مَتِيُ 12 - أَتَّوْرَتْ دَ أَنَّبَاوَاتَمْبَيَ عَكَنْ كِيَايٜىٰ رَانَرْ هُوتُنْ يَهُودَاوَا ﴿ مَرْ 2.23-28 ؛ لُكْ 6.1-5 ﴾ 1 أَنَانً أَ رَانَرْ هُوتُ تَمَكُواْ، عِيسَىٰ دَ أَلْمَجِرَنْسَ سُكَبِے تَغُواْنَكِنْ حَڟِنْ أَلْكَمَ؞ أَلْمَجِرَنْسَ كُوَ سُنَ جِنْ يُنْوَ، سَيْ سُكَ ڢَارَ ثِرٜىٰ ڟَابَرْ أَلْكَمَرْ سُنَ ثِ؞ 2 دَ ڢَرِسِيَاوَا سُكَغَ حَكَ، سَيْ سُكَثٜىٰ مَسَ «كَغَنِ، أَلْمَجِرَنْكَ سُنَيِنْ أَبِنْدَ كُواْيَرْوَرْ مُوسَٰى تَحَنَ عَيِ أَ رَانَرْ هُوتُ تَمَكُواْ؞» 3 سَيْ يَثٜىٰ مُسُ «أَشٜىٰ، بَكُ كَرَنْتَ أَبِنْدَ دَاوُدَ يَيِ لُواْكَثِنْ دَشِ دَ أَبُواْكَنْ تَڢِيَرْسَ سُكٜىٰجِنْ يُنْوَ بَ؟ 4 يَدَّ يَشِغَ غِدَنْ اللَّهْ يَثِ غُرَاسَرْ دَ عَكَ كٜىٰٻٜىٰ، وَنْدَ بَيْ كَمَاتَ كُواْ شِے كُواْ أَبُواْكَنْ تَڢِيَرْسَ سُثِ بَ، سَيْدَيْ ڢِرِسْتُواْثِے كَطَيْ؞ 5 كُواْ بَكُ كَرَنْتَ عَثِكِنْ كُواْيَرْوَرْ مُوسَٰى بَ، يَدَّ ڢِرِسْتُواْثِے أَ هَيْكَلِ سُكٜىٰيِنْ بَنْظَ دَ رَانَرْ هُوتُ تَمَكُواْ، كُمَ بَيْ ذَمَ مُسُ لَيْڢِے بَ؟ 6 إِنَ غَيَ مُكُ، غَ وَنْدَ يَڢِ هَيْكَلِ أَنَنْ؞ 7 عَمَّا دَ كُنْ سَنْ أَبِنْدَ وَنَّنْ أَيَرْ تَكٜىٰ نُڢِ وَتُواْ، ‹جِنْڧَيْ نَكٜىٰسُواْ، بَهَدَايَبَ،› دَ بَكُ غَ مَرَسَ لَيْڢِے دَ لَيْڢِے بَ؞ 8 غَمَا طَنْ مُتُمْ عُبَنْغِجِ نٜىٰ حَرْ مَا دَ نَرَانَرْ هُوتُ تَمَكُواْ؞» مَيْ شَنْيَيّٜىٰنْ حَنُّ ﴿ مَرْ 3.1-6 ؛ لُكْ 6.6-11 ﴾ 9 سَيْ عِيسَىٰ يَبَرْ وُرِنْ يَشِغَ مَجَمِعَرْسُ؞ 10 أَݣَويْ وَنِ مُتُمْ أَوُرِنْ مَيْ شَنْيَيّٜىٰنْ حَنُّ؞ سَيْ سُكَ تَمْبَيِ عِيسَىٰ سُكَثٜىٰ «كُواْيَرْوَرْ مُوسَٰى تَيَرْدَ عَيِ وَرْكَرْوَ أَ رَانَرْ هُوتُ تَمَكُواْ؟» سُنْيِ وَنَّنْ تَمْبَيَ نٜىٰ دُواْمِنْ سُسَامٜىٰشِ دَ لَيْڢِے؞ 11 سَيْ يَثٜىٰ مُسُ «عَثٜىٰ وَنِنْكُ يَنَدَ تُنْكِيَ طَيَ تَكْ، سَيْ تَڢَاطَ ثِكِنْ رَامِ أَ رَانَرْ هُوتُ تَمَكُواْ، مَيْ تُنْكِيَرْ بَذَيْڢِتَرْدَ عِتَبَ؟ 12 أَيْ، مُتُمْ يَاڢِ تُنْكِيَ دَرَجَ سُواْسَيْ؞ سَبُواْدَ حَكَ بَعَحَنَ يِنْعَيْكِنْ أَلْحٜىٰرِ أَ رَانَرْ هُوتُ تَمَكُواْبَ؞» 13 سَيْيَثٜىٰ وَمُتُمِنْ «مِيڧُواْ حَنُّنْكَ؞» سَيْ يَمِيڧُواْ، نَنْ دَنَنْ سَيْ حَنُّنْ يَوَرْكٜىٰ يَذَمَ كَمَرْ طَيَنْ حَنُّنْ؞ 14 عَمَّا ڢَرِسِيَاوَا سُكَ ڢِتَ سُكَيِ شَوَرَا يَدَّ ذَاسُ كَشٜىٰ عِيسَىٰ؞ ثِكَاوَرْ أَنَّبْثِنْ عِشَايَ 15 دَ عِيسَىٰ يَغَانٜىٰ حَكَ، سَيْ يَبَرْ وُرِنْ؞ سَيْ مُتَنٜىٰ دَيَوَ سُكَبِيشِ، يَا كُوَ وَرْكَرْ دَسُو دُكَ؞ 16 يَكُمَ جَا مُسُ كُنّٜىٰ ثٜىٰوَ كَدَ سُبَادَ لَابَرِنْسَ؞ 17 وَنَّنْ كُوَ دُواْمِنْ عَثِكَ أَبِنْدَ عَكَ ڢَطَا نٜىٰ تَبَاكِنْ أَنَّبِے عِشَايَ ثٜىٰوَ 18 «غَا بَاوَنَ وَنْدَ نَذَاٻَا، شِينٜىٰ نَكٜىٰ ڧَوْنَ، وَنْدَ نَكٜىٰ جِنْ دَاطِنْسَ سُواْسَيْ؞ ذَنْ ثِكَشِ دَ رُوحُنَ، ذَيْ سَنَرْوَ أَلْعُمَّيْ شَرِيعَرْ غَسْكِيَ؞ 19 بَذَيْ يِ غَرْدَمَ، كُواْ يَيِ مَغَنَ دَ ڧَرْڢِبَ، بَذَاعَجِ مُرْيَرْسَ عَتِيتِبَ؞ 20 كَرَنْ دَ يَيِ كُسَنْ كَرْيٜىٰوَ، بَذَيْ كَرْيَبَ، ڢِتِلَرْ دَ تَيِ كُسَنْ مُتُوَ كُمَ، بَذَيْ كَشٜىٰ تَبَ، سَيْ يَسَا غَسْكِيَ تَثِ نَصَرَا، 21 أَلْعُمَّيْ كُمَ ذَاسُسَا ذُوثِيَا غَ سُونَنْسَ؞» عِيسَىٰ دَ بَعَلْظَبُلْ ﴿ مَرْ 3.20-30 ؛ لُكْ 11.14-23 ﴾ 22 سَيْ عَكَ كَٰوُاْ مَسَ وَنِ بٜىٰبٜىٰنْ مَكَهُواْ مَيْ أَلْجَنِ؞ عِيسَىٰ كُوَ يَا وَرْكَرْ دَشِ، حَرْ مُتُمِنْ يَيِ مَغَنَ يَكُمَ عِيَ غَنِ؞ 23 مُتَنٜىٰنْ دُكَ سُكَيِ مَامَاكِ سُكَثٜىٰ «شِنْ، بَ وَنَّنْ شِينٜىٰ طَنْ دَاوُدَ بَ؟» 24 عَمَّا دَ ڢَرِسِيَاوَا سُكَجِ حَكَ سَيْ سُكَثٜىٰ «أَيْ دَ إِيكُوانْ بَعَلْظَبُلْ سَرْكِنْ أَلْجَنُ نٜىٰ وَنَّنْ مُتُمِنْ يَكٜىٰ ڢِتَرْدَ أَلْجَنُ؞» 25 دَيَكٜىٰ عِيسَىٰ يَسَنْ أَبِنْدَ سُكٜىٰ تُنَانِ سَيْيَثٜىٰ مُسُ «دُكْ مُلْكِنْدَ يَرَبُ كَشِ بِيُ سُنَ غَابَادَ جُونَ، مُلْكٍ بَذَيْ ڟَيَبَ؞ كُمَ غَرِ كُواْ غِدَنْ دَ مُتَنٜىٰنْ سُنْ رَبُ كَشِ بِيُ سُنَ غَابَادَ جُونَ، بَذَيْ ڟَيَبَ؞ 26 عِدَنْ شَيْطَنْ يَنَ ڢِتَرْدَ شَيْطَنْ، يَنَ ڢَطَ دَ كَنْسَ كٜىٰنَنْ؞ تُواْ، يَيَ مُلْكِنْسَ ذَيْ ڟَيَ؟ 27 عِدَنْ كُوَ دَ إِيكُوانْ بَعَلْظَبُلْ نَكٜىٰ ڢِتَرْدَ أَلْجَنُ، تُواْ أَلْمَجِرَنْكُ ڢَا؟ دَ إِيكُوانْ وَ سُكٜىٰ ڢِتَرْ دَسُو؟ أَلْمَجِرَنْكُ نٜىٰ ذَاسُيِ مُكُ شَرِيعَ عَكَنْ وَنَّنْ؞ 28 عِدَنْ نِے كُوَ دَ إِيكُوانْ رُوحٌ اللَّهْ نَكٜىٰ ڢِتَرْدَ أَلْجَنُ، أَشٜىٰ، مُلْكٍ اللَّهْ يَا ذُواْ مُكُ كٜىٰنَنْ؞ 29 «بَذَاعَ عِيَ شِغَ غِدَنْ مُتُمْ مَيْ ڧَرْڢِے عَكْوَاشِ كَايَنْسَبَ، سَيْدَيْ عِدَنْ أَنْطَوْرٜىٰشِ تُكُنَ، سَعَنً ذَاعَ عِيَ ݣُوشِ كَايَنْ غِدَنْسَ؞ 30 «وَنْدَ بَا يَتَرٜىٰ دَنِے، يَنَ غَابَادَنِے كٜىٰنَنْ، وَنْدَ بَيْ تَيْمَكٜىٰنِ تَرَوَبَ كُوَ، يَنَ وَاڟَرْوَنٜىٰ؞ 31 دُواْمِنْ حَكَ إِنَ غَيَ مُكُ، ذَاعَ غَاڢَرْتَا وَمُتَنٜىٰ كُواْوَنٜىٰ إِرِنْ ذُنُوبِ دَ مَغَنَرْ صَاٻُواْ، عَمَّا وَنْدَ يَيِ مَغَنَرْ صَاٻُواْ غَمٜىٰدَ رُوحُ مَيْ ڟَرْكِے، بَذَاعَ غَاڢَرْتَا مَسَبَ؞ 32 عِدَنْ وَنِ يَيِ مَغَنَرْ رٜىٰنِ غَ طَنْ مُتُمْ، ذَاعَ غَاڢَرْتَا مَسَ، عَمَّا دُكْ وَنْدَ يَيِ مَغَنَرْ رٜىٰنِ غَ رُوحُ مَيْ ڟَرْكِے، بَذَاعَ تَٻَ غَاڢَرْتَا مَسَبَ، كُواْ يَنْذُ كُواْ أَ زَامَانِ مَيْ ذُوَا؞» إِتَاثٜىٰ دَ یَیَنْسَ ﴿ لُكْ 6.43-45 ﴾ 33 «إِتَاثٜىٰ مَيْݣَوْ يَكَنْ بَادَ یَیَ مَاسُ ݣَوْ؞ إِتَاثٜىٰ مَرَرْ ݣَوْ كُمَ يَكَنْ بَادَ یَیَ مَرَسَ ݣَوْ؞ إِتَاثٜىٰ دَيْ دَ إِرِنْ یَیَنْسَ نٜىٰ عَكٜىٰ غَانٜىٰشِ؞ 34 كُو ڧُنْغِيَرْ مُوغَيٜىٰنْ مَثِيظَيْ! يَيَ ذَاكُ عِيَ ڢَطَرْ أَبُ مَيْݣَوْ تُنْدَ كُو مُوغَيٜىٰ نٜىٰ؟ أَيْ، أَبِنْدَ يَكٜىٰ ثِكِنْ ذُوثِيَا، شِ يَكٜىٰ ڢِتُواْوَ عَبَاكِ؞ 35 مُتُمِنْ كِرْكِ دَغَ أَجِيَرْسَ نَكِرْكِ، يَكَنْ ڢِتَرْدَ أَبِنْ كِرْكِ؞ مُوغُنْ مُتُمْ دَغَ ثِكِنْ أَجِيَرْ مُغُنْتَارْسَ، يَكَنْ ڢِتَرْدَ مُوغُنْ أَبُ؞ 36 «إِنَ غَيَ مُكُ، دُكْ مَغَنَرْ بَنْظَ دَ مُتَنٜىٰ سُكَيِ، ذَاسُ بَادَ لِسَّڢِنْتَ أَ رَانَرْ شَرِيعَ؞ 37 عَكَنْ مَغَنَرْكَ نٜىٰ ذَاعَيِ مَكَ شَرِيعَ، كُواْ تَسَا كَذَمَ مَرَرْ لَيْڢِے كُواْ مَيْ لَيْڢِے؞» مَلَمً كُواْيَرْوَرْ مُوسَٰى دَ ڢَرِسِيَاوَا سُنَ نٜىٰمَنْ عَلَمَ ﴿ مَرْ 8.11-12 ؛ لُكْ 11.29-32 ﴾ 38 سَيْ وَطَنْسُ دَغَ ثِكِنْ مَلَمً كُواْيَرْوَرْ مُوسَٰى دَ ڢَرِسِيَاوَا سُكَثٜىٰ مَسَ «مَلَمْ، مُنَسُواْ كَنُونَ مَنَ وَتَ بَبَّرْ عَلَمَرْ دَ ذَاتَ بَيَّنَ إِيكُوانْكَ؞» 39 سَيْ يَأَمْسَ مُسُ يَثٜىٰ «مُتَنٜىٰنْ زَامَانِنَّنْ مَرَسَ أَمِنْثِ غَ اللَّهْ نٜىٰ، مُوغَيٜىٰ نٜىٰ كُمَ! سُنَسُواْ سُغَ عَلَمَ، عَمَّا بَذَاعَ نُونَ مُسُ وَتَ عَلَمَ بَ، سَيْدَيْ عَلَمَ تَأَنَّبِے يُونُسَ؞ 40 غَمَا يَدَّ يُونُسَ يَيِ ݣُونَ عُكُ دَرٜىٰ دَ رَانَ عَثِكِنْ ثِكِ نَبَبَّنْ كِيڢِ، حَكَمَا طَنْ مُتُمْ ذَيْ يِݣُونَ عُكُ دَرٜىٰ دَ رَانَ عَثِكِنْ ڧَسَا؞ 41 أَ رَانَرْ شَرِيعَ مُتَنٜىٰنْ نِنٜىٰبَ ذَاسُ تَاشِ تَرٜىٰدَ مُتَنٜىٰنْ زَامَانِنَّنْ، سُنُونَ وَمُتَنٜىٰنْ زَامَانِنَّنْ بَسُيِ دَيْدَيْبَ، دُواْمِنْ سُو سُنْ تُوبَ سَبُواْدَ وَعَظِنْ يُونُسَ؞ غَاشِ كُوَ وَنْدَ يَڢِ يُونُسَ يَنَ أَنَنْ؞ 42 أَ رَانَرْ شَرِيعَ، سَرَوْنِيَرْ شٜىٰبَ ذَاتَ تَاشِ تَرٜىٰدَ مُتَنٜىٰنْ زَامَانِنَّنْ، تَنُونَ مُسُ بَسُيِ دَيْدَيْبَ، دُواْمِنْ تَذُواْ نٜىٰ دَغَ وُرِے مَيْ نِيسَ سُواْسَيْ، دُواْمِنْ تَجِ كُواْيَرْوَرْ حِكِمَ تَسَرْكِے سُلَيْمَٰنُ؞ غَاشِ كُوَ وَنْدَ يَڢِ سُلَيْمَٰنُ يَنَ أَنَنْ؞» دَاوُاْوَرْ ڧَظَمِنْ رُوحُ ﴿ لُكْ 11.24-26 ﴾ 43 «عِدَنْ ڧَظَامِنْ رُوحُ يَڢِتَ دَغَ جِكِنْ مُتُمْ، يَكَنْيِ تَيَٰوُاْ أَوُرَارٜىٰنْ دَ بَ ضُوَ دُواْمِنْ يَسَامِ وُرِنْ هُوتَوَا؞ عَمَّا عِدَنْ بَيْ سَامُبَ، 44 سَيْيَثٜىٰ، ‹ذَنْ كُواْمَ غِدَانَ نَدَا عِنْدَ نَڢِتُواْ؞› عِدَنْ يَا ذُواْ يَسَامُ بَا كُواْوَ يَكُمَغَا أَنْشَرٜىٰ، أَنْڠَرَ غِدَنْ، 45 سَيْ يَكُواْمَ يَݣُوسُواْ وَطَنْسُ ڧَظَامَنْ رُوحُواْحِ غُدَا بَݣَويْ، وَطَنْدَ سُكَڢِيشِ مُغُنْتَا، سُذُواْ سُشِغَ سُذَوْنَ أَوُرِنْ؞ عَڧَرْشٜىٰ، ذَمَنْ مُتُمِنَّنْ ذَيْڢِ نَڢَرْكُوانْ مُونِ؞ حَكَ مَا ذَيْ ذَمَ غَ مُتَنٜىٰنْ وَنَّنْ زَامَانِ؞» مَامَرْ عِيسَىٰ دَ یَنْعُوَنْسَ ﴿ مَرْ 3.31-35 ؛ لُكْ 8.19-21 ﴾ 46 يَنَ كَنْ مَغَنَ دَ جَمَعَ كٜىٰنَنْ، سَيْغَا مَامَرْسَ دَ یَنْعُوَنْسَ سُنَ ڟَيٜىٰ أَوَجٜىٰ سُنَسُواْ سُيِ مَغَنَ دَشِ؞ 47 سَيْ عَكَثٜىٰ مَسَ «غَا مَامَرْكَ دَ یَنْعُوَنْكَ سُنَ ڟَيٜىٰ أَوَجٜىٰ سُنَ سُواْ سُيِ مَغَنَ دَكَيْ؞» 48 سَيْيَثٜىٰ وَوَنَّنْ دَيَڢَطَا مَسَ «وَثٜىٰثٜىٰ مَامَاتَ، كُمَ سُوَنٜىٰنٜىٰ یَنْعُوَنَ؟» 49 سَيْ يَنُونَ أَلْمَجِرَنْسَ دَ حَنُّنْسَ يَثٜىٰ «غَا مَامَاتَ دَ یَنْعُوَنَ أَنَنْ؞ 50 غَمَا دُكْ وَنْدَ يَيِ أَبِنْدَ عُبَانَ دَيَكٜىٰ ثِكِنْ سَمَ يَكٜىٰسُواْ، شِينٜىٰ طَنْعُوَنَ دَ یَرْعُوَتَ دَ كُمَ مَامَاتَ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria