يُواْشُوَ 8 - أَتَّوْرَتْ دَ أَنَّبَاوَا

أَنْ ثِ أَيْ دَ يَاڧِ

¹ يَهْوٜىٰهْ كُمَ يَثٜىٰ وَ يُواْشُوَ ‏«‏كَدَ كَجِڟُواْرُواْ كُواْ كَڢِدَّ ذُوثِيَا؞ سَيْ كَطَوْكِ دُكَنْ سُواْجُواْجِ، كَتَاشِ، كَتَڢِے أَيْ كَڢَاطَ مُسُ دَ يَاڧِ؞ غَاشِ، نَارِغَا نَا بَادَ سَرْكِنْ أَيْ دَ دُكَنْ مُتَنٜىٰنْسَ دَ غَرِنْسَ دَ ڧَسَرْسَ أَهَنُّنْكَ؞

² ذَاكَيِ وَ أَيْ دَ سَرْكِنْتَ أَبِنْدَ كَيِ وَ يٜىٰرِكُواْ دَ سَرْكِنْتَ، عَمَّا وَنَّنْ لُواْكَثِ ذَاكُ عِيَ ݣُوشِ كَايَنْتَ دَ دَبُّواْبِنْتَ دُواْمِنْ سُذَمَ نَاكُ؞ كُيِ شِرِ كُيِ وَغَرِنْ ݣُونْتُوانْ ٻَوْنَ دَغَ بَايَنْ غَرِنْ؞»‏

³ سَيْ يُواْشُوَ يَتَاشِ تَرٜىٰدَ دُكَنْ سُواْجُواْجِنْسَ ذُوَا أَيْ؞ يُواْشُوَ كُوَ يَذَاٻِ سُواْجُواْجِ مَڢِيَ عِيَ يَاڧِ غُدَا دُبُو تَلَاتِنْ، يَعَيْكٜىٰسُ دَ دَرٜىٰ؞

⁴ يَ عُمَرْثٜىٰسُ يَثٜىٰ ‏«‏كُتَڢِے كُٻُيَ عَبَايَنْ غَرِنْ، عَمَّا بَذَاكُيِ نِيسَ دَغَ غَرِنْ سُواْسَيْ بَ، كُذَمَ دَ شِرِنْ كَيْ هَرِ؞

⁵ نِے دَ دُكَنْ مُتَنٜىٰنْ دَسُكٜىٰ تَرٜىٰدَنِ، ذَامُجٜىٰ كُسَدَ غَرِنْ؞ سَعَدَّ مُتَنٜىٰنْ أَيْ سُكَ ڢِتُواْ دُواْمِنْ سُيَاڧٜىٰمُ كَمَرْ يَدَّ سُكَيِ أَدَا، ذَامُ جُويَا مُغُدُ كَمَرْ يَدَّ مُكَيِ دَ ڢَرْكُواْ؞

⁶ ذَاسُ كُوَ ڢِتُواْ سُبِيمُ، حَرْ سَيْ مُنْ جَنْيٜىٰسُ نٜىٰسَ دَ غَرِنْ؞ ذَاسُيِ ڟَمَّنِ ثٜىٰوَ مُنَ غُدُ دَغَ غَرٜىٰسُ كَمَرْ يَدَّ دَا مُكَيِ؞

⁷ كُو كُوَ سَيْ كُتَاشِ دَغَ وُرِنْ ٻُيَنْكُ، كُثِ غَرِنْ؞ غَمَا يَهْوٜىٰهْ اللَّهْ نْكُ ذَيْبَادَ غَرِنْ أَ حَنُّنْكُ؞

⁸ سَعَدَّ كُكَثِ غَرِنْ، سَيْ كُسَا وَغَرِنْ وُتَا؞ كُيِ بِيَيَّ ڢَا دَ وَنَّنْ عُمَرْنِنْ يَهْوٜىٰهْ دَ نَڢَطَا مُكُ؞»‏

⁹ سَيْ يُواْشُوَ يَسَلَّمٜىٰسُ، سُكَ تَڢِے وُرِنْ دَ ذَاسُيِ ݣُونْتُوانْ ٻَوْنَ، سُكَجِرَا ڟَكَانِنْ بٜىٰتٜىٰلْ دَ أَيْ، تَوَجٜىٰنْ يَمَّ دَ أَيْ؞ يُواْشُوَ كُوَ يَݣُونَ تَرٜىٰدَ مُتَنٜىٰنْسَ؞

¹⁰ يُواْشُوَ يَتَاشِ دَ سَسَّڢٜىٰ يَتَتَّارَ سُواْجُواْجِنْسَ؞ سَيْ شِ دَ شُوغَبَنِّنْ مُتَنٜىٰنْ إِسْرَٰٓءِيلَ سُكَ تَڢِے سُكَ وُثٜىٰ ذُوَا غَبَ، سُكَبِدَ سُواْجُواْجِ ذُوَا أَيْ؞

¹¹ دُكَنْ سُواْجُواْجِنْ دَسُكٜىٰ تَرٜىٰ دَشِ، سُكَ تَڢِے كُسَدَ غَرِنْ سُكَ كَڢَ سَنْسَنِنْ يَاڧِ أَغٜىٰڢٜىٰنْ أَرٜىٰوَ دَ أَيْ؞ ڟَكَانِنْسُ دَ أَيْ أَݣَويْ ݣُورِ؞

¹² يُواْشُوَ يَذَاٻِ مُتَنٜىٰ وَجٜىٰنْ دُبُو بِيَرْ يَكُمَسَا سُكَ ٻُيَ ڟَكَانِنْ بٜىٰتٜىٰلْ دَ أَيْ، تَوَجٜىٰنْ يَمَّ دَ غَرِنْ؞

¹³ سُواْجُواْجِنْ سُكَ كَڢَ سَنْسَنِنْسُ أَرٜىٰوَ دَ غَرِنْ أَ جٜىٰرٜىٰ دُواْمِنْ يَاڧِ، مَاسُ ݣُونْتُوانْ ٻَوْنَ كُوَ سُنَ يَمَّ دَ غَرِنْ؞ عَمَّا يُواْشُوَ يَݣُونَ عَݣُورِنْ؞

¹⁴ سَعَدَّ سَرْكِنْ أَيْ يَغَ سُواْجُواْجِنْ يُواْشُوَ، يَطَوْكِ مَتَاكِ دَ سَوْرِ؞ شِے دَ دُكَنْ مُتَنٜىٰنْسَ سُكَ ڢِتَ ذُوَا وَجٜىٰنْ ݣُورِنْ يُواْدَنْ دُواْمِنْ سُيَاڧِ مُتَنٜىٰنْ إِسْرَٰٓءِيلَ أَوُرِنْ دَ دَا سُكَيِ يَاڧِ؞ عَمَّا سَرْكِنْ بَيْسَنْ أَݣَويْ یَنْ ݣُونْتُوانْ ٻَوْنَ عَبَايَنْ غَرِنْبَ؞

¹⁵ سَيْ يُواْشُوَ دَ دُكَنْ مُتَنٜىٰنْسَ سُكَ رُوطٜىٰسُ، سُكَيِ تَجَنْ بَايَ سُكَ رُوغَ دَ غُدُ ذُوَا دَاجِ؞

¹⁶ سَبُواْدَ حَكَ، عَكَ كِرَا دُكَنْ مُتَنٜىٰنْ دَسُكٜىٰ ثِكِنْ بِرْنِنْ سُتَارُ سُبِيسُ؞ سُكَبِے مُتَنٜىٰنْ إِسْرَٰٓءِيلَ، تَهَكَ عَكَجَاسُ نٜىٰسَ دَ غَرِنْ؞

¹⁷ بَا وَنِ مُتُمِنْدَ يَرَغُ عَثِكِنْ أَيْ كُواْ بٜىٰتٜىٰلْ وَنْدَ بَيْڢِتَ دُواْمِنْ يَبِے سُواْجُواْجِنْ إِسْرَٰٓءِيلَ بَ؞ سُكَبَرْ ڧُواْڢُواْڢِنْ غَرِنْ عَبُوطٜىٰ سُكَبِے سُواْجُواْجِنْ إِسْرَٰٓءِيلَ؞

¹⁸ سَيْ يَهْوٜىٰهْ يَثٜىٰ وَ يُواْشُوَ ‏«‏كَمِيڧَ مَاشِنْ دَيَكٜىٰ حَنُّنْكَ وَجٜىٰنْ أَيْ، غَمَا نَا بَادَ عِتَ أَ حَنُّنْكَ؞»‏ يُواْشُوَ كُوَ يَيِ يَدَّ عَكَ ڢَطَا مَسَ؞

¹⁹ دَظَرَرْ يُواْشُوَ يَمِيڧَ حَنُّنْسَ، یَنْ ݣُونْتُوانْ ٻَوْنَ سُكَتَاشِ أَغُجٜىٰ، سُكَ رُوغَ دَ غُدُ ذُوَا ثِكِنْ غَرِنْ سُكَ كُوَثِشِ؞ سُكَيِ سَوْرِ سُكَسَا وَغَرِنْ وُتَا؞

²⁰ سَعَدَّ مُتَنٜىٰنْ أَيْ سُكَ دُوبِے بَايَ، سُكَغَ هَيَاڧِنْ غَرِنْ يَنَ تَاشِ ذُوَا سَمَ؞ بَابُوَتَ حَنْيَ كُمَ وَدَّ ذَاسُ ڟِيرَا، سَبُواْدَ مُتَنٜىٰنْ إِسْرَٰٓءِيلَ وَطَنْدَ سُكٜىٰ غُدُ ذُوَا دَاجِ، سُكَ جُويَا دُواْمِنْ سُڢَاطَ مُسُ دَ يَاڧِ؞

²¹ غَمَا سَعَدَّ يُواْشُوَ دَ دُكَنْ إِسْرَٰٓءِيلَاوَا سُكَغَ وَطَنْدَ سُكَ ٻُيَ سُنْ رِغَا سُنْثِ غَرِنْ، هَيَاڧِے نَغَرِنْ كُمَ يَنَ تَتَاشِ ذُوَا سَمَ، سَيْ سُكَ جُويَا كَنْ مُتَنٜىٰنْ أَيْ، سُكَ كَكَّشٜىٰسُ؞

²² إِسْرَٰٓءِيلَاوَنْ دَ سُكَثِ غَرِنْ سُكَ ڢِتُواْ دَغَ غَرِنْ سُكَ ڢَاطَ مُسُ دَ يَاڧِ؞ سَيْ مُتَنٜىٰنْ أَيْ سُكَ سَامِ كَنْسُ أَڟَكِيَرْ إِسْرَٰٓءِيلَاوَا غَبَ دَ بَايَ؞ إِسْرَٰٓءِيلَاوَا كُوَ سُكَ كَكَّشٜىٰسُ، بَاوَنْدَ يَڟِيرَا كُواْ يَغُدُ دَغَ غَرٜىٰسُ؞

²³ عَمَّا سُكَ كَامَ سَرْكِنْ أَيْ دَ رَيْ، سُكَ كَٰوُاْشِ وُرِنْ يُواْشُوَ؞

²⁴ سَعَدَّ إِسْرَٰٓءِيلَاوَا سُكَ غَمَ كَكَّشٜىٰ مَذَوْنَنْ أَيْ أَ ڢِيلَيٜىٰ دَ كُمَ دَاجِ عِنْدَ سُكَ كُواْرٜىٰسُ، سَيْ إِسْرَٰٓءِيلَاوَا سُكَ كُواْمَ أَيْ، سُكَ كُمَ كَكَّشٜىٰ وَطَنْدَ سُكٜىٰ ثِكِنْتَ؞

²⁵ أَ رَانَرْ نَنْ أَنْ‌غَمَ دَ مُتَنٜىٰنْ أَيْ، مُتُمْ دُبُو غُواْمَشَا بِيُ نٜىٰ، مَظَا دَ مَاتَا؞

²⁶ غَمَا يُواْشُوَ بَيْ جَنْيٜىٰ حَنُّنْسَ وَنْدَ يَمِيڧَ مَاشِ دَشِيبَ، سَيْ دَ يَغَمَ هَلَّكَ دُكَنْ وَطَنْدَ عَكَ كٜىٰٻٜىٰ غَ يَهْوٜىٰهْ دُواْمِنْ هَلَّكَرْوَ، دُكَنْ مَذَوْنَنْ أَيْ؞

²⁷ سَيْ دَبُّواْبِے دَ كَايَيَّكِ نَغَرِنْ نٜىٰ كَطَيْ سُكَ ضَغٜىٰ، إِسْرَٰٓءِيلَاوَا كُوَ سُكَ ݣُوشٜىٰ بِسَغَ يَدَّ يَهْوٜىٰهْ يَعُمَرْثِ يُواْشُوَ؞

²⁸ يُواْشُوَ يَڧُواْنٜىٰ أَيْ، بَيْ بَرْ كُواْمٜىٰبَ؞ سَيْ غِدَاجٜىٰنْ دَ عَكَ ڧُواْنٜىٰ دَ كُمَ عَكَ رُرُّشٜىٰ سُنْ ذَمَ كُڢَيْ؞ حَكَ يَكٜىٰ هَرْوَيَوْ؞

²⁹ يَرَاتَيٜىٰ سَرْكِنْ أَيْ عَكَنْ إِتَاثٜىٰ يَكُمَ بَرْ غَاوَرْسَ حَرْ يَمَّ؞ دَيْدَيْ ڢَاطُوَرْ رَانَ، يُواْشُوَ يَبَادَ عُمَرْنِ سُجٜىٰ سُطَوْكِ غَاوَا دَغَ إِتَاثٜىٰنْ سُجٜىٰڢَرْ دَشِ عَڧُواْڢَرْ غَرِنْ؞ سُكَ رُڢٜىٰ غَاوَا دَ تُلِنْ دُوَڟُو مَيْ يَوَ، وَنْدَ يأَنَانً هَرْوَيَوْ؞

أَنْ كَرَنْتَ كُواْيَرْوَرْ مُوسَٰى عَبَبَّنْ تُدُنْ عٜىٰبَلْ

³⁰ سَيْ يُواْشُوَ يَغِنَ وَ يَهْوٜىٰهْ اللَّهْ نَ إِسْرَٰٓءِيلَ بَغَدٜىٰ عَكَنْ بَبَّنْ تُدُنْ عٜىٰبَلْ؞

³¹ يَيِشِ كَمَرْ يَدَّ دَا مُوسَٰى بَاوَنْ يَهْوٜىٰهْ يَعُمَرْثِ إِسْرَٰٓءِيلَاوَا؞ يَغِنَ بَغَدٜىٰنْ بِسَغَ أَبِنْدَ يَكٜىٰ أَرُبُوثٜىٰ ثِكِنْ لِتَّڢِنْ كُواْيَرْوَرْ مُوسَٰى ثٜىٰوَ ‏«‏أَغِنَ بَغَدٜىٰنْ دَ دُووَڟُنْ دَ بَعَتَٻَ سَسَّڧَ بَ، بَعَكُمَ تَٻَ دَ كَايَنْ عَيْكِ نَڧَرْڢٜىٰبَ؞»‏ عَكَنْسَ كُوَ سُكَ مِيڧَ هَدَايُ نَڧُواْنَاوَا غَ يَهْوٜىٰهْ، سُكَ كُمَ مِيڧَ هَدَايُ نَڠَرَنْ زُمُنْثِ؞

³² أَوَنَّنْ وُرِے نٜىٰ أَعِدُوانْ إِسْرَٰٓءِيلَاوَا، يُواْشُوَ يَرُبُوتَ كُواْيَرْوَرْ مُوسَٰى عَكَنْ دُوَڟُو؞

³³ دُكَنْ إِسْرَٰٓءِيلَاوَا، بَاڧِ دَ یَنْ غِدَا، تَرٜىٰدَ دَتَّاوَنْسُ دَ شُوغَبَنِّنْسُ دَ كُمَ مَاسُ شَرِيعَ سُكَ ڟَيَ أَغٜىٰڢٜىٰ بِيُ نَأَݣُوتِنْ يَرْجٜىٰجٜىٰنِيَ نَ يَهْوٜىٰهْ، سُنَ ڢُسْكَنْتَرْ ڢِرِسْتُواْثِے، ذُرِيَرْ لَوِ، مَاسُ طَوْكٜىٰ دَ عَݣُوتِنْ يَرْجٜىٰجٜىٰنِيَ؞ رَبِنْ مُتَنٜىٰنْ سُكَ ڟَيَ أَغَبَنْ بَبَّنْ تُدُنْ غٜىٰرِظِمْ، رَبِنْسُ كُمَ سُكَ ڟَيَ أَغَبَنْ بَبَّنْ تُدُنْ عٜىٰبَلْ؞ حَكَ يَهْوٜىٰهْ يَعُمَرْثِ مُوسَٰى أَدَا، ثٜىٰوَ يَسَا مُتَنٜىٰ سُڟَيَ حَكَ أَ لُواْكَثِنْ دَ ذَاعَ سَا مُسُ أَلْبَرْكَ؞

³⁴ بَايَنْ حَكَ يُواْشُوَ يَكَرَنْتَ دُكَنْ كَلْمُواْمِنْ دَسُكٜىٰ ثِكِنْ لِتَّڢِنْ كُواْيَرْوَرْ مُوسَٰى، دَ أَلْبَرْكُ دَ لَعَنَ، كَمَرْ يَدَّ عَكَ رُبُوتَ ثِكِنْ نَطَطّٜىٰنْ لِتَّڢِنَّنْ؞

³⁵ بَابُوَتَ مَغَنَرْ دَ مُوسَٰى يَعُمَرْتَ وَدَّ يُواْشُوَ بَيْ كَرَنْتَ أَغَبَنْ دُكَنْ تَارُوانْ إِسْرَٰٓءِيلَاوَا بَ، تَرٜىٰدَ مَاتَنْسُ دَ یَیَنْسُ دَ كُمَ بَڧِنْ دَسُكٜىٰ ظَوْنٜىٰ تَرٜىٰدَسُو؞