مِيكَ 7 - أَتَّوْرَتْ دَ أَنَّبَاوَا

لَلَثٜىٰوَرْ إِسْرَٰٓءِيلَ

¹ كَيْتُواْنَ!‏ غَمَا نَا ذَمَ كَمَرْ مَيْ يُنْوَ، وَنْدَ بَيْ سَامِ كُواْمٜىٰبَ بَايَنْدَ عَكَيِ غِرْبِنْ أَمْڢَانِنْ غُواْنَ، بَايَنْدَ عَكَيِ كَالَ أَغُواْنَرْ إِنَبِے؞ بَابُ یَیَنْ إِنَبِنْدَ ذَاعَ ڟِنْكَ عَثِ، بَابُ یَیَنْ ٻَوْرٜىٰنْ دَ سُكَ نُونَ، وَنْدَ رَيْنَ يَكٜىٰسُواْ؞

² بَابُ مَاسُ حَلِنْ اللَّهْ دَ سُكَ ضَغٜىٰ عَڧَسَرْ، بَابُ مَيْ غَسْكِيَ أَ ظُوثِ وَنْدَ يَضَغٜىٰ؞ كُواْوَ يَنَ نٜىٰمَنْ دَامَرْ كَشٜىٰ وَنِ، كُواْوَ يَنَ ڢَرَوْتَرْ طَنْعُوَنْسُ دَ تَرْكُواْ؞

³ حَنُّوَنْسُ ڠُونِنْ عَيْكَتَ مُغُنْتَا نٜىٰ، سَرْكِے دَ أَلْڧَلِ دُكْ سُنَ نٜىٰمَنْ ثِنْ حَنْثِ، بَبَّنْ مُتُمْ يَنَ سَا عَيِ أَبِنْدَ ذُوثِيَارْسَ تَكٜىٰسُواْ؞ تَهَكَ سُنَ جُجُّويٜىٰ غَسْكِيَ؞

⁴ مُتُمْ مَڢِے كِرْكِ عَثِكِنْسُ كَمَرْ إِتَاثٜىٰ مَرَرْ یَیَ نٜىٰ؞ مَڢِے غَسْكِيَ عَثِكِنْسُ كُمَ كَمَرْ إِتَاثٜىٰنْ لٜىٰمُوانْ ڟُنْڟُ مَرَرْ یَیَنٜىٰ سَيْ ڧَيَ؞ رَانَرْ حُكُنْثِنْسُ تَذُواْ، رَانَرْ دَ عَكَ ڢَطَا مُسُ تَبَاكِنْ أَنَّبَاوَا مَاسُ غَادِنْسُ، يَنْذُ كُواْوَ يَضِكِثِے؞

⁵ كَدَ كَدُواْغَرَ غَ مَڨُوبْثِنْكَ، كَدَ كَأَمِنْثٜىٰ دَ أَبُواْكِنْكَ، كُواْ دَ مَاتَرْكَ وَدَّ كَكٜىٰ ڧَوْنَ، لُورَ دَ مَغَنَرْ بَاكِنْكَ؞

⁶ غَمَا طَا يَنَ رٜىٰنَ بَابَنْسَ، یَ مَثٜىٰ كُمَ تَنَ تَيَرْ وَ مَامَرْتَ، مَاتَرْ طَا تَنَ يِنْ غَابَادَ مَامَرْ مِجِنْتَ؞ أَبُواْكَنْ غَابَنْ مُتُمْ، مُتَنٜىٰنْ غِدَنْسَ نٜىٰ؞

⁷ عَمَّا نِے ذَنْ ظُبَ عِدُواْ غَ يَهْوٜىٰهْ ذَنْ جِرَا اللَّهْ مَيْ ثٜىٰتُواْنَ، اللَّهْ نَا كُوَ ذَيْجِينِ؞

يَهْوٜىٰهْ ذَيْ كَٰوُاْ ثٜىٰتُواْ

⁸ يَا أَبُواْكَنْ غَابَنَ، كَدَ كُيِ مُرْنَ عَكَيْنَ، غَمَا سَعَدَّ نَڢَاطِ، ذَنْ تَاشِ؞ سَعَدَّ نَذَوْنَ عَثِكِنْ دُهُ، يَهْوٜىٰهْ ذَيْ ذَمَ حَصْكٜىٰ أَغَرٜىٰنِ؞

⁹ ذَنْ جِمْرٜىٰ دَ ڢُشِنْ يَهْوٜىٰهْ غَمَا نَا يِمَسَ ذُنُوبِ؞ عَمَّا عَڧَرْشٜىٰ ذَيْ ڟَيَ مِنِ، يَدَيْدَيْتَ مُغُنْتَارْ دَ عَكَيِ مِنِ؞ ذَيْ كَٰوُاْ نِے ثِكِنْ حَصْكٜىٰ، ذَيْ نُونَ أَ ڢِيلِ بَ نِے دَ لَيْڢِے؞

¹⁰ سَعَنً أَبُواْكَنْ غَابَنَ ذَاسُ غَنِ، كُنْيَا ذَاتَ رُڢٜىٰ وَطَنْدَ سُكَثٜىٰ مِنِ، ‏«‏إِنَا يَهْوٜىٰهْ اللَّهْ نْكَ؟»‏ عِدَنُونَ ذَاسُغَ ڢَاطُوَرْسُ، يَنْذُ ذَاعَ تَتَّاكٜىٰسُ كَمَرْ لَاكَ عَتِيتُنَ؞

¹¹ رَانَرْ سَاكٜىٰ غِنَا كَتَنْ‌غَرْكُ تَنَ ذُوَا، رَانَرْ دَ ذَاعَ ڧَارَ ڢَاطِنْ إِيَاكَرْ ڧَسَرْكُ؞

¹² أَ رَانَرْ نَنْ مُتَنٜىٰنْكُ ذَاسُ دَاوُاْ وُرِنْكُ، دَغَ أَسُّرِيَ دَ كُواْغِنْ يُڢِرٜىٰتِسْ أَغَبَسْ، دَغَ كُمَ مَصَرْ عَكُدُ، دَغَ مَنْيَنْ تُدَّيْ دَ تٜىٰكُنَ مَاسُ نِيسَ؞

¹³ عَمَّا ڧَسَا كٜىٰوَيٜىٰ دَ تَاكُ ذَاتَ ذَمَ كُڢَيْ، سَبُواْدَ مُغُنْتَارْ مَذَوْنَنْ دَسُكٜىٰ ثِكِنْتَ؞

جِنْڧَنْ يَهْوٜىٰهْ عَكَنْ إِسْرَٰٓءِيلَ

¹⁴ يَا يَهْوٜىٰهْ، يِكِيوُانْ مُتَنٜىٰنْكَ دَ سَنْدَنْكَ، غَرْكٜىٰنْ تُمَكِنْكَ نَغَادُواْ، غَرْكٜىٰنْكَ وَنْدَ يَكٜىٰ ظَوْنٜىٰ شِ كَطَيْ عَكُرْمِ أَڟَكِيَرْ ڧَسَا مَيْ أَلْبَرْكَ؞ بَرِ سُڢِتَ سُيِ كِيوُاْ عَڧَسَرْ بَشَنْ دَ ڧَسَرْ غِلٜىٰيَدْ كَمَرْ ݣُونَكِنْ دَا؞

¹⁵ إِنْجِ يَهْوٜىٰهْ، ‏«‏ذَنْ نُونَ مُسُ أَيُّكَنْ بَنْ مَامَاكِ، كَمَرْ عَݣُونَكِنْ دَ سُكَ ڢِتَ دَغَ مَصَرْ؞

¹⁶ أَلْعُمَّيْ ذَاسُ غَنِ ذَاسُ كُمَ شَا كُنْيَا عَكَنْ دُكَنْ إِيكُوانْسُ؞ ذَاسُ سَا حَنُّ عَبَاكِ، كُنُّوَنْسُ ذَاسُ تُواْشٜىٰ؞

¹⁷ ذَاسُ لَشٜىٰ ڧُورَا كَمَرْ مَثِيجِ، كَمَرْ حَلِتُّو مَاسُ رَرَّڢٜىٰ؞ ذَاسُ ڢِتَ دَ ضَوَرْ جِكِے، دَغَ وُرَارٜىٰنْ ٻُيَنْسُ، ذَاسُ جُويُواْ وُرِينَ، نِے يَهْوٜىٰهْ اللَّهْ نْكُ، سَبُواْدَ ڟُواْرُواْ؞»‏

بَابُ وَنِ كَمَرْ اللَّهْ

¹⁸ بَابُوَنِ اللَّهْ كَمَرْكَ، يَا يَهْوٜىٰهْ!‏ كَيْ اللَّهْ نٜىٰ مَيْ يَاڢٜىٰ لَيْڢِے، مَيْ كَوَرْدَ ذُنُوبِ نَضَغُواْوَرْ جَمَعَرْكَ تَغَادُواْ؞ بَاكَ رِڧٜىٰ ڢُشِنْكَ حَرْ أَبَدَا، غَمَا كَنَ جِنْ دَاطِے كَنُونَ ڧَوْنَ مَرَرْ ثَنْجَاوَا؞

¹⁹ ذَاكَ سَاكٜىٰ جُويُواْوَ كَيِ مَنَ جِنْڧَيْ ذَاكَ تَتَّاكَ لَيْڢُواْڢِنْمُ ڧَرْڧَشِنْ ڧَڢَاڢُنْكَ؞ ذَاكَ جٜىٰڢَرْ دَ دُكَنْ ذُنُبَنْمُ عَثِكِنْ ظُرْڢَڢَّنْ تٜىٰكُ؞

²⁰ ذَاكَ نُونَ أَمِنْثِنْكَ غَ مُتَنٜىٰنْكَ، ڧَوْنَرْكَ مَرَرْ ثَنْجَاوَا غَ ذُرِيَرْ يَعْڧُوبَ دَ إِبْرَٰهِيمْ، كَمَرْ يَدَّ كَرَنْڟٜىٰوَ كَاكَنِّنْمُ تُنْ زَامَانِنْ دَا؞