لُكَّ 13 - أَتَّوْرَتْ دَ أَنَّبَاوَاتُوبَ كُواْ هَلَّكَ 1 أَ دَيْدَيْ وَنَّنْ لُواْكَثِ، وَطَنْسُ مُتَنٜىٰنْ دَسُكٜىٰ أَوُرِنْ سُكَ غَيَ وَ عِيسَىٰ لَابَرِنْ غَلِيلَاوَنْ دَ بِلَتُسْ يَسَا عَكَ كَشٜىٰ لُواْكَثِنْ دَسُكٜىٰ مِيڧَا وَ اللَّهْ هَدَايَرْسُ؞ 2 عِيسَىٰ يَأَمْسَ مُسُ يَثٜىٰ «دُوانْ أَنْكَشٜىٰ غَلِيلَاوَنَّنْ حَكَ، كُنَ ڟَمَّنِ سُنْڢِے كُواْوَ ذُنُوبِ كٜىٰنَنْ أَ غَلِيلِ؟ 3 سَمْ! إِنَ غَيَ مُكُ، عِدَنْ بَكُ تُوبَ عَكَنْ لَيْڢُواْڢِنْكُ بَ، دُكَنْكُ ذَاكُ هَلَّكَ كَمَرْسُ؞ 4 كُواْ كُوَ مُتَنٜىٰ شَا تَݣُوسْ طِنَّنْ دَ حَصُومِيَا تَڢَاطِ عَكَنْسُ أَ سِلُوَمْ، يَكَشٜىٰسُ، كُنَ ڟَمَّنِ سُنْڢِے دُكْ سَوْرَنْ مُتَنٜىٰنْ عُرُوشَلِيمَ ذُنُوبِ نٜىٰ؟ 5 سَمْ! إِنَ غَيَ مُكُ، إِنْ بَكُ تُوبَبَ، ذَاكُ هَلَّكَ كَمَرْسُ؞» مِصَالِ نَٻَوْرٜىٰ مَرَرْ یَیَ 6 سَيْ عِيسَىٰ يَبَاسُ مِصَالِ يَثٜىٰ «أَنْ تَٻَيِنْ وَنِ مُتُمْ وَنْدَ يَكٜىٰدَ إِتَاثٜىٰنْ ٻَوْرٜىٰ أَغُواْنَرْ إِنَبِنْسَ؞ سَيْ يَذُواْ دُواْمِنْ يَڟِنْكَ یَیَنْ، عَمَّا بَيْ سَامِ كُواْ طَيَبَ؞ 7 سَيْيَثٜىٰ وَمُتُمِنْ دَيَكٜىٰ لُورَ دَ غُواْنَرْ، ‹دُوبَ، يَوْ شٜىٰكَرَا عُكُ كٜىٰنَنْ إِنَ ذُوَا نٜىٰمَنْ یَیَنْ ٻَوْرٜىٰنَّنْ، عَمَّا كُلُّمْ بَانَ سَامُنْ كُواْمٜىٰ عَكَنْسَ؞ سَارٜىٰشِ! دُوانْمٜىٰ ذَاعَ بَرْ شِ يَتَرٜىٰ وُرِے عَبَنْظَ؟› 8 «عَمَّا مَيْ لُورَ دَ غُواْنَرْ يَأَمْسَ يَثٜىٰ، ‹مَيْغِرْمَ، عَبَرْ شِ دَيْ، إِنْ بَرْ شِ شٜىٰكَرَا طَيَ، إِنْكُمَ ظُبَ مَسَ تَاكِ أَوَنَّنْ شٜىٰكَرَا؞ 9 عِدَنْ يَا يِ یَیَ نَنْ غَبَ، تُواْ، إِنْكُمَ بَيْيِبَ، سَيْ أَسَارٜىٰشِ؞› » عِيسَىٰ يَوَرْكَرْ دَ مَثٜىٰ أَ رَانَرْ هُوتُ 10 وَتَرَانَ عِيسَىٰ يَنَ كُواْيَرْوَا أَوَتَ مَجَمِعَ أَ رَانَرْ هُوتُ تَمَكُواْ، 11 سَيْغَا وَتَ مَثٜىٰ وَدَّ أَلْجَنِ يَسَا ثِيوُاْ يَشَنْيٜىٰتَ نَڟَوُانْ شٜىٰكَرُ غُواْمَشَا تَݣُوسْ؞ دُكْ تَتَنْڨُورٜىٰ، بَاتَ مَا عِيَ مِيڧٜىٰوَ؞ 12 دَ عِيسَىٰ يَغَنْتَ، سَيْ يَكِرَتَ يَثٜىٰ «عُوَرْغِدَا، أَنْوَرْكَرْ دَكٜىٰ دَغَ رَشِنْ لَاڢِيَرْكِ؞» 13 سَيْ يَسَا حَنُّنْسَ عَكَنْتَ، نَنْ دَنَنْ سَيْ تَمِيڧٜىٰ ڟَبْ، تَيَبِے اللَّهْ؞ 14 عَمَّا شُوغَبَنْ مَجَمِعَرْ يَجِ هَوْشِ يَدَّ عِيسَىٰ يَوَرْكَرْدَ عِتَ أَ رَانَرْ هُوتُ؞ سَيْيَثٜىٰ وَمُتَنٜىٰنْ دَسُكٜىٰ نَنْ «أَݣَويْ رَانَكُو حَرْ شِدَ دَ يَا كَمَاتَ عَيِ عَيْكِ، كُذُواْ أَ رَانَكُنَّنْ أَوَرْكَرْ دَكُو، بَ رَانَرْ هُوتُنْبَ؞» 15 عَمَّا عُبَنْغِجِ يَثٜىٰمَسَ «مُنَاڢُكَيْ كَوَيْ! أَشٜىٰ، كُواْوَنّٜىٰنْكُ بَايَ كُنْثٜىٰ سَانِيَرْسَ كُواْ جَاكِنْسَ، يَكَيْشِ وُرِنْ دَ ذَيْ شَا ضُوَ أَ رَانَرْ هُوتُ؟ 16 مَثٜىٰنَّنْ، یَرْ دَنْغِنْ إِبْرَٰهِيمْ وَدَّ شَيْطَنْ يَطَوْرٜىٰ، يَوْ شٜىٰكَرَا غُواْمَشَا تَݣُوسْ، أَشٜىٰ، بَيْيِ دَيْدَيْ أَوَرْكَرْدَ عِتَ أَ رَانَرْ هُوتُ تَمَكُواْ بَ؟» 17 وَنَّنْ مَغَنَرْسَ دَ يَيِ، تَسَا دُكْ مَاسُڧِنْ غَنِنْسَ سُكَجِ كُنْيَا؞ سَوْرَنْ مُتَنٜىٰ كُوَ، دُكْ سُكَيِ تَمُرْنَ سَبُواْدَ أَيُّكَنْ بَنْ مَامَاكِنْ دَ يَكٜىٰيِ؞ مِصَالِ نَڨُويَرْ مَسْتَدْ ﴿ مَتْ 13.31-32 ؛ مَرْ 4.30-32 ﴾ 18 سَيْ عِيسَىٰ يَثٜىٰ «يَيَ مُلْكٍ اللَّهْ يَكٜىٰ؟ دَ مٜىٰ كُمَ ذَنْ ݣُوتَنْتَاشِ؟ 19 مُلْكٍ سَمَ كَمَرْ ڨُويَرْ مَسْتَدْ يَكٜىٰ وَدَّ تَڢِے ڧَنْڧَنْتَ ثِكِنْ إِرِ دُكَ، وَدَّ وَنِ مُتُمْ يَطَوْكَ يَشُوكَ أَغُواْنَرْسَ؞ سَيْ تَيِ غِرْمَ حَرْ تَذَمَ إِتَاثٜىٰ، ڟُنْڟَيٜىٰ كُوَ سُكَيِ غِدَا أَ رَسَّنْسَ؞» مِصَالِ نَيِسْتِ ﴿ مَتْ 13.33 ﴾ 20 عِيسَىٰ يَسَاكٜىٰ تَمْبَيَ «دَمٜىٰ ذَنْ ݣُوتَنْتَا مُلْكٍ اللَّهْ؟ 21 كَمَرْ يِسْتِ يَكٜىٰ وَنْدَ وَتَ مَثٜىٰ تَݣُوٻَ دَ مُودُ عُكُ نَغَارِنْ أَلْكَمَ، حَرْ دُكْ غَارِنْ يَغَمٜىٰدَ يِسْتِنْ؞» ڧَرَمَرْ ڧُواْڢَ ﴿ مَتْ 7.13-14 ، 21-23 ﴾ 22 دَ عِيسَىٰ يَكَامَ حَنْيَ ذَيْ تَڢِے عُرُوشَلِيمَ، سَيْ يَبِے غَرُرُوَ دَ ڧَوْيُكَ يَنَ كُواْيَوَ مُتَنٜىٰ؞ 23 سَيْ وَنِ يَتَمْبَيٜىٰشِ يَثٜىٰ «مَلَمْ، شِنْ، وَيْ مُتَنٜىٰ كَطَنْ نٜىٰ كَوَيْ ذَاسُ سَامِ ثٜىٰتُواْ؟» عِيسَىٰ يَثٜىٰمُسُ، 24 «كُيِ ڧُواْڧَرِ كُشِغَ تَڧَرَمَرْ ڧُواْڢَ، دُواْمِنْ مُتَنٜىٰ دَيَوَ ذَاسُيِ ڧُواْڧَرِنْ شِغَ عَمَّا بَذَاسُ عِيَبَ؞ 25 إِنْ دَيْ مَيْغِدَنْ يَارِغَا يَتَاشِ يَرُڢٜىٰ ڧُواْڢَرْ غِدَنْ، كُو كُوَ ذَاكُ ڟَيَ أَوَجٜىٰ كُنَ ڨُونْڨُوسَ ڧُواْڢَرْ، كُنَ ثٜىٰوَ ‹مَيْغِدَا، عَبُوطٜىٰ مَنَ ڧُواْڢَ!› شِ كُمَ ذَيْ أَمْسَ مُكُ يَثٜىٰ، ‹بَنْ سَنْ عِنْدَ كُكَ ڢِتُواْبَ!› 26 «سَعَنً ذَاكُ ڢَارَ كُكَ كُنَ ثٜىٰوَ ‹حَبَ، مُو دَ مُكَثِ مُكَشَا تَرٜىٰدَكَيْ، حَرْ كَكُواْيَرْ أَغَرُرُوَنْمُ!› 27 عَمَّا ذَيْثٜىٰ، ‹بَنْ سَنْ عِنْدَ كُكَ ڢِتُواْبَ؞ كُرَبُ دَنِے، كُو مَاسُ عَيْكَتَ مُغُنْتَا!› 28 سَعَدَّ كُكَغَ إِبْرَٰهِيمْ دَ إِسْحَٰڧَ دَ يَعْڧُوبَ دَ دُكَنْ أَنَّبَاوَا أَمُلْكٍ اللَّهْ، كُو كُوَ أَنَ كُواْرَرْكُ، أَنَنْ نٜىٰ ذَاكُيِ كُوكَا دَ ثِظُوانْ هَڧُواْرَ؞ 29 مُتَنٜىٰ ذَاسُذُواْ دَغَ غَبَسْ دَ يَمَّ، كُدُ دَ أَرٜىٰوَ، سُذَوْنَ ثِنْ بِكِ أَمُلْكٍ اللَّهْ؞ 30 غَاشِ ڢَا وَطَنْدَ سُكٜىٰ نَڧَرْشٜىٰ ذَاسُ ذَمَ نَڢَرْكُواْ، نَڢَرْكُواْ كُمَ سُذَمَ نَڧَرْشٜىٰ؞» عِيسَىٰ يَدَامُ عَكَنْ عُرُوشَلِيمَ ﴿ مَتْ 23.37-39 ﴾ 31 أَوَنَّنْ لُواْكَثِ سَيْ وَطَنْسُ ڢَرِسِيَاوَا سُكَذُواْ سُكَثٜىٰ وَ عِيسَىٰ «كَتَاشِ دَغَ نَنْ ڢَا، دُواْمِنْ هِرُدُسْ يَنَ سُواْ يَكَشٜىٰكَ؞» 32 سَيْ يَثٜىٰمُسُ «كُجٜىٰ كُغَيَ وَمَيْ مَكِرْثِنَّنْ ثٜىٰوَ ‹يَوْ إِنَ ڢِتَرْدَ أَلْجَنُ، إِنَ كُمَ وَرْكَرْدَ مُتَنٜىٰ، غُواْبٜىٰ مَا حَكَ، جِيبِنٜىٰ ذَنْ غَمَ عَيْكِنَ؞ 33 دُكْدَهَكَ لَلَّيْ نٜىٰ إِنْثِيغَبَدَ تَڢِيَاتَ يَوْ دَ غُواْبٜىٰ دَ كُمَ جِيبِے، دُوانْ كُوَ بَيْيِ ݣَوْ عَثٜىٰ أَنَّبِے يَمُتُبَ، إِنْ بَ أَ عُرُوشَلِيمَ نٜىٰ عَكَ كَشٜىٰشِيبَ؞› 34 «أَيَّ، عُرُوشَلِيمَ! عُرُوشَلِيمَ! مَيْ كِسَنْ أَنَّبَاوَا، مَيْ جِڢَرْ وَطَنْدَ عَكَ عَيْكُواْ غَرٜىٰتَ! سَوْ نَوَ نَاسُواْ إِنْتَتَّرَاكُ كَمَرْ يَدَّ كَاظَا تَكٜىٰ تَتَّارَ یَنْ يَارَنْتَ ثِكِنْ ڢِكَڢِكَنْتَ، عَمَّا كُنْڧِ! 35 غَاشِ أَنْبَرْ مُكُ غِدَنْكُ كُڢَيْ! إِنَ كُوَ غَيَ مُكُ، بَذَاكُ ڧَارَ غَنِينَ بَ، سَيْ رَانَرْ دَ كُكَثٜىٰ، ‹مَيْ أَلْبَرْكَنٜىٰ، وَنْدَ يَكٜىٰ ذُوَا ثِكِنْ سُونَنْ عُبَنْغِجِ!› » |
Hausa Common Language Ajami Bible © The Bible Society of Nigeria, 2020
Bible Society of Nigeria