ڢِرِسْتُواْثِے 16 - أَتَّوْرَتْ دَ أَنَّبَاوَارَانَرْ طَوْكَرْ أَلْحَكِنْ ذُنُوبِ 1 سَيْ يَهْوٜىٰهْ يَيِ مَغَنَ دَ مُوسَٰى بَايَنْ مُتُوَرْ یَیَ مَظَا بِيُ نَ هَٰرُونَ، وَطَنْدَ سُكَ مُتُ سَعَدَّ سُكَذُواْ غَبَنْ يَهْوٜىٰهْ يَدَّ بَيْ ثَنْثَنْتَبَ؞ 2 يَهْوٜىٰهْ يَيِ مَغَنَ دَ مُوسَٰى ثٜىٰوَ «كَڢَطَا وَطَنْعُوَنْكَ هَٰرُونَ ثٜىٰوَ كَدَ يَشِغَ وُرِے مَڢِے ڟَرْكِے عَبَايَنْ لَبُلٜىٰ دُكْ لُواْكَثِنْدَ يَغَ دَامَ؞ غَمَا أَوُرِنْ نٜىٰ نَكٜىٰ بَيَّنَ عَثِكِنْ غِرْغِجٜىٰ عَبِسَ مُرْڢِنْ عَݣُوتِنْ يَرْجٜىٰجٜىٰنِيَ، وَتُواْ وُرِنْ طَوْكَرْ أَلْحَكِنْ ذُنُوبِ؞ عِدَنْ كُوَ يَڧِ يِنْ بِيَيَّ دَ وَنَّنْ دُواْكَا، ذَيْ مُتُ؞ 3 «غَا يَدَّ هَٰرُونَ ذَيْ شِغَ وُرِے مَڢِے ڟَرْكِے؞ ذَيْ عِيَ شِغَ بَايَنْدَ يَمِيڧَ طَنْ بِجِمِ دُواْمِنْ هَدَايَ تَوَنْكٜىٰ ذُنُوبِ دَ كُمَ ضَغُواْ دُواْمِنْ هَدَايَ تَڧُواْنَاوَا؞ 4 كَاڢِنْ يَشِغَ، سَيْ يَيِ وَنْكَ دَ ضُوَ يَسَا رِيغُنَنْسَ نَلِيلِنْ نَنُونَ كٜىٰٻٜىٰوَرْسَ دَ ڟَرْكِے غَ يَهْوٜىٰهْ، وَتُواْ غَجٜىٰرٜىٰنْ وَنْدُواْ دَ غَجٜىٰرِيَرْ رِغَا دَ أَبِنْ طَمَرَ دَ هُولَرْ ڢِرِسْتِ؞ 5 جَمَعَرْ إِسْرَٰٓءِيلَ كُمَ ذَاسُ بَا هَٰرُونَ بُنْسُرَيْ بِيُ دُواْمِنْ هَدَايَ تَوَنْكٜىٰ ذُنُوبِ دَ ضَغُواْ طَيَ دُواْمِنْ هَدَايَ تَڧُواْنَاوَا؞ 6 «هَٰرُونَ ذَيْ مِيڧَ طَنْ بِجِمِنْ هَدَايَ تَوَنْكٜىٰ ذُنُوبِ دُواْمِنْ كَنْسَ؞ تَهَكَ ذَيْ طَوْكِ أَلْحَكِنْ ذُنُوبِنْسَ دَ نَغِدَنْسَ؞ 7 ذَيْ كُمَ طَوْكِ بُنْسُرَيْ بِيُنَّنْ يَكَٰوُاْسُ أَغَبَنْ يَهْوٜىٰهْ عَڧُواْڢَرْ شِغَ تٜىٰنْتِنْ سَدُوَ؞ 8 هَٰرُونَ ذَيْجٜىٰڢَ ڧُرِعَ عَكَنْ بُنْسُرَيْ بِيُنَّنْ؞ ڧُرِعَ طَيَ ذَاتَ كَسَنْثٜىٰ دُواْمِنْ يَهْوٜىٰهْ، طَيَنْ كُمَ دُواْمِنْ أَظَظٜىٰلْ؞ 9 بُنْسُرُنْ دَ ڧُرِعَ دُواْمِنْ يَهْوٜىٰهْ تَڢَاطُواْ عَكَنْسَ، هَٰرُونَ ذَيْ مِيڧَشِ هَدَايَ تَوَنْكٜىٰ ذُنُوبِ؞ 10 عَمَّا بُنْسُرُنْ دَ ڧُرِعَ دُواْمِنْ أَظَظٜىٰلْ تَڢَاطُواْ عَكَنْسَ، ذَاعَ كَٰوُاْ شِ دَ رَيْ أَغَبَنْ يَهْوٜىٰهْ، دُواْمِنْ عَيِ ڧَٰعِدَرْ طَوْكَرْ أَلْحَكِنْ ذُنُوبِ عَكَنْسَ؞ بَايَنْ حَكَ سَيْ عَكُواْرٜىٰشِ ذُوَا دَاجِ دُواْمِنْ أَظَظٜىٰلْ؞ تَهَكَ ذَاعَ كَوَرْدَ ذُنُبَنْ مُتَنٜىٰنْ؞ 11 «سَعَدَّ هَٰرُونَ يَكَٰوُاْ يَيَنْكَ طَنْ بِجِمِ نَهَدَايَ تَوَنْكٜىٰ ذُنُوبِ دُواْمِنْ كَنْسَ، ذَيْ يِڧَٰعِدَرْ طَوْكَرْ أَلْحَكِنْ ذُنُبَنْسَ دَ نَغِدَنْسَ؞ 12 ذَيْ طَوْكِ ݣُونُواْ نَڧُواْنَ تُرَارٜىٰ ثِكٜىٰ دَ غَرْوَشِنْ وُتَادَغَ بَغَدٜىٰنْ دَيَكٜىٰ غَبَنْ يَهْوٜىٰهْ؞ ذَيْ كُمَ ثِكَ حَنُّنْسَ بِيُ دَ تُرَارٜىٰ مَيْ ڧَنْشِ، يَشِغَرْ دَشِ بَايَنْ لَبُلٜىٰنْ؞ 13 أَوُرِنْ أَغَبَنْ يَهْوٜىٰهْ، هَٰرُونَ ذَيْ ظُبَ تُرَارٜىٰنْ عَكَنْ غَرْوَشِنْ وُتَا دُواْمِنْ هَيَاڧِنْ تُرَارٜىٰ يَتَاشِ يَرُڢٜىٰ مُرْڢِ نَأَݣُوتِنْ شَيْدَرْ يَرْجٜىٰجٜىٰنِيَ، وَتُواْ وُرِنْ طَوْكَرْ أَلْحَكِنْ ذُنُوبِ، دُواْمِنْ كَدَ هَٰرُونَ يَغَنِ يَمُتُ؞ 14 ذَيْ طِبِے جِنِنْ طَنْ بِجِمِنْ يَيَيَّڢَا شِ دَ يَڟَرْسَ أَغٜىٰڢٜىٰنْ غَبَسْ نَمُرْڢِنْ عَݣُوتِنْ يَرْجٜىٰجٜىٰنِيَ، وَتُواْ أَغَبَنْ عَݣُوتِنْ؞ ذَيْ يَيَّڢَا جِنِنْ أَغَبَنْ مُرْڢِنْ عَݣُوتِنْ سَوْ بَݣَويْ دَ يَڟَرْسَ؞ 15 «سَيْ يَيَنْكَ بُنْسُرُ نَهَدَايَ تَوَنْكٜىٰ ذُنُوبِ دُواْمِنْ جَمَعَرْ، يَكَٰوُاْ جِنِنْ بَايَنْ لَبُلٜىٰنْ؞ ذَيْ يِدَشِ كَمَرْ يَدَّ يَيِ دَ جِنِنْ طَنْ بِجِمِنْ، وَتُواْ ذَيْ يَيَّڢَا شِ عَبِسَ مُرْڢِنْ عَݣُوتِنْ دَ كُمَ أَغَبَنْ مُرْڢِنْ عَݣُوتِنْ؞ 16 تَهَكَنٜىٰ ذَيْ يِڧَٰعِدَ دُواْمِنْ أَڟَبْتَثٜىٰ وُرِے مَڢِے ڟَرْكِے سَبُواْدَ ڧَظَنْتَرْ یَیَنْ إِسْرَٰٓءِيلَ دَ ذُنُبَنْ غَنْغَنْثِنْسُ دَ دُكَنْ ذُنُبَنْسُ؞ «حَكَ ذَيْ يِ دُواْمِنْ تٜىٰنْتِنْ سَدُوَ وَنْدَ يَكٜىٰ أَوُرِنْسُ، أَڟَكِيَرْ ڧَظَنْتَرْسُ؞ 17 بَابُوَنْدَ ذَيْ كَسَنْثٜىٰ عَثِكِنْ تٜىٰنْتِنْ سَدُوَ دَغَ لُواْكَثِنْ دَ هَٰرُونَ ڢِرِسْتِ ذَيْ شِغَ ثِكِنْ وُرِے مَڢِے ڟَرْكِے دُواْمِنْ يَيِ ڧَٰعِدَ تَطَوْكَرْ أَلْحَكِنْ ذُنُوبِ دُواْمِنْ كَنْسَ دَ غِدَنْسَ دَ كُمَ دُواْمِنْ دُكَنْ تَارُوانْ جَمَعَرْ إِسْرَٰٓءِيلَ، حَرْ لُواْكَثِنْدَ يَڢِتُواْ؞ 18 ذَيْ تَڢِے وُرِنْ بَغَدٜىٰنْ دَيَكٜىٰ أَغَبَنْ يَهْوٜىٰهْ، يَڟَبْتَثٜىٰ بَغَدٜىٰنْ تَوُرِنْ طِبَنْ جِنِنْ طَنْ بِجِمِنْدَ نَبُنْسُرُنْ، يَسَا عَكُواْوَنٜىٰ ڧَهُواْ حُطُ نَبَغَدٜىٰنْ؞ 19 ذَيْ يَيَّڢَا جِنِنْ دَ يَڟَرْسَ سَوْ بَݣَويْ؞ تَهَكَ ذَيْ ڟَبْتَثٜىٰ بَغَدٜىٰنْ دَغَ ڧَظَنْتَرْ یَیَنْ إِسْرَٰٓءِيلَ، يَكُمَ كٜىٰٻٜىٰشِ دَ ڟَرْكِے غَ يَهْوٜىٰهْ؞ 20 «بَايَنْدَ هَٰرُونَ بَبَّنْ ڢِرِسْتِ يَكَمَّلَ ڧَٰعِدَرْ ڟَبْتَثٜىٰوَ دُواْمِنْ وُرِے مَڢِے ڟَرْكِے دَ تٜىٰنْتِنْ سَدُوَ غَبَاطَيَ دَ كُمَ بَغَدٜىٰنْ، ذَيْ كَٰوُاْ بُنْسُرُ مَيْ رَيْ طِنْ؞ 21 ذَيْسَا حَنُّوَنْسَ بِيُ عَكَنْ كَيْ نَبُنْسُرُ مَيْ رَيْ، يَنَ ڢُرْتَ دُكَنْ لَيْڢُواْڢِنْ یَیَنْ إِسْرَٰٓءِيلَ دَ دُكَنْ ذُنُبَنْ غَنْغَنْثِنْسُ دَ دُكَنْ ذُنُبَنْسُ؞ تَهَكَ ذَاعَ ظُبَ دُكَنْ ذُنُبَنْ یَیَنْ إِسْرَٰٓءِيلَ عَكَنْ بُنْسُرُنْ؞ بَايَنْ حَكَ ذَاعَ كُواْرِ بُنْسُرُنْ أَدَاجِ تَهَنُّنْ وَنْدَ عَكَ شِرْيَ دُواْمِنْ وَنَّنْ حِدِمَ؞ 22 ذَاعَ سَكِ بُنْسُرُنْ، ذَيْ كُمَ طَوْكِ دُكَنْ لَيْڢُواْڢِنْ یَیَنْ إِسْرَٰٓءِيلَ عَكَنْسَ ذُوَا دَاجِنْ دَ بَا كُواْوَ؞ 23 «هَٰرُونَ ذَيْ شِغَ تٜىٰنْتِنْ سَدُوَ، ذَيْ كُمَ ثِرٜىٰ رِيغُنَ نَلِيلِنْ نَڢِرِسْتِ وَطَنْدَ يَسَنْيَ كَاڢِنْ يَشِغَ وُرِے مَڢِے ڟَرْكِے، يَبَرْسُ أَوُرِنْ؞ 24 ذَيْ وَنْكٜىٰ جِكِنْسَ دَ ضُوَ أَوَنِ وُرِے مَيْ ڟَرْكِے، يَسَنْيَ رِيغُنَنْسَ؞ بَايَنْ وَنَّنْ ذَيْڢِتَ يَمِيڧَ تَاسَ هَدَايَ تَڧُواْنَاوَا دَ هَدَايَ تَڧُواْنَاوَا تَجَمَعَرْ، دُواْمِنْ يَطَوْكِ أَلْحَكِنْ ذُنُبَنْسَ دَ نَجَمَعَرْ؞ 25 كِڟٜىٰ دَغَ هَدَايَ تَوَنْكٜىٰ ذُنُوبِ ذَيْ ڧُواْنٜىٰشِ عَكَنْ بَغَدٜىٰنْ؞ 26 شِے مُتُمِنْدَ يَسَكِ بُنْسُرُ مَيْ طَوْكَرْ لَيْڢِے ذُوَا دَاجِ دُواْمِنْ أَظَظٜىٰلْ، ذَيْ وَنْكٜىٰ رِيغُنَنْسَ يَوَنْكٜىٰ جِكِنْسَ دَ ضُوَ؞ بَايَنْ حَكَ يَنَ عِيَ شِغَ ذَنْغُوانْ؞ 27 طَنْ بِجِمِنْ دَ بُنْسُرُ نَهَدَايَ تَوَنْكٜىٰ ذُنُوبِ، وَطَنْدَ عَكَ كَٰوُاْ جِنِنْسُ دُواْمِنْ ڧَٰعِدَرْ طَوْكَرْ أَلْحَكِنْ ذُنُوبِ أَ وُرِے مَڢِے ڟَرْكِے، ذَاعَ ڢِتَرْ دَسُو بَايَنْ ذَنْغُوانْ؞ ذَاعَڧُواْنٜىٰ ڢَتَرْسُ دَ نَامَنْسُ دَ دُكَنْ كَاشِنْسُ دَ وُتَا؞ 28 شِ مُتُمِنْدَ يَڧُواْنٜىٰسُ، ذَيْ وَنْكٜىٰ رِيغُنَنْسَ، يَوَنْكٜىٰ جِكِنْسَ دَ ضُوَ؞ بَايَنْ حَكَ يَنَ عِيَ شِغَ ذَنْغُوانْ؞ 29 «وَنَّنْ ڧَٰعِدَثٜىٰ تَدِنْدِنْدِنْ دُواْمِنْكُ؞ عَكُواْوَثٜىٰ رَانَ تَغُواْمَ غَ وَتَنْ بَݣَويْ، ذَاكُيِ أَظُمِ، بَذَاكُ كُمَيِ عَيْكِبَ كُواْ كَطَنْ، كُواْ دَ مُتُمْ بَڧُواْ نٜىٰ عَثِكِنْكُ كُواْ طَنْ ڧَسَا نٜىٰ؞ 30 غَمَا أَ رَانَرْ نَنْ ڢِرِسْتِ ذَيْ يِڧَٰعِدَ تَطَوْكَرْ أَلْحَكِنْ ذُنُوبِ دُواْمِنْكُ، دُواْمِنْ أَڟَبْتَثٜىٰكُ دَغَ دُكَنْ ذُنُبَنْكُ، دُواْمِنْ كُذَمَ مَرَسَ ڧَظَنْتَا أَغَبَنْ يَهْوٜىٰهْ؞ 31 وَنَّنْ رَانَرْ ثِكَكّٜىٰنْ هُوتُ ثٜىٰ أَغَرٜىٰكُ، كَمَرْ رَانَرْ هُوتُ تَمَكُواْ، ذَاكُ كُوَيِ أَظُمِ؞ وَنَّنْ ڧَٰعِدَ ثٜىٰ تَدِنْدِنْدِنْ؞ 32 نَنْ غَبَ، بَبَّنْ ڢِرِسْتِ ذَيْ يِڧَٰعِدَرْ طَوْكَرْ أَلْحَكِنْ ذُنُوبِ، وَتُواْ ڢِرِسْتِ وَنْدَ عَكَ نَطَ عَكَ كُمَ كٜىٰٻٜىٰ دَ ڟَرْكِے دُواْمِنْ يَيِ حِدِمَ أَمَڟَيِنْ كَكَنْسَ هَٰرُونَ؞ ذَيْ يِڧَٰعِدَرْ سَنْيٜىٰ دَ رِيغُنَ نَنُونَ كٜىٰٻٜىٰوَرْسَ غَ يَهْوٜىٰهْ؞ 33 ذَيْ يِڧَٰعِدَرْ ڟَبْتَثٜىٰوَ دُواْمِنْ وُرِے مَڢِے ڟَرْكِے دَ تٜىٰنْتِنْ سَدُوَ غَبَاطَيَ دَ بَغَدٜىٰنْ؞ ذَيْ كُمَيِ ڧَٰعِدَرْ طَوْكَرْ أَلْحَكِنْ ذُنُبَنْ ڢِرِسْتُواْثِے دَ نَدُكَنْ تَارُوانْ جَمَعَرْ؞ 34 وَنَّنْ ڧَٰعِدَ ثٜىٰ تَدِنْدِنْدِنْ دُواْمِنْكُ؞ ذَاعَيِ ڧَٰعِدَ تَطَوْكَرْ أَلْحَكِنْ ذُنُبَنْ یَیَنْ إِسْرَٰٓءِيلَ سَوْ طَيَ أَ شٜىٰكَرَا؞» مُوسَٰى كُوَ يَيِ دَيْدَيْ بِسَغَ يَدَّ يَهْوٜىٰهْ يَعُمَرْثٜىٰشِ؞ |
Hausa Common Language Ajami Bible © The Bible Society of Nigeria, 2020
Bible Society of Nigeria