مَتِيُ 23 - أَتَّوْرَتْ دَ أَنَّبَاوَا

عِيسَىٰ يَتُواْنَ أَسِيرِنْ مَلَمً كُواْيَرْوَرْ مُوسَٰى دَ ڢَرِسِيَاوَا

¹ دَ مُتَنٜىٰ سُكَ تَارُ دَيَوَ تَرٜىٰدَ أَلْمَجِرَنْسَ، سَيْ عِيسَىٰ يَثٜىٰ مُسُ،

² ‏«‏مَلَمً كُواْيَرْوَرْ مُوسَٰى دَ ڢَرِسِيَاوَا سُونٜىٰ عَكَبَاسُ إِيكُوانْ كُواْيَرْ دَ كُواْيَرْوَرْ مُوسَٰى؞

³ سَبُواْدَ حَكَ كُيِ دُكْ أَبِنْدَ سُكٜىٰ كُواْيَ مُكُ، كُكُمَبِے، عَمَّا كَدَ كُيِ يَدَّ سُكٜىٰيِ، غَمَا بَاسَ يِنْ أَبِنْدَ سُكٜىٰ كُواْيَرْوَا؞

⁴ سُكَنْ طَوْرَ كَايَ مَاسُ نَوْيِ، مَاسُ وُيَرْ طَوْكَ، سُسَا وَمُتَنٜىٰ عَكَڢَطَ، عَمَّا سُو كَنْسُ بَاسَ تَيْمَكَ مُسُ كُواْ دَ طَنْ يَڟَ؞

⁵ سُنَيِنْ أَيُّكَنْسُ دُواْمِنْ مُتَنٜىٰ سُغَنِ نٜىٰ، سُنَ طَوْرَ مَنْيَ مَنْيَنْ ڧُنْشِنْ أَيُواْيِنْ مَغَنَرْ اللَّهْ أَغُواْشِنْسُ، سُنَيِنْ دُواْغَيٜىٰنْ ظَرٜىٰ مَاسُ لِلُواْ عَبَاكِنْ رِيغُنَنْسُ؞

⁶ ‏«‏سُنْ ثِكَ سُواْ عَبَاسُ وُرِنْ ذَمَنْ مَنْيَ أَوُرِنْ بِكِ دَ كُمَ وُرَارٜىٰنْ ذَمَ مَاسُ دَرَجَ أَ مَجَمِعُ،

⁷ عَكُمَ دِنْ‌غَ غَيْشٜىٰسُ عَكَاسُوَ، عَكُمَ دِنْ‌غَثٜىٰ مُسُ، ‏‹‏مَلَم›‏؞

⁸ عَمَّا كُو دَيْ، كَدَ عَثٜىٰمُكُ ‏‹‏مَلَم›‏، دُواْمِنْ مَلَمِنْكُ طَيَ نٜىٰ، دُكَنْكُ كُوَ یَنْعُوَ نٜىٰ؞

⁹ كَدَ كُثٜىٰ دَ كُواْوَ ‏‹‏عُبَا›‏ عَدُونِيَا، دُواْمِنْ عُبَا طَيَ غَرٜىٰكُ شِينٜىٰ وَنْدَ يَكٜىٰ ثِكِنْ سَمَ؞

¹⁰ كَدَ كُمَ عَثٜىٰ دَكُو ‏‹‏شُوغَبَا›‏، دُواْمِنْ شُوغَبَا طَيَ غَرٜىٰكُ، وَتُواْ أَلْمَسِيحُ؞

¹¹ وَنْدَ يَكٜىٰ بَبَّ عَثِكِنْكُ سَيْ يَذَمَ مَيْيِ مُكُ حِدِمَ؞

¹² دُكْ وَنْدَ يَطَوْكَكَ كَنْسَ، ذَاعَ ڧَسْڧَنْتَرْ دَشِ؞ عَمَّا دُكْ وَنْدَ يَڧَسْڧَنْتَرْ دَكَنْسَ، ذَاعَ طَوْكَكَاشِ؞

¹³ ‏«‏عَمَّا كَيْتُوانْكُ، كُو مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ كُنْ رُڢٜىٰوَ مُتَنٜىٰ ڧُواْڢَرْ شِغَ مُلْكٍ سَمَ؞ كُو كَنْكُ بَكُ شِغَبَ، كُمَ كُنَ حَنَ مَاسُسُواْ سُشِغَ دَامَرْ شِغَ؞

¹⁴ كَيْتُوانْكُ مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ كُكَنْثِ كَايَنْ مَاتَانْدَ مَذَنْسُ سُكَ مُتُ، سَعَنً كُكَنْيِ دُواْغُوَرْ أَدُّعَ دُواْمِنْ أَغَنْكُ؞ سَبُواْدَ حَكَ ذَاعَيِ مُكُ حُكُنْثِ مَڢِے ڟَنَنِ؞

¹⁵ ‏«‏كَيْتُوانْكُ مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ غَمَا كُكَنْ ڧٜىٰتَرٜىٰ تٜىٰكُ، كُكَنْ كَيْ ڧَسَاشٜىٰ مَاسُ نِيسَ دُواْمِنْ سَامُنْ مَيْ تُوبَ طَيَ؞ عِدَنْ كُوَ كُكَ سَامُ، سَيْ كُمَيْدَشِ طَنْ غِدَنْ وُتَا ڢِيٜىٰ دَكُو سَوْ بِيُ؞

¹⁶ ‏«‏كَيْتُوانْكُ، مَكَاڢِنْ جَغُواْرَ!‏ كُكَنْثٜىٰ، ‏‹‏دُكْ وَنْدَ يَرَنْڟٜىٰ دَ هَيْكَلِ، بَ دَامُوَ، عَمَّا دُكْ وَنْدَ يَرَنْڟٜىٰ دَ ظِينَارِيَرْ هَيْكَلِنْ، دُواْلٜىٰ يَيِ أَبِنْدَ يَرَنْڟٜىٰ ذَيْ يِ؞›‏

¹⁷ كُو وَوَيٜىٰنْ مَكَڢِ!‏ وَنٜىٰ يَڢِ غِرْمَ، ظِينَارِيَرْ، كُواْ هَيْكَلِنْدَ يَڟَرْكَكٜىٰ ظِينَارِيَرْ؟

¹⁸ كُكَنْ كُمَثٜىٰ، ‏‹‏دُكْ وَنْدَ يَرَنْڟٜىٰ دَ بَغَدٜىٰ، بَ دَامُوَ، عَمَّا دُكْ وَنْدَ يَرَنْڟٜىٰ دَ بَيْكُوانْ دَ عَكَسَا عَكَنْ بَغَدٜىٰنْ، دُواْلٜىٰ يَيِ أَبِنْدَ يَرَنْڟٜىٰ ذَيْ يِ؞›‏

¹⁹ كُو مَكَڢِ!‏ وَنٜىٰنٜىٰ يَڢِ غِرْمَ، بَيْكُوانْ نٜىٰ كُواْ بَغَدٜىٰنْ هَدَايَ وَنْدَ يَكٜىٰ ڟَرْكَكٜىٰ بَيْكُوانْ؟

²⁰ سَبُواْدَ حَكَ دُكْ وَنْدَ يَرَنْڟٜىٰ دَ بَغَدٜىٰنْ هَدَايَ، يَرَنْڟٜىٰ دَشِ دَ دُكْ أَبِنْدَ يَكٜىٰ كَنْسَ كٜىٰنَنْ؞

²¹ دُكْ كُمَ وَنْدَ يَرَنْڟٜىٰ دَ هَيْكَلِنْ، يَرَنْڟٜىٰ دَشِ دَ كُمَ اللَّهْ وَنْدَ يَكٜىٰ ظَوْنٜىٰ عَثِكِنْسَ؞

²² دُكْ وَنْدَ كُمَ يَرَنْڟٜىٰ دَسَمَ، يَرَنْڟٜىٰ دَ كُجٜىٰرَرْ مُلْكٍ اللَّهْ دَ كُمَ وَنْدَ يَكٜىٰ ظَوْنٜىٰ عَكَنْ كُجٜىٰرَرْ مُلْكٍ؞

²³ ‏«‏كَيْتُوانْكُ، مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ كُكَنْ بَادَ زَكَّرْ كَايَنْ يَجِ نَغَنْيٜىٰ عَمَّا كُنْ ڨَلٜىٰ أَبُبُوَنْ دَ سُكَڢِے مُهِمَّنْثِ عَثِكِنْ دُواْكُواْكِ، وَتُواْ غَسْكِيَ دَ جِنْڧَيْ دَ أَمِنْثِ؞ وَطَنَّنْ نٜىٰ يَا كَمَاتَ كُيِ بَاتَرٜىٰدَ ڨَلٜىٰ سَوْرَنْ بَ؞

²⁴ كُو مَكَاڢِنْ جَغُواْرَ، كُكَنْ تَاثٜىٰ طَنْ ڧَرَمِ ڨُورُواْ، عَمَّا كُكَنْ حَطِيٜىٰ رَاڧُمِ!‏

²⁵ ‏«‏كَيْتُوانْكُ، مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ كُكَنْ وَنْكٜىٰ بَايَنْ ݣُوڢْ دَ نَݣُونُواْ، عَمَّا عَثِكِ سُنَ ثِكٜىٰ دَ أَيُّكَ مَرَسَ ݣَوْ نَثُوثٜىٰ ثُوثٜىٰ دَ سُوانْكَيْ؞

²⁶ كَيْ مَكَهُوانْ بَڢَرِسِيٜىٰ!‏ سَيْكَڢَارَ وَنْكٜىٰ ثِكِنْ ݣُوڢْ دَ نَݣُونُواْ، دُواْمِنْ بَايَنْسُ مَا يَذَمَ دَڟَبْتَ؞

²⁷ ‏«‏كَيْتُوانْكُ، مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ كُنَ كَمَرْ كَبُرْبُرَنْ دَ عَكَ شَاڢَ مُسُ ڢَضٍ ڢٜىٰنْتِ، مَاسُ ݣَنْ غَنِ دَغَ وَجٜىٰ، عَمَّا عَثِكِ سَيْ ڧَسُسُوَنْ مَتَتُّو دَ دَتِّ إِرِ إِرِ؞

²⁸ حَكَ كُو كُمَ كُكٜىٰ، أَوَجٜىٰ مُتَنٜىٰ سُكَنْ غَ كَمَرْ كُو مَاسُ أَدَلْثِنٜىٰ، عَمَّا دَغَ ثِكِ، ثِكٜىٰ كُكٜىٰ دَ مُنَاڢُنْثِ دَ مُوغَيٜىٰنْ أَيُّكَ؞

²⁹ ‏«‏كَيْتُوانْكُ، مَلَمً كُواْيَرْوَرْ مُوسَٰى دَ ڢَرِسِيَاوَا، مُنَاڢُكَيْ!‏ غَمَا كُكَنْ غِنَا كَبُرْبُرَ مَاسُ ݣَوْ دُواْمِنْ أَنَّبَاوَا، كُكُمَيِ وَكَبُرْبُرَنْ مَاسُ أَدَلْثِے أَدُواْ؞

³⁰ كُكَنْثٜىٰ، ‏‹‏دَ مُنَانَنْ ݣُونَكِنْ كَاكَنِّنْمُ دَ بَمُ تَيْمَكٜىٰسُ ظُبْدَ جِنِنْ أَنَّبَاوَابَ؞›‏

³¹ تَهَكَ كُكَ نُونَ ثٜىٰوَ كُونٜىٰ یَیَنْ وَطَنْدَ سُكَ كَشٜىٰ أَنَّبَاوَا؞

³² تُواْ، سَيْ كُثِكَ مُودُنْ مُوغَيٜىٰنْ أَيُّكَنْ دَ كَاكَنِّنْكُ سُكَ ڢَارَ!‏

³³ كُو مَثِيظَيْ، كُو ڧُنْ‌غِيَرْ مُوغَيٜىٰنْ مَثِيظَيْ!‏ يَيَ ذَاكُ عِيَ غُجٜىٰ وَحُكُنْثِنْ غِدَنْ وُتَا؟

³⁴ سَبُواْدَ حَكَ إِنَ عَيْكَ مُكُ دَ أَنَّبَاوَا دَ مَاسُ حِكِمَ دَ مَلَمً كُواْيَرْوَرْ مُوسَٰى؞ ذَاكُ كَشٜىٰ وَطَنْسُ، كُغِثِّيٜىٰ وَطَنْسُ، كُكُمَيِ وَ وَطَنْسُ بُلَلَ أَ مَجَمِعُنْكُ، كُنَ بِنْسُ غَرِ غَرِ كُنَ ڟَنَنْتَ مُسُ؞

³⁵ ذَنْ عَيْكُواْ دَ وَطَنَّنْ مُتَنٜىٰ دُواْمِنْ أَلْحَكِنْ جِنِنْ مَاسُ أَدَلْثِے وَطَنْدَ عَكَ كَشٜىٰ عَدُونِيَا يَكُواْمَ كَنْكُ، تُنْدَغَ جِنِنْ هَبِيلَ مَيْ أَدَلْثِے، حَرْ ذُوَا نَ زَكَرِيَّا طَنْ بٜىٰرٜىٰكِيَ، وَنْدَ كُكَ كَشٜىٰ ڟَكَانِنْ وُرِے مَيْ ڟَرْكِے دَ بَغَدٜىٰنْ هَدَايَ؞

³⁶ حَڧِيڧَ إِنَغَيَ مُكُ، دُكْ وَنَّنْ ذَيْڢَرُ دَ مُتَنٜىٰنْ وَنَّنْ زَامَانِ؞»‏

عِيسَىٰ يَدَامُ عَكَنْ عُرُوشَلِيمَ

³⁷ ‏«‏أَيَّ عُرُوشَلِيمَ، عُرُوشَلِيمَ!‏ مَاسُ كَشٜىٰ أَنَّبَاوَا، مَاسُ جِڢَرْ وَطَنْدَ عَكَ عَيْكُواْ أَغَرٜىٰكِ!‏ سَوْ نَوَ نَسُواْ إِنْتَتَّرَاكُ كَمَرْ يَدَّ كَاظَا تَكٜىٰ تَتَّارَ یَیَنْتَ عَثِكِنْ ڢِكَڢِكَنْتَ، عَمَّا كُنْڧِ؞

³⁸ غَاشِ يَنْذُ، أَنْبَرْ مُكُ غِدَنْكُ كُڢَيْ!‏

³⁹ غَمَا إِنَغَيَ مُكُ، بَذَاكُ سَاكٜىٰ غَنِينَ بَ، سَيْ رَنْ دَ كُكَثٜىٰ، ‏‹‏مَيْ أَلْبَرْكَ نٜىٰ وَنْدَ يَكٜىٰ ذُوَا ثِكِنْ سُونَنْ عُبَنْ‌غِجِ؞›‏ »‏