لُكَّ 21 - أَتَّوْرَتْ دَ أَنَّبَاوَا

بَيْكُوانْ مَثٜىٰنْدَ مِجِنْتَ يَمُتُ

¹ عِيسَىٰ يَطَغَ كَيْ يَغَ وَطَنْسُ مَاسُ كُطِ سُنَسَا بَيْكُوانْسُ أَوُرِنْ ظُبَ بَيْكُواْ؞

² سَيْ يَغَ وَتَ مَتَلَوْثِيَرْ دَ مِجِنْتَ يَمُتُ تَذُواْ تَسَا بَيْكُواْ نَیَنْ تَغُلَّ بِيُنْ دَ بَسُ كَيْ كُواْبُواْبَ؞

³ سَيْ عِيسَىٰ يَثٜىٰ ‏«‏حَڧِيڧَ إِنَ غَيَ مُكُ، بَيْكُوانْ دَ مَتَلَوْثِيَرْ نَنْ تَسَا، يَڢِ نَسَوْرَنْ دُكَ؞

⁴ غَمَا دُكَنْسُ سُنْ بَايَرْ دَغَ يَوَنْ أَبِنْدَ سُكٜىٰ دَشِينٜىٰ، عَمَّا عِتَ كُوَ ثِكِنْ رَشِنْتَ تَسَا دُكْ طَنْ كُطِنْ دَ تَكٜىٰدَشِ أَ رَايُوَرْتَ؞»‏

عِيسَىٰ يَيِ مَغَنَ عَكَنْ رُشٜىٰوَرْ هَيْكَلِ

⁵ وَطَنْسُ سُكَ ڢَارَ مَغَنَ عَكَنْ هَيْكَلِ دَ أَدُوانْ دُوَڟُو مَاسُ دَرَجَرْ دَ عَكَ غِنَاشِ دَسُو دَ كُمَ إِرِنْ ݣَوْتَنْ دَ عَكَيِ مَسَ أَدُواْ دَسُو؞ سَيْ عِيسَىٰ يَثٜىٰ،

⁶ ‏«‏غَمٜىٰ دَ أَبُبُوَنَّنْ دَ كُكٜىٰ كَلُّواْ نٜىٰ، تُواْ، لُواْكَثِ يَنَ ذُوَا دَ بَا وَنِ دُوڟٜىٰنْ دَذَاعَ بَرِ نَنْ عَكَنْ طَنْعُوَنْسَ، كُواْوَنّٜىٰنْسُ ذَاعَ رُشٜىٰشِ؞»‏

ڢَرْكُوانْ وَهَلَ

⁷ سَيْ سُكَ تَمْبَيٜىٰشِ سُكَثٜىٰ ‏«‏مَلَمْ، يَوْشٜىٰ وَنَّنْ ذَيْ ڢَرُ؟ وَثٜىٰ عَلَمَثٜىٰ كُمَ ذَاعَ غَنِ سَعَدَّ أَبُبُوَنَّنْ ذَاسُ ڢَرُ؟»‏

⁸ سَيْ يَثٜىٰمُسُ ‏«‏كُلُورَ ڢَا، كَدَ وَنِ يَرُوطٜىٰكُ؞ دُواْمِنْ مُتَنٜىٰ دَيَوَ ذَاسُذُواْ عَثِكِنْ سُونَنَ، سُنَ ثٜىٰوَ ‏‹‏أَيْ، نِنٜىٰ شِ!‏›‏ دَكُمَ، ‏‹‏لُواْكَثِ يَيِ!‏›‏ كَدَ ڢَا كُبِيسُ؞

⁹ كَدَ مَا كُجِڟُواْرُواْ إِنْ كُنْجِ لَابَرِنْ يَاڧٜىٰ يَاڧٜىٰ دَ تَاشِنْ حَنْكَلِ؞ لَلَّيْنٜىٰ وَنَّنْ يَڢَارَ ذُوَا، عَمَّا ڧَرْشٜىٰنْ بَيْذُواْ بَتُكُنَ؞»‏

¹⁰ يَثِيغَبَدَ ثٜىٰوَ ‏«‏أَلْعُمَّ ذَاتَ تَاسَرْوَ أَلْعُمَّ، مُلْكِ يَتَاسَرْ وَمُلْكِ؞

¹¹ ذَاعَيِ مُومُّنَرْ ضَوَرْ ڧَسَا دَ يُنْوَ دَ بَلَعِ أَوُرَارٜىٰ دَبَمْ دَبَمْ؞ ذَاعَغَ أَبُبُوَ مَاسُ بَنْڟُواْرُواْ دَ عَلَمُ مَاسُ بَنْ مَامَاكِ سُنَ ڢِتُواْوَ دَغَ سَمَ؞

¹² كَاڢِنْ دُكْ أَبُبُوَنَّنْ سُڢَرُ، ذَاسُ كَامَكُ، سُبَادَكُو دُوانْ أَڟَنَنْتَ مُكُ؞ ذَاعَكَيْكُ غَبَنْ مَجَمِعُ عَكُمَ سَاكُ عَكُرْكُكُ؞ ذَاعَكُمَ كَيْكُ غَبَنْ سَرَاكُنَ دَ شُوغَبَنِّ سَبُواْدَ سُونَنَ؞

¹³ وَنَّنْ نٜىٰ ذَيْبَاكُ دَامَ كُيِ شَيْدَرْ لَابَرِنَ؞

¹⁴ سَبُواْدَ حَكَ سَيْ كُشِرْيَ أَ رَنْكُ تُنْدَ وُرِے عَكَنْ بَذَاكُ دَامُ دَ يَدَّ ذَاكُكَارٜىٰ كَنْكُبَ؞

¹⁵ غَمَا ذَنْبَاكُ كَلْمُواْمِ دَ حِكِمَ يَدَّ كُواْ طَيَ دَغَ ثِكِنْ مَاسُ غَابَادَكُو بَذَيْ عِيَ جُويٜىٰ مَغَنَرْ كُواْ يَيِ مُسُونْ أَبِنْدَ كُكَثٜىٰبَ؞

¹⁶ حَرْ إِيَايٜىٰنْكُ مَا دَ یَنْعُوَنْكُ دَ دَنْ‌غِنْكُ دَ أَبُواْكَنْكُ ذَاسُ بَاشٜىٰكُ، سُكُمَسَا عَكَشٜىٰ وَطَنْسُنْكُ؞

¹⁷ كُواْوَ ذَيْڧِيكُ سَبُواْدَ سُونَنَ؞

¹⁸ عَمَّا بَا كُواْطَيَ دَغَ ثِكِنْ غَاشِنْ كَنْكُ دَظَيْ ٻَتَ؞

¹⁹ عِدَنْ كُكَجِمْرٜىٰ، ذَاكُ ڟِيرَا؞

عِيسَىٰ يَڢَطَا يَدَّ عُرُوشَلِيمَ ذَاتَ ڢَاطِ

²⁰ ‏«‏سَعَدَّ كُكَغَ سُواْجُواْجِ سُنْ كٜىٰوَيٜىٰ عُرُوشَلِيمَ، ذَاكُ سَنِ ثٜىٰوَ أَنْيِ كُسَ أَ رُشٜىٰتَ؞

²¹ تُواْ، سَيْ وَطَنْدَ سُكٜىٰ ثِكِنْ يَنْكِنْ يَهُودِيَ، سُغُدُ ذُوَا ثِكِنْ تُدَّيْ؞ وَطَنْدَ سُكٜىٰ عَبِرْنِ كُمَ سُڢِتَ، وَطَنْدَ سُكٜىٰ عَڧَوْيٜىٰ كُمَ كَدَ سُشِغَ بِرْنِنْ؞

²² غَمَا ݣُونَكِنَّنْ ݣُونَكِنْ حُكُنْثِ نٜىٰ، دُوانْ دُواْلٜىٰنٜىٰ عَثِكَ دُكْ أَبِنْدَ رُبُوتَثِّيَرْ مَغَنَرْ اللَّهْ تَثٜىٰ؞

²³ كَيْتُوانْ مَاتَا مَاسُثِكِ دَ مَاسُ غُواْيُواْ أَوَنَّنْ لُواْكَثِ!‏ غَمَا مُومُّنَرْ وَهَلَ ذَاتَ شِغَ ڧَسَرْ، كُمَ ڢُشِنْ اللَّهْ ذَيْ سَوْكُواْ عَكَنْ مُتَنٜىٰنَّنْ؞

²⁴ ذَاعَكَشٜىٰ وَطَنْسُ عَيَاڧِ، عَكُمَ كَامَ وَطَنْسُ عَكَيْسُ بَوْتَا أَوَطَنْسُ ڧَسَاشٜىٰ؞ وَطَنْدَ بَا يَهُودَاوَا بَ ذَاسُ ڟَنَنْتَاوَ عُرُوشَلِيمَ، حَرْ سَيْ لُواْكَثِنْسُ يَثِكَ؞

دَاوُاْوَرْ طَنْ مُتُمْ

²⁵ ‏«‏ذَاعَكُمَغَ عَلَمُ مَاسُبَنْ ڟُواْرُواْ أَجِكِنْ رَانَ دَ وَتَ دَ تَوْرَرِ؞ عَدُونِيَا كُمَ أَلْعُمَّيْ ذَاسُ ضِكِثِے دُوانْ ڟُواْرُواْ سَبُواْدَ تَڢَسَ دَ هَوْكَنْ تٜىٰكُ؞

²⁶ مُتَنٜىٰ ذَاسُ سُومَ دُوانْ ڟُواْرُواْ، ذَاسُ كُمَ رَظَنَ دَ غَنِنْ أَبُبُوَنْ دَسُكٜىٰ ڢَرُوَ غَ دُونِيَا؞ غَمَا ذَاعَ غِرْغِظَ إِيكُواْكِنْ سَرَرِنْ سَمَ؞

²⁷ سَعَنً ذَاعَ غَ طَنْ مُتُمْ يَنَ ذُوَا عَثِكِنْ غِرْغِجٜىٰ تَرٜىٰدَ إِيكُواْ دَ طَوْكَكَ مَيْ يَوَ؞

²⁸ عِدَنْ وَطَنَّنْ أَبُبُوَ سُكَ ڢَارَ ڢَرُوَ، كُشِرْيَ كَنْكُ سُواْسَيْ دُواْمِنْ ثٜىٰتُوانْكُ يَيِكُسَ؞»‏

كُواْيَرْوَا عَكَنْ إِتَاثٜىٰنْ ٻَوْرٜىٰ

²⁹ سَيْ عِيسَىٰ يَبَاسُ وَنِ مِصَالِ يَثٜىٰ ‏«‏كُدُوبَ إِتَاثٜىٰنْ ٻَوْرٜىٰ دَ سَوْرَنْ عِتَتُوَ مَنَ؞

³⁰ دَظَرَرْ سُنْڢَارَ ڢِتَرْدَ سَابَبِّنْ غَنْيٜىٰ، كُو دَكَنْكُ كُنْسَنْ ثٜىٰوَ دَامِنَ تَيِكُسَ كٜىٰنَنْ؞

³¹ حَكَ مَا، عِدَنْ كُكَغَ وَطَنَّنْ أَبُبُوَ سُنَ ڢَرُوَ، كُسَنِ مُلْكٍ اللَّهْ يَيِكُسَ؞

³² ‏«‏حَڧِيڧَ إِنَ غَيَ مُكُ مُتَنٜىٰنْ زَامَانِنَّنْ بَذَاسُ مُتُبَ سَيْ دُكَنْ أَبُبُوَنَّنْ سُنْ ڢَرُ؞

³³ سَمَ دَ دُونِيَا ذَاسُ شُوطٜىٰ، عَمَّا كَلْمَتَ بَذَاتَ شُوطٜىٰبَ كُواْ كَطَنْ؞

غَرْغَطِ عَكَنْ ذَمَ دَ شِرِ

³⁴ ‏«‏كُذَوْنَ أَشِرْيٜىٰ ڢَا؞ كَدَ كُبَرْ ثِيٜىٰ ثِيٜىٰ دَ بُغُوَ دَ دَامُوَرْ رَايُوَرْ دُونِيَا سُطَوْكِ حَنْكَلِنْكُ؞ عِدَنْ بَهَكَبَ، رَانَرْ نَنْ ذَاتَ ذُواْ بَا لَابَرِ تَثَڢْكٜىٰكُ

³⁵ كَمَرْ تَرْكُواْ؞ غَمَا ذَاتَ ذُواْ عَكَنْ كُواْوَ دَيَكٜىٰ ذَمَ عَدُونِيَا دُكَ؞

³⁶ كُذَوْنَ أَشِرْيٜىٰ ڢَا، كُنَ أَدُّعَ كُلُّمْ دُوانْ كُسَامِ ڧَرْڢِنْ كُٻُثٜىٰ وَدُكَنْ وَطَنَّنْ أَبُبُوَنْ دَ ذَاسُ ڢَرُ، كُكُمَ ڟَيَ أَغَبَنْ طَنْ مُتُمْ؞»‏

³⁷ كُواْوَثٜىٰ رَانَ، عِيسَىٰ يَكَنْيِ كُواْيَرْوَا أَهَيْكَلِ، عَمَّا عِدَنْ يَمَّ تَيِ سَيْ يَڢِتَ يَجٜىٰ تُدُنْ عِتَتُوَنْ ظَيْتُنْ يَݣُونَ عَثَنْ؞

³⁸ دَ سَسَّڢٜىٰ كُمَ دُكَنْ مُتَنٜىٰ سُكَنْ ذُواْ وُرِنْسَ أَهَيْكَلِ سُجِيشِ؞