يَهُودَ 1 - أَتَّوْرَتْ دَ أَنَّبَاوَا

غَيْسُوَا

¹ دَغَ يَهُودَ بَاوَنْ عِيسَىٰ أَلْمَسِيحُ، طَنْعُوَنْ يَعْڧُوبَ، ذُوَا غَرٜىٰكُ، كُو وَطَنْدَ اللَّهْ يَكِرَا، وَطَنْدَ اللَّهْ عُبَا يَكٜىٰ ڧَوْنَ، عِيسَىٰ أَلْمَسِيحُ كُمَ يَكٜىٰ كِيَايٜىٰوَا؞

² بَرِ جِنْڧَيْ دَ سَلَمَ دَ ڧَوْنَ سُذَمَ نَاكُ عَيَلْوَثٜىٰ؞

حُكُنْثِ عَكَنْ مَلَمً ڧَضْيَا

³ يَا كُو وَطَنْدَ نَكٜىٰ ڧَوْنَ، دَا مَا نَيِ مَرْمَرِنْ رُبُوتَ مُكُ غَمٜىٰدَ ثٜىٰتُواْنَّنْ نَامُ دُكَ؞ عَمَّا دَغَ بَايَ نَغَ يَذَمَ دُواْلٜىٰنٜىٰ إِنْرُبُوتَ مُكُ إِنْ غَرْغَطٜىٰكُ كُدَاغٜىٰ سُواْسَيْ كُكِيَايٜىٰ بَنْ‌غَسْكِيَرْمُ وَدَّ اللَّهْ يَدَنْڧَوَ ڟَرْكَكَنْسَ، سَوْ طَيَ تَكْ، بَا ڧَارِ؞

⁴ نَڢَطِ وَنَّنْ نٜىٰ سَبُواْدَ وَطَنْسُ مُتَنٜىٰنْ دَ سُكَ شِغَ ثِكِنْكُ عَٻُواْيٜىٰ، وَطَنْدَ تُنْدَا عَكَ ڧَدَّرَسُ غَ حُكُنْثِ؞ بَاسُدَ حَلِ إِرِنْ نَ اللَّهْ، سُنَ كُمَ مَيْدَ أَلْحٜىٰرِنْ اللَّهْ يَا ذَمَ حَنْيَرْ نٜىٰمَنْ جِنْ دَاطِے نَرَشِنْ كُنْيَا؞ سُنَيِنْ مُسُونْ عِيسَىٰ أَلْمَسِيحُ وَنْدَ شِينٜىٰ كَطَيْ شُوغَبَنْمُ دَ كُمَ عُبَنْ‌غِجِنْمُ؞

⁵ كُواْدَيَكٜىٰ كُنْ رِغَا كُنْ سَنِ، إِنَ سُواْ إِنْتُنَ مُكُ يَدَّ عُبَنْ‌غِجِ يَثٜىٰثِ مُتَنٜىٰنْسَ دَغَ ڧَسَرْ مَصَرْ، عَمَّا دُكْدَهَكَ دَغَ بَايَ يَا هَلَّكَ وَطَنْدَ بَسُ بَادَ غَسْكِيَابَ؞

⁶ كُتُنَ كُمَ دَ مَلاَىِٕكُنْدَ بَسُ كِيَايٜىٰ مَڟَيِنْسُ نَ إِيكُواْ بَ، عَمَّا سُكَ بَرْ عَيْنِحِنْ وُرِنْ ذَمَنْسُ؞ وَطَنَّنْ ڢَا عُبَنْ‌غِجِ يَا ڟَرٜىٰسُ أَدُهُ، أَطَوْرٜىٰ دَ سَرْڧَ تَهَرْ أَبَدَا سُجِرَا شَرِيعَ تَبَبَّرْ رَانَرْ نَنْ؞

⁷ كَدَ كُمَنْتَادَ يَدَّ سُواْدُوامْ دَ غُواْمُواْرَ دَ غَرُضُوً دَسُكٜىٰ كٜىٰوَيٜىٰ دَسُو، سُو مَا سُنْ بَادَ كَنْسُ غَ رَايُوَرْ لَلَتَ دَ مُومُّنَرْ شَعَوَرْ جِكِے كَمَرْ وَدَّ بَتَيِ دَيْدَيْ دَحَلِتَّرْ اللَّهْ بَ؞ غَرُرُوَنَّنْ سُنْ ذَمَ مِصَالِنْ مَاسُ شَنْ حُكُنْثِ أَوُتَا تَهَرْ أَبَدَا؞

⁸ حَكَ يَكٜىٰدَ مَاسُ دُواْغَضَ عَكَنْ مَڢَرْكَيْ، سُكَنْ ڧَظَنْتَرْدَ جِكِنْسُ، سُكَنْڧِ مِيڧَ كَنْسُ غَ مَاسُ إِيكُواْ، سُكُمَيِ وَحَلِتُّو مَاسُ دَرَجَ أَ سَمَ بَڧَرْ مَغَنَ؞

⁹ كُواْ مِيكَآءِيلُ، شُوغَبَنْ مَلاَىِٕكُ مَا بَيْيِ إِرِنْ وَنَّنْ بَ؞ أَسَعَدَّ يَكٜىٰ جَيَيَّ دَ شَيْطَنْ، سُنَ غَرْدَمَ عَكَنْ غَاوَرْ مُوسَٰى، شِ مِيكَآءِيلُ بَيْيِ ڧَرْڢِنْ حَلِ يَيَنْكٜىٰ مَسَ حُكُنْثِ دَ بَڧَرْ مَغَنَبَ؞ يَا ثٜىٰ كَوَيْ، ‏«‏عُبَنْ‌غِجِ يَڟَاوَتَا مَكَ!‏»‏

¹⁰ عَمَّا وَطَنَّنْ مُتَنٜىٰ سُنَ ذَاغِ دَ بَڧَرْ مَغَنَ عَكَنْ دُكَنْ أَبِنْدَ بَسُغَانٜىٰبَ، كُمَ وَطَنَّنْ أَبُبُوَنْ دَ سُكَ سَنِ بِسَغَ جِكِے، كَمَرْ دَبُّواْبِے مَرَسَ حَنْكَلِ، إِرِنْ وَطَنَّنْ أَبُبُوَ نٜىٰ ذَاسُ كَيْسُ غَ هَلَّكَ؞

¹¹ كَيْتُوانْسُ!‏ سُنْبِے حَنْيَرْ كَيِنُ؞ دُواْمِنْ نٜىٰمَنْ رِيبَ سُنْڢَاطَ ثِكِنْ كُسْكُرٜىٰ إِرِنَّ بَلَعَمْ، سُنْ كُمَ هَلَّكَ تَوُرِنْ تَاوَيٜىٰ إِرِنَّ ڧَارُونَ؞

¹² وَطَنَّنْ مُتَنٜىٰ كُوَ ذَمَنْسُ عَثِكِنْ تَارُوانْكُ نَڧَوْنَ أَبِنْ عَيْبِے نٜىٰ، سَعَدَّ سُكٜىٰثِ سُكٜىٰ كُمَ شَا تَرٜىٰدَكُو بَا كُنْيَا بَا ڟُواْرُواْ؞ سُو مَكِيَايَنٜىٰ وَطَنْدَ سُكٜىٰ ثِيَرْدَ كَنْسُ كَوَيْ؞ سُنَنَنْ كَمَرْ هَدَرِنْ دَ إِسْكَ تَكَنْ كُواْرَ، عَمَّا بَابُ ضُوَ عَثِكِ؞ سُنَ كَمَرْ عِتَتُوَ مَرَسَ یَیَ دَ رَانِ، كُواْ كَمَرْ عِتَتُوَنْ دَ عَكَ تُمْٻُكٜىٰ، كُمَ سُنْ مُتُ غَبَاطَيَ؞

¹³ سُو كَمَرْ رَاڧُمَنْ ضُوً تٜىٰكُنٜىٰ مَاسُ تَاشِ سَمَ ثِكِنْ هَوْكَ، سُنَ تَاڧَمَ دَ أَبُبُوَنْ كُنْيَا وَطَنْدَ كُمْڢَ سُكٜىٰ كَوَيْ؞ سُو كَمَرْ تَوْرَرِنٜىٰ مَاسُ يَٰوُاْ بَرْكَتَيْ، وَطَنْدَ عَكَيِ مُسُ تَنَدِنْ بَڧِنْ دُهُ نَهَرْ أَبَدَا؞

¹⁴ إِدْرِيسْ مَا، وَنْدَ يَكٜىٰ نَڟَارَ تَبَݣَويْ دَغَ ءَادَمُ، شِے مَا يَيِ أَنَّبْثِ عَكَنْ وَطَنَّنْ مُتَنٜىٰ ثٜىٰوَ ‏«‏دُوبَ دَيْ، عُبَنْ‌غِجِ يَنَ ذُوَا دَ دُبَّنْ مَلاَىِٕكُنْسَ مَاسُ ڟَرْكِے،

¹⁵ دُواْمِنْ يَعَيْكَتَ حُكُنْثِنْسَ عَكَنْ كُواْوَ؞ ذَيْ نُونَاوَ مَرَسَ حَلِ إِرِنَّ اللَّهْ دُكَنْ عَيْكِنْسُ نَرَشِنْ حَلِنْ اللَّهْ؞ ذَيْ تُواْنٜىٰ دُكَنْ مُوغَيٜىٰنْ مَغَنْ‌غَنُنْ دَ مَاسُ ذُنُوبِ مَرَسَ حَلِ إِرِنَّ اللَّهْ سُكَ ڢَطَا غَمٜىٰدَشِ؞»‏

¹⁶ وَطَنَّنْ مُتَنٜىٰ دَيْ مَاسُ غُنَغُنِ نٜىٰ، مَاسُ غَنِنْ لَيْڢِنْ وَطَنْسُ، مَاسُبِنْ مُوغُوَرْ شَعَوَرْسُ، مَاسُثِكٜىٰ دَ يَبُوانْ كَنْسُ، مَاسُ ذَاڧِنْ بَاكِ دُواْمِنْ سَامُنْ رِيبَ تَكَنْسُ؞

غَرْغَطِ دَ عُمَرْنَيْ

¹⁷ عَمَّا يَا كُو وَطَنْدَ نَكٜىٰ ڧَوْنَ، كُتُنَ دَ أَبِنْدَ مَنْذَنِّےنْ عُبَنْ‌غِجِنْمُ عِيسَىٰ أَلْمَسِيحُ سُكَ ڢَطَا أَدَا ثٜىٰوَ ذَيْ ڢَرُ؞

¹⁸ سُنْ ڢَطَا مُكُ ثٜىٰوَ ‏«‏أَ زَامَانِنْ ڧَرْشٜىٰ ذَاعَيِ وَطَنْسُ مُتَنٜىٰ مَاسُ بَعَ، وَطَنْدَ ذَاسُبِے إِرِنْ تَاسُ شَعَوَ وَدَّ بَ تَحَلِ إِرِنَ اللَّهْ بَ؞

¹⁹ سُونٜىٰ مُتَنٜىٰ وَطَنْدَ سُكَنْ كَٰوُاْ رَبُوَ، مَاسُبِنْ شَعَوَرْ جِكِے، سَبُواْدَ بَاسُ دَ رُوحٌ اللَّهْ؞»‏

²⁰ عَمَّا يَا كُو وَطَنْدَ نَكٜىٰ ڧَوْنَ، كُيِ تَغِنَ كَنْكُ عَكَنْ بَنْ‌غَسْكِيَرْكُ نَنْ مَڢِے ڟَرْكِے؞ كُكُمَيِ أَدُّعَ تَوُرِنْ إِيكُوانْ رُوحُ مَيْ ڟَرْكِے؞

²¹ كُكِيَايٜىٰ كَنْكُ ثِكِنْ ڧَوْنَرْ اللَّهْ، كُنَ جِضَانْ عُبَنْ‌غِجِنْمُ عِيسَىٰ أَلْمَسِيحُ وَنْدَ ثِكِنْ جِنْڧَنْسَ ذَيْ كَيْكُ غَ رَيْ نَهَرْ أَبَدَا؞

²² كُدِنْ‌غَ نُونَ جِنْڧَيْ غَ وَطَنْدَ سُكٜىٰيِنْ شَكَّ؞

²³ كُثٜىٰثٜىٰ وَطَنْسُ كَمَرْ كُنَ ڢِظْغٜىٰسُ دَغَ ثِكِنْ وُتَا؞ وَطَنْسُ كُوَ كُنُونَ مُسُ جِنْڧَيْ، عَمَّا تَرٜىٰدَ ڟُواْرُواْ، حَرْ مَا كُنَ ڨَمَرْ تُڢَاڢِنْ دَ حَلِنْ مُتُنْتَكَرْسُ يَا ڧَظَنْتَرْ؞

أَدُّعَرْ يَبُواْ

²⁴ تُواْ، يَبُواْ يَا تَبَّتَا غَ وَنْدَ يَكٜىٰدَ إِيكُواْ يَڟَرٜىٰكُ دَغَ ڢَاطُوَ، يَكُمَ مِيڧَكُ مَرَسَ تَبُواْ أَغَبَنْ طَوْكَكَرْسَ دَ ڢَضٍ ثِكِ سُواْسَيْ؞

²⁵ غَرٜىٰشِ كُمَ، وَنْدَ شِ كَطَيْ يَكٜىٰ اللَّهْ مَيْ ثٜىٰتُوانْمُ، تَوُرِنْ عِيسَىٰ أَلْمَسِيحُ عُبَنْ‌غِجِنْمُ، طَوْكَكَ دَ دَرَجَ دَ مُلْكِ دَ إِيكُواْ سُتَبَّتَا تُنْدَغَ ڢَرْكُوانْ ذَامَانَيْ دَ يَنْذُ دَ كُمَ حَرْ أَبَدَا!‏ أَمِينْ؞