لُكَّ 14 - أَتَّوْرَتْ دَ أَنَّبَاوَا

عِيسَىٰ يَوَرْكَرْ دَ مَيْ ثِيوُاْ

¹ وَتَ رَانَرْ هُوتُ تَمَكُواْ، سَيْ عِيسَىٰ يَشِغَ غِدَنْ وَنِ شُوغَبَنْ ڢَرِسِيَاوَا دُواْمِنْ يَثِ عَبِنْثِ؞ مُتَنٜىٰ كُوَ سُنَ ظُبَ مَسَ عِدُواْ؞

² سَيْغَا وَنِ دَ ڧَڢَاڢُنْسَ دَ حَنُّوَنْسَ سُنْ كُكُّمْبُرَ يَا ذُواْ وُرِنْ عِيسَىٰ؞

³ سَيْ عِيسَىٰ يَتَمْبَيِ مَلَمً كُواْيَرْوَرْ مُوسَٰى دَ ڢَرِسِيَاوَا يَثٜىٰ ‏«‏دُواْكَرْمُ تَيَرْدَ عَيِ وَرْكٜىٰوَ أَ رَانَرْ هُوتُ، كُواْ بَابُ؟»‏

⁴ عَمَّا بَسُثٜىٰ كُواْمٜىٰبَ؞ عِيسَىٰ كُوَ يَطَوْكِ مُتُمِنْ يَوَرْكَرْ دَشِ، يَكُمَ ثٜىٰمَسَ يَتَڢِے أَبِنْسَ؞

⁵ سَعَنً عِيسَىٰ يَتَمْبَيِ مُتَنٜىٰنْ يَثٜىٰ ‏«‏عِدَنْ جَاكِنْكُ كُواْ بِجِمِنْكُ يَڢَاطِ أَ رِجِيَ أَ رَانَرْ هُوتُ تَمَكُواْ، بَذَاكُ ثِرٜىٰ شِ نَنْ دَنَنْ بَا وَيْ دُوانْ رَانَرْ هُوتُ نٜىٰ؟»‏

⁶ سُكَ رَسَ أَمْسَرْ وَنَّنْ تَمْبَيَ؞

طَوْكِ كَنْكَ كَمَرْ بَكُواْمٜىٰبَنٜىٰ

⁷ دَ عِيسَىٰ يَغَ وَطَنْسُ عَثِكِنْ مُتَنٜىٰنْ دَ عَكَ غَيَّتَ دُوانْ ثِنْ عَبِنْثِ سُنَ ڧُواْڧَرِنْ ذَاٻَرْ كُجٜىٰرُ مَاسُ دَرَجَ، سَيْ عِيسَىٰ يَڢَطَا مُسُ وَنَّنْ مِصَالِ؞

⁸ ‏«‏عِدَنْ وَنِ يَكِرَاكَ ذُوَا بِكٍ عَوْرٜىٰ، كَدَ كَجٜىٰ كَڢَارَ ذَوْنَوَ أَوُرِنْ ذَمَنْ مَنْيَ، غَمَا وَتَڧِيلَ أَنْكِرَا وَنِ وَنْدَ يَڢِيكَ دَرَجَ؞

⁹ شِے وَنْدَ يَكِرَاكُ دُكَ بِيُ كُوَ ذَيْذُواْ يَثٜىٰمَكَ، ‏‹‏تَاشِ، كَبَا وَنَّنْ وُرِے؞›‏ كَغَا، ذَاكَجِے كُنْيَا، دُوانْ ذَاكَ كُواْمَ كَنْ وُرِنْ ذَمَ مَرَرْ دَرَجَ؞

¹⁰ عَمَّا عِدَنْ أَنْكِرَاكَ بِكِ، كَجٜىٰ كَنٜىٰمِ وُرِنْ ذَمَ مَرَرْ دَرَجَ كَذَوْنَ، دُوانْ إِنْ وَنْدَ يَكِرَاكَ يَذُواْ، سَيْيَثٜىٰ مَكَ، ‏‹‏ذُواْ نَنْ، أَبُواْكِينَ، كَذَوْنَ أَوَنَّنْ كُجٜىٰرَ مَيْدَرَجَ؞›‏ وَنَّنْ ذَيْسَا سَوْرَنْ مُتَنٜىٰنْ دَ عَكَ كِرَا، سُبَاكَ غِرْمَ؞

¹¹ غَمَا دُكْ وَنْدَ يَطَوْكَكَ كَنْسَ، ذَاعَ ڧَسْڧَنْتَرْ دَشِ، عَمَّا دُكْ وَنْدَ يَڧَسْڧَنْتَرْ دَكَنْسَ، ذَاعَ طَوْكَكَ شِ؞»‏

يِنْ أَلْحٜىٰرِ

¹² سَيْ عِيسَىٰ يَثٜىٰ وَوَنْدَ يَكِرَشِ ‏«‏عِدَنْ كَكِرَا وَنِ دُوانْ ثِنْ عَبِنْثِ، كُواْ كَشِرْيَ بِكِ، كَدَ كَكِرَا أَبُواْكَنْكَ نٜىٰ كَوَيْ، كُواْ یَنْعُوَنْكَ، كُواْ دَنْ‌غِنْكَ، كُواْ مَڨُوبْتَنْكَ مَاسُ أَرْزِڧِ، دُوانْ وَتَرَانَ ذَاسُ كِرَاكَ، سُو مَا؞ تَهَكَ ذَاسُ بِيَاكَ أَبِنْدَ كَيِ مُسُ؞

¹³ عَمَّا إِنْ ذَاكَ كِرَا مُتَنٜىٰ بِكِ، كَكِرَا تَلَكَاوَا دَ غُرَغُ دَ شَنْيَيُّ دَ مَكَڢِ؞

¹⁴ تَهَكَ ذَاكَسَامِ أَلْبَرْكَ، دُواْمِنْ وَطَنَّنْ دَيْ بَذَاسُ عِيَ بِيَنْكَبَ؞ اللَّهْ نٜىٰ ذَيْبِيَاكَ أَ رَانَرْ دَ مَاسُ أَدَلْثِے ذَاسُ تَاشِ دَغَ مَتَتُّو؞»‏

مِصَالِنْ بَبَّنْ بِكِ

¹⁵ دَجِنْ حَكَ، سَيْ طَيَ دَغَ ثِكِنْ وَطَنْدَ سُكٜىٰ تَرٜىٰدَشِ عَتٜىٰبُرْ يَثٜىٰ وَ عِيسَىٰ ‏«‏مَيْ أَلْبَرْكَ نٜىٰ دُكْ وَنْدَ ذَيْثِ عَبِنْثِ عَبِكِنَّنْ نَمُلْكٍ اللَّهْ!‏»‏

¹⁶ عِيسَىٰ يَثٜىٰمَسَ ‏«‏أَنْ تَٻَيِنْ وَنِ مُتُمِنْدَ يَشِرْيَ بَبَّنْ بِكِ، يَكُمَ كِرَا مُتَنٜىٰ دَيَوَ؞

¹⁷ دَ لُواْكَثِنْ بِكٍ يَيِ، سَيْ يَعَيْكِ بَاوَنْسَ يَجٜىٰ يَثٜىٰ وَ وَطَنْدَ عَكَ كِرَا، ‏‹‏كُذُواْ، غَمَا أَنْ‌غَمَ شِرْيَ كُواْمٜىٰ!‏›‏

¹⁸ عَمَّا سَيْ دُكَنْسُ سُكَ ڢَارَ بَادَ هُجُّواْجِ؞ نَڢَرْكُواْ يَثٜىٰ، ‏‹‏نَسَيِ غُواْنَ، دُواْلٜىٰنٜىٰ إِنْجٜىٰ إِنْ غَنِ يَدَّ تَكٜىٰ، إِنَضُواْڧُوانْكَ، كَيِ مِنِ حَڧُرِ؞›‏

¹⁹ طَيَنْ كُمَ يَثٜىٰ، ‏‹‏نَسَيِ شَانُنْ نُواْمَ غُدَا غُواْمَ، إِنَ حَنْيَتَ كٜىٰنَنْ إِنْ ڠُودَاسُ، إِنَضُواْڧُوانْكَ، كَيِ مِنِ حَڧُرِ؞›‏

²⁰ وَنِ كُمَ يَثٜىٰ، ‏‹‏ݣُونَ ݣُونَنَّنْ نٜىٰ نَيِ عَوْرٜىٰ، سَبُواْدَ حَكَ بَذَنْ سَامِ دَامَرْ ذُوَابَ؞›‏

²¹ ‏«‏بَاوَنْ يَكُواْمَ يَغَيَ وَمَيْغِدَنْسَ دُكَنْ أَبِنْدَ عَكَ غَيَ مَسَ؞ هَوْشِ يَكَامَ مَيْغِدَنْ، سَيْيَثٜىٰ وَبَاوَنْ، ‏‹‏يِمَظَا، كَبِے تِيتِ تِيتِ دَ لُنْ‌غُ لُنْ‌غُ نَبِرْنِ، كَتَتَّارَ تَلَكَاوَا دَ غُرَغُ دَ مَكَڢِ دَ شَنْيَيُّ كَكَٰوُاْسُ نَنْ؞›‏

²² نَنْ دَنَنْ، بَاوَنْ يَدَاوُاْ يَثٜىٰ، ‏‹‏رَنْكَيَدَطٜىٰ، أَنْيِ أَبِنْدَ كَڢَطَا، عَمَّا دَ سَوْرَنْ وُرِے حَرْ يَنْذُ؞›‏

²³ مَيْغِدَنْ يَثٜىٰ وَبَاوَنْ، ‏‹‏كَجٜىٰ كَنْ مَنْيَنْ هَنْيُواْيِ دَ ڧَنَانَا، كَتُرُواْ مُتَنٜىٰ سُذُواْ دُوانْ غِدَانَ يَثِكَ؞

²⁴ إِنَغَيَ مُكُ، بَابُ كُواْ طَيَ دَغَ ثِكِنْ مُتَنٜىٰنَّنْ دَ دَا عَكَ كِرَا دَ ذَيْ طَنْطَنَ عَبِنْثِنْ بِكِنَّنْ دَ نَشِرْيَ؞›‏ »‏

وُيَرْ رَايُوَرْ بِنْ أَلْمَسِيحُ

²⁵ وَتَرَانَ، مُتَنٜىٰ دَيَوَ سُنَ بِنْ عِيسَىٰ، سَيْ يَجُويَ يَثٜىٰمُسُ،

²⁶ ‏«‏دُكْ مَيْ سُوانْ بِنَ، إِنْ بَيْڢِے ڧَوْنَتَ ڢِيٜىٰدَ بَابَنْسَ كُواْ مَامَرْسَ كُواْ مَاتَرْسَ كُواْ یَیَنْسَ كُواْ یَنْعُوَنْسَ مَظَا دَ مَاتَا، حَرْ مَا رَنْسَبَ، بَذَيْ عِيَ ذَمَ أَلْمَجِرِنَبَ؞

²⁷ دُكْ وَنْدَ بَيْ طَوْكِ غِثِّيٜىٰنْسَ يَبِينِبَ، بَذَيْ عِيَ ذَمَ أَلْمَجِرِنَبَ؞

²⁸ ‏«‏مِصَالِ، عِدَنْ وَنِ دَغَ ثِكِنْكُ يَنَ سُواْ يَيِغِنِ، ذَيْ ڢَارَ ذَوْنَوَ، يَيِ لِسَّڢِنْ أَبِنْدَ غِنِنْ ذَيْثِ تُكُنَ يَغَنِ كُواْ يَنَدَ إِسَشّٜىٰنْ كُطِنْ دَ ذَيْ غَمَ غِنِنْ؞

²⁹ إِنْ بَيْيِ حَكَبَ، بَذَيْ عِيَ غَمَ غِنِنْدَ يَڢَارَبَ، كُمَ دُكَنْ مُتَنٜىٰنْ دَ سُكَغَ وَنَّنْ عَيْكِ ذَاسُيِ مَسَ دَارِيَا،

³⁰ ذَاسُثٜىٰ، ‏‹‏وَنَّنْ مُتُمْ يَڢَارَ غِنِ عَمَّا يَكَاسَ غَمَاوَا؞›‏

³¹ ‏«‏عِدَنْ وَنِ سَرْكِے ذَيْڢِتَ دَ سُواْجُواْجِ دُبُو غُواْمَ دُواْمِنْ يَيِ يَاڧِ دَ وَنِ وَنْدَ يَكٜىٰدَ سُواْجُواْجِ دُبُو عَشِرِنْ، أَيْ، ذَيْ ذَوْنَ تُكُنَ يَدُوبَ كُواْ يَنَدَ إِسَشّٜىٰنْ ڧَرْڢِنْ دَ ذَيْ يَاڧِ وَنْثَنْ سَرْكِنْ؞

³² عِدَنْ بَذَيْ عِيَبَ، تُواْ، تُنْ سُنَ دَنِيسَ سَيْ يَعَيْكِ یَنْ عَيْكَ سُجٜىٰ سُنٜىٰمِ حَنْيَرْ ذَمَنْ لَاڢِيَ؞

³³ حَكَمَا كُواْوَنّٜىٰنْكُ إِنْ بَيْ بَرْ دُكْ أَبِنْدَ يَكٜىٰدَشِيبَ، بَذَيْ عِيَ ذَمَ أَلْمَجِرِنَبَ؞»‏

مِصَالِ عَكَنْ غِشِرِ

³⁴ ‏«‏غِشِرِ أَبُ نٜىٰ مَيْݣَوْ، عَمَّا عِدَنْ يَا رَبُ دَ دَاطِنْسَ، تَيَيَا ذَاعَ مَيْدَ دَاطِنْسَ؟

³⁵ بَاشِ دَ وَنِ أَمْڢَانِ أَغُواْنَ، كُواْ عَتَاكِ، سَيْدَيْ أَظُبَرْ دَشِ كَوَيْ؞ بَرِ مَيْكُنّٜىٰنْجِ يَجِ؞»‏