يُواْشُوَ 17 - أَتَّوْرَتْ دَ أَنَّبَاوَا

ذُرِيَرْ مَنَسّٜىٰ

¹ عَكَ بَا ذُرِيَرْ مَنَسّٜىٰ، طَنْ ڢَضٍ يُوسُڢَ، نَاتَ رَبُوانْ غَادُواْ؞ مَكِرْ بَابَنْ غِلٜىٰيَدْ كُوَ طَنْ ڢَضٍ مَنَسّٜىٰ نٜىٰ؞ تُنْدَيَكٜىٰ مَكِرْ جَرُمِ نٜىٰ، عَكَ بَاشِ غِلٜىٰيَدْ دَ بَشَنْ غَبَسْ دَ يُواْدَنْ؞

² عَكَ كُمَ رَبَ وَ سَوْرَنْ ذُرِيَرْ مَنَسّٜىٰ نَاسُ رَبُوانْ غَادُوانْ ڧَسَرْ عَيَمَّثِنْ يُواْدَنْ؞ عَكَ كُمَ رَرَّبَ يَنْكِنْ دَنْ‌غِ دَنْ‌غِ، وَتُواْ دَنْ‌غُواْغِنْ أَبِيٜىٰظٜىٰرْ دَ هٜىٰلٜىٰكْ دَ أَسْرِيٜىٰلْ دَ شٜىٰكٜىٰمْ دَ هٜىٰڢٜىٰرْ دَ كُمَ شٜىٰمِدَ؞ وَطَنَّنْ سُونٜىٰ سَوْرَنْ یَیَ مَظَا نَ مَنَسّٜىٰ طَنْ يُوسُڢَ دَنْ‌غِ دَنْ‌غِ؞

³ ظٜىٰلُواْڢٜىٰهَدْ طَنْ هٜىٰڢٜىٰرْ جِيكَنْ غِلٜىٰيَدْ طَنْ مَكِرْ نَظُرِيَرْ مَنَسّٜىٰ كُوَ بَ شِ دَ یَیَ مَظَا، عَمَّا یَیَ مَتَ كَطَيْ يَكٜىٰدَسُو؞ سُونَيٜىٰنْ یَیَنْسَ مَاتَا سُونٜىٰ مَلَ دَ نُواْوَ دَ هُواغْلَ دَ مِلْكَ دَ كُمَ تِرْظَ؞

⁴ سُكَ تَڢِے وُرِنْ عٜىٰلٜىٰيَظَرْ ڢِرِسْتِ دَ يُواْشُوَ طَنْ نُنْ دَ شُوغَبَنِّنْ سُكَثٜىٰ ‏«‏يَهْوٜىٰهْ يَا عُمَرْثِ مُوسَٰى يَبَامُ رَبُوانْ غَادُوانْمُ، كَمَرْ يَدَّ عَكَبَا یَنْعُوَنْمُ مَظَا؞»‏ يُواْشُوَ كُوَ يَيِ كَمَرْ يَدَّ يَهْوٜىٰهْ يَعُمَرْتَ، يَبَاسُ يَنْكِنْ ڧَسَرْ مَلَّكَرْسُ تَغَادُواْ، يَدَّ عَكَبَا یَنْعُوَنْ بَابَنْسُ؞

⁵ سَبُواْدَ حَكَ مَنَسّٜىٰ يَسَامِ كَشِ غُواْمَ بَنْدَ ڧَسَرْ غِلٜىٰيَدْ دَ بَشَنْ وَطَنْدَ سُكٜىٰ ڧٜىٰتَرٜىٰنْ غَبَشِنْ يُواْدَنْ؞

⁶ غَمَا یَیَ مَتَ نَظُرِيَرْ مَنَسّٜىٰ سُنْ سَامِ رَبُوانْ غَادُوانْسُ تَرٜىٰدَ یَیَ مَظَا؞ عَكَ بَا سَوْرَنْ ذُرِيَرْ مَنَسّٜىٰ ڧَسَرْ غِلٜىٰيَدْ؞

⁷ إِيَاكَرْ يَنْكِنْ مَنَسّٜىٰ كُوَ تَمِيڧٜىٰ دَغَ أَشٜىٰرْ ذُوَا مِكْمٜىٰتَتْ وَدَّ تَكٜىٰ غَبَسْ دَ شٜىٰكٜىٰمْ؞ دَغَ شٜىٰكٜىٰمْ تَمِيڧٜىٰ كُدُ تَكُمَ ڧُنْشِ مَذَوْنَنْ عٜىٰنْتَڢُّوَ؞

⁸ يَنْكِنْ تَڢُّوَ يَنَ أَ حَنُّنْ مُتَنٜىٰنْ مَنَسّٜىٰ، عَمَّا غَرِنْ تَڢُّوَ يَنَ أَ حَنُّنْ مُتَنٜىٰنْ إِڢْرَيِمْ نٜىٰ؞

⁹ سَيْ إِيَاكَرْ تَغَنْ‌غَرَ كُدُ ذُوَا رَاڢِنْ كَنَ؞ غَرُضُوً دَسُكٜىٰ عَكُدَنْثِنْ رَاڢِنْ نَ إِڢْرَيِمْ نٜىٰ، كُواْدَيَكٜىٰ سُنَ ثِكِنْ يَنْكِنْ مَنَسّٜىٰ؞ إِيَاكَرْ مَنَسّٜىٰ كُوَ تَبِے غٜىٰڢٜىٰنْ أَرٜىٰوَثِنْ رَاڢِنْ تَكُمَ ڧَارٜىٰ عَتٜىٰكُنْ مٜىٰدِتٜىٰرٜىٰنِيَ؞

¹⁰ يَنْكِنْ دَيَكٜىٰ وَجٜىٰنْ كُدُ نَ إِڢْرَيِمْ نٜىٰ، يَنْكِنْ دَيَكٜىٰ وَجٜىٰنْ أَرٜىٰوَ كُوَ نَ مَنَسّٜىٰ نٜىٰ؞ إِيَاكَرْ دُكَنْسُ تَيَمَّ عِتَثٜىٰ تٜىٰكُنْ؞ يَنْكِنْ ذُرِيَرْ أَشٜىٰرْ يَنَ عَ أَرٜىٰوَثِنْ مَنَسّٜىٰ، يَنْكِنْ ذُرِيَرْ إِسَّكَرْ كُمَ يَنَ وَجٜىٰنْ غَبَسْ؞

¹¹ عَثِكِنْ يَنْكُنَنْ ذُرِيَرْ إِسَّكَرْ دَ تَ أَشٜىٰرْ، ذُرِيَرْ مَنَسّٜىٰ كُمَ يَمَلَّكِ بٜىٰتْ شَنْ دَ إِبْلٜىٰيَمْ دَ ڧَوْيُكَنْ دَسُكٜىٰ كٜىٰوَيٜىٰ دَسُو؞ مَنَسّٜىٰ يَكُمَ مَلَّكِ مَذَوْنَنْ دُوارْ وَنْدَ يَكٜىٰ عَبَاكِنْ تٜىٰكُ دَ مَذَوْنَنْ عٜىٰنْدُوارْ دَ مَذَوْنَنْ تَعَنَكْ دَ مَذَوْنَنْ مٜىٰغِدُّواْ، تَرٜىٰدَ ڧَوْيُكَنْ دَسُكٜىٰ كٜىٰوَيٜىٰ دَسُو؞

¹² عَمَّا مُتَنٜىٰنْ مَنَسّٜىٰ بَسُ عِيَ كُواْرَرْ مُتَنٜىٰنْ دَسُكٜىٰ ظَوْنٜىٰ عَبِرَنٜىٰنَّنْبَ، دُواْمِنْ حَكَ كَنْعَنِيَاوَا سُكَ نَاثٜىٰ سُيِ ذَمَنْسُ عَثِكِنْ وَطَنَّنْ وُرَارٜىٰنْ؞

¹³ عَمَّا سَعَدَّ إِسْرَٰٓءِيلَاوَا سُكَيِ ڧَرْڢِے سُواْسَيْ، سَيْ سُكَسَا كَنْعَنِيَاوَا سُيِ عَيْكِنْ دُواْلٜىٰ، عَمَّا بَسُ عِيَ كُواْرَرْ كَنْعَنِيَاوَنْ دُكَبَ؞

ذُرِيَرْ إِڢْرَيِمْ دَ مَنَسّٜىٰ تَيَمَّ سُنْ ضُواْڧِ ڧَارِنْ ڧَسَا

¹⁴ ذُرِيَرْ يُوسُڢَ سُكَثٜىٰ وَ يُواْشُوَ ‏«‏دُوانْمٜىٰ كَبَامُ رَبُوانْ غَادُواْ كَشِ طَيَ دُواْمِنْ مَلَّكَرْمُ؟ غَاشِ كُوَ مُنَدَ مُتَنٜىٰ دَيَوَ غَمَا يَهْوٜىٰهْ يَا أَلْبَرْكَثٜىٰمُ؞»‏

¹⁵ يُواْشُوَ كُوَ يَأَمْسَ مُسُ يَثٜىٰ ‏«‏عِدَنْ كُو دَيَوَ نٜىٰ، إِنْكُمَ حَرْ يَنْكِنْ تُدَّيْ نَ إِڢْرَيِمْ يَكَاسَ مُكُ، سَيْ كُهَوْرَ كُشِغَ ثِكِنْ كُرْمِ كُسَارٜىٰ وَكَنْكُ وُرِے عَثِكِنْ ڧَسَرْ ڢٜىٰرِظِّيَاوَا دَ تَ رٜىٰڢَيَاوَا؞»‏

¹⁶ سَيْ مُتَنٜىٰنْ يُوسُڢَ سُكَثٜىٰ ‏«‏يَنْكِنْ تُدَّيْ نَ إِڢْرَيِمْ بَيْ إِشٜىٰمُبَ؞ غَاشِ كُمَ دُكَنْ كَنْعَنِيَاوَنْ دَسُكٜىٰ ظَوْنٜىٰ أَ ڢِيلَيٜىٰ سُنَدَ كٜىٰكُنَنْ دُواْكِ نَڧَرْڢٜىٰ، دُكْ دَ وَطَنْدَ سُكٜىٰ ظَوْنٜىٰ أَ بٜىٰتْ شَنْ دَ ڧَوْيُكَنْ دَسُكٜىٰ كٜىٰوَيٜىٰ دَ عِتَ دَ كُمَ وَطَنْدَ سُكٜىٰ ظَوْنٜىٰ عَثِكِنْ ݣُورِنْ يٜىٰظِرٜىٰيٜىٰلْ؞»‏

¹⁷ يُواْشُوَ كُوَ يَيِ مَغَنَ دَ غِدَنْ يُوسُڢَ، وَتُواْ ذُرِيَرْ إِڢْرَيِمْ دَ ذُرِيَرْ مَنَسّٜىٰ يَثٜىٰ ‏«‏حَڧِيڧَ، كُو مُتَنٜىٰ مَاسُيَوَنْ غَسْكٜىٰ نٜىٰ، غَاشِ كُمَ كُنَدَ ڧَرْڢِے ڨُورَيْ؞ بَذَاكُسَامِ رَبُوانْ غَادُواْ كَشِ طَيَ كَوَيْبَ؞

¹⁸ عَمَّا يَنْكِنْ تُدَّيْ مَيْ كُرْمِ ذَيْ كُمَ ذَمَ نَاكُ؞ سَيْ كُسَارٜىٰ كُشَرٜىٰ كُمَلَّكِ يَنْكِنْ دُكَ حَرْ إِيَاكَرْسَ؞ غَمٜىٰ دَ كَنْعَنِيَاوَا كُوَ، ذَاكُ كُواْرٜىٰسُ، كُواْدَيَكٜىٰ سُو مَاسُ ڧَرْڢِے نٜىٰ سُنَ كُمَ دَ كٜىٰكُنَنْ دُواْكِ نَڧَرْڢٜىٰ؞»‏