لُكَّ 2 - أَتَّوْرَتْ دَ أَنَّبَاوَا

حَيْڢُوَرْ عِيسَىٰ

¹ عَݣُونَكِنْنَنْ، كَيْسَرْ أَوْغُسْتُسْ يَبَادَ عُمَرْنِ عَڧِرْغَ دُكَنْ مُتَنٜىٰنْ دَسُكٜىٰ عَڧَرْڧَشِنْ مُلْكٍ رُواْمَ؞

² وَنَّنْ شِينٜىٰ ڧِرْغَ تَڢَرْكُواْ وَدَّ عَكَيِ لُواْكَثِنْ دَ كِرِنِيُسْ يَكٜىٰ مُلْكٍ ڧَسَرْ سُورِيَ؞

³ دُكَنْ مُتَنٜىٰ سُكَ كُواْمَ غَرُرُوَنْسُ دُواْمِنْ عَڧِرْغَسُ؞

⁴ يُوسُڢَ مَا يَبَرْ غَرِنْ نَظَرٜىٰتْ عَثِكِنْ غَلِيلِ يَجٜىٰ غَرِنْ بَيْتَلَحْمِ عَيَنْكِنْ يَهُودِيَ، وَتُواْ غَرِنْ دَ عَكَ حَيْڢِ سَرْكِے دَاوُدَ كٜىٰنَنْ؞ يُوسُڢَ يَجٜىٰ ثَنْ دُواْمِنْ شِ دَغَ دَنْ‌غِنْ دَاوُدَ نٜىٰ؞

⁵ يَتَڢِے تَرٜىٰدَ مَرْيَمُ دَ عَكَيِ أَلْڧَوَرِ ذَيْ عَوْرَ، دُواْمِنْ عَڧِرْغَسُ تَرٜىٰ؞ لُواْكَثِنَّنْ كُوَ تَنَدَ ثِكِ؞

⁶ دَ سُنَ ثَنْ بَيْتَلَحْمِ، سَيْ ݣُونَكِنْ حَيْڢُوَرْتَ سُكَيِ؞

⁷ تَا حَيْڢِ طَنْتَ نَڢَارِ، تَا رُڢٜىٰشِ دَ ذَنٜىٰنْ غُواْيُواْ، تَكُمَ ݣُونْتَرْ دَشِ أَعَبِنْدَ عَكٜىٰبَادَبُّواْبِے عَبِنْثِ عَثِكِ، دُواْمِنْ بَسُ سَامِ طَاكِ أَ مَسَوْكِبَ؞

مَكِيَايَ دَ مَلاَىِٕكُ

⁸ أَوَنَّنْ غٜىٰڢٜىٰنْ ڧَسَرْ كُوَ، أَݣَويْ وَطَنْسُ مَكِيَايَ سُنَ ݣُونَ أَڢِيلِ، سُنَ لُورَ دَ دَبُّواْبِنْسُ دَ دَرٜىٰ؞

⁹ بَا لَابَرِ سَيْغَا مَلاَىِٕكَنْ عُبَنْ‌غِجِ يَبَيَّنَ غَرٜىٰسُ، كُمَ طَوْكَكَرْ اللَّهْ تَحَصْكَكَسُ؞ سَيْ سُكَجِڟُواْرُواْ سُواْسَيْ؞

¹⁰ عَمَّا مَلاَىِٕكَنْ يَثٜىٰمُسُ ‏«‏كَدَ كُجِڟُواْرُواْ!‏ غَمَا نَا ذُواْ مُكُ دَ لَابَرِ مَيْ دَاطِے، وَنْدَ ذَيْسَا دُكَنْ مُتَنٜىٰ سُيِ ڢَضٍ ثِكِ سُواْسَيْ؞

¹¹ عَيَوْ طِنَّنْ، عَثِكِنْ غَرِنْ دَاوُدَ، أَنْحَيْڢَ مُكُ مَيْ ثٜىٰتُواْ، أَلْمَسِيحُ عُبَنْ‌غِجِ!‏

¹² وَنَّنْ نٜىٰ ذَيْ ذَمَ مُكُ عَلَمَ، ذَاكُ سَامُ أَنَّطٜىٰ جَرِرِ دَ ذَنٜىٰ، أَنْكُمَ ݣُونْتَرْ دَشِ أَعَبِنْدَ عَكٜىٰبَادَبُّواْبِے عَبِنْثِ عَثِكِ؞»‏

¹³ بَا لَابَرِ سَيْغَا ڧُنْ‌غِيَرْ مَلاَىِٕكُ دَغَ سَمَ سُنْ بَيَّنَ تَرٜىٰدَ مَلاَىِٕكَ نَڢَارِنْ، سُنَ يَبُوانْ اللَّهْ سُنَ ثٜىٰوَ

¹⁴ ‏«‏طَوْكَكَ غَ اللَّهْ عَثَنْ ثِكِنْ سَمَ!‏ عَدُونِيَا بَرِ سَلَمَ تَكَسَنْثٜىٰ تَرٜىٰدَ وَطَنْدَ اللَّهْ يَكٜىٰ جِنْ دَاطِنْسُ!‏»‏

¹⁵ دَ مَلاَىِٕكُنْ سُكَ رَبُ دَسُو سُكَ كُواْمَ سَمَ، سَيْ مَكِيَايَنْ سُكَثٜىٰ وَجُونَنْسُ ‏«‏بَرِ مُجٜىٰ بَيْتَلَحْمِ مُغَ أَبِنَّنْ دَيَڢَرُ دَ عُبَنْ‌غِجِ يَغَيَ مَنَ؞»‏

¹⁶ سَيْ سُكَ تَڢِے دَسَوْرِ، سُكَغَ مَرْيَمُ دَ يُوسُڢَ، سُكَ كُمَ غَا يَرُوانْ يَنَ ݣُونْثٜىٰ أَعَبِنْدَ عَكٜىٰبَادَبُّواْبِے عَبِنْثِ عَثِكِ؞

¹⁷ دَ مَكِيَايَنْ سُكَ غَنْشِ سَيْ سُكَ بَادَ لَابَرِنْ أَبِنْدَ مَلاَىِٕكَنْ يَڢَطَا مُسُ عَكَنْ يَرُوانْ؞

¹⁸ دُكَنْ مُتَنٜىٰنْ دَ سُكَجِ وَنَّنْ لَابَرِ، سَيْ سُكَيِ تَرِڧٜىٰ بَاكِ سُنَ مَامَاكِنْ أَبِنْدَ مَكِيَايَنَّنْ سُكَثٜىٰ؞

¹⁹ مَرْيَمُ كُوَ تَرِڧٜىٰ دُكَنْ وَطَنَّنْ أَبُبُوَ، تَنَ تُنَانِنْسُ أَ ذُوثِيَارْتَ؞

²⁰ مَكِيَايَنْ كُمَ سُكَ كُواْمَ، سُنَ تَيِنْ وَاڧُواْڧِنْ يَبُوانْ اللَّهْ، سَبُواْدَ دُكَنْ أَبِنْدَ سُكَجِ سُكَ كُمَ غَنِ؞ كُواْمٜىٰ يَڢَرُ كُوَ كَمَرْ دَيْ يَدَّ مَلاَىِٕكَنْ يَڢَطَا مُسُ؞

أَنْ سَا وَ عِيسَىٰ سُونَ

²¹ دَ يَرُوانْ يَيِ ݣُونَ تَݣُوسْ، سَيْ عَكَيِ مَسَ كَاثِيَ، عَكَ كُمَ بَاشِ سُونَ عِيسَىٰ، سُونَنْ دَ مَلاَىِٕكَ يَبَايَرْ تُنْ كَاڢِنْ عَيِ ثِكِنْسَ؞

أَنْ كَيْ عِيسَىٰ هَيْكَلِ دُوانْ مِيڧَاوَا

²² دَ لُواْكَثِ يَكَيْ دَ مَرْيَمُ دَ يُوسُڢَ ذَاسُيِ أَبِنْدَ كُواْيَرْوَرْ مُوسَٰى تَثٜىٰ عَيِ دُوانْ ڟَبْتَثٜىٰوَ سَيْ سُكَ طَوْكِ عِيسَىٰ ذُوَا عُرُوشَلِيمَ دُواْمِنْ سُمِيڧَشِ غَ عُبَنْ‌غِجِ؞

²³ حَكَ يَكٜىٰ أَرُبُوثٜىٰ أَ كُواْيَرْوَرْ عُبَنْ‌غِجِ ‏«‏دُكْ طَا نَڢَارِ وَنْدَ عَكَ حَيْڢَ، ذَاعَ كٜىٰٻٜىٰشِ دَ ڟَرْكِے غَ عُبَنْ‌غِجِ؞»‏

²⁴ سُكَ كُمَيِ هَدَايَ كَمَرْ يَدَّ كُواْيَرْوَرْ عُبَنْ‌غِجِ تَڢَطَا ثٜىٰوَ ‏«‏كُرْثِيُواْيِ بِيُ كُواْ یَنْ تَتَّبَرُ بِيُنٜىٰ ذَاعَ يَنْكَ؞»‏

²⁵ تُواْ، أَوَنَّنْ لُواْكَثِ أَݣَويْ وَنِ مُتُمِنْ دَيَكٜىٰ ذَمَ أَ عُرُوشَلِيمَ دَ عَكٜىٰثٜىٰ دَشِ سِمٜىٰيُوانْ؞ شِے مُتُمْ مَيْ أَدَلْثِنٜىٰ، مَيْ بَوْتَرْ اللَّهْ، كُمَ يَنَ جِضَانْ رَانَرْ دَ ذَاعَ ثٜىٰثِ إِسْرَٰٓءِيلَ؞ رُوحُ مَيْ ڟَرْكِے كُوَ يَنَ تَرٜىٰدَشِ؞

²⁶ رُوحُ مَيْ ڟَرْكِے يَڢَطَا مَسَ ثٜىٰوَ بَذَيْ مُتُبَ سَيْ يَغَ أَلْمَسِيحُنْ دَ عُبَنْ‌غِجِ يَيِ أَلْڧَوَرِ ذَيْ عَيْكُواْ؞

²⁷ دَ رُوحُ يَنَ إِظَشِ سَيْ يَشِغَ هَيْكَلِنْ أَ لُواْكَثِنْ دَ إِيَايٜىٰنْ سُكَ كَٰوُاْ عِيسَىٰ هَيْكَلِ دُواْمِنْ سُيِ كَمَرْ يَدَّ كُواْيَرْوَرْ مُوسَٰى تَثٜىٰ عَيِ،

²⁸ سَيْ سِمٜىٰيُوانْ يَكَرْٻِ يَرُوانْ أَهَنُّنْسَ يَيِ وَ اللَّهْ غُواْدِيَ يَثٜىٰ،

²⁹ ‏«‏يَنْذُ، يَا عُبَنْ‌غِجِ، كَسَلَّمِ بَاوَنْكَ لَاڢِيَ، كَمَرْ يَدَّ كَيِ أَلْڧَوَرِ،

³⁰ غَمَا عِدَنُونَ سُنْ‌غَ ثٜىٰتُوانْكَ،

³¹ ثٜىٰتُوانْدَ كَشِرْيَ أَغَبَنْ دُكَنْ مُتَنٜىٰ،

³² حَصْكٜىٰنْ دَ ذَيْ بَيَّنَكَ غَ وَطَنْدَ بَا يَهُودَاوَا بَ، يَكُمَ كَٰوُاْ طَوْكَكَ غَ مُتَنٜىٰنْكَ إِسْرَٰٓءِيلَ؞»‏

³³ بَابَنْ يَرُوانْ دَ مَامَرْسَ سُكَ رِڧٜىٰ بَاكِ، سُنَ مَامَاكِنْ أَبُبُوَنَّنْ دَ سِمٜىٰيُوانْ يَڢَطَا عَكَنْسَ؞

³⁴ سِمٜىٰيُوانْ يَسَا مُسُ أَلْبَرْكَ، يَثٜىٰ وَ مَرْيَمُ مَامَرْ يَرُوانْ ‏«‏اللَّهْ يَاذَاٻِ يَرُواْنَّنْ دُواْمِنْ يَذَمَ دَلِيلِنْ ڢَاطُوَرْ وَطَنْسُ دَ تَاشِنْ وَطَنْسُ دَيَوَ عَثِكِنْ إِسْرَٰٓءِيلَ؞ ذَيْ ذَمَ عَلَمَ دَغَ وُرِنْ اللَّهْ وَدَّ مُتَنٜىٰ دَيَوَ بَذَاسُ سُواْبَ؞

³⁵ تَهَكَ أَسِيرِنْ ظُكَاتَنْسُ ذَيْ تُواْنُ؞ أَبِنَّنْ كُوَ ذَيْ يِمِكِ ذَاڢِ كَمَرْ تَكُواْبِے نٜىٰ يَسُواْكِ ذُوثِيَارْكِ؞»‏

³⁶ أَݣَويْ وَتَ ڟُواْهُوَرْ أَنَّبِيَ مَيْ سُونَ هَنَّةُ، یَرْ ڢَنُوٜىٰلْ نَظُرِيَرْ أَشٜىٰرْ؞ تَايِ ذَمَنْ عَوْرٜىٰ نَشٜىٰكَرَا بَݣَويْ نٜىٰ كَوَيْ،

³⁷ سَيْ مِجِنْتَ يَمُتُ؞ يَنْذُ شٜىٰكَرُنْتَ تَمَٰنِنْ دَ حُطُ نٜىٰ؞ بَاتَبَرِنْ هَيْكَلِ، تَنَيِ وَ اللَّهْ سُجَّدَ دَرٜىٰ دَ رَانَ أَوُرِنْ، تَنَ أَدُّعَ دَ أَظُمِ؞

³⁸ دَيْدَيْ وَنَّنْ لُواْكَثِ، سَيْ تَشِغُواْ، تَنَيِ وَ اللَّهْ غُواْدِيَ، تَكُمَيِ مَغَنَ غَمٜىٰدَ يَرُواْنَّنْ غَ دُكَنْ وَطَنْدَ سُكٜىٰ جِضَانْ اللَّهْ يَبَا عُرُوشَلِيمَ یَنْثِ؞

يُوسُڢَ دَ مَرْيَمُ سُنْ كُواْمَ غِدَنْسُ أَ نَظَرٜىٰتْ

³⁹ دَ يُوسُڢَ دَ مَرْيَمُ سُكَ غَمَيِنْ دُكَنْ أَبُبُوَنْ دَ كُواْيَرْوَرْ عُبَنْ‌غِجِ تَثٜىٰ عَيِ، سَيْ سُكَ كُواْمَ غَرِنْسُ نَظَرٜىٰتْ أَ غَلِيلِ؞

⁴⁰ يَرُوانْ يَيِ غِرْمَ، يَكُمَيِ ڧَرْڢِے، يَنَ ثِكٜىٰ دَ حِكِمَ؞ أَلْحٜىٰرِنْ اللَّهْ كُمَ يَنَ تَرٜىٰدَشِ؞

عِيسَىٰ طَنْ يَرُواْ عَثِكِنْ هَيْكَلِ

⁴¹ كُواْوَثٜىٰ شٜىٰكَرَا إِيَايٜىٰنْ عِيسَىٰ سُكَنْجٜىٰ عُرُوشَلِيمَ دُوانْ بِكٍ ڧٜىٰتَرٜىٰوَ؞

⁴² دَ عِيسَىٰ يَثِكَ شٜىٰكَرَا غُواْمَشَا بِيُ دَ حَيْڢُوَ، سَيْ سُكَجٜىٰ بِكٍ كَمَرْ يَدَّ سُكَ سَابَا؞

⁴³ دَ بِكٍ يَڧَارٜىٰ، سُكَ كَامَ حَنْيَ دُواْمِنْ سُكُواْمَ غِدَا، عَمَّا عِيسَىٰ، طَنْ يَرُواْنَّنْ، يَڟَيَ عَبَايَ أَ عُرُوشَلِيمَ، بَ دَ سَنِنْ إِيَايٜىٰنْسَبَ؞

⁴⁴ سُو كُمَ سُنَ ڟَمَّنِ يَنَ ثِكِنْ جَمَعَ، سَبُواْدَ حَكَ سُكَيِ تَتَڢِيَ حَرْ يِنِ غُدَا؞ سَعَنً سُكَ ڢَارَ نٜىٰمَنْسَ ثِكِنْ یَنْعُوَنْسُ دَ كُمَ أَبُواْكَنْسُ،

⁴⁵ عَمَّا بَسُغَنْ شِيبَ؞ سَبُواْدَ حَكَ سُكَ كُواْمَ عُرُوشَلِيمَ دُواْمِنْ سُنٜىٰمٜىٰشِ عَثَنْ؞

⁴⁶ أَ رَانَ تَ عُكُ سُكَ سَامٜىٰشِ يَنَ ذَمَ عَثِكِنْ هَيْكَلِ تَرٜىٰدَ مَلَمَيْ؞ يَنَ جِنْسُ، يَنَ كُمَيِ مُسُ تَمْبَيُواْيِ؞

⁴⁷ دُكَنْ وَطَنْدَ سُكَجِيشِ، سُكَ رِڧٜىٰ بَاكِ، سُنَ مَامَاكِنْ غَانٜىٰوَرْسَ دَ يَدَّ يَكٜىٰ بَادَ أَمْسُواْشِ؞

⁴⁸ إِيَايٜىٰنْسَ كُمَ سُكَيِ مَامَاكِنْ غَنِنْسَ أَنَنْ؞ سَيْ مَامَرْسَ تَثٜىٰمَسَ ‏«‏طَانَ، دُوانْمٜىٰ كَيِ مَنَ حَكَ؟ نِے دَ بَابَنْكَ مُنْ دَامُ سُواْسَيْ دَ بَمُغَنْكَبَ؞»‏

⁴⁹ يَأَمْسَ مُسُ يَثٜىٰ ‏«‏دُوانْمٜىٰ كُكٜىٰ نٜىٰمَنَ؟ بَكُسَنِ ثٜىٰوَ يَا كَمَاتَ إِنْكَسَنْثٜىٰ أَغِدَنْ عُبَانَ بَ؟»‏

⁵⁰ عَمَّا بَسُ غَانٜىٰ كُواْ مٜىٰنٜىٰنٜىٰ يَكٜىٰ نُڢِ دَ مَغَنَرْسَ نَنْبَ؞

⁵¹ سَيْ يَتَاشِ يَبِيسُ، سُكَ كُواْمَ نَظَرٜىٰتْ تَرٜىٰ، عِنْدَ يَدِنْ‌غَ بِيَيَّ غَ إِيَايٜىٰنْسَ؞ مَامَرْسَ كُمَ تَرِڧٜىٰ دُكَنْ وَطَنَّنْ أَبُبُوَ تَنَ تُنَانِنْسُ أَ ذُوثِيَارْتَ؞

⁵² عِيسَىٰ يَيِ تَڧَارُوَ دَ حِكِمَ دَ ڟَيِ، يَكُمَ سَامِ ڢَضٍ جِنِ أَغَبَنْ اللَّهْ دَ كُمَ أَغَبَنْ مُتَنٜىٰ؞