مَتِيُ 11 - أَتَّوْرَتْ دَ أَنَّبَاوَا

یَنْ عَيْكَ دَغَ وُرِنْ يَحْيَى مَيْ بَڢْتِسْمَ

¹ دَ عِيسَىٰ يَغَمَيِ وَ أَلْمَجِرَنْسَ شَا بِيُنَّنْ وَطَنَّنْ عُمَرْنَيْ، سَيْ يَتَاشِ دَغَ وُرِنْ يَتَڢِے يَنَ كُواْيَرْوَا يَنَ وَعَظِ أَغَرُرُوَنْسُ؞

² أَ لُواْكَثِنْ كُوَ يَحْيَى مَيْ بَڢْتِسْمَ يَنَ ثِكِنْ كُرْكُكُ؞ سَعَدَّ يَجِ أَبُبُوَنْ دَ أَلْمَسِيحُ يَكٜىٰيِ، سَيْ يَعَيْكِ أَلْمَجِرَنْسَ وُرِنْسَ

³ سُثٜىٰ مَسَ ‏«‏كَيْ نٜىٰ وَنْدَ ذَيْذُواْ، كُواْ مُسَا عِدُواْ غَ وَنِ؟»‏

⁴ عِيسَىٰ يَأَمْسَ مُسُ يَثٜىٰ ‏«‏كُكُواْمَ كُڢَطَا وَ يَحْيَى أَبِنْدَ كُكَ غَنِ كُكَ كُمَجِ، وَتُواْ،

⁵ مَكَڢِ سُنَ سَامُنْ غَنِ، غُرَغُ سُنَ تَڢِيَ، مَاسُ ثُوتَرْ ڢَتَرْ جِكِے سُنَ سَامُنْ ڟَبْتَثٜىٰوَ كُرَمٜىٰ سُنَ جِنْ مَغَنَ، أَنَ تَادَ وَطَنْدَ سُكَ مُتُ، أَنَ كُمَبَا تَلَكَاوَا لَابَرِ مَيْ دَاطِے؞

⁶ مَيْ أَلْبَرْكَ نٜىٰ وَنْدَ بَيْيِ شَكَّرْ بَنْ‌غَسْكِيَرْ دَ يَكٜىٰدَ عِتَ عَكَيْنَبَ؞»‏

⁷ دَ سُكَ تَڢِے، سَيْ عِيسَىٰ يَڢَارَيِ وَتَارُوانْ مُتَنٜىٰنْ مَغَنَ عَكَنْ يَحْيَى يَثٜىٰ ‏«‏مٜىٰكُكَ ڢِتَ كُغَنِ أَدَاجِ؟ كُنْ ڢِتَ غَنِنْ دُواْغَيٜىٰنْ ثِيَوَرْ دَ إِسْكَ تَكٜىٰ كَطَوَ نٜىٰ؟

⁸ تُواْ، مٜىٰكُكَ ڢِتَ كُغَنِ؟ كُنَ ڟَمَّنِ ذَاكُ غَ وَنِ وَنْدَ يَسَا رِيغُنَ مَاسُ ݣَوْ نٜىٰ؟ أَيْ، مُتَنٜىٰنْ غِدَنْ سَرْكِے نٜىٰ سُكٜىٰ سَا رِيغُنَ مَاسُ ݣَوْ؞

⁹ تُواْ، مٜىٰكُكَ ڢِتَ كُغَنِ؟ أَنَّبِے؟ عِ، إِنَ غَيَ مُكُ، حَرْ مَا يَاڢِ أَنَّبِے؞

¹⁰ وَنَّنْ شِينٜىٰ وَنْدَ عَكَ رُبُوتَ عَكَنْسَ ثٜىٰوَ ‏«‏ ‏‹‏غَاشِ، نَعَيْكَرْ دَ مَنْذُوانَ يَرِغَاكَ غَبَ، وَنْدَ ذَيْ شِرْيَ مَكَ حَنْيَ كَاڢِنْ كَذُواْ؞›‏

¹¹ ‏«‏حَڧِيڧَ إِنَ غَيَ مُكُ، بَعَتَٻَ حَيْڢُوَرْ وَنِ عَدُونِيَرْ نَنْ وَنْدَ يَكَيْ يَحْيَى مَيْ بَڢْتِسْمَ غِرْمَبَ؞ عَمَّا دُكْدَهَكَ، وَنْدَ يَڢِ ڧَنْڧَنْتَ أَمُلْكٍ سَمَ يَا ڢِيشِ؞

¹² تُنْدَغَ زَامَانِنْ يَحْيَى مَيْ بَڢْتِسْمَ حَرْ ذُوَا يَوْ مُلْكٍ اللَّهْ يَنَ شَنْ وُيَرْ تَاشِنْ حَنْكَلِ، مَاسُ تَاشِنْ حَنْكَلِ كُمَ سُكٜىٰسُواْ سُڨُوثٜىٰ مُلْكٍ اللَّهْ دَ ڧَرْڢِے؞

¹³ غَمَا كُواْيَرْوَرْ مُوسَٰى دَ لِتَّتَّڢَنْ أَنَّبَاوَا دُكَ سُنْيِ مَغَنَ عَكَنْ مُلْكٍ كَاڢِنْ يَحْيَى يَذُواْ،

¹⁴ كُمَ عِدَنْ ذَاكُ يَرْدَ دَ سَڧُوانْسُ، يَحْيَى شِينٜىٰ وَنْدَ عَكَيِ مَغَنَ عَكَيْ سَعَدَّ عَكَثٜىٰ إِلْيَاسُ ذَيْذُواْ؞

¹⁵ بَرِ مَيْ كُنّٜىٰنْجِ، يَجِ؞

¹⁶ ‏«‏عَمَّا دَمٜىٰ ذَنْ ݣُوتَنْتَا وَنَّنْ زَامَانِ؟ كَمَرْ يَارَا نٜىٰ دَسُكٜىٰ ظَوْنٜىٰ عَكَاسُوَ سُنَ كِرَنْ أَبُواْكَنْ وَسَنْسُ سُنَ ثٜىٰوَ

¹⁷ ‏«‏ ‏‹‏مُنْ هُورَ مُكُ سَرٜىٰوَ، كُنْڧِ كُيِ ضَوَ!‏ مُنْ رٜىٰرَ وَاڧَرْ مُتُوَ، كُنْڧِ كُيِ كُوكَا!‏›‏

¹⁸ ‏«‏غَمَا دَ يَحْيَى يَذُواْ بَيْثِكَ ثِدَشَابَ، سَيْ سُكَثٜىٰ، ‏‹‏يَنَ دَ أَلْجَنُ؞›‏

¹⁹ دَ طَنْ مُتُمْ يَذُواْ يَنَثِ يَنَشَا، سُكَثٜىٰ، ‏‹‏غَا مَيْيَوَنْ ثِدَشَا، أَبُواْكِنْ مَاسُ كَرْٻَرْ هَرَاجِ دَ مَاسُ ذُنُوبِ!‏›‏ دُكْدَهَكَ، أَنَ غَانٜىٰ حِكِمَرْ اللَّهْ أَعَيُّكَنْتَ؞»‏

غَرُضُوً دَ بَسُ تُوبَبَ

²⁰ سَيْ يَڢَارَ ڟَاوَتَا وَ غَرُضُوً، عِنْدَ يَيِيَوَنْثِنْ أَيُّكَنْسَ نَبَنْ مَامَاكِ، غَمَا مُتَنٜىٰنَّنْ بَسُ تُوبَبَ؞

²¹ ‏«‏كَيْتُوانْكِ، كُواْرَسِنْ!‏ كَيْتُوانْكِ، بٜىٰڟَيْدَ!‏ غَمَا دَا عَثٜىٰ أَيُّكَنْ بَنْ مَامَاكِنْ دَ عَكَيِ عَثِكِنْكُنٜىٰ عَكَيِ أَ تَيَ دَ سِدُوانْ، دَا سُنْ تُوبَ تُنْ تُنِ، سُنْ سَا ڟُمَّ دَ تُواْكَ أَجِكِنْسُ؞

²² عَمَّا إِنَغَيَ مُكُ، أَ رَانَرْ شَرِيعَ ذَاعَ ڢِے جِنْ تَوْسَيِنْ مُتَنٜىٰنْ تَيَ دَ سِدُوانْ ڢِيٜىٰ دَكُو؞

²³ كٜىٰ كُمَ كَڢَرْنَهُمْ، كِنَ ڟَمَّنِ طَوْكَكَاكِ ذَاعَيِ ذُوَا سَمَ نٜىٰ؟ عَ إِنَا!‏ ڧَسْڧَنْتَرْ دَكٜىٰ ذَاعَيِ حَرْ وُرِنْ ذَمَنْ مَتَتُّو؞ أَيُّكَنْ بَنْ مَامَاكِنْ دَ عَكَيِ عَثِكِنْكِ دَ سُونٜىٰ عَكَيِ أَ سُواْدُوامْ دَ تأَنَانً هَرْوَيَوْ؞

²⁴ عَمَّا إِنَ غَيَ مُكُ، أَ رَانَرْ شَرِيعَ ذَاعَ ڢِے جِنْ تَوْسَيِنْ مُتَنٜىٰنْ سُواْدُوامْ ڢِيٜىٰ دَكٜىٰ؞»‏

كُذُواْ وُرِينَ دُواْمِنْ كُسَامِ هُوتُ

²⁵ أَوَنَّنْ لُواْكَثِ نٜىٰ عِيسَىٰ يَثٜىٰ ‏«‏نَا غُواْدٜىٰ مَكَ، يَا عُبَا، عُبَنْ‌غِجِنْ سَمَ دَ دُونِيَا، سَبُواْدَ كَٻُواْيٜىٰ وَطَنَّنْ أَبُبُوَ غَ مَاسُ حِكِمَ دَ مَاسُ عِلِمِ، كَكُمَ بَيَّنَ وَیَنْ يَارَا؞

²⁶ حَكَنٜىٰ يَا عُبَا، غَمَا وَنَّنْ شِينٜىٰ أَبِنْدَ يَيِ مَكَ ݣَوْ؞

²⁷ ‏«‏عُبَانَ يَا بَانِ دُكَنْ أَبُ، كُمَ بَاوَنْدَ يَسَنْ طَنْ سَيْ عُبَنْ، كُمَ بَاوَنْدَ يَسَنْ عُبَنْ سَيْ طَنْ دَ كُمَ وَنْدَ طَنْ يَسُواْ يَبَيَّنَ مَسَ؞

²⁸ ‏«‏كُذُواْ غَرٜىٰنِ، دُكَنْكُ دَ كُكَ غَجِ، كُمَ كُنَ ڢَامَ دَ كَايَ مَاسُ نَوْيِ عَكَنْكُ، ذَنْ بَاكُ هُوتَوَا؞

²⁹ كُمِيڧَ كَنْكُ غَ عُمَرْنَيْنَ كَمَرْ يَدَّ سَانِيَ تَكَنْ مِيڧَ وُيَنْتَ غَ غُنْ‌غُمٜىٰنْ نُواْمَ، كُكُمَ كُواْيَ دَغَ وُرِينَ، دُواْمِنْ نِے مَيْتَوَلِعُ نٜىٰ، مَيْسَوْڧِنْ كَيْ، كُمَ ذَاكُسَامِ هُوتُ أَ ذُوثِيَارْكُ؞

³⁰ غَمَا غُنْ‌غُمٜىٰنَ يَنَدَ سَوْڧِ، عُمَرْنَيْنَ كُمَبَا نَوْيِ؞»‏