ڢِرِسْتُواْثِے 20 - أَتَّوْرَتْ دَ أَنَّبَاوَاحُكُنْثٜىٰ حُكُنْثٜىٰ نَرَشِنْ ڟَرْكِے 1 يَهْوٜىٰهْ يَيِ مَغَنَ دَ مُوسَٰى ثٜىٰوَ 2 يَڧَارَ ثٜىٰ وَمُتَنٜىٰنْ إِسْرَٰٓءِيلَ «دُكْ وَنِ دَغَ ثِكِنْكُ إِسْرَٰٓءِيلَاوَا كُواْ بَڧُوانْ دَيَكٜىٰ ذَمَ عَثِكِنْكُ، وَنْدَ يَمِيڧَ طَيَ دَغَ ثِكِنْ یَیَنْسَ هَدَايَ غَ غُنْكِنَّنْ مُواْلٜىٰكْ، ذَاعَ كَشٜىٰ مُتُمِنْ؞ دُكَنْ جَمَعَرْكُ عَڧَسَرْ نٜىٰ ذَاسُ جٜىٰجّٜىٰڢٜىٰشِ دَ دُوَڟُو سُكَشٜىٰ؞ 3 نِے كَيْنَ ذَنْ طَوْرَ ڢُسْكَ تَيِنْ غَابَادَ وَنَّنْ مُتُمِنْ إِنْ كَوَرْ دَشِ دَغَ مُتَنٜىٰنْسَ، غَمَا تَوُرِنْ مِيڧَ طَيَ دَغَ یَیَنْسَ غَ غُنْكِنَّنْ مُواْلٜىٰكْ يَيِ بَنْظَ دَ وُرِنْ ذَمَنَ مَيْ ڟَرْكِے، يَكُمَ ڧَسْڧَنْتَرْدَ سُونَنَ مَيْ ڟَرْكِے؞ 4 عِدَنْ كُمَ جَمَعَرْكُ عَڧَسَرْ سُنْ غَنِ سُنْيِ شِضُ سَعَدَّ مُتُمِنْ يَمِيڧَ طَيَ دَغَ ثِكِنْ یَیَنْسَ غَ مُواْلٜىٰكْ، إِنْ حَرْ بَسُ كَشٜىٰشِ بَ، 5 نِے كَيْنَ ذَنْ طَوْرَ ڢُسْكَ تَيِنْ غَابَادَ مُتُمِنْ دَ عِيَلِنْسَ؞ ذَنْ كَوَرْدَشِ دَغَ جَمَعَرْسَ دَشِے دَ عِيَلِنْسَ دَ دُكَنْ وَطَنْدَ سُكٜىٰيِ مِنِ رَشِنْ أَمِنْثِ تَوُرِنْ يِنْ سُجَّدَ غَ غُنْكِنَّنْ مُواْلٜىٰكْ؞ 6 «عِدَنْ وَنِ يَجُويَ غَ بِنْ مَيْ حَطَكَيْ دَ رُوحُواْحِنْ مَتَتُّو كُواْ بُواْكَيٜىٰ، يَنَ يِنْ كَارُوَنْثِ، وَتُواْ يَيِ مِنِ رَشِنْ أَمِنْثِ كٜىٰنَنْ؞ ذَنْ طَوْرَ ڢُسْكَ تَيِنْ غَابَادَ وَنَّنْ مُتُمْ إِنْ كَوَرْدَشِ دَغَ جَمَعَرْسَ؞ 7 «كُكٜىٰٻٜىٰ كَنْكُ دَ ڟَرْكِے، كُذَمَ مَاسُ ڟَرْكِے، غَمَا نِنٜىٰ يَهْوٜىٰهْ اللَّهْ نْكُ؞ 8 كُكِيَايٜىٰ ڧَٰعِدُواْدِنَ، كُعَيْكَتَاسُ؞ نِنٜىٰ يَهْوٜىٰهْ وَنْدَ يَكٜىٰٻٜىٰكُ دَ ڟَرْكِے؞ 9 «دُكْ وَنْدَ يَذَاغِ بَابَنْسَ كُواْ مَامَرْسَ، ذَاعَ كَشٜىٰشِ، غَمَا يَا ذَاغِ بَابَنْسَ دَ مَامَرْسَ؞ أَلْحَكِنْ جِنِنْسَ كُوَ ذَيْ كَسَنْثٜىٰ عَكَنْسَ؞ 10 «عِدَنْ وَنِ يَيِ ظِنَ دَ مَاتَرْ مَڨُوبْثِنْسَ، دُكَنْسُ بِيُ، مُتُمِنْ دَ مَثٜىٰنْ، ذَاعَ كَشٜىٰسُ؞ 11 «مُتُمِنْ دَ يَيِ جِمَاعِ دَ مَاتَرْ بَابَنْسَ يَڧَسْڧَنْتَرْ دَ بَابَنْسَ كٜىٰنَنْ؞ دُكَنْسُ بِيُ ذَاعَ كَشٜىٰسُ؞ أَلْحَكِنْ جِنِنْسُ ذَيْ كَسَنْثٜىٰ عَكَنْسُ؞ 12 «عِدَنْ مُتُمْ يَيِ جِمَاعِ دَ مَاتَرْ طَنْسَ، دُكَنْسُ بِيُ ذَاعَ كَشٜىٰسُ، غَمَا سُنْ عَيْكَتَ أَبِنْ ڨَمَ؞ أَلْحَكِنْ جِنِنْسُ ذَيْ كَسَنْثٜىٰ عَكَنْسُ؞ 13 «عِدَنْ مُتُمْ يَيِ جِمَاعِ دَ وَنِ مُتُمْ كَمَرْ يَدَّ مُتُمْ يَكٜىٰيِ دَ مَثٜىٰ، دُكَنْسُ سُنْ عَيْكَتَ أَبِنْ ڨَمَ؞ ذَاعَكَشٜىٰسُ؞ أَلْحَكِنْ جِنِنْسُ كُوَ ذَيْ كَسَنْثٜىٰ عَكَنْسُ؞ 14 «عِدَنْ مُتُمْ يَيِ جِمَاعِ دَ مَثٜىٰ دَ مَامَرْتَ، وَنَّنْ بَبَّنْ أَبِنْ ڨَمَ نٜىٰ؞ ذَاعَڧُواْنٜىٰسُ دَ وُتَا، شِ مُتُمِنْ دَ مَاتَنَّنْ بِيُ، دُواْمِنْ كَدَ أَبِنْ ڨَمَ يَيَطُ عَثِكِنْكُ؞ 15 «عِدَنْ مُتُمْ يَيِ جِمَاعِ دَ دَبَّ، ذَاعَ كَشٜىٰشِ عَكُمَ كَشٜىٰ دَبَّرْ؞ 16 «عِدَنْ مَثٜىٰ تَايِ جِمَاعِ دَ دَبَّ، ذَاعَ كَشٜىٰتَ، عَكُمَ كَشٜىٰ دَبَّرْ؞ أَلْحَكِنْ جِنِنْسُ ذَيْ كَسَنْثٜىٰ عَكَنْسُ؞ 17 «عِدَنْ مُتُمْ يَا عَوْرِ یَرْعُوَرْسَ، وَتُواْ یَرْ بَابَنْسَ، كُواْ یَرْ مَامَرْسَ، حَرْ سُكَيِ جِمَاعِ دَ جُونَ، وَنَّنْ أَبِنْ ڧَسْڧَنْثِ نٜىٰ؞ أَغَبَنْ جَمَعَ، ذَاعَ كَوَرْ دَسُو دَغَ جَمَعَرْسُ، غَمَا مُتُمِنْ يَڧَسْڧَنْتَرْ دَ یَرْعُوَرْسَ، أَلْحَكِنْ لَيْڢِنْسَ يَنَ عَكَنْسَ؞ 18 «عِدَنْ مُتُمْ يَيِ جِمَاعِ دَ مَثٜىٰ لُواْكَثِنْ دَتَكٜىٰ غَنِنْ أَلْعَادَرْتَ، تُواْ، دُكَنْسُ ذَاعَ كَوَرْ دَسُو دَغَ جَمَعَرْسُ، غَمَا سُنْ ڧَضْيَا ڧَٰعِدَرْ ذَمَنْ ڟَرْكِے؞ 19 «بَذَاكَيِ جِمَاعِ دَ یَرْعُوَرْ مَامَرْكَ كُواْ یَرْعُوَرْ بَابَنْكَبَ؞ غَمَا يِنْ حَكَ ذَيْ ڧَسْڧَنْتَرْ دَ عِتَ؞ أَلْحَكِنْ ذُنُوبِنَّنْ يَنَ عَكَنْسُ؞ 20 عِدَنْ مُتُمْ يَيِ جِمَاعِ دَ مَاتَرْ طَنْعُوَنْ بَابَنْسَ، يَڧَسْڧَنْتَرْ دَ طَنْعُوَنْ بَابَنْسَ كٜىٰنَنْ؞ أَلْحَكِنْ ذُنُوبِنْسُ يَنَ عَكَنْسُ، ذَاسُ مُتُ بَ حَيْڢُوَ؞ 21 عِدَنْ مُتُمْ يَيِ جِمَاعِ دَ مَاتَرْ طَنْعُوَنْسَ، وَنَّنْ أَبِنْ ڧَظَنْتَا نٜىٰ؞ يَڧَسْڧَنْتَرْ دَ طَنْعُوَنْسَ كٜىٰنَنْ؞ بَذَاسُ تَٻَ حَيْڢُوَبَ؞ 22 «كُكِيَايٜىٰ دُكَنْ ڧَٰعِدُواْدِنَ دَ دُكَنْ عُمَرْنَيْنَ، كُكُمَ عَيْكَتَاسُ، دُواْمِنْ كَدَ ڧَسَرْدَ ذَنْ كَيْكُ كُيِ ذَمَ عَثِكِ تَأَمَيَ دَكُو؞ 23 بَذَاكُ كُمَيِ تَڢِيَ بِسَغَ أَلْعَادُنْ أَلْعُمَّنْ دَ نَكٜىٰ كُواْرَ أَغَبَنْكُبَ؞ سَبُواْدَ سُنْ عَيْكَتَ دُكَنْ أَبُبُوَنَّنْ، شِے يَسَا إِنَ ڨَمَرْسُ؞ 24 عَمَّا نِے نَا ڢَطَا مُكُ ثٜىٰوَ ذَاكُثِ كُغَاجِ ڧَسَرْسُ؞ ذَنْ بَاكُ عِتَ تَذَمَ مَلَّكَرْكُ، ڧَسَاثٜىٰ مَيْ ظُبَرْدَ مَدَرَ دَ ظُمَ، ڧَسَاثٜىٰ مَيْ أَمْڢَانِ؞ نِنٜىٰ يَهْوٜىٰهْ اللَّهْ نْكُ وَنْدَ يَوَارٜىٰكُ دَغَ سَوْرَنْ ڧَبِيلُ؞ 25 سَبُواْدَ حَكَ ذَاكُ بَمْبَنْتَ ڟَكَانِنْ دَبُّواْبِنْ دَسُكٜىٰ مَاسُ ڧَظَنْتَادَ مَرَسَ ڧَظَنْتَادَ ڟُنْڟَيٜىٰنْ دَسُكٜىٰ مَاسُ ڧَظَنْتَادَ مَرَسَ ڧَظَنْتَا؞ بَذَاكُ ڧَظَنْتَرْ دَكَنْكُ تَوُرِنْ دَبَّ كُواْ ڟُنْڟُ، كُواْ وَنِ أَبُ مَيْ رَرَّڢٜىٰ عَڧَسَابَ، وَتُواْ وَطَنْدَ نَوَارٜىٰسُ سُذَمَ مَاسُ ڧَظَنْتَا أَغَرٜىٰكُ؞ 26 ذَاكُ ذَمَ مَاسُ ڟَرْكِے غَرٜىٰنِ، غَمَا نِے يَهْوٜىٰهْ نِے مَيْ ڟَرْكِے نٜىٰ، نَاكُوَ وَارٜىٰكُ دَغَ سَوْرَنْ ڧَبِيلُ دُواْمِنْ كُذَمَ نَوَ؞ 27 «نَمِجِ كُواْ مَثٜىٰ وَطَنْدَ سُكَ ذَمَ بُواْكَيٜىٰ كُواْ مَاسُ حَطَكَيْ دَ رُوحُواْحِنْ مَتَتُّو ذَاعَ جٜىٰجّٜىٰڢٜىٰسُ دَ دُوَڟُو عَكَشٜىٰسُ؞ أَلْحَكِنْ جِنِنْسُ ذَيْ كَسَنْثٜىٰ عَكَنْسُ؞» |
Hausa Common Language Ajami Bible © The Bible Society of Nigeria, 2020
Bible Society of Nigeria