ڢِرِسْتُواْثِے 5 - أَتَّوْرَتْ دَ أَنَّبَاوَا

ڧَٰعِدُواْدِنْ هَدَايَ تَوَنْكٜىٰ ذُنُوبِ

¹ ‏«‏عِدَنْ مُتُمْ يَڧِ يِنْ مَغَنَ، سَعَدَّ يَجِ كِرَا دُواْمِنْ يَبَادَ شَيْدَ أَ ڢِيلِ غَمٜىٰدَ وَنِ أَبِنْدَ يَغَنِ، كُواْ يَسَنِ، تُواْ، يَيِ ذُنُوبِ كٜىٰنَنْ، أَلْحَكِ يَنَ عَكَنْسَ؞

² ‏«‏كُواْ كُوَ عِدَنْ مُتُمْ يَتَٻَ وَنِ أَبِنْ ڧَظَنْتَا نٜىٰ، بَ دَ سَنِنْسَبَ، كَمَرْ مُوشٜىٰنْ نَامَنْ دَاجِ مَيْ ڧَظَنْتَا، كُواْ مُوشٜىٰنْ دَبَّرْ غِدَا مَيْ ڧَظَنْتَا، كُواْ مُوشٜىٰنْ حَلِتُّو مَاسُ رَرَّڢٜىٰ، يَڧَظَنْتُ كٜىٰنَنْ؞ وَنَّنْ يَجَٰوُاْ مَسَ لَيْڢِے؞

³ ‏«‏كُواْ كُوَ عِدَنْ مُتُمْ يَتَٻَ وَنِ أَبُ نَمُتُمْ وَنْدَ يَكَنْسَا مُتُمْ يَڧَظَنْتُ، بَ دَ سَنِنْسَبَ دَظَرَرْ يَغَانٜىٰ، تُواْ، وَنَّنْ يَجَٰوُاْ مَسَ لَيْڢِے كٜىٰنَنْ؞

⁴ ‏«‏عِدَنْ مُتُمْ يَيِ سَوْرِنْ طَوْكَرْ ضَنْڟُوَا دَ بَاكِنْسَ عَكَنْ وَنِ أَبُ، بَاتَرٜىٰدَ يَيِ تُنَانِ تُكُنَبَ، كُواْ دَ أَبِنْ مَيْݣَوْ كُواْ مَرَرْ ݣَوْ نٜىٰ، بَاتَرٜىٰدَ سَنِنْسَبَ دَظَرَرْ يَغَانٜىٰ، تُواْ، وَنَّنْ يَجَٰوُاْ مَسَ لَيْڢِے كٜىٰنَنْ؞

⁵ ‏«‏عِدَنْ مُتُمْ يَغَانٜىٰ يَعَيْكَتَ طَيَ دَغَ ثِكِنْ وَطَنَّنْ لَيْڢُواْڢِ، سَيْ يَڢُرْتَ إِرِنْ ذُنُوبِنْ دَ يَيِ؞

⁶ دُواْمِنْ بِيَنْ أَلْحَكِنْ ذُنُوبِنْدَ يَعَيْكَتَ، ذَيْ كَٰوُاْ وَ يَهْوٜىٰهْ هَدَايَ؞ هَدَايَرْ ذَاتَ ذَمَ تَمَثٜىٰ دَغَ غَرْكٜىٰنْ تُمَكِنْسَ كُواْ نَأَوَكِنْسَ، هَدَايَ تَوَنْكٜىٰ ذُنُوبِ؞ ڢِرِسْتِ كُوَ ذَيْ مِيڧَ هَدَايَ تَطَوْكَرْ أَلْحَكِنْ ذُنُوبِ دُواْمِنْ مُتُمِنْ؞»‏

هَدَايُ نَوَنْكٜىٰ ذُنُوبِ دُواْمِنْ مَتَلَوْتَ

⁷ ‏«‏عَمَّا عِدَنْ مُتُمْ بَذَيْ عِيَ كَٰوُاْ وَ يَهْوٜىٰهْ تُنْكِيَ كُواْ عَكُيَ بَ دُواْمِنْ بِيَنْ أَلْحَكِنْ ذُنُوبِنْدَ يَعَيْكَتَ، تُواْ، سَيْ يَكَٰوُاْ كُرْثِيُواْيِ بِيُ كُواْ یَنْ تَتَّبَرُ بِيُ؞ ذَاعَيِ أَمْڢَانِ دَ طَيَ دُواْمِنْ هَدَايَ تَوَنْكٜىٰ ذُنُوبِ، طَيَ كُمَ نَهَدَايَ تَڧُواْنَاوَا؞

⁸ ذَيْ كَٰوُاْسُ وُرِنْ ڢِرِسْتِ؞ دَ ڢَرْكُواْ ڢِرِسْتِ ذَيْ مِيڧَ وَنْدَ يَكٜىٰ نَهَدَايَ تَوَنْكٜىٰ ذُنُوبِ؞ ذَيْ مُرْطٜىٰ وُيَنْ عَمَّا بَذَيْ ڟِنْكٜىٰ كَيْ طِنْ بَ؞

⁹ ذَيْ طِبَ جِنِنْ هَدَايَ تَوَنْكٜىٰ ذُنُوبِ يَيَيَّڢَا شِ عَكُواْوَنٜىٰ غٜىٰڢٜىٰنْ بَغَدٜىٰنْ هَدَايَ؞ ذَيْ رِڧٜىٰ ڟُنْڟُنْ يَدَّ جِنِنْسَ ذَيْ يِتَظُبَ أَغِنْدِنْ بَغَدٜىٰنْ؞ وَنَّنْ هَدَايَ ثٜىٰ تَوَنْكٜىٰ ذُنُوبِ؞

¹⁰ نَبِيُنْ كُمَ ذَيْ مِيڧَ شِ هَدَايَ تَڧُواْنَاوَا بِسَغَ ڧَٰعِدُواْدِنْ دَ عَكَ بَايَرْ؞ تَهَكَ ڢِرِسْتِ ذَيْ طَوْكِ أَلْحَكِنْ ذُنُوبِ دُواْمِنْ ذُنُوبِنْ دَ مُتُمِنْ يَيِ، ذَاعَ كُوَ غَاڢَرْتَا مَسَ؞

¹¹ ‏«‏عَمَّا عِدَنْ بَذَيْ عِيَ كَٰوُاْ كُرْثِيُواْيِ بِيُ كُواْ یَنْ تَتَّبَرُ بِيُ بَ، تُواْ، سَيْ يَكَٰوُاْ كِلُواْ طَيَ نَغَارِنْ حَڟِ مَيْ لَوْشِ دُواْمِنْ هَدَايَ تَوَنْكٜىٰ ذُنُوبِنْدَ يَعَيْكَتَ؞ بَذَيْسَا مَيْ كُواْ تُرَارٜىٰ عَكَيْبَ، غَمَا هَدَايَ ثٜىٰ تَوَنْكٜىٰ ذُنُوبِ بَ هَدَايَ تَهَڟِ بَ ثٜىٰ؞

¹² مُتُمِنْ ذَيْ كَٰوُاْ غَارِنْ وُرِنْ ڢِرِسْتِ، ڢِرِسْتِ كُوَ ذَيْسَا حَنُّنْسَ يَطِبَ غَارِنْ، وَنَّنْ رَبُواْ نٜىٰ نَتُنَاوَا؞ سَيْ يَڧُواْنٜىٰ عَكَنْ بَغَدٜىٰنْ، هَدَايَ تَڧُواْنَاوَا غَ يَهْوٜىٰهْ؞ وَنَّنْ هَدَايَ ثٜىٰ تَوَنْكٜىٰ ذُنُوبِ؞

¹³ تَهَكَ ڢِرِسْتِ ذَيْ طَوْكِ أَلْحَكِنْ ذُنُبَنْدَ مُتُمِنْ يَعَيْكَتَ، ثِكِنْ دُكَنْ وَطَنَّنْ دَ عَكَ لِسَّڢْتَا، ذَاعَ كُوَ غَاڢَرْتَا مَسَ؞ سَوْرَنْ أَبِنْدَ يَرَغُ دَغَ هَدَايَرْ، ذَيْ ذَمَ رَبُواْ نَڢِرِسْتِ، كَمَرْ يَدَّ يَكٜىٰ أَ هَدَايَ تَهَڟِ؞»‏

ڧَٰعِدَرْ هَدَايُ تَرٜىٰدَ حَكِّنْ مَيَرْوَ

¹⁴ يَهْوٜىٰهْ يَيِ مَغَنَ دَ مُوسَٰى يَثٜىٰ،

¹⁵ ‏«‏عِدَنْ وَنِ مُتُمْ عَثِكِنْكُ يَنُونَ رَشِنْ أَمِنْثِ، يَيِ ذُنُوبِ بَ دَ غَنْ‌غَنْبَ، وَنْدَ يَشَاڢِ أَبُبُوَنْ دَ عَكَ كٜىٰٻٜىٰ دَ ڟَرْكِے غَ يَهْوٜىٰهْ، تُواْ سَيْ يَكَٰوُاْ ضَغُواْ مَرَرْ تَبُواْ دَغَ غَرْكٜىٰنْسَ، هَدَايَ تَشَاڢٜىٰ لَيْڢِنْسَ؞ دَرَجَرْ ضَغُوانْ ذَيْ كَسَنْثٜىٰ بِسَغَ مَعَوْنِنْ أَظُرْڢَا وَنْدَ عَكٜىٰيِنْ أَمْڢَانِ دَشِ أَ وُرِے مَيْ ڟَرْكِے؞ وَنَّنْ هَدَايَ تَشَاڢٜىٰ لَيْڢِے كٜىٰنَنْ؞

¹⁶ مُتُمِنْ ذَيْبِيَ سَبُواْدَ أَبِنْدَ عَكَ كٜىٰٻٜىٰ دَ ڟَرْكِے وَنْدَ مُتُمِنْ يَيِ لَيْڢِے عَكَنْسَ؞ ذَيْ كُمَ ڧَارَ كَشِ طَيَ ثِكِنْ بِيَرْ عَكَيْ، يَبَا ڢِرِسْتِ؞ ڢِرِسْتِ كُوَ ذَيْ طَوْكِ أَلْحَكِنْ ذُنُوبِنْسَ تَوُرِنْ مِيڧَ ضَغُواْ هَدَايَ تَشَاڢٜىٰ لَيْڢِے، ذَاعَ كُوَ غَاڢَرْتَا مَسَ؞

¹⁷ ‏«‏عِدَنْ وَنِ يَيِ ذُنُوبِ تَوُرِنْ عَيْكَتَ طَيَ دَغَ ثِكِنْ أَبُبُوَنْ دَ يَهْوٜىٰهْ يَعُمَرْتَ كَدَ عَيِ، بَاتَرٜىٰدَ سَنِنْسَبَ، تُواْ، يَيِ لَيْڢِے كٜىٰنَنْ، أَلْحَكِنْ لَيْڢِنْ يَنَ عَكَنْسَ؞

¹⁸ ذَيْ كَٰوُاْوَ ڢِرِسْتِ ضَغُواْ مَرَرْ تَبُواْ دَغَ غَرْكٜىٰنْ تُمَكِ كُواْ أَوَكِ، دُواْمِنْ هَدَايَ تَشَاڢٜىٰ لَيْڢِے، كُواْ يَڠُودَ دَرَجَرْ ضَغُواْ دَ أَظُرْڢَا، بِسَغَ مَعَوْنِنْ دَ عَكٜىٰيِنْ أَمْڢَانِ دَشِ أَ وُرِے مَيْ ڟَرْكِے؞ ڢِرِسْتِ كُوَ ذَيْ طَوْكِ أَلْحَكِنْ ذُنُوبِ دُواْمِنْ مُتُمِنْ سَبُواْدَ كُسْكُرٜىٰنْ دَ يَيِ بَ دَ غَنْ‌غَنْبَ، ذَاعَ كُوَ غَاڢَرْتَا مَسَ؞

¹⁹ وَنَّنْ هَدَايَثٜىٰ تَبِيَنْ حَكِّنْ مَيَرْوَ دُواْمِنْ أَ شَاڢٜىٰ لَيْڢِنْدَ مُتُمِنْ يَيِ وَ يَهْوٜىٰهْ؞»‏