مَتِيُ 26 - أَتَّوْرَتْ دَ أَنَّبَاوَاشُوغَبَنِّ سُنْيِ شَوَرَا سُكَشٜىٰ عِيسَىٰ ﴿ مَرْ 14.1-2 ؛ لُكْ 22.1-2 ؛ يَحـ 11.45-53 ﴾ 1 دَ عِيسَىٰ يَغَمَ ڢَطِنْ وَطَنَّنْ أَبُبُوَ دُكَ، سَيْيَثٜىٰ وَ أَلْمَجِرَنْسَ، 2 «كُنْ سَنْ بِكٍ ڧٜىٰتَرٜىٰوَ يَضَغٜىٰ سَوْرَنْ ݣُونَ بِيُ، ذَاعَ كُمَ بَادَ طَنْ مُتُمْ أَغِثِّيٜىٰشِ؞» 3 سَيْ مَنْيَنْ ڢِرِسْتُواْثِے دَ شُوغَبَنِّنْ مُتَنٜىٰ سُكَ تَارُ أَغِدَنْ بَبَّنْ ڢِرِسْتِ، مَيْ سُونَ كَيَڢَ؞ 4 سُكَيِ شَوَرَا سُكَامَشِ عَٻُواْيٜىٰ سُكَشٜىٰشِ؞ 5 عَمَّا سُكَثٜىٰ «بَ دَيْ أَ لُواْكَثِنْ بِكِنْبَ، دُواْمِنْ كَدَ مُتَنٜىٰ سُتَادَ ضِكِثِ؞» أَنْ شَڢَاوَا عِيسَىٰ مَنْ ڧَنْشِ أَ بٜىٰتَنِ ﴿ مَرْ 14.3-9 ؛ لُكْ 7.37-38 ؛ يَحـ 12.1-8 ﴾ 6 تُواْ دَ عِيسَىٰ يَنَ بٜىٰتَنِ أَغِدَنْ سِيمَنْ، وَنْدَ دَا مَيْ ثُوتَرْ ڢَتَرْ جِكِے نٜىٰ، 7 سَيْ وَتَ مَثٜىٰ تَذُواْ وُرِنْ عِيسَىٰ دَ یَرْ ݣُولَبَرْ دَ عَكَيِ دَ دُوڟٜىٰنْ عُواْنِسْ ثِكٜىٰ دَ مَنْ ڧَنْشِ مَيْ ڟَادَ سُواْسَيْ؞ أَ لُواْكَثِنْ دَيَكٜىٰ ثِنْ عَبِنْثِ، سَيْ تَظُبَ مَسَ مَنْ عَكَيْ؞ 8 عَمَّا دَ أَلْمَجِرَنْ سُكَغَ حَكَ، سَيْ سُكَجِ هَوْشِ سُكَثٜىٰ وَجُونَنْسُ «أَيْ، وَنَّنْ ٻَرْنَثٜىٰ؞ 9 غَمَا دَ أَنْسَيَرْ دَ مَنَّنْ دَ أَنْسَامِ كُطِ مَيْ يَوَ أَنْبَا تَلَكَاوَا؞» 10 عَمَّا تُنْدَيَكٜىٰ عِيسَىٰ يَسَنْ أَبِنْدَ سُكٜىٰ ڢَطَا سَيْيَثٜىٰ مُسُ «دُوانْمٜىٰ كُكٜىٰ دَامُنْ مَثٜىٰنَّنْ؟ أَيْ، أَبُ مَيْݣَوْ نٜىٰ تَيِمِنِ؞ 11 مَاسُ بُڧَاتَ سُنَ تَرٜىٰدَكُو كُلُّمْ، عَمَّا بَ كُلُّمْ نٜىٰ نَكٜىٰ تَرٜىٰدَكُوبَ؞ 12 ظُبَ مِنِ مَنَّنْ دَ تَيِ كُوَ تَنَ شِرْيَ نِنٜىٰ دُواْمِنْ بِنّٜىٰوَ؞ 13 حَڧِيڧَ إِنَ غَيَ مُكُ، دُكْ عِنْدَ ذَاعَيِ شٜىٰلَرْ لَابَرِ مَيْ دَاطِنَّنْ، عَدُونِيَا دُكَ، ذَاعَ دِنْغَ ڢَطِنْ أَبِنْدَ مَثٜىٰنَّنْ تَيِ دُوانْ تُنَاوَا دَ عِتَ؞» يَهُودَ يَايَرْدَ يَبَادَ عِيسَىٰ ﴿ مَرْ 14.10-11 ؛ لُكْ 22.3-6 ﴾ 14 سَيْ طَيَ دَغَ ثِكِنْ شَا بِيُنْ، مَيْ سُونَ يَهُودَ إِسْكَرِيُواْتِ، يَجٜىٰ وُرِنْ مَنْيَنْ ڢِرِسْتُواْثِے، 15 يَثٜىٰ «مٜىٰ ذَاكُ بَا نِے، عِدَنْ نَبَاكُ شِ؟» سُكَ بَاشِ كُطِنْ أَظُرْڢَا تَلَاتِنْ؞ 16 تُنْدَغَ لُواْكَثِنَّنْ يَڢَارَ نٜىٰمَنْ حَنْيَرْ دَ ذَيْبَادَ عِيسَىٰ؞ عِيسَىٰ يَثِ عَبِنْثِنْ بِكٍ ڧٜىٰتَرٜىٰوَ تَرٜىٰدَ أَلْمَجِرَنْسَ ﴿ مَرْ 14.12-21 ؛ لُكْ 22.7-13 ، 21-23 ؛ يَحـ 13.21-30 ﴾ 17 تُواْ، أَ رَانَرْ ڢَرْكُواْ تَبِكٍ غُرَاسَرْ مَرَرْ يِسْتِ، سَيْ أَلْمَجِرَنْ سُكَذُواْ وُرِنْ عِيسَىٰ سُكَثٜىٰ مَسَ «إِنَا كَكٜىٰسُواْ مُشِرْيَ مَكَ كَثِ بِكٍ ڧٜىٰتَرٜىٰوَ؟» 18 يَثٜىٰ «كُجٜىٰ ثِكِنْ غَرِ وُرِنْ وَنِ مُتُمْ، كُثٜىٰ مَسَ، ‹مَلَمْ يَا ثٜىٰ، لُواْكَثِنْسَ يَيِ كُسَ، ذَيْثِ بِكٍ ڧٜىٰتَرٜىٰوَ أَغِدَنْكَ تَرٜىٰدَ أَلْمَجِرَنْسَ؞› » 19 أَلْمَجِرَنْ كُوَ سُكَيِ يَدَّ عِيسَىٰ يَثٜىٰ سُيِ، سُكَ كُمَ شِرْيَ عَبِنْثِنْ بِكٍ ڧٜىٰتَرٜىٰوَ؞ 20 دَ يَمَّ تَيِ، سَيْ يَذَوْنَ دُواْمِنْ يَثِ عَبِنْثِ تَرٜىٰدَ أَلْمَجِرَنْسَ شَا بِيُ؞ 21 سُنَ ثِكِنْ ثِنْ عَبِنْثِنْ كٜىٰنَنْ سَيْ عِيسَىٰ يَثٜىٰ مُسُ «حَڧِيڧَ إِنَ غَيَ مُكُ، طَيَ دَغَ ثِكِنْكُ ذَيْ بَاشٜىٰنِ؞» 22 سَيْ سُكَ دَامُ سُواْسَيْ، سُكَ ڢَارَ تَمْبَيَرْسَ دَ طَيَ طَيَ سُنَ ثٜىٰوَ «أَنْيَ، نِنٜىٰ، عُبَنْغِجِ؟» 23 سَيْ يَأَمْسَ يَثٜىٰ «وَنْدَ يَكٜىٰ ثِنْ عَبِنْثِ عَݣُونُواْ طَيَ تَرٜىٰدَنِ، شِينٜىٰ ذَيْبَادَنِ؞ 24 طَنْ مُتُمْ ذَيْ مُتُ كَمَرْ يَدَّ عَكَ رُبُوتَ عَثِكِنْ مَغَنَرْ اللَّهْ غَمٜىٰدَشِ؞ عَمَّا كَيْتُوانْ وَنْدَ ذَيْبَادَ طَنْ مُتُمْ! ذَيْڢِيٜىٰ وَمُتُمِنَّنْ دَمَا بَعَ حَيْڢٜىٰشِيبَ؞» 25 سَيْ يَهُودَ وَنْدَ يَبَاشٜىٰشِ يَثٜىٰ «مَلَمْ، كُواْ نِنٜىٰ؟» عِيسَىٰ يَثٜىٰ مَسَ «كَيْ مَا كَاڢَطَا؞» جِيبِنْ عُبَنْغِجِ ﴿ مَرْ 14.22-26 ؛ لُكْ 22.14-20 ؛ 1 كُوارْ 11.23-25 ﴾ 26 سُنَ ثِكِنْ ثِنْ عَبِنْثِ، سَيْ عِيسَىٰ يَطَوْكِ غُرَاسَرْ، يَيِ غُواْدِيَ غَ اللَّهْ، يَكَكَّرْيَ غُرَاسَرْ يَبَا أَلْمَجِرَنْسَ يَثٜىٰ «كُكَرْٻَ كُثِ، وَنَّنْ جِكِينَ نٜىٰ؞» 27 سَيْ يَطَوْكِ ݣُوڢْ نَضُوً إِنَبِے؞ بَايَنْدَ يَيِ غُواْدِيَ غَ اللَّهْ، سَيْ يَبَاسُ يَثٜىٰ «دُكَنْكُ كُشَا؞ 28 غَمَا وَنَّنْ جِنِنَ نٜىٰ نَثِكَرْ يَرْجٜىٰجٜىٰنِيَرْ، وَنْدَ ذَاعَ ظُبَرْ سَبُواْدَ مُتَنٜىٰ دَيَوَ، دُواْمِنْ غَاڢَرَرْ ذُنُبَنْسُ؞ 29 إِنَ غَيَ مُكُ، بَذَنْ ڧَارَ شَنْ ضُوً إِنَبِنَّنْبَ، سَيْدَيْ أَ رَانَرْ نَنْ دَ ذَنْشَا وَنِ سَابُواْ تَرٜىٰدَكُو أَمُلْكٍ عُبَانَ؞» 30 دَ عِيسَىٰ دَ أَلْمَجِرَنْسَ سُكَ رٜىٰرَ وَاڧَا، سَيْ سُكَ ڢِتَ، سُكَ تَڢِے تُدُنْ عِتَتُوَنْ ظَيْتُنْ؞ بِتْرُسْ ذَيْ يِ مُسُونْ سَنِنْ عِيسَىٰ ﴿ مَرْ 14.27-31 ؛ لُكْ 22.31-34 ؛ يَحـ 13.36-38 ﴾ 31 سَيْ عِيسَىٰ يَثٜىٰ مُسُ «دُكَنْكُ ذَاكُ غُدُ كُبَرْنِ أَدَرٜىٰنَّنْ، دُوانْ أَبِنْدَ ذَيْ ڢَرُ دَنِے، غَمَا أَرُبُوثٜىٰ يَكٜىٰ ثٜىٰوَ « ‹ذَنْ بُغِ مَكِيَايِنْ، تُمَكِنْ غَرْكٜىٰنْ كُمَ ذَاسُ وَڟٜىٰ؞› » 32 «عَمَّا ڢَا بَايَنْ أَنْتَاشٜىٰنِ دَغَ مَتَتُّو، ذَنْ رِغَاكُ ذُوَا غَلِيلِ؞» 33 سَيْ بِتْرُسْ يَثٜىٰ مَسَ «كُواْ دُكَنْسُ سُنْ غُدُ دُواْمِنْ أَبِنْدَ ذَيْ ڢَرُ دَكَيْ، نِے بَذَنْ غُدُبَ سَمْ؞» 34 سَيْ عِيسَىٰ يَثٜىٰ مَسَ «غَسْكِيَ إِنَ غَيَ مَكَ، أَدَرٜىٰنَّنْ، كَاڢِنْ ظَكَرَ يَيِ ثَارَ، ذَاكَيِ مُسُونْ سَنِنَ حَرْ سَوْ عُكُ؞» 35 بِتْرُسْ يَثٜىٰ مَسَ «كُواْ ذَاعَ كَشٜىٰنِ، بَذَنْيِ مُسُونْ سَنِنْكَبَ؞» حَكَ مَا دُكَنْ أَلْمَجِرَنْ سُكَثٜىٰ؞ عِيسَىٰ يَيِ أَدُّعَ أَ غٜىٰڟٜىٰمَنِ ﴿ مَرْ 14.32-42 ؛ لُكْ 22.39-46 ﴾ 36 سَعَنً عِيسَىٰ دَ أَلْمَجِرَنْسَ سُكَجٜىٰ وَنِ وُرِنْ دَ عَكٜىٰ ثٜىٰ دَشِ غٜىٰڟٜىٰمَنِ، وَتُواْ، وُرِنْ مَاڟَ یَیَنْ ظَيْتُنْ؞ يَثٜىٰ وَ أَلْمَجِرَنْ «كُذَوْنَ أَنَنْ، ذَنْجٜىٰ ثَنْ إِنْيِ أَدُّعَ؞» 37 سَيْ يَتَڢِے دَ بِتْرُسْ دَ یَیَنَّنْ نَ ظَبَدِ غُدَا بِيُ وَتُواْ، يَعْڧُوبَ دَ يَحْيَى، سَيْ يَڢَارَ بَڧِنْ ثِكِ دَ دَامُوَ سُواْسَيْ، 38 يَكُمَ ثٜىٰمُسُ «بَڧِنْ ثِكِنْ دَيَكٜىٰ أَ رَيْنَ ذَيْ عِيَ كَشٜىٰنِ؞ كُذَوْنَ أَنَنْ، كُيِ ڟَرُواْ تَرٜىٰدَنِ؞» 39 دَ يَجٜىٰ غَبَ كَطَنْ سَيْ يَڢَاطِ دَ ڢُسْكَرْسَ عَڧَسَا يَيِ أَدُّعَ يَثٜىٰ «عُبَانَ، عِدَنْ ذَيْ يِوُ، كَطَوْكٜىٰ مِنِ ݣُوڢْ نَوَهَلَرْ نَنْ؞ دُكْدَهَكَ دَيْ، بَ أَبِنْدَ نَكٜىٰسُواْ ذَاعَيِبَ، سَيْدَيْ أَبِنْدَ كَكٜىٰسُواْ؞» 40 يَدَاوُاْ وُرِنْ أَلْمَجِرَنْ يَسَامٜىٰسُ سُنَ بَرْثِ، سَيْيَثٜىٰ وَ بِتْرُسْ «أَشٜىٰ، بَذَاكُ عِيَيِنْ ڟَرُواْ تَرٜىٰدَنِيبَ كُواْ نَ أَوَ غُدَا؟ 41 كُيِ ڟَرُواْ، كُكُمَيِ أَدُّعَ دُواْمِنْ كَدَ كُڢَاطَ ثِكِنْ جَرَّبَ؞ لَلَّيْ رُوحُ يَيَرْدَ، عَمَّا جِكِنْ بَا ڧَرْڢِے؞» 42 سَيْ يَسَاكٜىٰ كُواْمَاوَا سَوْ نَبِيُ، يَجٜىٰ يَيِ أَدُّعَ يَثٜىٰ «عُبَانَ، عِدَنْ وَنَّنْ وَهَلَرْ بَذَاتَ وُثٜىٰبَ سَيْنَا شَاتَ، بَرِ أَعَيْكَتَ نُڢِنْكَ؞» 43 يَسَاكٜىٰ دَاوُاْوَ يَسَامٜىٰسُ سُنَ بَرْثِ، دُوانْ عِدَنُونْسُ سُنْثِكَ دَ بَرْثِ؞ 44 سَيْ يَسَاكٜىٰ بَرِنْسُ، يَجٜىٰ يَيِ أَدُّعَ سَوْ نَعُكُ، يَسَاكٜىٰ ڢَطَا مَغَنَرْ دَ يَيِ أَدَا؞ 45 سَيْ يَدَاوُاْ وُرِنْ أَلْمَجِرَنْ يَثٜىٰ مُسُ «حَرْ يَنْذُ بَرْثِ كُكٜىٰيِ كُنَ هُوتَوَا؟ تُواْ، غَاشِ لُواْكَثِ يَيِ دَ ذَاعَ بَادَ طَنْ مُتُمْ أَ حَنُّنْ مَاسُ ذُنُوبِ؞ 46 كُتَاشِ مُتَڢِے؞ غَا مَيْ بَاشٜىٰنِ نَنْ، يَا إِسُواْ؞» أَنْ كَامَ عِيسَىٰ ﴿ مَرْ 14.43-50 ؛ لُكْ 22.47-53 ؛ يَحـ 18.3-12 ﴾ 47 كَاڢِنْ يَرُڢٜىٰ بَاكِ سَيْغَا يَهُودَ طَيَ دَغَ ثِكِنْ شَا بِيُنَّنْ، تَرٜىٰدَ تَارُوانْ مُتَنٜىٰ دَيَوَ، سُنَ رِڧٜىٰ دَ تَكُبَ دَ سَنْدُنَ؞ مَنْيَنْ ڢِرِسْتُواْثِے دَ شُوغَبَنِّ نٜىٰ سُكَ عَيْكُواْسُ؞ 48 تُواْ، دَا مَا شِے مَيْ بَاشٜىٰشِ طِنْ يَارِغَا يَبَاسُ عَلَمَ ثٜىٰوَ «وَنْدَ ذَنْ سُمْبَثٜىٰشِ، شِينٜىٰ مُتُمِنْ؞ كُكَامَشِ؞» 49 دَ ذُوَانْسَ سَيْ يَمِيڧٜىٰ ذُوَا وُرِنْ عِيسَىٰ يَثٜىٰ مَسَ «سَلَّمَ دَيْ، مَلَمْ!» سَيْ يَهُودَ يَسُمْبَثٜىٰ شِ؞ 50 عِيسَىٰ يَثٜىٰ مَسَ «أَبُواْكِينَ، يِ أَبِنْدَ يَكَٰوُاْكَ؞» سَيْ مُتَنٜىٰنْ سُكَذُواْ سُكَ كَامَ عِيسَىٰ سُكَ رِڧٜىٰشِ؞ 51 دَ غَنِنْ حَكَ سَيْ طَيَ دَغَ ثِكِنْ وَطَنْدَ سُكٜىٰ تَرٜىٰدَ عِيسَىٰ، يَظَارٜىٰ تَكُواْبِنْسَ، يَسَارِ بَاوَنْ بَبَّنْ ڢِرِسْتِ، يَيَنْكٜىٰ كُنّٜىٰنْسَ؞ 52 سَيْ عِيسَىٰ يَثٜىٰ مَسَ «مَيْ دَ تَكُواْبِنْكَ، غَمَا دُكْ وَنْدَ يَطَوْكِ تَكُواْبِے، تَكُواْبِے نٜىٰ ذَيْ كَشٜىٰشِ؞ 53 كُنَ ڟَمَّنِ بَانِ دَ إِيكُواْ إِنْ نٜىٰمِ تَيْمَكُواْ دَغَ وُرِنْ عُبَانَ، كُمَ نَنْ دَنَنْ يَعَيْكُواْ مِنِ دَ مَلاَىِٕكُ ڢِيٜىٰدَ ڧُنْغِيَرْ سُواْجُواْجِ غُواْمَشَا بِيُ؟ 54 تُواْ، تَيَيَا كٜىٰنَنْ ذَاعَ ثِكَ أَبِنْدَ رُبُوتَثِّيَرْ مَغَنَرْ اللَّهْ تَڢَطَا ثٜىٰوَ لَلَّيْ وَنَّنْ أَبُ يَڢَرُ؟» 55 أَ لُواْكَثِنَّنْ عِيسَىٰ يَثٜىٰ وَمُتَنٜىٰنْ «كُنْڢِتُواْ نٜىٰ دَ تَكُبَ دَ سَنْدُنَ كُكَامَنِ سَيْ كَثٜىٰ طَنْ ڢَشِ؟ كُواْوَثٜىٰ رَانَ إِنَ ذَمَ أَ هَيْكَلِ إِنَ يِنْ كُواْيَرْوَا بَكُ كَمَنِبَ؞ 56 عَمَّا دُكْ وَنَّنْ يَڢَرُ نٜىٰ دُواْمِنْ عَثِكَ أَبِنْدَ أَنَّبَاوَا سُكَ رُبُوتَ عَثِكِنْ رُبُوتَثِّيَرْ مَغَنَرْ اللَّهْ؞» دَجِنْ حَكَ دُكَنْ أَلْمَجِرَنْسَ سُكَبَرْ شِ، سُكَ غُدُ؞ عِيسَىٰ أَغَبَنْ یَنْ مَجَلِسَ ﴿ مَرْ 14.53-65 ؛ لُكْ 22.54-55 ، 63-71 ؛ يَحـ 18.13-14 ، 19-24 ﴾ 57 سَيْ وَطَنْدَ سُكَ كَامَ عِيسَىٰ سُكَ كَيْ شِ وُرِنْ كَيَڢَ، بَبَّنْ ڢِرِسْتِ، عِنْدَ مَلَمً كُواْيَرْوَرْ مُوسَٰى دَ شُوغَبَنِّ سُنْ رِغَا سُنْ حَطُ؞ 58 عَمَّا بِتْرُسْ يَبِيسُ دَغَ نٜىٰسَ نٜىٰسَ، حَرْ ذُوَا ڢِيلِنْ غِدَنْ بَبَّنْ ڢِرِسْتِ؞ يَشِغَ يَذَوْنَ دَ مَاسُ غَادِ دُواْمِنْ يَغَ يَدَّ ذَاعَ غَمَ؞ 59 تُواْ، مَنْيَنْ ڢِرِسْتُواْثِے دَ یَنْ مَجَلِسَ، دُكْ سُكَ نٜىٰمِ شَيْدَرْ ڧَضْيَا دَ ذَاعَيِ وَ عِيسَىٰ دُواْمِنْ سُسَامِ دَامَ سُكَشٜىٰشِ؞ 60 عَمَّا بَسُ سَامُبَ، كُواْدَيَكٜىٰ وَطَنْسُ دَيَوَ سُنْ بَادَ شَيْدَرْ ڧَضْيَا؞ دَغَ ڧَرْشٜىٰ وَطَنْسُ مُتُمْ بِيُ سُكَ ڢِتُواْ 61 سُكَثٜىٰ «وَنَّنْ مُتُمْ يَثٜىٰ وَيْ ذَيْ عِيَرُشٜىٰ هَيْكَلِنْ اللَّهْ، يَكُمَ سَاكٜىٰ غِنَاشِ ثِكِنْ ݣُونَ عُكُ؞» 62 سَيْ بَبَّنْ ڢِرِسْتِ يَتَاشِ يَثٜىٰ «بَاكَ دَ وَتَ أَمْسَ؟ شَيْدَرْ دَسُكٜىٰ بَايَرْوَ عَكَنْكَ ڢَا؟» 63 عَمَّا عِيسَىٰ يَيِ شِضُ؞ سَيْ بَبَّنْ ڢِرِسْتِ يَثٜىٰ مَسَ «نَهَطَكَ دَ اللَّهْ مَيْ رَيْ، كَغَيَ مَنَ كُواْ كَيْنٜىٰ أَلْمَسِيحُ، طَنْ اللَّهْ؞» 64 عِيسَىٰ يَثٜىٰ مَسَ «يَدَّ كَڢَطَا؞ عَمَّا إِنَ غَيَ مُكُ دَغَ يَنْذُ ذَاكُغَ طَنْ مُتُمْ ظَوْنٜىٰ أَ حَنُّنْ دَامَنْ مَيْ إِيكُواْ، يَنَ كُمَ ذُوَا ثِكِنْ غِرْغِجٜىٰ نَسَرَرِنْ سَمَ؞» 65 سَيْ بَبَّنْ ڢِرِسْتِ يَيَاغٜىٰ رِيغُنَنْسَ سَبُواْدَ ٻَثِنْ رَيْ يَثٜىٰ «يَيِ وَ اللَّهْ صَاٻُواْ! وَثٜىٰ شَيْدَثٜىٰ كُمَ مُكٜىٰ نٜىٰمَ؟ كُنْجِ يَيِ وَ اللَّهْ صَاٻُواْ؞ 66 مٜىٰكُكَ غَنِ؟» سُكَ أَمْسَ سُكَثٜىٰ «يَ إِسَ عَكَشٜىٰشِ!» 67 سَيْ سُكَ تُواْتُّواْڢَ مَسَ مِيَوْ أَ ڢُسْكَ، سُكَ دُدُّكٜىٰشِ، وَطَنْسُ كُمَ سُكَ مَمَّرٜىٰشِ، 68 سُنَ ثٜىٰوَ «يِمَنَ أَنَّبْثِ، إِنْ كَيْ أَلْمَسِيحُ نٜىٰ! ڢَطَا وَنْدَ يَمَرٜىٰكَ!» بِتْرُسْ يَيِ مُسُونْ سَنِنْ عِيسَىٰ ﴿ مَرْ 14.66-72 ؛ لُكْ 22.56-62 ؛ يَحـ 18.15-18 ، 25-27 ﴾ 69 أَ لُواْكَثِنَّنْ بِتْرُسْ يَنَ ظَوْنٜىٰ عَثِكِنْ ڢِيلِنْ غِدَنْ، سَيْ وَتَ يَارِنْيَ مَيْ عَيْكِ أَغِدَنْ تَذُواْ وُرِنْسَ تَثٜىٰمَسَ «كَيْ مَا، أَيْ، تَرٜىٰ كَكٜىٰ دَ عِيسَىٰ مُتُمِنْ غَلِيلِنَّنْ!» 70 عَمَّا بِتْرُسْ يَيِ مُسُو أَغَبَنْسُ دُكَ يَثٜىٰ «نِے بَنْسَنْ أَبِنْدَ كِكٜىٰ مَغَنَ عَكَيْبَ!» 71 دَ يَڢِتُواْ ذَوْرٜىٰ، سَيْ وَتَ يَارِنْيَ مَيْ عَيْكِ أَغِدَنْ كُمَ تَغَنْشِ، تَثٜىٰ وَ وَطَنْدَ سُكٜىٰ ڟَيٜىٰ أَوُرِنْ «وَنَّنْ مُتُمْ يَنَ تَرٜىٰدَ عِيسَىٰ بَنَظَرٜىٰتْ!» 72 بِتْرُسْ يَسَاكٜىٰيِنْ مُسُو حَرْ دَ ضَنْڟُوَا يَنَ ثٜىٰوَ «بَنْ مَا سَنْ مُتُمِنْبَ؞» 73 أَنْ جِمَ كَطَنْ سَيْ وَطَنْدَ سُكٜىٰ ڟَيٜىٰ أَوُرِنْ سُكَذُواْ سُكَثٜىٰ وَ بِتْرُسْ «بَاشَكَّ كَيْ مَا طَيَنْسُ نٜىٰ؞ يَدَّ كَكٜىٰ مَغَنَ يَتُواْنٜىٰكَ؞» 74 سَيْ يَڢَارَ لَعَنْتَ كَنْسَ، يَنَ ضَنْڟُوَا، يَنَ ثٜىٰوَ «بَنْ مَا سَنْ مُتُمِنْبَ!» نَنْ تَكٜىٰ ظَكَرَ يَيِ ثَارَ؞ 75 سَيْ بِتْرُسْ يَتُنَ دَ مَغَنَرْ دَ عِيسَىٰ يَيِ مَسَ ثٜىٰوَ «كَاڢِنْ ظَكَرَ يَيِ ثَارَ، ذَاكَيِ مُسُونْ سَنِنَ سَوْ عُكُ؞» سَيْ بِتْرُسْ يَڢِتَ وَجٜىٰ يَيِ كُوكَا مَيْذَاڢِ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria