ڢِرِسْتُواْثِے 2 - أَتَّوْرَتْ دَ أَنَّبَاوَا

هَدَايَ تَهَڟِ

¹ ‏«‏سَعَدَّ مُتُمْ يَكَٰوُاْ هَدَايَ تَهَڟِ غَ يَهْوٜىٰهْ، سَيْ يَمِيڧَ غَارِ مَيْ لَوْشِ؞ سَيْ مُتُمِنْ يَظُبَ مَنْ ظَيْتُنْ عَكَيْ، يَكُمَسَا مَسَ تُرَارٜىٰ،

² يَكَٰوُاْ شِ وُرِنْ یَیَنْ هَٰرُونَ ڢِرِسْتُواْثِے؞ ڢِرِسْتِ مَيْ حِدِمَ ذَيْسَا حَنُّنْسَ يَطِبِے غَارِنْ حَڟِ مَيْ لَوْشِ دَ مَيْ دَ دُكَنْ تُرَارٜىٰ، يَڧُواْنٜىٰسُ رَبُواْ نَتُنَاوَا عَبَغَدٜىٰنْ؞ هَدَايَرْدَ عَكَ مِيڧَ دَ وُتَا كٜىٰنَنْ، مَيْ دَاطِنْ ڧَنْشِ غَ يَهْوٜىٰهْ؞

³ أَبِنْ دَ يَرَغُ دَغَ هَدَايَ تَهَڟِ ذَيْ ذَمَ رَبُواْ نَڢِرِسْتِ، وَتُواْ نَ هَٰرُونَ دَ یَیَنْسَ؞ أَبُ نٜىٰ مَيْ ڟَرْكِے سُواْسَيْ نَهَدَايَ تَڧُواْنَاوَا غَ يَهْوٜىٰهْ؞

⁴ ‏«‏عِدَنْ كُمَ أَبِنْدَ عَكَيِ أَ مَتُواْيَ نٜىٰ مُتُمْ يَكَٰوُاْ هَدَايَ تَهَڟِ، سَيْ عَيِشِ دَ غَارِ مَيْ لَوْشِ؞ عَيِ وَيْنَ مَرَرْ يِسْتِ وَنْدَ عَكَ ݣُوٻَ دَ مَيْ كُواْ بِسْكِتْ وَنْدَ عَكَ شَاڢَ دَ مَيْ؞

⁵ ‏«‏عِدَنْ هَدَايَرْسَ تَهَڟِ نٜىٰ نَأَبِنْدَ عَكَ تُواْيَ عَكَسْكُوانْ تُيَ، سَيْ عَيِتَ دَ غَارِنْ حَڟِ مَيْ لَوْشِ مَرَرْ يِسْتِ وَنْدَ عَكَ ݣُوٻَ دَ مَيْ؞

⁶ ذَاعَكَكَّرْيَ شِ ڧَنَانَا، أَ ظُبَ مَسَ مَيْ، هَدَايَ تَهَڟِثٜىٰ؞

⁷ ‏«‏عِدَنْ هَدَايَرْسَ تَهَڟِ نٜىٰ نَأَبِنْدَ عَكَيِ عَݣُونُوانْ تُيَ، سَيْ عَيِتَ دَ غَارِنْ حَڟِ مَيْ لَوْشِ ثِكِنْ مَيْ؞

⁸ ذَاعَكَٰوُاْ وَ يَهْوٜىٰهْ هَدَايَ تَهَڟِ وَدَّ عَكَيِ دَ وَطَنَّنْ أَبُبُوَ؞ ذَاعَكَٰوُاْ أَ مِيڧَا وَڢِرِسْتِ، شِ ذَيْ كَيْ عَكَنْ بَغَدٜىٰ؞

⁹ ڢِرِسْتِ ذَيْ طٜىٰبُواْ رَبُواْ نَتُنَاوَا دَغَ هَدَايَ تَهَڟِنْ يَڧُواْنٜىٰشِ عَكَنْ بَغَدٜىٰنْ؞ هَدَايَرْدَ عَكَ مِيڧَ دَ وُتَا كٜىٰنَنْ، مَيْ دَاطِنْ ڧَنْشِ غَ يَهْوٜىٰهْ؞

¹⁰ أَبِنْ دَ يَرَغُ دَغَ هَدَايَ تَهَڟِنْ ذَيْ ذَمَ رَبُواْ نَ هَٰرُونَ دَ یَیَنْسَ مَظَا؞ أَبُ مَيْ ڟَرْكِے نٜىٰ سُواْسَيْ نَهَدَايَ تَڧُواْنَاوَا غَ يَهْوٜىٰهْ؞

¹¹ ‏«‏بَابُ هَدَايَ تَهَڟِنْ دَ ذَاعَ كَٰوُاْ وَ يَهْوٜىٰهْ دَ ذَاعَ سَا يِسْتِ، غَمَا بَذَاعَ ڧُواْنٜىٰ يِسْتِ كُواْ ظُمَ أَ هَدَايَرْدَ عَكَ مِيڧَ دَ وُتَا غَ يَهْوٜىٰهْ بَ؞

¹² ذَاعَ عِيَ كَٰوُاْسُ هَدَايَ تَنُونً ڢَارِ غَ يَهْوٜىٰهْ نٜىٰ، عَمَّا بَذَاعَ مِيڧَسُ عَكَنْ بَغَدٜىٰ هَدَايَ مَيْ دَاطِنْ ڧَنْشِبَ؞

¹³ ذَاعَسَا غِشِرِ عَكَنْ كُواْوَثٜىٰ هَدَايَرْكُ تَهَڟِ، غَمَا غِشِرِ عَلَمَ ثٜىٰ تَيَرْجٜىٰجٜىٰنِيَ دَ اللَّهْ نْكُ؞ ذَاكُ مِيڧَ دُكَنْ هَدَايُنْكُ دَ غِشِرِ؞

¹⁴ ‏«‏عِدَنْ عَكَ كَٰوُاْ هَدَايَ تَهَڟِ تَنُونً ڢَارِ غَ يَهْوٜىٰهْ، سَيْ أَ مِيڧَ هَدَايَ تَكَوُنَنْ حَڟِنْ دَ عَكَ غَسَ أَوُتَا عَكَ كُمَ نِڧَ؞

¹⁵ ذَاعَ ظُبَ مَسَ مَيْ عَكُمَسَا مَسَ تُرَارٜىٰ، هَدَايَ ثٜىٰ تَهَڟِ؞

¹⁶ دَغَ ثِكِنْ وَطَنَّنْ كَوُنَنْ حَڟِنْ دَ عَكَ نِڧَ دَ مَيْ طِنْ دَ تُرَارٜىٰنْ، ڢِرِسْتِ ذَيْ طِبَ رَبُواْ نَتُنَاوَا يَڧُواْنٜىٰ؞ هَدَايَرْدَ عَكَ مِيڧَ غَ يَهْوٜىٰهْ كٜىٰنَنْ؞»‏