مَرْكُسْ 13 - أَتَّوْرَتْ دَ أَنَّبَاوَا

عِيسَىٰ يَيِ مَغَنَ عَكَنْ رُشٜىٰوَرْ هَيْكَلِ

¹ عِيسَىٰ يَنَ ڢِتُواْوَ كٜىٰنَنْ دَغَ هَيْكَلِ، سَيْ طَيَ دَغَ ثِكِنْ أَلْمَجِرَنْسَ يَثٜىٰ مَسَ ‏«‏مَلَمْ، دُوبِے مَنْيَنْ دُووَڟُنَّنْ دَ غِنٜىٰ غِنٜىٰنَّنْ مَاسُ بَنْ مَامَاكِ!‏»‏

² سَيْ عِيسَىٰ يَثٜىٰ مَسَ ‏«‏كَغَا دُكَنْ وَطَنَّنْ مَنْيَنْ غِنٜىٰ غِنٜىٰ؟ ذَاعَ رُشٜىٰسُ دُكَ؞ بَذَاعَبَرْ كُواْ دُوڟٜىٰ طَيَ عَكَنْ طَنْعُوَنْسَبَ؞»‏

ڢَرْكُوانْ وَهَلُواْلِ

³ عِيسَىٰ يَنَ ظَوْنٜىٰ عَكَنْ تُدُنْ عِتَتُوَنْ ظَيْتُنْ وَنْدَ يَكٜىٰ ڢُسْكَنْتَرْ هَيْكَلِنْ، سَيْ بِتْرُسْ دَ يَعْڧُوبَ دَ يَحْيَى دَ أَنْدَرَوُسْ سُكَ تَمْبَيٜىٰشِ عَٻُواْيٜىٰ، سُكَثٜىٰ،

⁴ ‏«‏كَغَيَ مَنَ، يَوْشٜىٰ نٜىٰ ذَاعَيِ وَطَنَّنْ أَبُبُوَ؟ وَثٜىٰ عَلَمَ ثٜىٰ ذَاعَ غَنِ أَ لُواْكَثِنْ دَسُكٜىٰ شِرِنْ ڢَرُوَ؟»‏

⁵ سَيْ عِيسَىٰ يَثٜىٰ مُسُ ‏«‏كُلُورَ ڢَا، كَدَ وَنِ يَرُوطٜىٰكُ؞

⁶ مُتَنٜىٰ دَيَوَ ذَاسُذُواْ عَثِكِنْ سُونَنَ، سُنَ ثٜىٰوَ سُونٜىٰنِ، حَرْ سُرُوطِ مُتَنٜىٰ دَيَوَ؞

⁷ عِدَنْ كُمَ كُكَجِ لَابَرِنْ يَاڧٜىٰ يَاڧٜىٰ دَ جِيتَ جِيتَرْسُ، كَدَ حَنْكَلِنْكُ يَتَاشِ؞ دُواْلٜىٰنٜىٰ وَنَّنْ يَڢَرُ، عَمَّا ڧَرْشٜىٰنْ بَيْ ذُواْ بَتُكُنَ؞

⁸ أَلْعُمَّ ذَاتَ تَاسَرْ وَ أَلْعُمَّ، مُلْكِ يَتَاسَرْ وَمُلْكِ؞ ذَاعَيِ تَرَوَرْ ڧَسَا أَوُرَارٜىٰ دَبَمْ دَبَمْ، ذَاعَ كُمَيِ يُنْوَ؞ عَمَّا دُكْ وَطَنَّنْ بَ عَيْنِحِنْ عَذَابَرْ بَنٜىٰ؞ مَسُواْمِنْ عَذَابَنٜىٰ كَوَيْ؞

⁹ ‏«‏سَيْ كُكُلَ دَ كَنْكُ، دُوانْ ذَاسُ كَيْكُ كُواْتُ عَكُمَيِ مُكُ دُوكَ أَ مَجَمِعُ؞ ذَاعَكَيْكُ غَبَنْ شُوغَبَنِّ دَ سَرَاكُنَ سَبُواْدَ سُونَنَ، دُواْمِنْ كُشَيْدَ لَابَرِ مَيْ دَاطِے أَغَبَنْسُ؞

¹⁰ عَمَّا كَاڢِنْ ڧَرْشٜىٰنْ يَذُواْ، دُواْلٜىٰنٜىٰ عَيِ وَدُكَنْ أَلْعُمَّيْ شٜىٰلَرْ لَابَرِنَّنْ مَيْ دَاطِے؞

¹¹ دُكْ لُواْكَثِنْ دَ سُكَ كَامَكُ سُكَ كَيْكُ كُواْتُ، كَدَ كُدَامُ عَكَنْ أَبِنْدَ ذَاكُ ڢَطَا؞ كُدَيْ ڢَطِ دُكْ أَبِنْدَ يَذُواْ مُكُ أَوَنَّنْ لُواْكَثِ، دُواْمِنْ بَكُونٜىٰ كُكٜىٰ مَغَنَبَ، رُوحُ مَيْ ڟَرْكِے نٜىٰ؞

¹² طَنْعُوَ ذَيْبَادَ طَنْعُوَنْسَ عَكَشٜىٰشِ، بَابَ كُمَ يَبَادَ طَنْسَ؞ یَیَ كُمَ ذَاسُ تَيَرْ وَ إِيَايٜىٰنْسُ حَرْ سُسَا عَكَشٜىٰسُ؞

¹³ كُواْوَ ذَيْڧِيكُ سَبُواْدَ سُونَنَ؞ عَمَّا دُكْ وَنْدَ يَجِمْرٜىٰ حَرْ ذُوَا ڧَرْشٜىٰ، ذَيْ ڟِيرَا؞»‏

مُوغُوَرْ وَهَلَ

¹⁴ ‏«‏ذَاكُ غَ أَبِنْ ڧَظَنْتَا مَيْ كَٰوُاْ هَلَّكَرْوَ دَيَكٜىٰ كَٰوُاْ رُشٜىٰوَ يَنَ ڟَيٜىٰ أَوُرِنْ دَ بَيْ كَمَاتَبَ؞ بَرِ مَيْ كَرَاتُ يَغَانٜىٰ؞ تُواْ، سَيْ وَطَنْدَ سُكٜىٰ ثِكِنْ يَنْكِنْ يَهُودِيَ سُغُدُ ذُوَا ثِكِنْ دُوَڟُو؞

¹⁵ وَنْدَ يَكٜىٰ كَنْ رُڢِنْ طَاكِ كُمَ كَدَ يَسَوْكُواْ يَشِغَ ثِكِنْ غِدَا وَيْ ذَيْ طَوْكِ وَنِ أَبُ؞»‏

¹⁶ ‏«‏وَنْدَ يَكٜىٰ أَغُواْنَ كُمَ كَدَ يَكُواْمَ وَيْ ذَيْ طَوْكِ مَيَاڢِنْسَ؞

¹⁷ كَيْتُوانْ مَاتَا مَاسُثِكِ دَ مَاسُ غُواْيُواْ أَوَنَّنْ لُواْكَثِ!‏

¹⁸ كُيِ أَدُّعَ كَدَ أَبُبُوَنَّنْ سُڢَرُ أَ لُواْكَثِنْ سَنْيِ؞

¹⁹ عَݣُونَكِنْنَنْ ذَاعَيِ وَتَ عَذَابَ مَيْ ذَاڢِ سُواْسَيْ وَدَّ بَعَتَٻَيِبَ تُنْ ڢَرْكُوانْ لُواْكَثِنْ دَ اللَّهْ يَحَلِثِّ دُونِيَا، حَرْ ذُوَا يَنْذُ؞ بَكُوَ ذَاعَ ڧَارَ يِنْ إِرِنْتَبَ حَرْ أَبَدَا؞

²⁰ دَابَدُوانْ عُبَنْ‌غِجِ يَضَغٜىٰ ݣُونَكِنَّنْبَ دَا بَا طَنْ أَدَمْ دَ ذَيْ ڟِيرَا؞ عَمَّا سَبُواْدَ تَوْسَيِنْ وَطَنْدَ يَذَاٻَا، سَيْ يَضَغٜىٰ ڟَوُانْ ݣُونَكِنْ؞

²¹ ‏«‏أَ لُواْكَثِنَّنْ دُكْ وَنْدَ يَثٜىٰ مُكُ، ‏‹‏دُوبَ، غَ أَلْمَسِيحُ نَنْ!‏›‏ كُواْ، ‏‹‏دُوبَ، غَاشِ ثَنْ!‏›‏ كَدَ كُيَرْدَ؞

²² أَلْمَسِيحً ڧَضْيَا دَ أَنَّبَاوَنْ ڧَضْيَا ذَاسُ ڢِڢِّتُواْ، ذَاسُ نُونَ عَلَمُ دَ أَيُّكَنْ بَنْ مَامَاكِ، دُواْمِنْ سُرُوطِ مُتَنٜىٰ حَرْ مَا دَ وَطَنْدَ عَكَ ذَاٻَا، عِدَنْ ذَيْ يِوُ؞

²³ سَبُواْدَ حَكَ، كُلُورَ!‏ نَغَيَ مُكُ دُكَنْ كُواْمٜىٰ تُنْدَ وُرِے؞»‏

دَاوُاْوَرْ طَنْ مُتُمْ

²⁴ ‏«‏عَمَّا عَݣُونَكِنْنَنْ، وَتُواْ بَايَنْ عَذَابَرْ نَنْ مَيْ ذُوَا، ‏«‏ ‏‹‏رَانَ ذَاتَيِ دُهُ؞ وَتَ كُمَ بَذَيْ يِ حَصْكٜىٰبَ؞

²⁵ تَوْرَرِ ذَاسُدِنْ‌غَ ڢَاطُوَ دَغَ سَمَ؞ ذَاعَكُمَ غِرْغِظَ إِيكُواْكِنْ سَرَرِنْ سَمَ؞›‏

²⁶ ‏«‏سَعَنً ذَاعَ غَ طَنْ مُتُمْ يَنَ ذُوَا عَثِكِنْ غِرْغِجٜىٰ دَ إِيكُواْ مَيْغِرْمَ دَ طَوْكَكَ؞

²⁷ سَعَنً ذَيْ عَيْكُواْ مَلاَىِٕكُنْسَ سُتَتَّارُواْ وَطَنْدَ يَذَاٻَا دَغَ غَبَسْ دَ يَمَّ دَ كُدُ دَ أَرٜىٰوَ، وَتُواْ دَغَ وَنَّنْ إِيَاكَرْ دُونِيَا ذُوَا وَنْثَنْ؞»‏

كُواْيَرْوَا عَكَنْ إِتَاثٜىٰنْ ٻَوْرٜىٰ

²⁸ ‏«‏كُكُواْيِ وَنِ أَبُ دَغَ إِتَاثٜىٰنْ ٻَوْرٜىٰ؞ عِدَنْ رَسَّنْسَ سُنْ ڢَارَ سَاكٜىٰوَ، سُنَ ڢِتَرْدَ سَابُوانْ غَنْيٜىٰ، كُنْ سَنْ دَامِنَ تَيِكُسَ كٜىٰنَنْ؞

²⁹ حَكَكُمَ عِدَنْ كُكَغَ وَطَنَّنْ أَبُبُوَ سُنَ ڢَرُوَ، كُسَنْ لُواْكَثِ يَيِ كُسَ، يَنَدَبْ دَ بَاكِنْ ڧُواْڢَ؞

³⁰ حَڧِيڧَ إِنَ غَيَ مُكُ، مُتَنٜىٰنْ زَامَانِنَّنْ بَذَاسُ مُتُبَ، سَيْ دُكْ أَبُبُوَنَّنْ سُنْ ڢَرُ؞

³¹ سَمَ دَ دُونِيَا ذَاسُ ڧَارٜىٰ، عَمَّا كَلْمَتَ بَذَاتَ ڧَارٜىٰبَ كُواْ كَطَنْ؞

بَا وَنْدَ يَسَنْ رَانَرْ ذُوَانْ أَلْمَسِيحُ

³² ‏«‏عَمَّا بَاوَنْدَ يَسَنْ رَانَرْ، كُواْ عَڧَرْڢٜىٰ نَوَنٜىٰ وَنَّنْ ذَيْ ڢَرُ، كُواْ مَلاَىِٕكُنْ دَسُكٜىٰ سَمَ، كُواْ طَنْ، سَيْدَيْ عُبَنْ كَطَيْ؞

³³ كُلُورَ، كُذَوْنَ دَ شِرِ، دُواْمِنْ بَكُسَنْ لُواْكَثِ، كُواْ عَڧَرْڢٜىٰ نَوَنٜىٰ وَنَّنْ ذَيْ ڢَرُبَ؞

³⁴ كَمَرْ مُتُمْ نٜىٰ مَيْ تَڢِيَ، إِنْ يَتَاشِ، يَكَنْ بَادَ غِدَنْ أَ حَنُّنْ بَايِنْسَ، كُواْوَنّٜىٰنْسُ دَ عَيْكِنْ دَ ذَيْ يِ؞ سَعَنً يَڢَطَا وَمَيْغَادِنْ ڧُواْڢَ يَذَوْنَ أَشِرْيٜىٰ؞

³⁵ سَبُواْدَ حَكَ، كُذَوْنَ دَ شِرِ، دُوانْ بَكُسَنْ لُواْكَثِنْ دَ مَيْغِدَنْ ذَيْ دَاوُاْبَ؞ غَمَا ذَيْ عِيَ دَاوُاْوَ كُواْ دَ يَمَّ، كُواْ دَ ڟَكَرْ دَرٜىٰ، كُواْ دَ ثَارَرْ ظَكَرَ، كُواْ كُوَ دَ سَڢٜىٰ؞

³⁶ كَدَ يَذُواْ بَا لَابَرِ، يَسَامٜىٰكُ كُنَ بَرْثِ؞

³⁷ أَبِنْ دَ نَكٜىٰ غَيَ مُكُ، إِنَ غَيَ وَكُواْوَ نٜىٰ، كُذَوْنَ دَ شِرِ!‏»‏