مَتِيُ 13 - أَتَّوْرَتْ دَ أَنَّبَاوَامِصَالِ نَمَيْ شُوكَ ﴿ مَرْ 4.1-9 ؛ لُكْ 8.4-8 ﴾ 1 أَ رَانَرْ نَنْ عِيسَىٰ يَڢِتَ دَغَ غِدَنْ، يَجٜىٰ يَذَوْنَ عَبَاكِنْ تٜىٰكُ؞ 2 تَرُوانْ مُتَنٜىٰ دَيَوَ سُواْسَيْ سُكَ تَارُ كٜىٰوَيٜىٰ دَشِ، حَرْ سَيْ دَ يَشِغَ جِضْغٍ ضُوَ يَذَوْنَ، تَارُوانْ مُتَنٜىٰنْ كُمَ سُكَ ڟَيَ عَبَاكِنْ تٜىٰكُنْ؞ 3 سَيْ يَغَيَ مُسُ أَبُبُوَ دَيَوَ تَوُرِنْ مِصَلَيْ، يَثٜىٰ «وَنِ مَنُواْمِ يَجٜىٰ غُواْنَ دُواْمِنْ يَيِ شُوكَ؞ 4 يَنَ ثِكِنْ يَاڢَ إِرِ كٜىٰنَنْ، سَيْ وَطَنْسُ إِرِ سُكَ ڢَاطِ عَكَنْ حَنْيَ، سَيْ ڟُنْڟَيٜىٰ سُكَذُواْ سُكَ ثِنْيٜىٰسُ؞ 5 وَطَنْسُ كُمَ سُكَ ڢَاطِ أَوُرِے مَيْ دُوَڟُو عِنْدَ بَا ڧَسَا سُواْسَيْ؞ سُكَ ڟِرُواْ دَ سَوْرِ سَبُواْدَ ڧَسَرْ وُرِنْ بَا ظُرْڢِ؞ 6 دَ رَانَ تَيِ ذَاڢِ سَيْ تَڧُواْنٜىٰسُ، حَرْ سُكَ بُوشٜىٰ، غَمَا بَسُ دَ سَيْوَ سُواْسَيْ؞ 7 وَطَنْسُ كُمَ سُكَ ڢَاطِ أَوُرِنْ دَ أَݣَويْ ڧَيَ، سَيْ ڧَيَرْ تَتَاشِ تَشَا ڧَرْڢِنْسُ؞ 8 وَطَنْسُ كُمَ سُكَ ڢَاطِ عَڧَسَا مَيْݣَوْ، سُكَيِ ڟَابَ طَرِے طَرِے، وَطَنْسُ سِتِّنْ سِتِّنْ، وَطَنْسُ كُمَ تَلَاتِنْ تَلَاتِنْ؞ 9 بَرِ مَيْكُنّٜىٰنْجِ، يَجِ؞» مَنُڢَرْ مِصَالِ ﴿ مَرْ 4.10-12 ؛ لُكْ 8.9-10 ﴾ 10 سَيْ أَلْمَجِرَنْ عِيسَىٰ سُكَذُواْ سُكَثٜىٰ مَسَ «دُوانْمٜىٰ كَكٜىٰيِ مُسُ مَغَنَ دَ مِصَلَيْ؟» 11 يَأَمْسَ مُسُ يَثٜىٰ «كُو دَيْ أَنْيَرْدَ مُكُ كُغَانٜىٰ أَسِيرِنْ مُلْكٍ سَمَ، عَمَّا سُو بَعَبَاسُبَ؞ 12 غَمَا وَنْدَ يَكٜىٰدَ أَبُ ذَاعَ ڧَارَ مَسَ حَرْ يَيَلْوَتَ سُواْسَيْ، عَمَّا وَنْدَ بَاشِدَ كُواْمٜىٰ، ذَاعَ كَرْٻِ طَنْ كَطَنْ طِنْ دَ يَكٜىٰدَشِ؞ 13 أَبِنْدَ يَسَا نَكٜىٰيِ مُسُ مَغَنَ دَ مِصَلَيْ شِينٜىٰ، « ‹غَمَا كُواْ سُنْ دُوبَ بَاسَ غَنِ، كُواْ سُنْ سَوْرَرَ بَاسَجِ؞ بَاسَ كُمَ غَانٜىٰوَ؞› 14 «لَلَّيْ أَنَّبْثِنْ عِشَايَ يَا ثِكَ عَكَنْسُ ثٜىٰوَ ‹ذَاكُيِ تَجِ كَمْ، عَمَّا بَذَاكُ غَانٜىٰبَ سَمْ، ذَاكُيِ تَدُوبَاوَ كُمَ، عَمَّا بَذَاكُ ڢَهِمْتَبَ سَمْ؞ 15 غَمَا ذُوثِيَارْ مُتَنٜىٰنَّنْ تَيِ تَوْرِ، كُنُّوَنْسُ كُمَ بَاسَجِ؞ سُنْ كُمَ رُڢٜىٰ عِدَنُونْسُ، دُواْمِنْ كَدَ سُغَنِ دَ عِدَنُونْسُ، كَدَ كُمَ سُجِ دَ كُنُّوَنْسُ، دُواْمِنْ كَدَ سُغَانٜىٰ أَ ذُوثِيَارْسُ، حَرْ سُجُويُواْ وُرِينَ إِنْوَرْكَرْ دَسُو؞› 16 «عِدَنُونْكُ مَاسُ أَلْبَرْكَ نٜىٰ غَمَا سُنَ غَنِ؞ كُنُّوَنْكُ مَا حَكَ غَمَا سُنَجِ؞ 17 حَڧِيڧَ إِنَغَيَ مُكُ، أَنَّبَاوَا دَ مَاسُ أَدَلْثِے دَيَوَ سُنْسُواْ سُغَ أَبِنْدَ كُكٜىٰ غَنِ، عَمَّا بَسُ غَنِبَ، سُكُمَجِ أَبِنْدَ كُكٜىٰجِ، عَمَّا بَسُجِبَ؞» بَيَانِنْ مِصَالِنْ مَيْ شُوكَ ﴿ مَرْ 4.13-20 ؛ لُكْ 8.11-15 ﴾ 18 «تُواْ، غَا أَبِنْدَ مِصَالِنْ مَيْ شُوكَ يَكٜىٰ نُڢِ؞ 19 عِدَنْ مُتُمْ يَجِ كَلْمَرْ مُلْكٍ سَعَنً بَيْ غَانٜىٰبَ، شَيْطَنْ يَكَنْذُواْ يَڨُوثٜىٰ أَبِنْدَ عَكَ شُوكَ عَثِكِنْ ذُوثِيَارْ مُتُمِنْ؞ وَنَّنْ شِينٜىٰ إِرِنْدَ يَڢَاطِ عَكَنْ حَنْيَ؞ 20 إِرِنْدَ يَڢَاطِ أَوُرِنْ دَ يَكٜىٰدَ دُوَڟُو كُوَ، شِينٜىٰ ݣُوتَنْثِنْ مُتُمْ وَنْدَ دَظَرَرْ يَا جِ كَلْمَرْ اللَّهْ، سَيْ يَكَرْٻَ دَ ڢَضٍ ثِكِ؞ 21 عَمَّا دَيَكٜىٰ بَاشِدَ تُوشٜىٰ، بَيْ دَطٜىٰ سُواْسَيْبَ؞ سَعَدَّ عَذَابَ كُواْ ڟَنَنِ يَتَاشِ سَبُواْدَ وَنَّنْ كَلْمَرْ اللَّهْ، سَيْ مُتُمِنْ يَجَا دَ بَايَ؞ 22 إِرِنْدَ يَڢَاطِ أَوُرِنْ دَ أَݣَويْ ڧَيَ كُمَ، شِينٜىٰ ݣُوتَنْثِنْ مُتُمِنْ دَ عِدَنْ يَا جِ كَلْمَرْ اللَّهْ، سَيْ دَامُوَرْ دُونِيَا دَ سُوانْ أَرْزِڧِ سُحَنَ كَلْمَرْ غِرْمَ، حَرْ تَذَمَ بَاتَدَ أَمْڢَانِ؞ 23 إِرِنْدَ يَڢَاطِ عَڧَسَا مَيْݣَوْ كُمَ، شِينٜىٰ ݣُوتَنْثِنْ مُتُمِنْ دَ عِدَنْ يَا جِ كَلْمَرْ اللَّهْ يَكُمَ غَانٜىٰتَ، سَيْ يَيِ أَمْڢَانِ دَ عِتَ، حَرْ يَيِ رِيبَ، وَنِ طَرِے طَرِے، وَنِ سِتِّنْ سِتِّنْ، وَنِ كُمَ تَلَاتِنْ تَلَاتِنْ؞» مِصَالِ نَثِيَوَ ثِكِنْ أَلْكَمَ 24 عِيسَىٰ يَسَاكٜىٰبَاسُ وَنِ مِصَالِ يَثٜىٰ «ذَاعَ عِيَ ݣُوتَنْتَا مُلْكٍ سَمَ دَ مُتُمِنْدَ يَشُوكَ إِرِ مَيْݣَوْ أَغُواْنَرْسَ، 25 عَمَّا لُواْكَثِنْ دَ كُواْوَ يَكٜىٰ بَرْثِ، سَيْ أَبُواْكِنْ غَابَنْسَ يَجٜىٰ يَشُوكَ وَتَ إِرِنْ ثِيَوَ أَغُواْنَرْ أَلْكَمَرْ، يَتَڢِے أَبِنْسَ؞ 26 دَ شُوكَرْ تَتَاشِ تَيِ ڟَابَ، سَيْ ثِيَوَرْ مَا تَتَاشِ؞ 27 سَيْ بَايِنْ مَيْغِدَنْ سُكَذُواْ سُكَثٜىٰ مَسَ، ‹مَيْغِدَا، أَشٜىٰ، بَ إِرِ مَيْݣَوْ كَشُوكَ أَغُواْنَرْكَبَ؟ تُواْ، يَيَ دُكْ ثِيَوَ تَڢِتُواْ أَوُرِنْ؟› 28 «يَثٜىٰ مُسُ، ‹أَبُواْكِنْ غَابَنَ نٜىٰ يَيِ وَنَّنْ؞› «بَايِنْ سُكَثٜىٰ، ‹كَنَسُواْ مُجٜىٰ مُثِرٜىٰ ثِيَوَرْ؟› 29 «عَمَّا يَثٜىٰ، ‹أَعَ، كَدَ غَرِنْ ثِرٜىٰ ثِيَوَرْ كُثِرٜىٰ تَرٜىٰدَ أَلْكَمَرْ؞ 30 بَرِ دُكَنْسُ سُيِ غِرْمَ تَرٜىٰ حَرْ لُواْكَثِنْ غِرْبِے، أَ لُواْكَثِنْ غِرْبِنْ ذَنْ غَيَ وَمَاسُ غِرْبِنْ سُڢَارَ ثِرٜىٰ ثِيَوَرْ سُتَارَ، سُطَطَّوْرٜىٰ، عَڧُواْنٜىٰ، عَمَّا عَتَارَ أَلْكَمَرْ أَ ظُبَ أَ ضُمْبُنَ؞› » مِصَالِ نَڨُويَرْ مَسْتَدْ ﴿ مَرْ 4.30-32 ؛ لُكْ 13.18-19 ﴾ 31 عِيسَىٰ يَسَاكٜىٰبَاسُ وَنِ مِصَالِ، يَثٜىٰ «مُلْكٍ سَمَ كَمَرْ ڨُويَرْ مَسْتَدْ نٜىٰ وَنْدَ وَنِ مُتُمْ يَطَوْكَ يَشُوكَ أَغُواْنَرْسَ؞ 32 عِتَثٜىٰ تَاڢِ ڧَنْڧَنْتَ ثِكِنْ سَوْرَنْ إِرِ، عَمَّا عِدَنْ تَايِ غِرْمَ، سَيْ تَڢِے دُكْ سَوْرَنْ غَنْيَيٜىٰ، تَذَمَ بَبَّنْ إِتَاثٜىٰ، حَرْ مَا ڟُنْڟَيٜىٰ سُيِ غِدَنْسُ عَكَنْ رَسَّنْسَ؞» مِصَالِ نَيِسْتِ ﴿ لُكْ 13.20-21 ﴾ 33 عِيسَىٰ يَسَاكٜىٰبَاسُ وَنِ مِصَالِ، يَثٜىٰ «مُلْكٍ سَمَ كَمَرْ يِسْتِ يَكٜىٰ، وَنْدَ وَتَ مَثٜىٰ تَطَوْكَ تَݣُوٻَ دَ مُودُ عُكُ نَغَارِنْ أَلْكَمَ، حَرْ دُكْ غَارِنْ يَغَمٜىٰدَ يِسْتِنْ؞» عِيسَىٰ يَيِ أَمْڢَانِ دَ مِصَلَيْ ﴿ مَرْ 4.33-34 ﴾ 34 عِيسَىٰ يَغَيَوَ تَارُوانْ مُتَنٜىٰنْ دُكْ وَطَنَّنْ أَبُبُوَ دَ مِصَلَيْ؞ بَايَغَيَ مُسُ وَنِ أَبُ سَيْ تَرٜىٰدَ مِصَالِ؞ 35 وَنَّنْ كُوَ دُواْمِنْ عَثِكَ أَبِنْدَ أَنَّبِے عِشَايَ يَڢَطَا نٜىٰ ثٜىٰوَ «ذَنْيِ مَغَنَ دَ مِصَلَيْ، أَبِنْدَ يَكٜىٰ عَٻُواْيٜىٰ تُنْ ڢَرْكُوانْ دُونِيَا، ذَنْ سَنَرْدَشِ؞» بَيَانِنْ مِصَالِنْ ثِيَوَ ثِكِنْ أَلْكَمَ 36 سَيْ عِيسَىٰ يَبَرْ تَارُوانْ مُتَنٜىٰنْ يَشِغَ غِدَا، أَلْمَجِرَنْسَ كُمَ سُكَذُواْ وُرِنْسَ سُكَثٜىٰ مَسَ «كَغَيَ مَنَ أَبِنْدَ مِصَالِنَّنْ نَثِيَوَ أَغُواْنَ يَكٜىٰ نُڢِ؞» 37 سَيْ يَأَمْسَ يَثٜىٰ «وَنْدَ يَشُوكَ إِرِ مَيْݣَوْ شِينٜىٰ طَنْ مُتُمْ؞ 38 غُواْنَرْ كُمَ عِتَثٜىٰ دُونِيَا، إِرِ مَيْݣَوْ كُمَ شِينٜىٰ یَیَنْ مُلْكٍ، ثِيَوَرْ كُمَ یَیَنْ مُوغُنَّنْ نٜىٰ؞ 39 كُمَ أَبُواْكِنْ غَابَنْدَ يَشُوكَ ثِيَوَرْ، شِينٜىٰ شَيْطَنْ؞ لُواْكَثِنْ غِرْبِنْ كُوَ، ڧَرْشٜىٰنْ دُونِيَا نٜىٰ؞ مَاسُ غِرْبِنْ كُمَ سُونٜىٰ مَلاَىِٕكُ؞ 40 كَمَرْ يَدَّ عَكٜىٰ تَارَ ثِيَوَ عَڧُواْنٜىٰتَ، حَكَ ذَيْ ذَمَ عَڧَرْشٜىٰنْ دُونِيَا؞ 41 طَنْ مُتُمْ ذَيْ عَيْكُواْ دَ مَلاَىِٕكُنْسَ، ذَاسُ تَارَ دُكَنْ أَبُبُوَنْ دَ سُكَسَا مُتَنٜىٰ سُيِ ذُنُوبِ دَ كُمَ دُكْ مَاسُ يِنْ مُوغَيٜىٰنْ أَيُّكَ، سُڢِتَرْ دَسُو دَغَ مُلْكِنْسَ، 42 سُكُمَ جٜىٰڢَسُ عَثِكِنْ غِدَنْ وُتَا مَيْ ذَاڢِ؞ أَ نَنْ ذَاسُيِ تَكُوكَا سُنَ ثِظُوانْ هَڧُواْرَنْسُ؞ 43 أَ لُواْكَثِنْ نٜىٰ مَاسُ أَدَلْثِے ذَاسُ حَصْكَكَ كَمَرْ رَانَ عَثِكِنْ مُلْكٍ عُبَنْسُ؞ بَرِ مَيْكُنّٜىٰنْجِ، يَجِ؞» مِصَالِ نَدُكِيَرْدَ تَكٜىٰ عَٻُواْيٜىٰ 44 «مُلْكٍ سَمَ كَمَرْ دُوكِيَ نٜىٰ وَدَّ عَكَٻُواْيٜىٰ أَغُواْنَ، وَدَّ وَنِ يَسَامُ، يَسَاكٜىٰ ٻُواْيٜىٰوَ؞ سَبُواْدَ يَوَنْ مُرْنَ يَجٜىٰ يَسَيَرْ دَ دُكَنْ أَبُبُوَنْ دَ يَكٜىٰدَسُو، يَسَيِ غُواْنَرْ؞» مِصَالِ نَدُوڟٜىٰنْ لُعُلُعُ مَيْ دَرَجَ 45 «حَرْ يَنْذُ دَيْ، مُلْكٍ سَمَ كَمَرْ طَنْ كَاسُوَ يَكٜىٰ، مَيْ نٜىٰمَنْ دُوَڟُو مَاسُ دَرَجَ وَتُواْ، لُعُلُعُ؞ 46 دَ يَسَامِ لُعُلُعُ طَيَ مَيْ دَرَجَ سُواْسَيْ، سَيْ يَجٜىٰ يَسَيَرْ دَ دُكَنْ أَبُبُوَنْ دَ يَكٜىٰدَسُو، يَسَيٜىٰشِ؞» مِصَالِ نَرَغَرْ كَامُنْ كِيڢِ 47 «حَرْ يَنْذُ دَيْ، مُلْكٍ سَمَ يَنَ كَمَ دَ رَاغَرْ كَامُنْ كِيڢِ وَدَّ عَكَ جٜىٰڢَ عَتٜىٰكُ تَكَمُواْ كِيڢِ إِرِ إِرِ؞ 48 دَ تَثِكَ، عَكَ جَٰوُاْ تَغٜىٰڢٜىٰنْ تٜىٰكُنْ، عَكَ ذَوْنَ، عَكَ ذَاٻَا كِيڢِ مَاسُ ݣَوْ، عَكَسَا عَݣُونْدُواْ، عَكَ ظُبَرْدَ وَطَنْدَ بَاسُ دَݣَوْ؞ 49 حَكَ ذَيْ ذَمَ عَڧَرْشٜىٰنْ دُونِيَا، مَلاَىِٕكُ ذَاسُذُواْ سُرَبَ، سُثِرٜىٰ مُوغَيٜىٰ دَغَ مَاسُ أَدَلْثِے؞ 50 سُكُمَ جٜىٰڢَ مُوغَيٜىٰنْ ثِكِنْ غِدَنْ وُتَا مَيْذَاڢِ، عِنْدَ ذَاسُيِ كُوكَا دَ ثِظُوانْ هَڧُواْرَ؞ سَابُوَرْ دُوكِيَ دَ ڟُواْهُوَ 51 «كُنْ غَانٜىٰ وَنَّنْ دُكَ؟» سُكَ أَمْسَ سُكَثٜىٰ «عِ؞» 52 سَيْ يَثٜىٰمُسُ «سَبُواْدَ حَكَ دُكْ مَلَمِنْدَ يَذَمَ أَلْمَجِرِنْ مُلْكٍ سَمَ، كَمَرْ مَيْغِدَا يَكٜىٰ وَنْدَ يَطٜىٰبُواْ سَابُوَرْ دُوكِيَ دَ ڟُواْهُوَ دَغَ وُرِنْ أَجِيَرْسَ؞» أَنْڧِ عِيسَىٰ أَ نَظَرٜىٰتْ ﴿ مَرْ 6.1-6 ؛ لُكْ 4.16-30 ﴾ 53 دَ عِيسَىٰ يَغَمَ ڢَطِنْ وَطَنَّنْ مِصَلَيْ، سَيْ يَبَرْ وُرِنْ؞ 54 عِيسَىٰ يَذُواْ غَرِنْسَ يَڢَارَ كُواْيَ وَمُتَنٜىٰ أَ مَجَمِعُنْسُ؞ سُكَيِ مَامَاكِ سُكَثٜىٰ «إِنَا وَنَّنْ مُتُمْ يَسَامِ حِكِمَرْ نَنْ حَكَ دَ كُمَ إِيكُوانْ يِنْ وَطَنَّنْ أَيُّكَنْ بَنْ مَامَاكِ؟ 55 وَنَّنْ بَشِينٜىٰ طَنْ كَاڢِنْتَنَّنْبَ؟ بَمَمَرْسَ ثٜىٰ سُونَنْتَ مَرْيَمُ بَ؟ بَ یَنْعُوَنْسَ بَنٜىٰ سُو يَعْڧُوبَ دَ يُوسُڢَ دَ سِيمَنْ دَ يَهُودَ؟ 56 بَ یَنْعُوَنْسَ مَتَ دُكْ تَرٜىٰدَمُو سُكٜىٰبَ؟ تُواْ دَغَ إِنَا يَسَامُواْ دُكْ وَطَنَّنْ؟» 57 سَيْ سُكَجِ هَوْشِنْسَ؞ عَمَّا عِيسَىٰ يَثٜىٰ مُسُ «أَيْ، أَنَّبِے بَايَ رَسَ دَرَجَ سَيْدَيْ أَغَرِنْسَ دَ كُمَ ثِكِنْ غِدَنْسَ؞» 58 كُمَ بَيْيِ أَيُّكَنْ بَنْ مَامَاكِ دَيَوَ عَثَنْبَ، سَبُواْدَ رَشِنْ بَنْغَسْكِيَرْسُ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria