يُواْشُوَ 11 - أَتَّوْرَتْ دَ أَنَّبَاوَا

يُواْشُوَ يَثِ يَبِنْ دَ مَاسُ غُواْيُوانْ بَايَنْسَ دَ يَاڧِ

¹ سَعَدَّ سَرْكِے يَبِنْ نَ حَزُوارْ يَجِ لَابَرِنْ نَصَرُواْرِنْ دَ إِسْرَٰٓءِيلَاوَا سُكٜىٰ ثِ، سَيْ يَعَيْكَ دَ سَڧُواْ ذُوَا وُرِنْ سَرْكِے يُواْبَبْ نَ مَدُوانْ دَ سَرَاكُنَنْ شِمْرُوانْ دَ عَكْشَڢْ،

² دَ كُمَ سَرَاكُنَنْ دَسُكٜىٰ ثِكِنْ يَنْكِنْ مَنْيَنْ تُدَّيْ عَ أَرٜىٰوَ دَ نَيَنْكِنْ أَرَبَ أَ ݣُورِنْ يُواْدَنْ عَكُدَنْثِنْ كِنّٜىٰرٜىٰتْ دَ نَيَنْكِنْ ڧأَنَانً تُدَّيْ دَ كُمَ نَيَنْكِنْ دُوارْ عَيَمَّ عَبَاكِنْ تٜىٰكُ؞

³ يَكُمَ عَيْكَ دَ سَڧُوانْ ذُوَاغَ كَنْعَنِيَاوَا أَغَبَسْ دَ يَمَّ دَ كُواْغِنْ يُواْدَنْ، ذُوَاغَ أَمُواْرِيَاوَا دَ هِتِّيَاوَا دَ ڢٜىٰرِظِّيَاوَا دَ يٜىٰبُسِيَاوَا وَطَنْدَ سُكٜىٰ ظَوْنٜىٰ عَيَنْكِنْ تُدَّيْ، كُمَ ذُوَاغَ هِوِيَاوَا أَغِنْدِنْ بَبَّنْ تُدُنْ هَرْمُوانْ وَنْدَ يَكٜىٰ عَيَنْكِنْ مِظْڢَ؞

⁴ سُكَ ڢِتُواْ تَرٜىٰدَ دُكَنْ سُواْجُواْجِنْسُ وَطَنْدَ سُكٜىٰ مَاسُيَوَنْ غَسْكٜىٰ، حَرْ سُكَ ذَمَ كَمَرْ يَشِنْ بَاكِنْ تٜىٰكُ؞ سُكَ كُمَ ڢِتُواْ تَرٜىٰدَ دَوَكِ دَ كٜىٰكُنَنْ دُواْكِ مَاسُيَوَنْ غَسْكٜىٰ؞

⁵ دُكَنْ وَطَنَّنْ سَرَاكُنَ سُكَ حَطَ ڧَرْڢِنْسُ، سُكَ كَڢَ سَنْسَنِ عَبَاكِنْ رَاڢِنْ مٜىٰرُوامْ دُواْمِنْ سُيَاڧِ إِسْرَٰٓءِيلَاوَا؞

⁶ يَهْوٜىٰهْ يَثٜىٰ وَ يُواْشُوَ ‏«‏كَدَ كَجِڟُواْرُوانْسُ، غَمَا كَاڢِنْ غُواْبٜىٰ وَرْهَكَ نِے يَهْوٜىٰهْ ذَنْ كَكَّشٜىٰسُ، إِنْ بَادَسُو دُكَ غَ حَنُّنْ إِسْرَٰٓءِيلَاوَا؞ ذَاكُ غُرْغُنْتَ دَوَكِنْسُ كُكُمَ ڧُواْنٜىٰ كٜىٰكُنَنْ دُواْكِنْسُ؞»‏

⁷ سَيْ يُواْشُوَ تَرٜىٰدَ دُكَنْ سُواْجُواْجِنْسَ سُكَ ڢَاطَ مُسُ دَ يَاڧِ بَا لَابَرِ عَبَاكِنْ رَاڢِنْ مٜىٰرُوامْ؞

⁸ يَهْوٜىٰهْ كُوَ يَبَادَسُو غَ حَنُّنْ إِسْرَٰٓءِيلَاوَا؞ إِسْرَٰٓءِيلَاوَا سُكَ يَاڧٜىٰسُ، سُكَ كُمَ كُواْرٜىٰسُ حَرْ ذُوَا سِدُوانْ بَبَّ دَ مِسْرٜىٰڢُواتْ مَيِمْ عَ أَرٜىٰوَ، حَرْ ذُوَا ݣُورِنْ مِظْڢَ أَغَبَسْ؞ سُكَ ثِيغَبَدَ يَاڧٜىٰنْسُ، حَرْ سُكَ كَكَّشٜىٰسُ، بَسُ ضَغٜىٰ كُواْ طَيَبَ؞

⁹ يُواْشُوَ كُوَ يَيِ مُسُ كَمَرْ يَدَّ يَهْوٜىٰهْ يَعُمَرْثٜىٰشِ؞ يَغُرْغُنْتَ دَوَكِنْسُ يَكُمَ ڧُواْنٜىٰ كٜىٰكُنَنْ دُواْكِنْسُ؞

¹⁰ سَعَنً يُواْشُوَ يَجُويَ يَثِ نَصَرَا عَكَنْ بِرْنِنْ حَزُوارْ يَكُمَ كَشٜىٰ سَرْكِنْتَ دَ تَكُواْبِے؞ أَ لُواْكَثِنْ كُوَ سَرْكِنْ حَزُوارْ نٜىٰ يَكٜىٰ مُلْكِ عَكَنْ سَوْرَنْ مُلْكُواْكِنَّنْ؞

¹¹ يُواْشُوَ دَ سُواْجُواْجِنْسَ سُكَ هَلَّكَرْ دَسُو كَكَڢْ، سُكَ كَشٜىٰ كُواْوَنٜىٰ مُتُمِنْ دَيَكٜىٰ ثِكِنْتَ دَ تَكُواْبِے، بَسُ ضَغٜىٰ كُواْ طَيَبَ؞ يُواْشُوَ كُوَ يَڧُواْنٜىٰ بِرْنِنْ؞

¹² يُواْشُوَ كُوَ يَثِ دُكَنْ وَطَنَّنْ بِرَنٜىٰ دَ سَرَاكُنَنْسُ دَ يَاڧِ، يَكَشٜىٰ كُواْوَنّٜىٰنْسُ كَمَرْ يَدَّ مُوسَٰى بَاوَنْ يَهْوٜىٰهْ يَعُمَرْتَ؞

¹³ عَمَّا إِسْرَٰٓءِيلَاوَا بَسُ ڧُواْنٜىٰ بِرَنٜىٰنْ دَ عَكَ غِنَا عَكَنْ تُلِنْ كُڢَيْ نَبِرَنٜىٰنْ دَا بَ، سَيْدَيْ حَزُوارْ كَطَيْ وَدَّ يُواْشُوَ يَڧُواْنٜىٰتَ؞

¹⁴ إِسْرَٰٓءِيلَاوَا كُمَ سُكَ ݣُوشٜىٰ وَكَنْسُ دُكَنْ أَبُبُوَ مَاسُ ݣَوْ دَ دَبُّواْبِے دَغَ وَطَنَّنْ بِرَنٜىٰ؞ عَمَّا سُكَ كَشٜىٰ كُواْوَنٜىٰ مُتُمْ دَ تَكُواْبِے، حَرْ سُكَ هَلَّكَرْ دَسُو، بَسُ ضَغٜىٰ كُواْ طَيَبَ؞

¹⁵ سُكَيِ كَمَرْ يَدَّ يَهْوٜىٰهْ يَعُمَرْثِ بَاوَنْسَ مُوسَٰى، حَكَكُمَ مُوسَٰى يَعُمَرْثِ يُواْشُوَ، حَكَ كُوَ يُواْشُوَ يَيِ؞ بَا أَبِنْدَ بَيْ عَيْكَتَابَ ثِكِنْ دُكَنْ أَبِنْدَ يَهْوٜىٰهْ يَعُمَرْثِ مُوسَٰى؞

يَنْكُنَنْ دَ يُواْشُوَ يَا ثِ دَ يَاڧِ

¹⁶ تَهَكَ كُوَ يُواْشُوَ يَثِ نَصَرَا عَكَنْ ڧَسَرْ نَنْ دُكَ دَ يَنْكِنْ تُدَّيْ دَ دُكَنْ يَنْكِنْ نٜىٰغٜىٰبْ دَ دُكَنْ يَنْكِنْ غُواْشٜىٰنْ دَ يَنْكِنْ ڧأَنَانً تُدَّيْ عَيَمَّ دَ نَ أَرَبَ دَ كُمَ يَنْكِنْ مَنْيَنْ تُدَّيْ نَ إِسْرَٰٓءِيلَ تَرٜىٰدَ نَغِنْدِنْسُ،

¹⁷ تُنْدَغَ بَبَّنْ تُدُنْ هَلَكْ وَنْدَ يَتَاشِ ذُوَا وَجٜىٰنْ سٜىٰيِرْ، حَرْ ذُوَا بَعَلْغَدْ وَنْدَ يَكٜىٰ عَ أَرٜىٰوَ عَثِكِنْ ݣُورِنْ لٜىٰبَنُوانْ أَغِنْدِنْ بَبَّنْ تُدُنْ هَرْمُوانْ؞ يُواْشُوَ كُوَ يَكَامَ دُكَنْ سَرَاكُنَنْسُ يَكُمَ كَكَّشٜىٰسُ؞

¹⁸ يُواْشُوَ يَدَطٜىٰ يَنَ يَاڧِ دَ دُكَنْ وَطَنَّنْ سَرَاكُنَ؞

¹⁹ بَا وَنِ بِرْنِنْ دَ يَيِ يَرْجٜىٰجٜىٰنِيَرْ ذَمَنْ لَاڢِيَ تَرٜىٰدَ إِسْرَٰٓءِيلَاوَا، سَيْدَيْ نَ هِوِيَاوَا وَطَنْدَ سُكٜىٰ ظَوْنٜىٰ أَ غِبٜىٰيُوانْ؞ سَوْرَنْ بِرَنٜىٰنْ دُكَ كُوَ إِسْرَٰٓءِيلَاوَا سُكَثِسُ دَيَاڧِ؞

²⁰ غَمَا يَهْوٜىٰهْ نٜىٰ يَتَوْرَرَ ظُكَاتَنْسُ، دُواْمِنْ سُيَاڧِ إِسْرَٰٓءِيلَاوَا، دُواْمِنْ يَهَلَّكَرْ دَسُو غَبَاطَيَ، عَكُمَ كَوَرْ دَسُو بَابُ تَوْسَيِ، كَمَرْ يَدَّ يَهْوٜىٰهْ يَعُمَرْثِ مُوسَٰى؞

²¹ أَوَنَّنْ لُواْكَثِ يُواْشُوَ يَتَڢِے يَهَلَّكَ یَیَنْ أَنَكْ دَغَ يَنْكِنْ تُدَّيْ دَغَ هٜىٰبْرُوانْ دَ دٜىٰبِرْ دَ أَنَبْ دَ دُكَنْ يَنْكِنْ تُدَّيْ نَ يَهُودَ دَ كُمَ دَغَ دُكَنْ يَنْكِنْ تُدَّيْ نَ إِسْرَٰٓءِيلَ؞ يُواْشُوَ كُوَ يَهَلَّكَرْ دَسُو غَبَاطَيَ دُكْ دَ بِرَنٜىٰنْسُ؞

²² بَابُوَنِ كُواْ طَيَ دَغَ ثِكِنْ یَیَنْ أَنَكْ وَنْدَ يَرَغُ عَثِكِنْ يَنْكِنْ إِسْرَٰٓءِيلَاوَا، سَيْدَيْ عَثِكِنْ غَاظَ دَ غَتْ دَ كُمَ أَشْدُوادْ كَطَيْ نٜىٰ وَطَنْسُ سُكَ ضَغٜىٰ؞

²³ يُواْشُوَ كُوَ يَثِ دُكَنْ ڧَسَرْدَ يَاڧِ، كَمَرْ يَدَّ يَهْوٜىٰهْ يَعُمَرْثِ مُوسَٰى؞ يَبَادَ ڧَسَرْ غَادُواْ غَ إِسْرَٰٓءِيلَاوَا ذُرِيَ ذُرِيَ؞ ڧَسَرْ كُوَ تَسَامِ هُوتُ دَغَ يَاڧِ؞