لُكَّ 12 - أَتَّوْرَتْ دَ أَنَّبَاوَا

غَرْغَطِ غَمٜىٰدَ مُنَاڢُنْثِ

¹ أَنَانً سَيْ دُبَّنْ مُتَنٜىٰ سُكَ تَتَّارُ حَرْ سُنَ تَتَّاكَ جُونَ، سَيْ عِيسَىٰ يَيِ وَ أَلْمَجِرَنْسَ مَغَنَ دَ ڢَرْكُواْ يَثٜىٰ ‏«‏كُيِ حَنْكَلِ دَ يِسْتِنْ ڢَرِسِيَاوَا، وَتُواْ مُنَاڢُنْثِنْسُ؞

² بَا أَبِنْدَ يَكٜىٰ أَ رُڢٜىٰ دَ بَذَاعَ بَيَّنَبَ، كُمَ بَا أَبِنْدَ يَكٜىٰ عَٻُواْيٜىٰ وَنْدَ بَذَاعَ سَنِبَ؞

³ سَبُواْدَ حَكَ، دُكْ أَبِنْدَ كُكَ ڢَطَا عَٻُواْيٜىٰ، ذَاعَ جِيشِ أَڢِيلِ؞ أَبِنْ دَ كُكَ كُمَ ڢَطَا أَعَسِرْثٜىٰ، كُواْ عَثِكِنْ طَاكِنْ دَ كُكَ رُڢٜىٰ ڧُواْڢُواْڢِنْسَ مَا، ذَاعَيِ شٜىٰلَرْسَ عَكَنْ رُڢِنْ طَكُنَ؞

وَنْدَ ذَاعَجِ ڟُواْرُوانْسَ

⁴ ‏«‏كُو أَبُواْكَيْنَ، إِنَ غَيَ مُكُ، كَدَ كُجِڟُواْرُوانْ مَاسُ كِسَنْ جِكِے عَمَّا بَايَنْدَ سُكَ كَشٜىٰشِ بَا أَبِنْدَ ذَاسُ عِيَيِ كُمَ؞

⁵ ذَنْ ڢَطَا مُكُ وَنْدَ ذَاكُجِڟُواْرُوانْسَ؞ كُجِڟُواْرُوانْ اللَّهْ، وَنْدَ بَايَنْدَ يَكَشٜىٰ، يَنَدَ إِيكُواْ يَجٜىٰڢَ عَثِكِنْ غِدَنْ وُتَا كُمَ؞ حَڧِيڧَ إِنَ غَيَ مُكُ، شِينٜىٰ وَنْدَ ذَاكُجِڟُواْرُوانْسَ!‏

⁶ ‏«‏بَ عَكَنْ سَيَرْ دَ یَنْ ڟُنْڟُ بِيَرْ كُواْبُواْ بِيُبَ؟ دُكْدَهَكَ اللَّهْ بَيْ مَنْتَادَ كُواْ طَيَنْسُبَ؞

⁷ كَيْ!‏ حَرْ غَاشِنْ كَنْكُ مَا أَنْڧِرْغَسُ دُكَ؞ سَبُواْدَ حَكَ، كَدَ مَا كُجِڟُواْرُواْ، دُوانْ كُنْڢِے طَنْ ڟُنْڟُ دَرَجَ سَوْ بَرْكَتَيْ!‏»‏

نُونَ يَرْدَ دَ أَلْمَسِيحُ أَغَبَنْ مُتَنٜىٰ

⁸ ‏«‏إِنَ كُمَ ڢَطَا مُكُ، دُكْ وَنْدَ يَشَيْدَ أَغَبَنْ مُتَنٜىٰ ثٜىٰوَ يَيَرْدَ دَنِے، طَنْ مُتُمْ مَا ذَيْ شَيْدَ يَيَرْدَ دَشِ أَغَبَنْ مَلاَىِٕكُنْ اللَّهْ؞

⁹ وَنْدَ كُمَ يَيِ مُسُونْ سَنِنَ أَغَبَنْ مُتَنٜىٰ، نِے مَا ذَنْيِ مُسُونْ سَنِنْسَ أَغَبَنْ مَلاَىِٕكُنْ اللَّهْ؞

¹⁰ ‏«‏دُكْ وَنْدَ يَيِ مَغَنَرْ صَاٻُواْ غَمٜىٰدَ طَنْ مُتُمْ، ذَاعَ يَاڢٜىٰمَسَ، عَمَّا دُكْ وَنْدَ يَيِ مَغَنَرْ صَاٻُواْ غَمٜىٰدَ رُوحُ مَيْ ڟَرْكِے، بَذَاعَ يَاڢٜىٰمَسَبَ؞

¹¹ ‏«‏عِدَنْ كُمَ أَنْكَٰوُاْكُ أَغَبَنْ مَجَمِعُ، كُواْ غَبَنْ مَاسُ حُكُنْثِ، كُواْ كُمَ غَبَنْ شُوغَبَنِّ، كَدَ كُدَامُ دَ يَدَّ ذَاكُ كَارٜىٰ كَنْكُ، كُواْ كُمَ أَبِنْدَ ذَاكُثٜىٰ،

¹² دُواْمِنْ رُوحُ مَيْ ڟَرْكِے ذَيْ كُواْيَ مُكُ أَبِنْدَ يَكَمَاتَ كُڢَطَا أَ لُواْكَثِنْ؞»‏

مِصَالِ عَكَنْ وَنِ وَاوَا مَيْ أَرْزِڧِ

¹³ سَيْ وَنِ مُتُمْ دَغَ ثِكِنْ جَمَعَ يَثٜىٰ وَ عِيسَىٰ ‏«‏مَلَمْ، كَثٜىٰ وَطَنْعُوَنَ يَبَانِ رَبُواْنَ نَغَادُوانْ دَ بَابَنْمُ يَمُتُ يَبَرْ مَنَ؞»‏

¹⁴ عِيسَىٰ يَأَمْسَ مَسَ يَثٜىٰ ‏«‏كَيْ!‏ وَيَمَيْ دَنِے أَلْڧَلِ كُواْ إِنْذَمَ مَيْ رَبَ مُكُ كَايَنْ دَ بَابَنْكُ يَمُتُ يَبَرْ مُكُ؟»‏

¹⁵ يَثِيغَبَدَيِ وَمُتَنٜىٰ مَغَنَ يَثٜىٰمُسُ ‏«‏كُلُورَ ڢَا، كُيِنٜىٰسَ دَ كُواْوَنٜىٰ إِرِنْ ݣُوطَيِ، دُوانْ يَوَنْ كَايَ بَشِينٜىٰ سَامُنْ رَيْبَ؞»‏

¹⁶ سَيْ يَبَاسُ وَنِ مِصَالِ يَثٜىٰ ‏«‏أَنْ تَٻَيِنْ وَنِ مَيْ أَرْزِڧِ وَنْدَ غُواْنَرْسَ تَيِ أَمْڢَانِ سُواْسَيْ؞

¹⁷ يَڢَارَ تُنَانِ أَ رَنْسَ يَثٜىٰ، ‏‹‏بَانِ دَ عِنْدَ ذَنْسَا أَمْڢَانِنْ غُواْنَتَ دُكَ؞ مٜىٰ ذَنْيِ كٜىٰنَنْ؟›‏

¹⁸ ‏«‏يَثٜىٰ وَكَنْسَ، ‏‹‏يَوَّ!‏ نَسَنْ أَبِنْدَ ذَنْيِ؞ ذَنْ رُشٜىٰ وَطَنَّنْ ضُمْبُنَنَ، إِنْ‌غِنَ وَطَنْسُ مَنْيَ، إِنْظُبَ دُكَنْ أَمْڢَانِنْ غُواْنَتَ دَ كَايَانَ عَثِكِ؞

¹⁹ ذَنْ كُمَ ثٜىٰوَ رَيْنَ ‏«‏حَبَ!‏ كَنَدَ كَايَ مَاسُيَوَ وَنْدَ ذَاكَ مُواْرَ أَ شٜىٰكَرُ مَاسُيَوَ؞ بَرِ كَهُوتَ، كَيِ تَثِ، كَيِ تَشَا، كَنَ جِنْ دَاطِنْكَ؞»‏ ›‏

²⁰ عَمَّا اللَّهْ يَثٜىٰمَسَ، ‏‹‏كَيْ وَاوَا!‏ أَوَنَّنْ دَرٜىٰ ذَاكَ مُتُ؞ سَعَنً إِنْ‌غَا كُواْ وَنٜىٰنٜىٰ ذَيْثِ دُكْ كَايَنَّنْدَ كَتَارَ وَكَنْكَ؞›‏ »‏

²¹ عِيسَىٰ يَغَمَ مَغَنَرْ نَنْ دَ ثٜىٰوَ ‏«‏حَكَ ذَيْ ذَمَ غَ دُكْ وَنْدَ يَتَارَ وَكَنْسَ كَايَ، عَمَّا أَغَبَنْ اللَّهْ بَاشِ دَ أَرْزِڧِ؞»‏

كُدَيْنَ دَامُوَ

²² سَيْ عِيسَىٰ يَثٜىٰ وَ أَلْمَجِرَنْسَ ‏«‏دُواْمِنْ حَكَ إِنَغَيَ مُكُ، كَدَ كُدَامُ دَ يَدَّ ذَاكُ رَايُ، كُواْ كُمَ يَدَّ ذَاكُ سَامِ رِيغُنَ دُوانْ جِكِنْكُ؞

²³ دُواْمِنْ رَيْ يَڢِ عَبِنْثِ، جِكِے كُمَ يَڢِ رِيغُنَ؞

²⁴ كُدُوبِے ڟُنْڟَيٜىٰ مَنَ!‏ أَيْ، بَاسَ شُوكَ، بَاسَ غِرْبِے، بَاسُ دَ طَكُنَنْ أَجِيَرْ عَبِنْثِ كُواْ ضُمْبُنَ، عَمَّا دُكْدَهَكَ اللَّهْ يَنَ بَاسُ عَبِنْثِ؞ دَرَجَرْكُ كُوَ تَڢِے تَڟُنْڟَيٜىٰ سَوْ بَرْكَتَيْ!‏

²⁵ وَنٜىٰنٜىٰ عَثِكِنْكُ تَوُرِنْ دَامُوَرْسَ، ذَيْ عِيَ ڧَارَ كُواْ أَوَ طَيَ غَ ݣُونَكِنْ رَايُوَرْسَ؟

²⁶ تُواْ، عِدَنْ بَذَاكُ عِيَيِنْ ڧَنْڧَنِنْ أَبُ إِرِنْ وَنَّنْبَ، دُوانْمٜىٰ كُكٜىٰ دَامُوَ عَكَنْ سَوْرَنْ؟

²⁷ كُدُوبِے يَدَّ سُو ڢُلَوَ سُكٜىٰ غِرْمَ مَنَ؞ بَاسَ عَيْكِ، بَاسَ سَاڧَرْ كُواْمٜىٰ، بَاسَيِ وَكَنْسُ رِيغُنَ، دُكْدَهَكَ إِنَ غَيَ مُكُ كُواْ سَرْكِے سُلَيْمَٰنُ دَ دُكَنْ غِرْمَنْسَ بَيْتَٻَيِنْ أَدُواْ كَمَرْ طَيَ دَغَ ثِكِنْسُبَ؞

²⁸ تُواْ، عِدَنْ حَرْ اللَّهْ ذَيْ يِوَثِيَوَرْ دَاجِ أَدُواْ حَكَ، ثِيَوَ وَطَنْدَ سُكٜىٰنَنْ يَوْ، غُواْبٜىٰ كُوَ عَڧُواْنٜىٰسُ، بَلّٜىٰ كُو؟ يَا كُو مَاسُ ڧَنْڧَنْتَرْ بَنْ‌غَسْكِيَ!‏

²⁹ ‏«‏كَدَ كُدِنْ‌غَ تُنَانِ عَكَنْ أَبِنْدَ ذَاكُثِ، كُواْ أَبِنْدَ ذَاكُشَا، كَدَ مَا كُدَامُ؞

³⁰ أَيْ، مُتَنٜىٰنْ دُونِيَا وَطَنْدَ بَسُ سَنْ اللَّهْ بَ سُنَ تَنٜىٰمَنْ دُكْ إِرِنْ وَطَنَّنْ أَبُبُوَ؞ كُو كُوَ، عُبَنْكُ يَسَنْ كُنَ بُڧَاتَرْسُ؞

³¹ كُو دَيْ كُسَا رَنْكُ غَ مُلْكٍ اللَّهْ، ذَاعَ بَاكُ دُكَنْ وَطَنَّنْ أَبُبُوَ كُمَ؞

كُواْيَرْوَا عَكَنْ تَارَ دُوكِيَ أَسَمَ

³² ‏«‏يَا كُو ڧَرَمِنْ غَرْكٜىٰنَ، كَدَ كُجِڟُواْرُواْ، غَمَا عُبَنْكُ يَنَ جِنْ دَاطِے يَبَاكُ مُلْكِنْسَ؞

³³ كُسَيَرْ دَ دُكَنْ أَبِنْدَ كُكٜىٰ دَشِ، كُبَا تَلَكَاوَا سَدَكَ؞ كُيِ وَكَنْكُ أَجِيَرْ دَ بَذَاتَ ڟُوڢَبَ، وَتُواْ دُوكِيَرْ دَ بَذَاتَ لَلَثٜىٰبَ كٜىٰنَنْ أَسَمَ، عِنْدَ بَا ٻَرَوُانْ دَ ذَيْ سَاثٜىٰسُ، بَا كُمَ غَضَرْ دَ ذَاتَ لَلَتَرْدَسُو؞

³⁴ غَمَا عِنْدَ دُوكِيَرْ مُتُمْ تَكٜىٰ، أَنَنْ نٜىٰ ذُوثِيَارْسَ مَا تَكٜىٰ؞

بَايِنْ دَ سُكٜىٰ أَشِرْيٜىٰ

³⁵ ‏«‏كُذَوْنَ أَشِرْيٜىٰ، ڢِتِلُنْكُ عَكُنّٜىٰ؞

³⁶ كُذَمَ كَمَرْ بَايِنْ دَسُكٜىٰ جِضَانْ مَيْغِدَنْسُ يَدَاوُاْ دَغَ بِكٍ عَوْرٜىٰ؞ دَ يَدَاوُاْ يَڨُونْڨُوسَ ڧُواْڢَ، نَنْ دَنَنْ سَيْ سُبُوطٜىٰ مَسَ؞

³⁷ ذَيْ ذَمَ أَبِنْ ڢَضٍ ثِكِ غَ بَايِنَّنْ إِنْ حَرْ مَيْغِدَنْ يَدَاوُاْ يَسَامٜىٰسُ بَسُيِ بَرْثِبَ؞ حَڧِيڧَ إِنَ غَيَ مُكُ، ذَيْثِرٜىٰ بَبَّرْ رِغَرْدَ يَسَا، يَثٜىٰ مُسُ سُظَظْذَوْنَ، سُثِ عَبِنْثِ، سَعَنً يَبِے كَنْ كُواْوَنٜىٰ طَيَنْسُ يَكَٰوُاْ مَسَ عَبِنْثِ؞

³⁸ بَايِنَّنْ مَاسُ أَلْبَرْكَنٜىٰ إِنْ يَدَاوُاْ كُواْ دَ ڟَكَرْ دَرٜىٰ، كُواْ كُمَ دَ سَسَّڢٜىٰ، يَسَامٜىٰسُ أَشِرْيٜىٰ؞

³⁹ كُدَيْ سَنِ ثٜىٰوَ إِنْ مَيْغِدَا يَسَنْ لُواْكَثِنْ دَ ٻَرَوُاْ ذَيْذُواْ مَسَ، بَذَيْ بَرْ شِ يَشِغَ يَيِ مَسَ ٻَرْنَ أَغِدَا بَ؞

⁴⁰ سَيْ كُذَوْنَ دَ شِرِ، دُواْمِنْ طَنْ مُتُمْ ذَيْذُواْ أَلُواْكَثِنْ دَ بَكُيِ ڟَمَّنِ ذَيْذُوابَ؞»‏

بَاوَ مَيْ أَمِنْثِ كُواْ مَرَرْ أَمِنْثِ

⁴¹ بِتْرُسْ يَثٜىٰ ‏«‏عُبَنْ‌غِجِ، وَنَّنْ مِصَالِ عَكَنْمُ عَكَيِ كُواْ كُوَ يَشَاڢِ كُواْوَ؟»‏

⁴² عُبَنْ‌غِجِ يَأَمْسَ مَسَ يَثٜىٰ ‏«‏وَنٜىٰنٜىٰ بَاوَنَّنْ مَيْ أَمِنْثِ مَيْ حِكِمَ كُمَ، وَنْدَ مَيْغِدَنْسَ ذَيْسَا شِ يَلُورَ دَ غِدَنْسَ، يَكُمَ بَا سَوْرَنْ بَايِ عَبِنْثِ أَدَيْدَيْ لُواْكَثِ؟

⁴³ مَيْ أَلْبَرْكَ نٜىٰ بَاوَنْ دَ مَيْغِدَنْسَ ذَيْذُواْ يَسَامٜىٰشِ يَنَيِنْ عَيْكِنْسَ؞

⁴⁴ حَڧِيڧَ إِنَ غَيَ مُكُ، ذَيْسَا وَنَّنْ بَاوَ يَلُورَ مَسَ دَ كَايَنْسَ دُكَ؞

⁴⁵ عَمَّا عِدَنْ بَاوَنَّنْ يَثٜىٰ أَ رَنْسَ، ‏‹‏أَيْ، مَيْغِدَانَ يَيِ لَتِّنْ ذُوَا،›‏ سَعَنً يَڢَارَ دُوكَنْ سَوْرَنْ بَايِنْ، مَظَا دَ مَاتَا، يَكُمَ شِغَ ثِ دَ شَا، حَرْ يَنَ بُغُوَ،

⁴⁶ مَيْغِدَنْ وَنَّنْ بَاوَ ذَيْ دَاوُاْ أَ رَانَرْ دَ بَاوَنْ بَيْيِ ڟَمَّنِبَ، كُمَ أَ لُواْكَثِنْ دَ بَيْسَنِبَ؞ مَيْغِدَنَّنْ ذَيْ يِمَسَ مُوغُنْ دُوكَ يَكُمَ حُكُنْتَ شِ تَرٜىٰدَ مَرَسَ أَمِنْثِ؞

⁴⁷ ‏«‏بَاوَنْدَ يَسَنْ أَبِنْدَ مَيْغِدَنْسَ يَكٜىٰسُواْ يَيِ، عَمَّا بَيْيِ شِرِبَ، بَيْ كُمَيِ أَبِنْدَ عَكٜىٰسُواْ يَيِبَ، ذَاعَيِ مَسَ بُلَلَ سُواْسَيْ؞

⁴⁸ وَنْدَ كُوَ بَيْسَنْ أَبِنْدَ مَيْغِدَنْسَ يَكٜىٰسُواْ يَيِبَ، يَكُمَيِ أَبِنْدَ يَ إِسَ أَدُوكٜىٰشِ، ذَاعَ دُوكٜىٰشِ كَطَنْ؞ دُكْ وَنْدَ عَكَ بَاشِ أَبُ مَيْ يَوَ، ذَاعَ نٜىٰمِ أَبُ مَيْ يَوَ دَغَ غَرٜىٰشِ؞ وَنْدَ كُمَ عَكَ بَاشِ أَبُ مَيْ يَوَ سُواْسَيْ، ذَاعَ نٜىٰمِ أَبُ مَيْ يَوَ سُواْسَيْ دَغَ غَرٜىٰشِ؞

عِيسَىٰ يَكَٰوُاْ رَبُوَنٜىٰ

⁴⁹ ‏«‏وُتَا ثٜىٰ نَاذُواْ إِنْسَا وَدُونِيَا؞ دَ سُواْنَ نٜىٰ دَ أَنْكُنَّتَ كُواْ!‏

⁵⁰ إِنَدَ بَڢْتِسْمَرْ دَ ذَاعَيِ مِنِ، نَا كُوَ مَڟُ أَ ذُوثِيَا سُواْسَيْ حَرْ سَيْ أَنْيِ مِنِ عِتَ!‏

⁵¹ كُنَ ڟَمَّنِ ذَمَنْ لَاڢِيَ نٜىٰ نَكَٰوُاْوَ دُونِيَا؟ عَ إِنَا!‏ إِنَغَيَ مُكُ، رَبُوَثٜىٰ نَكَٰوُاْ؞

⁵² دَغَ يَنْذُ، أَغِدَا طَيَ، مُتُمْ بِيَرْ ذَاسُ رَبُ كَشِ بِيُ، عُكُ سُنَ غَابَادَ بِيُ، بِيُ كُمَ سُنَ غَابَادَ عُكُ؞

⁵³ بَابَ ذَيْ يِغَابَادَ طَنْسَ، طَنْ كُمَ يَيِ غَابَادَ بَابَنْسَ؞ مَامَا ذَاتَيِ غَابَادَ یَرْتَ، یَرْ كُمَ تَيِ غَابَادَ مَامَرْتَ؞ مَامَرْ مِجِ ذَاتَيِ غَابَادَ مَاتَرْ طَنْتَ، مَاتَرْ طَنْ كُمَ تَيِ غَابَادَ مَامَرْ مِجِنْتَ؞»‏

غَانٜىٰ يَنَيِنْ لُواْكَثِ

⁵⁴ عِيسَىٰ يَكُمَثٜىٰ وَمُتَنٜىٰ ‏«‏إِنْ كُنْ‌غَ هَدَرِ يَتَاسُواْ دَغَ يَمَّ، كُكَنْثٜىٰ أَيْ، ذَاعَيِ ضُوً سَمَ، سَيْ كُوَ عَيِ؞

⁵⁵ عِدَنْ كُمَ كُنْجِ إِسْكَ تَنَ هُورَاوَ دَغَ كُدُ، سَيْكُثٜىٰ ذَاعَيِ ذَاڢِ، سَيْ كُمَ عَيِ؞

⁵⁶ مُنَاڢُكَيْ!‏ كُنْعِيَ غَانٜىٰ يَنَيِنْ ڧَسَا دَ نَسَرَرِنْ سَمَ، عَمَّا غَانٜىٰوَرْ عَلَمُنْ زَامَانِنَّنْ يَغَغَرٜىٰكُ؞

شِرْيَ دَ مَيْ ڧَارَرْكَ

⁵⁷ ‏«‏مٜىٰيَسَا كُو كَنْكُ بَكُ عِيَ تُنَانِ كُغَانٜىٰ أَبِنْدَ يَڢِݣَوْ كُيِ؟

⁵⁸ عِدَنْ وَنِ يَكَيْ ڧَارَرْكَ عَكُواْتُ، كَيِ ڧُواْڧَرِ كُشِرْيَ تُنْ كُنَ عَكَنْ حَنْيَ؞ إِنْ كَڧِ، ذَيْكَيْكَ غَبَنْ أَلْڧَلِ؞ أَلْڧَلِ كُمَ يَمِيڧَكَ غَ طَنْ دُواْكَا؞ طَنْ دُواْكَا كُمَ يَسَاكَ عَكُرْكُكُ؞

⁵⁹ إِنَغَيَ مَكَ، بَذَاكَ ڢِتَ أَوُرِنْبَ سَيْ كَبِيَ دُكَنْ أَبِنْدَ عَكَ يَنْكَ مَكَ، بَا كُواْ سَوْرَنْ كُواْبُواْ؞»‏