لُكَّ 6 - أَتَّوْرَتْ دَ أَنَّبَاوَا

تَمْبَيَ عَكَنْ كِيَايٜىٰ رَانَرْ هُوتُ

¹ وَتَ رَانَرْ هُوتُ تَمَكُواْ عِيسَىٰ دَ أَلْمَجِرَنْسَ سُكَبِے تَغُواْنَكِنْ حَڟِنْ أَلْكَمَ، سَيْ أَلْمَجِرَنْ سُكَ كَرْيَ وَطَنْسُ كَنْ أَلْكَمَ سُنَ مُرْجٜىٰوَ سُنَثِ؞

² سَيْ وَطَنْسُ ڢَرِسِيَاوَا سُكَثٜىٰ ‏«‏مٜىٰيَسَا كُكٜىٰيِنْ أَبِنْدَ كُواْيَرْوَرْ مُوسَٰى تَحَنَ عَيِ أَ رَانَرْ هُوتُ تَمَكُواْ؟»‏

³ عِيسَىٰ يَأَمْسَ مُسُ يَثٜىٰ ‏«‏أَشٜىٰ، بَكُ كَرَنْتَ أَبِنْدَ دَاوُدَ يَيِبَ سَعَدَّ شِ تَرٜىٰدَ مُتَنٜىٰنْسَ سُكَجِ يُنْوَ؟

⁴ يَدَّ دَاوُدَ يَشِغَ غِدَنْ اللَّهْ، يَطَوْكِ غُرَاسَرْ دَ عَكَ كٜىٰٻٜىٰ، يَثِ، حَرْ مَا يَبَا أَبُواْكَنْ تَڢِيَرْسَ أَبِنْدَ بَيْ كَمَاتَ كُواْوَ يَثِبَ سَيْ ڢِرِسْتُواْثِے كَطَيْ؟»‏

⁵ سَيْ يَغَمَ مَغَنَرْ نَنْ دَ ثٜىٰوَ ‏«‏أَيْ، طَنْ مُتُمْ عُبَنْ‌غِجِ نٜىٰ نَ رَانَرْ هُوتُ تَمَكُواْ؞»‏

مَيْ شَنْيَيّٜىٰنْ حَنُّ

⁶ أَوَتَ رَانَرْ هُوتُ تَمَكُواْ كُمَ، عِيسَىٰ يَشِغَ مَجَمِعَ يَنَ كُواْيَرْوَا؞ أَݣَويْ وَنِ مُتُمْ أَوُرِنْ وَنْدَ حَنُّنْ دَامَنْسَ يَشَنْيٜىٰ؞

⁷ سَيْ مَلَمً كُواْيَرْوَرْ مُوسَٰى دَ ڢَرِسِيَاوَا سُكَ ظُبَ عِدُواْ، سُغَ كُواْ عِيسَىٰ ذَيْ يِوَرْكَرْوَ أَ رَانَرْ هُوتُ، دُواْمِنْ سُسَامٜىٰشِ دَ لَيْڢِے؞

⁸ عَمَّا عِيسَىٰ يَسَنْ أَبِنْدَ سُكٜىٰ تُنَانِ؞ سَيْ يَثٜىٰ وَمُتُمِنَّنْ ‏«‏تَاشِ كَذُواْ كَڟَيَ أَنَنْ؞»‏ سَيْ مُتُمِنْ يَتَاشِ يَذُواْ يَڟَيَ أَوُرِنْ؞

⁹ عِيسَىٰ يَثٜىٰ مُسُ ‏«‏إِنَ تَمْبَيَرْكُ، مٜىٰنٜىٰنٜىٰ يَدَاثٜىٰ عَيِ أَ رَانَرْ هُوتُ؟ عَيِ أَلْحٜىٰرِ كُواْ عَيِ مُغُنْتَا؟ عَثٜىٰثِ رَيْ، كُواْ أَ هَلَكَاشِ؟»‏

¹⁰ سَيْ يَدُدُّوبٜىٰسُ دُكَ، سَعَنً يَثٜىٰ وَمُتُمِنْ ‏«‏كَمِيڧَ حَنُّنْكَ؞»‏ شِے كُوَ يَمِيڧٜىٰ حَنُّنْ، سَيْ حَنُّنْسَ يَوَرْكٜىٰ؞

¹¹ سَيْ هَوْشِ يَكَامَ ڢَرِسِيَاوَا دَ مَلَمً كُواْيَرْوَرْ مُوسَٰى سُواْسَيْ، سُكَ ڢَارَ مَغَنَ دَ جُونَنْسُ عَكَنْ أَبِنْدَ ذَاسُيِ دَ عِيسَىٰ؞

عِيسَىٰ يَذَاٻِ أَلْمَجِرَيْ شَا بِيُ

¹² عَݣُونَكِنْنَنْ، عِيسَىٰ يَجٜىٰ يَهَوْ بَبَّنْ تُدُ دُواْمِنْ يَيِ أَدُّعَ؞ يَݣُونَ يَنَ أَدُّعَ غَ اللَّهْ؞

¹³ دَ غَرِ يَوَايٜىٰ، سَيْ يَكِرَا أَلْمَجِرَنْسَ، يَذَاٻِ غُدَا غُواْمَشَا بِيُ دَغَ ثِكِنْسُ، وَطَنْدَ يَثٜىٰدَسُو مَنْذَنِّے؞ غَا سُونَيٜىٰنْسُ،

¹⁴ سِيمَنْ، وَنْدَ عِيسَىٰ يَسَا مَسَ سُونَ بِتْرُسْ، أَنْدَرَوُسْ طَنْعُوَنْ بِتْرُسْ، يَعْڧُوبَ، يَحْيَى، ڢِلِبُسْ، بَرْتَلُواْمِ،

¹⁵ مَتِيُ، تُواْمَ، يَعْڧُوبَ طَنْ هَلْڢَ، سِيمَنْ، وَنْدَ عَكٜىٰثٜىٰ دَشِ مَيْ كِيشِنْ ڧَسَرْسَ،

¹⁶ يَهُودَ طَنْ يَعْڧُوبَ، يَهُودَ إِسْكَرِيُواْتِ، وَنْدَ يَبَاشٜىٰشِ؞

عِيسَىٰ يَكُواْيَرْ دَ مُتَنٜىٰ، يَكُمَ وَرْكَرْ دَسُو

¹⁷ سَيْ عِيسَىٰ يَسَوْكُواْ تَرٜىٰدَ مَنْذَنِّےنْسَ، يَڟَيَ أَوَنِ وُرِے مَيْ ڢِيلِ سُواْسَيْ، تَرٜىٰدَ مُتَنٜىٰ دَيَوَ وَطَنْدَ سُكٜىٰ أَلْمَجِرَنْسَ؞ أَ نَنْ كُمَ غَا مُتَنٜىٰ دَيَوَ دَ سُكَذُواْ دَغَ كُواْعِنَ عَيَنْكِنْ يَهُودِيَ دَ عُرُوشَلِيمَ دَ كُمَ يَنْكِنْ غَرُضُوً تَيَ دَ سِدُوانْ وَطَنْدَ سُكٜىٰ عَبَاكِنْ بَبَّرْ تٜىٰكُ؞

¹⁸ سُنْ ذُواْ دُواْمِنْ سُجِيشِ، سُكُمَ سَامِ وَرْكٜىٰوَ دَغَ دُكَنْ ثُوتُتُّكَنْسُ؞ عَكَ كُمَ وَرْكَرْدَ مُتَنٜىٰنْ دَ ڧَظَامَنْ رُوحُواْحِ سُكٜىٰ دَامُنْسُ؞

¹⁹ كُواْوَ يَيِ ڧُواْڧَرِ يَتَٻَشِ، دُواْمِنْ إِيكُواْ يَنَ ڢِتُواْوَ دَغَ غَرٜىٰشِ، يَكُوَ وَرْكَرْ دَسُو دُكَ؞

أَلْبَرْكُ

²⁰ سَيْ عِيسَىٰ يَدُوبِے أَلْمَجِرَنْسَ يَثٜىٰ، ‏«‏مَاسُ أَلْبَرْكَنٜىٰ، كُو مَتَلَوْتَ، غَمَا مُلْكٍ اللَّهْ نَاكُنٜىٰ!‏

²¹ مَاسُ أَلْبَرْكَنٜىٰ كُو دَ كُكٜىٰ جِنْ يُنْوَ يَنْذُ، غَمَا ذَاكُ ڧُواْشِ!‏ مَاسُ أَلْبَرْكَنٜىٰ كُو دَ كُكٜىٰ كُوكَا يَنْذُ، غَمَا ذَاكُيِ دَارِيَا!‏

²² مَاسُ أَلْبَرْكَنٜىٰ كُو عِدَنْ مُتَنٜىٰ سُكَڧِيكُ، سُكَ وَارٜىٰكُ، سُنَ ذَاغِنْكُ، سُنَ ثٜىٰوَ كُو مُوغَيٜىٰنٜىٰ سَبُواْدَ طَنْ مُتُمْ!‏

²³ ‏«‏إِنْ وَنَّنْ يَڢَرُ، كُيِ ڢَضٍ ثِكِ!‏ كُكُمَيِ ضَوَ دُواْمِنْ ڢَضٍ ثِكِ، غَمَا لَادَنْكُ يَنَ دَيَوَ أَ سَمَ؞ غَمَا حَكَ كَاكَنِّنْسُ مَا سُكَيِ وَ أَنَّبَاوَنْ دَ سُكَ رِغَاكُ؞»‏

أَلْعَمُرَنْ كَيْتُواْ

²⁴ ‏«‏عَمَّا كَيْتُوانْكُ، كُو دَ كُكٜىٰ دَ أَرْزِڧِ يَنْذُ، غَمَا كُنْ رِغَا كُنْجِ دَاطِنْكُ كُواْ!‏

²⁵ كَيْتُوانْكُ، كُو دَ كُكَ ڧُواْشِ يَنْذُ، غَمَا ذَاكُ ذَوْنَ دَ يُنْوَ!‏ كَيْتُوانْكُ، كُو دَ كُكٜىٰ دَارِيَا يَنْذُ، غَمَا ذَاكُيِ بَڧِنْ ثِكِ، كُنَ كُوكَا!‏

²⁶ كَيْتُوانْكُ، كُو دَ مُتَنٜىٰ سُكٜىٰ يَبُوانْكُ، غَمَا حَكَ كَاكَنِّنْسُ مَا سُكَيِ وَ أَنَّبَاوَنْ ڧَضْيَا؞»‏

كُنُونَ ڧَوْنَ غَ مَاسُ غَابَادَكُو

²⁷ ‏«‏إِنَ غَيَ مُكُ، كُو دَ كُكٜىٰ جِنَ، كُڧَوْنَثِ مَاسُ غَابَادَكُو، كُيِ وَ وَطَنْدَ بَاسَ سُوانْ غَنِنْكُ أَلْحٜىٰرِ؞

²⁸ كُسَا وَمَاسُ ذَاغِنْكُ أَلْبَرْكَ، كُكُمَيِ وَمَاسُ بَاكُ وَهَلَ أَدُّعَ؞

²⁹ عِدَنْ وَنِ يَمَرٜىٰكَ أَوَنَّنْ كُمَتُ، كَجُويَا مَسَ طَيَنْ مَا؞ عِدَنْ وَنِ يَڨُوثٜىٰ مَكَ بَبَّرْ رِغَا، كَثِرٜىٰ رِغَرْ ثِكِنْ مَا كَبَاشِ؞

³⁰ دُكْ وَنْدَ يَضُواْڧٜىٰكَ أَبُ، كَبَاشِ؞ وَنْدَ كُمَ يَيِ مَكَ ڨُوثٜىٰ، كَدَ مَا كَنٜىٰمِ أَ مَيَرْ مَكَ؞

³¹ كُيِ وَمُتَنٜىٰ أَبِنْدَ كُكٜىٰسُواْ سُيِمُكُ؞

³² ‏«‏عِدَنْ كُنَ ڧَوْنَرْ وَطَنْدَ سُكٜىٰ ڧَوْنَرْكُ نٜىٰ كَوَيْ، يَيَ ذَاكُ سَامِ أَلْبَرْكَ؟ كُواْ مَاسُ ذُنُوبِ مَا سُنَ ڧَوْنَرْ وَطَنْدَ سُكٜىٰ ڧَوْنَرْسُ نٜىٰ!‏

³³ عِدَنْ كُمَ كُنَ يِنأَلْحٜىٰرِ غَ مَاسُ يِمُكُ نٜىٰ كَوَيْ، يَيَ ذَاكُ سَامِ أَلْبَرْكَ؟ كُواْ مَاسُ ذُنُوبِ مَا سُنَيِنْ حَكَ؞

³⁴ إِنْ كُمَ مُتَنٜىٰنْ دَ ذَاسُ عِيَ بِيَنْكُ نٜىٰ كُكٜىٰبَاسُ بَاشِ، يَيَ ذَاكُ سَامِ أَلْبَرْكَ؟ كُواْ مَاسُ ذُنُوبِ مَا سُنَ بَادَ بَاشِ غَ مَاسُ ذُنُوبِ دُوانْ عَبِيَسُ دَيْدَيْ!‏

³⁵ عَمَّا كُو، كُڧَوْنَثِ مَاسُ غَابَادَكُو، كُكُمَيِ مُسُ أَلْحٜىٰرِ، كُبَادَ بَاشِ بَدَنُڢِ سَيْ أَنْبِيَكُبَ؞ تَيِنْ حَكَنٜىٰ ذَاكُسَامِ لَادَ مَيْ يَوَ، كُكُمَ ذَمَ یَیَنْ اللَّهْ مَڢِے طَوْكَكَ؞ غَمَا شِے مَيْ أَلْحٜىٰرِ نٜىٰ غَ مُتَنٜىٰنْ دَ بَاسَغُواْدِيَ دَ كُمَ مُوغَيٜىٰ؞

³⁶ كُذَمَ مَاسُ تَوْسَيِ كَمَرْ يَدَّ عُبَنْكُ يَكٜىٰ مَيْ تَوْسَيِ؞

كَدَ كُبَا كُواْوَ لَيْڢِ

³⁷ ‏«‏كَدَ كُشَرْعَنْتَ كُواْوَ، كُو كُمَ بَذَاعَيِ مُكُبَ؞ كَدَ كُحُكُنْتَ كُواْوَ، كُو كُمَ بَذَاعَ حُكُنْتَ كُبَ؞ كُيَاڢٜىٰ وَكُواْوَ، كُو كُمَ ذَاعَ يَاڢٜىٰ مُكُ؞

³⁸ كُبَايَرْ، كُو مَا ذَاعَ بَاكُ مُودُ عَثِكٜىٰ، عَثِكَ حَرْ يَيِ تُدُ يَنَ ظُبَ، حَرْ أَ جُويٜىٰ مُكُ سَوْرَنْ أَهَنُّنْ رِغَا؞ غَمَا دَ مُودُنْ دَ كُكٜىٰ عَوْنَاوَا مُتَنٜىٰ دَشِ، دَشِے ذَاعَ عَوْنَ مُكُ؞»‏

³⁹ عِيسَىٰ يَكُمَبَاسُ وَنِ مِصَالِ يَثٜىٰ ‏«‏مَكَهُواْ ذَيْ عِيَيِ وَوَنِ مَكَهُواْ جَغُواْرَ؟ عِدَنْ يَا يِهَكَ، تُواْ، دُكَنْسُ ذَاسُ ڢَاطِ أَ رَامِ؞

⁴⁰ بَا طَنْ مَكَرَنْتَنْدَ يَڢِ مَلَمِنْسَ، عَمَّا كُواْوَنٜىٰ طَنْ مَكَرَنْتَ وَنْدَ يَغَمَ كَرَاتُنْسَ، ذَيْذَمَ كَمَرْ مَلَمِنْسَ؞

⁴¹ ‏«‏دُوانْمٜىٰ كَكٜىٰ غَنِنْ طَنْ ڟِنْكٜىٰنْ دَيَكٜىٰ أَعِدُوانْ طَنْعُوَنْكَ، عَمَّا بَكَ كُلَ دَ غُنْ‌غُمٜىٰنْ دَيَكٜىٰ ثِكِنْ عِدُوانْكَبَ؟

⁴² يَيَ كُمَ ذَاكَ عِيَثٜىٰ وَطَنْعُوَنْكَ، ‏‹‏كَيْ، طَنْعُوَنَ، بَرِ إِنْثِرٜىٰ مَكَ طَنْ ڟِنْكٜىٰنَّنْ دَيَكٜىٰ عِدُوانْكَ،›‏ بَايَنْ كُمَ بَكَ عِيَ غَنِنْ غُنْ‌غُمٜىٰنْ دَيَكٜىٰ أَ نَاكَ عِدُوانْ بَ؟ كَيْ مُنَاڢُكِ!‏ كَڢَارَ ثِرٜىٰ غُنْ‌غُمٜىٰنْ دَيَكٜىٰ ثِكِنْ عِدُوانْكَ تُكُنَ، دُوانْ كَاعِيَ غَنِ سُواْسَيْ يَدَّ ذَاكَ عِيَ ثِرٜىٰ طَنْ ڟِنْكٜىٰنْ دَيَكٜىٰ ثِكِنْ عِدُوانْ طَنْعُوَنْكَ؞

أَنَ سَنِنْ إِتَاثٜىٰ تَ إِرِنْ یَیَنْسَ

⁴³ ‏«‏إِتَاثٜىٰ مَيْݣَوْ بَا يَيِنْ یَیَ مَرَسَ ݣَوْ، كُمَ مُومُّنَنْ إِتَاثٜىٰ بَا يَيِنْ یَیَ مَاسُ ݣَوْ؞

⁴⁴ أَنَ سَنِنْ كُواْوَنٜىٰ إِتَاثٜىٰ تَ إِرِنْ یَیَنْسَ؞ بَايَدَّ ذَاعَ ڟِنْكٜىٰ ٻَوْرٜىٰ أَجِكِنْ ڧَيَ، كُواْ كُوَ إِنَبِے أَجِكِنْ إِتَاثٜىٰنْ ڧَيَ؞

⁴⁵ مُتُمِنْ كِرْكِ يَنَ ڢِتَرْدَ أَبُبُوَ مَاسُ ݣَوْ دَغَ أَجِيَرْ أَبُبُوَ مَاسُ ݣَوْ وَطَنْدَ سُكٜىٰ أَ ذُوثِيَارْسَ؞ عَمَّا مُوغُنْ مُتُمْ يَنَ ڢِتَرْدَ أَبُبُوَ مَرَسَ ݣَوْ دَغَ أَجِيَرْ أَبُبُوَ مَرَسَ ݣَوْ وَطَنْدَ سُكٜىٰ أَ ذُوثِيَارْسَ؞ أَبِنْ دَيَكٜىٰ ثِكِنْ ذُوثِيَا، أَيْ، شِے يَكٜىٰ ڢِتُواْوَ عَبَاكِ؞

مُتَنٜىٰ بِيُ مَاسُ غِنِ

⁴⁶ ‏«‏دُوانْمٜىٰ كُكٜىٰثٜىٰ دَنِے ‏‹‏عُبَنْ‌غِجِ، عُبَنْ‌غِجِ،›‏ عَمَّا كُنْڧِ يِنْ أَبِنْدَ نَثٜىٰ كُيِ؟

⁴⁷ دُكْ وَنْدَ يَذُواْ وُرِينَ يَسَوْرَرَتَ، يَكُمَيِ أَبِنْدَ نَثٜىٰ يَيِ، ذَنْ ݣُوتَنْتَا مُكُ يَدَّ مُتُمِنَّنْ يَكٜىٰ؞

⁴⁸ شِے كَمَرْ مُتُمْ نٜىٰ وَنْدَ دَ ذَيْ غِنَا غِدَنْسَ، سَيْ يَحَڧَ ڧَسَا دَ ظُرْڢِ، يَكُمَ كَڢَ تُوشٜىٰنْ غِنِنْ عَكَنْ دُوڟٜىٰ؞ دَ عَكَيِ أَمْبَلِيَرْ ضُوَ، سَيْ تَبُغِ غِدَنْ، عَمَّا بَتَ عِيَ غِرْغِظَ غِدَنْبَ، سَبُواْدَ أَنْ‌غِنَاشِ دَݣَوْ؞

⁴⁹ عَمَّا دُكْ وَنْدَ يَجِ مَغَنَاتَ بَيْكُمَيِ أَبِنْدَ نَثٜىٰ يَيِبَ دَيْدَيْ يَكٜىٰ دَ مُتُمِنْدَ يَغِنَ غِدَنْسَ بَاتَرٜىٰدَ يَيِ وَغِدَنَّنْ تُوشٜىٰ مَيْݣَوْبَ؞ دَ عَكَيِ أَمْبَلِيَرْ ضُوَ، سَيْ تَبُغِ غِدَنْ، سَيْ يَڢَاطِ غَبَاطَيَ؞ ڢَاطُوَرْ غِدَنَّنْ كُوَ تَيِ مُونِ سُواْسَيْ؞»‏