴾ 10 أَنَانً، سَيْ يَهُودَ إِسْكَرِيُواْتِ طَيَ دَغَ ثِكِنْ أَلْمَجِرَيْ شَا بِيُنَّنْ، يَجٜىٰ وُرِنْ مَنْيَنْ ڢِرِسْتُواْثِے دُواْمِنْ يَبَادَ عِيسَىٰ أَغَرٜىٰسُ؞ 11 دَسُكَجِ حَكَ سُكَيِ مُرْنَ سُواْسَيْ، حَرْ سُكَيِ أَلْڧَوَرِ ذَاسُبَا شِ كُطِ؞ يَهُودَ كُوَ يَڢَارَ نٜىٰمَنْ حَنْيَ دُواْمِنْ يَبَاشٜىٰشِ؞ عِيسَىٰ يَثِ عَبِنْثِنْ بِكٍ ڧٜىٰتَرٜىٰوَ تَرٜىٰدَ أَلْمَجِرَنْسَ ﴿ مَتْ 26.17-25 ؛ لُكْ 22.7-14 ، 21-23 ؛ يَحـ 13.21-30 ﴾ 12 أَ رَانَرْ ڢَرْكُواْ تَبِكٍ غُرَاسَرْ مَرَرْ يِسْتِ، وَتُواْ رَنْ دَ عَكَنْ يَنْكَ طَنْ ضَغُواْ نَبِكٍ ڧٜىٰتَرٜىٰوَ، سَيْ أَلْمَجِرَنْ عِيسَىٰ سُكَ تَمْبَيٜىٰشِ سُكَثٜىٰ «إِنَا كَكٜىٰسُواْ مُجٜىٰ مُشِرْيَ مَكَ ثِنْ بِكٍ ڧٜىٰتَرٜىٰوَ؟» 13 سَيْ يَعَيْكَ أَلْمَجِرَنْسَ غُدَا بِيُ، يَثٜىٰمُسُ «كُشِغَ غَرِ؞ ثَنْ ذَاكُ غَمُ دَ وَنِ مُتُمْ يَنَ طَوْكٜىٰ دَ تُلُنْ ضُوَ؞ كُبِيشِ؞ 14 دُكْ غِدَنْدَ يَشِغَ، كُثٜىٰ وَمَيْغِدَنْ، ‹مَلَمْ يَنَ تَمْبَيَ ثٜىٰوَ إِنَا طَاكِنْ دَ ذَيْثِ بِكٍ ڧٜىٰتَرٜىٰوَ دَ أَلْمَجِرَنْسَ؟› 15 شِے كُوَ ذَيْ نُونَ مُكُ وَنِ بَبَّنْ طَاكِنْ سَمَ وَنْدَ عَكَ غَمَ ڠَرَنْسَ دُوانْ بِكٍ؞ أَوُرِنْ ذَاكُ شِرْيَ مَنَ عَبِنْثِ؞» 16 سَيْ أَلْمَجِرَنْ سُكَتَاشِ، سُكَ شِغَ ثِكِنْ غَرِ، سُكَ كُوَ سَامِ أَبُبُوَ كَمَرْ يَدَّ عِيسَىٰ يَڢَطَا مُسُ؞ سَيْ سُكَ شِرْيَ عَبِنْثِنْ بِكٍ ڧٜىٰتَرٜىٰوَ؞ 17 دَ يَمَّ تَيِ، عِيسَىٰ دَ أَلْمَجِرَنْسَ شَا بِيُنَّنْ سُكَذُواْ غِدَنْ؞ 18 سُنَ ثِنْ عَبِنْثِ كٜىٰنَنْ، سَيْ عِيسَىٰ يَثٜىٰ «حَڧِيڧَ إِنَ غَيَ مُكُ، طَيَ دَغَ ثِكِنْكُ ذَيْ بَاشٜىٰنِ، وَنْدَ يَنْذُ يَكٜىٰ ثِنْ عَبِنْثِ تَرٜىٰدَنِ؞» 19 سَيْ أَلْمَجِرَنْ سُكَ ڢَارَ بَڧِنْ ثِكِ، سُنَ ثٜىٰ مَسَ دَ طَيَ طَيَ «كُواْ نِنٜىٰ؟» 20 عِيسَىٰ يَأَمْسَ، يَثٜىٰ «طَيَ دَغَ ثِكِنْكُ شَا بِيُنَّنْ نٜىٰ دَيْ، وَنْدَ مُكٜىٰثِ دَغَ ڨُورْيَ طَيَ؞ 21 طَنْ مُتُمْ ذَيْ مُتُ، كَمَرْ يَدَّ يَكٜىٰ أَرُبُوثٜىٰ غَمٜىٰدَشِ؞ عَمَّا كَيْتُوانْ وَنْدَ ذَيْبَادَ طَنْ مُتُمْ! ذَيْ ڢِيٜىٰوَ مُتُمِنَّنْ دَمَا بَعَ حَيْڢٜىٰشِيبَ؞» جِيبِنْ عُبَنْغِجِ ﴿ مَتْ 26.26-30 ؛ لُكْ 22.14-23 ؛ 1 كُوارْ 11.23-25 ﴾ 22 سُنَ ثِكِنْ ثِنْ عَبِنْثِ، سَيْ عِيسَىٰ يَطَوْكِ غُرَاسَ، يَيِ غُواْدِيَ غَ اللَّهْ، يَكَكَّرْيَ، يَبَا أَلْمَجِرَنْسَ، يَثٜىٰ «كُكَرْٻَ، وَنَّنْ جِكِينَ نٜىٰ؞» 23 بَايَنْ وَنَّنْ كُمَ، يَطَوْكِ ݣُوڢْ نَضُوً إِنَبِے يَيِ غُواْدِيَ غَ اللَّهْ، يَبَاسُ؞ دُكَنْسُ كُوَ سُكَشَا دَغَ ثِكِ؞ 24 سَعَنً يَثٜىٰ مُسُ «وَنَّنْ جِنِنَ نٜىٰ؞ جِنِ نَثِكَرْ يَرْجٜىٰجٜىٰنِيَرْ؞ ذَاعَ ظُبَرْ دَشِ سَبُواْدَ مُتَنٜىٰ دَيَوَ؞ 25 إِنَ غَيَ مُكُ غَسْكِيَ، بَذَنْ ڧَارَ شَنْ ضُوً إِنَبِنَّنْبَ، سَيْدَيْ أَ رَانَرْ دَ ذَنْشَا وَنِ سَابُوانْ أَمُلْكٍ اللَّهْ؞» 26 بَايَنْدَ سُكَ رٜىٰرَ وَاڧَا، سَيْسُكَ ڢِتَ سُكَ تَڢِے تُدُنْ عِتَتُوَنْ ظَيْتُنْ؞ بِتْرُسْ ذَيْ يِ مُسُونْ سَنِنْ عِيسَىٰ ﴿ مَتْ 26.31-35 ؛ لُكْ 22.31-34 ؛ يَحـ 13.36-38 ﴾ 27 عِيسَىٰ يَثٜىٰ وَ أَلْمَجِرَنْسَ «دُكَنْكُ ذَاكُ غُدُ كُبَرْنِ، كَمَرْ يَدَّ عَكَ رُبُوتَ ثٜىٰوَ « ‹ذَنْ بُغِ مَكِيَايِنْ، تُمَكِنْ كُمَ ذَاسُ غُدُ؞› » 28 «عَمَّا بَايَنْدَ نَتَاشِ دَغَ مَتَتُّو، ذَنْ رِغَاكُ ذُوَا غَلِيلِ؞» 29 سَيْ بِتْرُسْ يَثٜىٰ مَسَ «كُواْ دُكَنْسُ سُنْ غُدُ سُنْ بَرْكَ، نِے كَمْ، بَذَنْ بَرْكَبَ؞» 30 عِيسَىٰ يَثٜىٰ مَسَ «غَسْكِيَ إِنَ غَيَ مَكَ، يَوْ، عَثِكِنْ دَرٜىٰنَّنْ، كَاڢِنْ ظَكَرَ يَيِ ثَارَ سَوْ بِيُ، ذَاكَيِ مُسُونْ سَنِنَ سَوْ عُكُ؞» 31 عَمَّا بِتْرُسْ يَيِ تَمَيْمَيْتَاوَا دَ ڧَرْڢِے يَنَ ثٜىٰوَ «كُواْ دَ ذَاعَ كَشٜىٰنِ تَرٜىٰدَكَيْ، بَذَنْيِ مُسُونْ سَنِنْكَبَ سَمْ؞» دُكَنْ سَوْرَنْ أَلْمَجِرَنْسَ مَا سُكَ ڢَطِ حَكَ؞ عِيسَىٰ يَيِ أَدُّعَ أَ غٜىٰڟٜىٰمَنِ ﴿ مَتْ 26.36-46 ؛ لُكْ 22.39-46 ﴾ 32 سُكَ تَڢِے وَنِ وُرِنْ دَ عَكٜىٰ ثٜىٰ دَشِ غٜىٰڟٜىٰمَنِ وَتُواْ، وُرِنْ مَڟٜىٰوَرْ یَیَنْ ظَيْتُنْ، سَيْ عِيسَىٰ يَثٜىٰ وَ أَلْمَجِرَنْسَ «كُذَوْنَ أَنَنْ؞ ذَنْجٜىٰ إِنْيِ أَدُّعَ؞» 33 سَيْ يَطَوْكِ بِتْرُسْ دَ يَعْڧُوبَ دَ يَحْيَى تَرٜىٰ دَشِ؞ أَنَانً، سَيْ يَڢَارَ دَامُوَ ڨُورَيْ، حَرْ جِكِنْسَ يَيِ سَنْيِ؞ 34 سَيْ يَثٜىٰ مُسُ «بَڧِنْ ثِكِ دَيَكٜىٰ أَ رَيْنَ ذَيْ عِيَ كَشٜىٰنِ؞ كُذَوْنَ أَنَنْ، كُيِ ڟَرُواْ؞» 35 دَ يَجٜىٰ غَبَ كَطَنْ، سَيْ يَڢَاطِ عَڧَسَا، يَيِ أَدُّعَ يَثٜىٰ، عِدَنْ يَا يِوُ، أَطَوْكٜىٰ مَسَ وَنَّنْ لُواْكَثِنْ وَهَلَ؞ 36 يَثٜىٰ «أَبَّ، عُبَا، كُواْوَنٜىٰ أَبُ مَيْيِوُوَ نٜىٰ أَغَرٜىٰكَ؞ كَطَوْكٜىٰ مِنِ وَنَّنْ ݣُوڢْ نَوَهَلَ؞ دُكْدَهَكَ دَيْ، كَيِ أَبِنْدَ كَكٜىٰسُواْ، بَ أَبِنْدَ نِے نَكٜىٰسُواْبَ؞» 37 بَايَنْ وَنَّنْ، سَيْ يَدَاوُاْ يَسَامِ أَلْمَجِرَنَّنْ عُكُ سُنَ بَرْثِ؞ سَيْ يَثٜىٰ وَ بِتْرُسْ «بِتْرُسْ، كَنَ بَرْثِ نٜىٰ؟ أَشٜىٰ، بَذَاكَ عِيَ ڟَرُواْ كُواْ دَ أَوَ طَيَبَ؟ 38 كُيِ ڟَرُواْ كُنَ كُمَ أَدُّعَ دُواْمِنْ كَدَ كُڢَاطَ ثِكِنْ جَرَّبَ؞ لَلَّيْ رُوحُ يَطَوْكَ، عَمَّا جِكِنْ بَا ڧَرْڢِے؞» 39 سَيْ يَسَاكٜىٰ كُواْمَاوَا، يَيِ أَدُّعَ، يَنَ مَيْمَيْتَ مَغَنَرْ دَا؞ 40 سَعَنً يَسَاكٜىٰ دَاوُاْوَ، يَسَامٜىٰسُ سُنَ بَرْثِ دُوانْ عِدَنُونْسُ سُنْثِكَ دَ بَرْثِ سُواْسَيْ؞ سُكَ كُمَ رَسَ أَبِنْدَ ذَاسُ ڢَطَا مَسَ؞ 41 سَيْ يَجٜىٰ يَدَاوُاْ، نَعُكُ كٜىٰنَنْ، يَثٜىٰ مُسُ «حَرْ يَنْذُ بَرْثِ كُكٜىٰيِ كُنَ هُوتَوَا؟ شِكٜىٰنَنْ! لُواْكَثِ يَيِ دَ ذَاعَ بَادَ طَنْ مُتُمْ غَ حَنُّنْ مَاسُ ذُنُوبِ؞ 42 كُتَاشِ مُتَڢِے! غَا مَيْ بَاشٜىٰنِ نَنْ يَ إِسُواْ!» أَنْ كَامَ عِيسَىٰ ﴿ مَتْ 26.47-56 ؛ لُكْ 22.47-53 ؛ يَحـ 18.3-12 ﴾ 43 عِيسَىٰ يَنَ ثِكِنْ مَغَنَ كٜىٰنَنْ، سَيْغَا يَهُودَ، طَيَ دَغَ ثِكِنْ أَلْمَجِرَنْسَ شَا بِيُنَّنْ، يَا ذُواْ تَرٜىٰدَ مُتَنٜىٰ دَيَوَ سُنَ رِڧٜىٰ دَ تَكُبَ دَ سَنْدُنَ؞ مَنْيَنْ ڢِرِسْتُواْثِے دَ مَلَمً كُواْيَرْوَرْ مُوسَٰى دَ شُوغَبَنِّ نٜىٰ سُكَ تُرُواْسُ؞ 44 يَهُودَ، وَنْدَ ذَيْ بَاشٜىٰشِ كُوَ، يَارِغَا يَشِرْيَ مُسُ عَلَمَ ثٜىٰوَ «وَنْدَ ذَنْ سُمْبَثٜىٰ شِ، شِينٜىٰ مُتُمِنْ؞ كُكَامَشِ كُتَڢِے؞ كُرِڧٜىٰشِ دَݣَوْ؞» 45 دَ ذُوَانْ يَهُودَ، سَيْ يَمِيڧٜىٰ ذُوَا وُرِنْ عِيسَىٰ، يَثٜىٰ مَسَ «مَلَمْ!» سَيْ يَسُمْبَثٜىٰ شِ؞ 46 سَيْ مُتَنٜىٰنْ كُوَ سُكَ كَامَ عِيسَىٰ سُكَ رِڧٜىٰشِ دَ ڧَرْڢِے؞ 47 عَمَّا طَيَ دَغَ ثِكِنْ أَلْمَجِرَنْ عِيسَىٰ وَنْدَ يَكٜىٰ ڟَيٜىٰ كُسَ، يَظَارٜىٰ تَكُواْبِنْسَ، يَسَارِ بَاوَنْ بَبَّنْ ڢِرِسْتِ، يَيَنْكٜىٰ مَسَ كُنّٜىٰ؞ 48 عِيسَىٰ يَثٜىٰ مُسُ «كُنْڢِتُواْ دَ تَكُبَ دَ سَنْدُنَ كُكَامَنِ سَيْ كَثٜىٰ طَنْ ڢَشِ؟ 49 كُواْوَثٜىٰ رَانَ إِنَ تَرٜىٰدَكُو أَ هَيْكَلِ إِنَ كُواْيَرْوَا، بَكُكَامَ نِبَ؞ بَا كُواْمٜىٰ؞ أَنْيِ حَكَنٜىٰ ڢَا دُواْمِنْ أَنَّبْثِنْ رُبُوتَثِّيَرْ مَغَنَرْ اللَّهْ يَثِكَ؞» 50 دَغَ نَنْ دُكَنْ أَلْمَجِرَنْ سُكَ بَرْشِ، سُكَ غُدُ؞ 51 أَݣَويْ وَنِ سَوْرَيِ يَبِے عِيسَىٰ، بَاشِ دَ رِغَا، سَيْ مَيَاڢِ كَوَيْ؞ دَمُتَنٜىٰنْ سُكَيِ ڧُواْڧَرِنْ كَامَشِ، 52 سَيْ يَبَرْ مَيَاڢِنْسَ أَ حَنُّنْسُ يَغُدُ ڟِرَرَ؞ عِيسَىٰ أَغَبَنْ یَنْ مَجَلِسَ ﴿ مَتْ 26.57-68 ؛ لُكْ 22.54-55 ، 63-71 ؛ يَحـ 18.13-14 ، 19-24 ﴾ 53 سُكَ كَيْ عِيسَىٰ وُرِنْ بَبَّنْ ڢِرِسْتِ، سَيْ مَنْيَنْ ڢِرِسْتُواْثِے دَ شُوغَبَنِّ دَ كُمَ مَلَمً كُواْيَرْوَرْ مُوسَٰى سُكَ تَارُ دُكْ أَوُرِنْ؞ 54 بِتْرُسْ كُمَ يَبِے عِيسَىٰ، عَمَّا دَغَ نٜىٰسَ؞ يَبِے شِ حَرْ ثِكِنْ ڢِيلِنْ غِدَنْ بَبَّنْ ڢِرِسْتِ طِنْ؞ أَوُرِنْ يَذَوْنَ تَرٜىٰدَ مَاسُ غَادِ، يَنَ جِنْ طُمِنْ وُتَا؞ 55 مَنْيَنْ ڢِرِسْتُواْثِے دَ سَوْرَنْ یَنْ مَجَلِسَ سُنَ تَنٜىٰمَنْ وَنِ أَبُ دَ ذَاعَيِ شَيْدَ عَكَنْ عِيسَىٰ ثٜىٰوَ يَيِ لَيْڢِے دُواْمِنْ سُكَشٜىٰشِ، عَمَّا بَسُ سَامُبَ؞ 56 مُتَنٜىٰ دَيَوَ كَمْ سُنْيِ شَيْدَرْ ڧَضْيَا، عَمَّا بَاكِنْسُ بَيْذُواْ طَيَبَ؞ 57 دَغَ بَايَ وَطَنْسُ سُكَتَاشِ ڟَيٜىٰ، سُكَيِ وَ عِيسَىٰ شَيْدَرْ ڧَضْيَا سُكَثٜىٰ، 58 «مُنْجِ يَثٜىٰ، وَيْ ذَيْ رُشٜىٰ هَيْكَلِنَّنْ دَ مُتَنٜىٰ سُكَ غِنَا، يَغِنَ وَنِ ثِكِنْ ݣُونَ عُكُ، وَنْدَ بَغِنِنْ مُتُمْبَ؞» 59 دُكْدَهَكَ دَيْ شَيْدَرْسُ بَتَذُواْ طَيَبَ؞ 60 سَيْ بَبَّنْ ڢِرِسْتِ يَتَاشِ يَڟَيَ أَڟَكِيَرْسُ، يَتَمْبَيِ عِيسَىٰ، يَثٜىٰ «بَاكَدَ وَتَ أَمْسَ؟ شَيْدَرْ دَسُكٜىٰ بَايَرْ عَكَنْكَ ڢَا؟» 61 عَمَّا عِيسَىٰ يَيِ شِضُ، بَيْبَاشِ كُواْ أَمْسَبَ؞ سَيْ بَبَّنْ ڢِرِسْتِ طِنْ يَسَاكٜىٰ تَمْبَيَرْسَ «كُواْ كَيْنٜىٰ أَلْمَسِيحُ طَنْ مَيْ أَلْبَرْكَ؟» 62 عِيسَىٰ يَأَمْسَ يَثٜىٰ «نِنٜىٰ؞ «كُمَ ذَاكُغَ طَنْ مُتُمْ ظَوْنٜىٰ أَ حَنُّنْ دَامَ نَ مَيْ إِيكُواْ، يَنَ كُمَ ذُوَا ثِكِنْ غِرْغِجٜىٰ نَسَرَرِنْ سَمَ؞» 63 سَيْ بَبَّنْ ڢِرِسْتِ يَيَاغٜىٰ رِيغُنَنْسَ، يَثٜىٰ «وَثٜىٰ شَيْدَ كُمَ مُكٜىٰ بُڧَاتَ؟ 64 كُنْ دَيْ جِ صَاٻُوانْدَ يَيِ وَ اللَّهْ! مٜىٰنٜىٰنٜىٰ رَعَيِنْكُ؟» سَيْ دُكَنْ مُتَنٜىٰ سُكَ يَنْكٜىٰ مَسَ شَرِيعَ ثٜىٰوَ عَكَشٜىٰشِ؞ 65 وَطَنْسُ مَا سُكَ ڢَارَ تُواْتُّواْڢَ مَسَ مِيَوْ، سُكَ طَوْرٜىٰ مَسَ إِدَانُو، سُكَ كُمَ مَمَّرٜىٰشِ، سُنَ ثٜىٰ مَسَ «ڢَطَا وَنْدَ يَمَرٜىٰكَ!» مَاسُ غَادِ كُمَ سُكَ يِتَيِ مَسَ دُوكَ؞ بِتْرُسْ يَيِ مُسُونْ سَنِنْ عِيسَىٰ ﴿ مَتْ 26.69-75 ؛ لُكْ 22.56-62 ؛ يَحـ 18.15-18 ، 25-27 ﴾ 66 بِتْرُسْ كُوَ يَنَ ڧَسَا أَ ڢِيلِنْ غِدَنْ، سَيْ وَتَ يَارِنْيَ عَثِكِنْ مَعَيْكَتَنْ بَبَّنْ ڢِرِسْتِ تَذُواْ وُرِنْ؞ 67 دَتَغَ بِتْرُسْ يَنَ جِنْ طُمِنْ وُتَا، سَيْ تَدُوبٜىٰشِ دَݣَوْ، تَثٜىٰمَسَ «أَيْ، كَيْ مَا كَنَ تَرٜىٰدَ عِيسَىٰ بَنَظَرٜىٰتْ نَنْ!» 68 عَمَّا بِتْرُسْ يَيِ مُسُو، يَثٜىٰ «بَنْ سَنْ مَا أَبِنْدَ كِكٜىٰ مَغَنَبَ؞ بَنْ غَانٜىٰبَ سَمْ!» دَ ڢَطِنْ حَكَ، سَيْ يَتَاشِ يَجٜىٰ ذَوْرٜىٰنْ غِدَنْ؞ نَنْ دَ نَنْ سَيْ ظَكَرَ يَيِ ثَارَ؞ 69 دَ يَارِنْيَرْ تَسَاكٜىٰ غَنْشِ أَوُرِنْ، سَيْ تَڢَطَا وَ وَطَنْدَ سُكٜىٰ ڟَيٜىٰ أَوُرِنْ «وَنَّنْ مَا طَيَ دَغَ ثِكِنْسُنٜىٰ؞» 70 سَيْ بِتْرُسْ يَسَاكٜىٰيِنْ مُسُو كُمَ؞ بَايَنْ طَنْ لُواْكَثِ كَطَنْ، وَطَنْدَ سُكٜىٰ ڟَيٜىٰ كُسَدَ بِتْرُسْ سُكَثٜىٰ مَسَ «بَاشَكَّ، كَيْ مَا طَيَ دَغَ ثِكِنْسُنٜىٰ؞ كَيْ بَمُتُمِنْ غَلِيلِ بَنٜىٰ؟» 71 عَمَّا بِتْرُسْ يَڢَارَ ذَاغِ يَنَ لَعَنْتَ كَنْسَ، يَنَ ضَنْڟُوَا كُمَ أَغَبَنْسُ، يَنَ ثٜىٰوَ «بَنْ مَا سَنْ مُتُمِنَّنْ دَ كُكٜىٰ مَغَنَرْسَبَ؞» 72 نَنْ دَ نَنْ سَيْ ظَكَرَ يَيِثَارَ سَوْ نَبِيُ؞ سَيْ بِتْرُسْ يَتُنَ دَ مَغَنَرْ دَ عِيسَىٰ يَڢَطَا مَسَ ثٜىٰوَ «كَاڢِنْ ظَكَرَ يَيِثَارَ سَوْ بِيُ، ذَاكَيِ مُسُونْ سَنِنَ سَوْ عُكُ؞» دَ يَتُنَ وَنَّنْ مَغَنَ، سَيْ يَڢَشٜىٰ دَ كُوكَا؞ |
Hausa Common Language Ajami Bible © The Bible Society of Nigeria, 2020
Bible Society of Nigeria