يُواْشُوَ 20 - أَتَّوْرَتْ دَ أَنَّبَاوَا

غَرُضُوً مَڢَكَا

¹ سَيْ يَهْوٜىٰهْ يَڢَطَا وَ يُواْشُوَ،

² يَثٜىٰ وَمُتَنٜىٰنْ إِسْرَٰٓءِيلَ، ‏«‏كُذَاٻِ غَرُضُوً مَڢَكَا وَطَنْدَ نَعُمَرْثِ مُوسَٰى يَڢَطَا مُكُ؞

³ ذَاكُ كٜىٰٻٜىٰ غَرُرُوَنَّنْ دُواْمِنْ عِدَنْ وَنِ مُتُمْ يَكَشٜىٰ وَنِ بَ دَ نِيَّرْسَ يَيِ كِسَنْ كَيْبَ، كُمَ بَ دَ غَنْ‌غَنْبَ، سَيْ يَغُدُ ذُوَا ثَنْ؞ غَرُضُوً ذَاسُ ذَمَ مُكُ مَڢَكَا دَغَ حَنُّنْ مَيْبِنْ حَكِّنْ جِنِ؞

⁴ ‏«‏سَعَدَّ مَيْ كِسَنْ كَيْ طِنْ يَغُدُ ذُوَا طَيَ دَغَ ثِكِنْ غَرُرُوَنَّنْ، ذَيْ ڟَيَ عَبَاكِنْ ڧُواْڢَرْ غَرِنْ، يَبَيَّنَ وَدَتَّاوَنْ أَبِنْدَ يَڢَرُ؞ سُو كُوَ إِنْ سُنْجِ، سَيْ سُكَرْٻٜىٰشِ، سُبَرْشِ يَشِغَ ثِكِنْ غَرِنْ، عَكُمَ بَاشِ وُرِنْ ذَمَ يَذَوْنَ تَرٜىٰدَسُو؞

⁵ عِدَنْ مُتُمْ مَيْبِنْ حَكِّنْ جِنِ يَبِيشِ حَرْ ثَنْ، مُتَنٜىٰنْ غَرِنْ بَذَاسُ بَادَ مَيْ كِسَنْ كَنَّنْ أَ حَنُّنْ مُتُمْ مَيْبِنْ حَكِّنْ جِنِنْبَ؞ دُواْلٜىٰ سُكَارٜىٰشِ، غَمَا يَا كَشٜىٰ مُتُمِنْ بَ دَ غَنْ‌غَنْبَ، كُمَ بَوَيْ تُنْدَا يَنَ ڧِيَيَّرْسَ بَنٜىٰ؞

⁶ مُتَنٜىٰنْ غَرِنْ مَڢَكَرْ ذَاسُ تَارُ سُيِ مَسَ شَرِيعَ؞ عِدَنْ سُكَ يَنْكٜىٰ حُكُنْثِ ثٜىٰوَ بَ دَ غَنْ‌غَنْثِ يَكَشٜىٰ مُتُمِنْبَ، سَيْ يَذَوْنَ أَغَرِنْ حَرْ سَيْ لُواْكَثِنْ دَ بَبَّنْ ڢِرِسْتِ نَلُواْكَثِنْ يَمُتُ؞ سَعَنً مَيْ كِسَنْ كَيْ طِنْ ذَيْ عِيَ كُواْمَ وَغِدَنْسَ عَثِكِنْ غَرِنْسَ دَغَ عِنْدَ يَغُدُ؞»‏

⁷ سَبُواْدَ حَكَ، سُكَ كٜىٰٻٜىٰ كٜىٰدٜىٰشْ وَنْدَ يَكٜىٰ ثِكِنْ غَلِيلِ عَيَنْكِنْ تُدَّيْ نَظُرِيَرْ نَڢْتَلِ دَ شٜىٰكٜىٰمْ وَنْدَ يَكٜىٰ عَيَنْكِنْ تُدَّيْ نَظُرِيَرْ إِڢْرَيِمْ دَ كِرِيَتْ أَرْبَ، وَتُواْ هٜىٰبْرُوانْ، وَنْدَ يَكٜىٰ عَيَنْكِنْ تُدَّيْ نَظُرِيَرْ يَهُودَ؞

⁸ عَڧٜىٰتَرٜىٰنْ كُواْغِنْ يُواْدَنْ، غَبَسْ دَ يٜىٰرِكُواْ، سُكَ كٜىٰٻٜىٰ بٜىٰظٜىٰرْ وَنْدَ يَكٜىٰ ثِكِنْ دَاجِ عَيَنْكِنْ تُدَّيْ نَيَنْكِنْ ذُرِيَرْ رَعُبَيْنُ دَ رَمُواتْ وَنْدَ يَكٜىٰ أَ غِلٜىٰيَدْ نَيَنْكِنْ ذُرِيَرْ غَدْ دَ غُواْلَنْ وَنْدَ يَكٜىٰ ثِكِنْ بَشَنْ نَيَنْكِنْ ذُرِيَرْ مَنَسّٜىٰ؞

⁹ وَطَنَّنْ سُونٜىٰ غَرُضُوً مَڢَكَا وَطَنْدَ عَكَ كٜىٰٻٜىٰ دُواْمِنْ دُكَنْ مُتَنٜىٰنْ إِسْرَٰٓءِيلَ دَ كُمَ بَڧِنْ دَسُكٜىٰ ذَمَ أَڟَكَانِنْسُ؞ دُكْ وَنْدَ يَكَشٜىٰ مُتُمْ بَ دَ غَنْ‌غَنْبَ، يَ عِيَ غُدُ ذُوَا ثَنْ، دُواْمِنْ كَدَ مَيْبِنْ حَكِّنْ جِنِ يَكَشٜىٰشِ؞ ذَيْ ذَوْنَ عَثَنْ حَرْ سَيْ يَڟَيَ أَغَبَنْ تَارُوانْ جَمَعَ دُواْمِنْ شَرِيعَ؞