يُواْشُوَ 1 - أَتَّوْرَتْ دَ أَنَّبَاوَا

اللَّهْ يَ عُمَرْثِ يُواْشُوَ يَثِ ڧَسَرْ كَنْعَنَ

¹ بَايَنْ مُتُوَرْ مُوسَٰى بَاوَنْ يَهْوٜىٰهْ، سَيْ يَهْوٜىٰهْ يَيِ مَغَنَ دَ يُواْشُوَ طَنْ نُنْ، مَتَيْمَكِنْ مُوسَٰى؞

² يَهْوٜىٰهْ يَثٜىٰ ‏«‏بَاوَنَ مُوسَٰى يَمُتُ؞ سَيْ كَشِرْيَ يَنْذُ، كَيْ دَ دُكَنْ جَمَعَرْ إِسْرَٰٓءِيلَ، كُڧٜىٰتَرٜىٰ كُواْغِنْ يُواْدَنْ ذُوَا ثِكِنْ ڧَسَرْدَ نَكٜىٰ بَاكُ؞

³ كَمَرْ يَدَّ نَيِ وَ مُوسَٰى أَلْڧَوَرِ، نَارِغَا نَا بَاكُ دُكْ عِنْدَ تَڢِنْ ڧَڢَرْكُ يَتَاكَ؞

⁴ إِيَاكَرْ يَنْكِنْكُ ذَاتَ مِيڧٜىٰ دَغَ دَاجِنْ دَيَكٜىٰ كُدُ حَرْ ذُوَا مَنْيَنْ تُدَّنْ لٜىٰبَنُوانْ دَسُكٜىٰ تَأَرٜىٰوَ دَغَ بَبَّنْ كُواْغِنْ يُڢِرٜىٰتِسْ أَغَبَسْ دَ دُكَنْ يَنْكِنْ هِتِّيَاوَا حَرْ ذُوَا تٜىٰكُنْ مٜىٰدِتٜىٰرٜىٰنِيَ وَجٜىٰنْ يَمَّ؞

⁵ بَابُ مُتُمِنْ دَ ذَيْ عِيَ ڟَيَاوَا أَغَبَنْكَ، يُواْشُوَ، ثِكِنْ دُكَنْ ݣُونَكِنْ رَنْكَ؞ كَمَرْ يَدَّ نَكَسَنْثٜىٰ تَرٜىٰدَ مُوسَٰى، حَكَ ذَنْ كَسَنْثٜىٰ تَرٜىٰدَكَيْ؞ بَذَنْ كُنْيَتَرْ دَكَيْ كُواْ كُوَ إِنْ يَاشٜىٰكَبَ؞

⁶ كَڧَرْڢَڢَ!‏ كَيِ ڧَرْڢِنْ حَلِ!‏ غَمَا كَيْنٜىٰ ذَاكَبِدَ جَمَعَرْ نَنْ سُمَلَّكِ وَنَّنْ ڧَسَرْدَ نَيِ أَلْڧَوَرِ ذَنْبَا كَاكَنِّنْسُ؞

⁷ كَڧَرْڢَڢَ!‏ كَيِ ڧَرْڢِنْ ذُوثِيَا ڨُورَيْ!‏ كَكُمَ تَبَّتَا كَكِيَايٜىٰ دُكَنْ كُواْيَرْوَرْ دَ بَاوَنَ مُوسَٰى يَبَاكَ؞ كَدَ كَكَوْثٜىٰ مَتَ دَامَ كُواْ هَغُ، دُواْمِنْ كَيِ نَصَرَا دُكْ عِنْدَ كَتَڢِے؞

⁸ كَتَبَّتَا مَغَنَرْ وَنَّنْ لِتَّڢِنْ كُواْيَرْوَا بَتَرَبُ دَ بَاكِنْكَبَ؞ عَمَّا ذَاكَيِ تُنَانِ عَكَنْسَ دَرٜىٰ دَ رَانَ دُواْمِنْ كَتَبَّتَا كَعَيْكَتَ دُكْ أَبِنْدَ عَكَ رُبُوتَ عَثِكِ؞ تَهَكَ ذَاكَ يَلْوَتَ أَ حَنْيَرْكَ، تَهَكَ كُمَ ذَاكَيِ نَصَرَا؞

⁹ كَتُنَ نَارِغَا نَا عُمَرْثٜىٰكَ كَڧَرْڢَڢَ، كَيِ ڧَرْڢِنْ حَلِ!‏ كَدَ كَڢِرْغِتَ كُواْ كَجِڟُواْرُواْ، غَمَا كَا سَنِ نِے يَهْوٜىٰهْ اللَّهْ نْكَ إِنَ تَرٜىٰ دَكَيْ دُكْ عِنْدَ ذَاكَتَڢِے؞»‏

يُواْشُوَ يَبَا مُتَنٜىٰ عُمَرْنِ

¹⁰ سَيْ يُواْشُوَ يَعُمَرْثِ شُوغَبَنِّنْ جَمَعَرْ ثٜىٰوَ

¹¹ سُشِغَ ثِكِنْ مُتَنٜىٰ سُبَاسُ وَطَنَّنْ عُمَرْنَيْ؞ سُثٜىٰ ‏«‏كُشِرْيَ وَكَنْكُ عَبِنْثِ دُواْمِنْ عَثِكِنْ ݣُونَ عُكُ ذَاكُ ڧٜىٰتَرٜىٰ كُواْغِنْ يُواْدَنْ دُواْمِنْ كُشِغَ ڧَسَرْدَ يَهْوٜىٰهْ اللَّهْ نْكُ يَكٜىٰ بَاكُ كُغَاجٜىٰتَ كُكُمَ مَلَّكٜىٰتَ؞»‏

¹² يُواْشُوَ كُوَ يَثٜىٰ وَظُرِيَرْ رَعُبَيْنُ دَ ذُرِيَرْ غَدْ دَ كُمَ رَبِنْ ذُرِيَرْ مَنَسّٜىٰ،

¹³ ‏«‏كُتُنَ دَ مَغَنَرْ دَ مُوسَٰى بَاوَنْ يَهْوٜىٰهْ يَڢَطَا مُكُ ثٜىٰوَ ‏‹‏يَهْوٜىٰهْ اللَّهْ نْكُ يَكٜىٰ بَاكُ وُرِنْ هُوتَوَا؞ يَرِغَا يَبَاكُ وَنَّنْ ڧَسَرْدَ تَكٜىٰ أَغَبَسْ دَ يُواْدَنْ تَذَمَ ڧَسَرْكُ؞›‏

¹⁴ دَ مَاتَنْكُ دَ یَیَنْكُ دَ كُمَ دَبُّواْبِنْكُ ذَاسُ ذَوْنَ أَنَنْ عَيَنْكِنْ غَبَسْ دَ كُواْغِنْ يُواْدَنْ؞ عَمَّا دُكَنْ سُواْجُواْجِنْكُ ذَاسُ ڧٜىٰتَرٜىٰ تَرٜىٰدَ یَنْعُوَنْكُ دُواْمِنْ سُتَيْمَكٜىٰسُ يَاڧِ؞

¹⁵ ذَاكُ تَيْمَكٜىٰسُ حَرْ سَيْ لُواْكَثِنْ دَ يَهْوٜىٰهْ يَبَا یَنْعُوَنْكُ هُوتُ كَمَرْ يَدَّ يَبَاكُ، سُكُمَ مَلَّكِ ڧَسَرْدَ تَكٜىٰ يَمَّ دَ يُواْدَنْ، وَدَّ يَهْوٜىٰهْ اللَّهْ نْكُ يَكٜىٰبَاسُ؞ بَايَنْ وَنَّنْ، ذَاكُ عِيَ كُواْمُواْوَ كُذَوْنَ عَثِكِنْ ڧَسَرْكُ دَتَكٜىٰ غَبَسْ دَ يُواْدَنْ، وَدَّ مُوسَٰى بَاوَنْ يَهْوٜىٰهْ يَبَاكُ؞»‏

¹⁶ سُو كُوَ سُكَ أَمْسَوَ يُواْشُوَ سُكَثٜىٰ ‏«‏ذَامُيِ دُكْ أَبِنْدَ كَاعُمَرْثٜىٰمُ، كُمَ ذَامُ تَڢِے دُكْ عِنْدَ كَاعَيْكٜىٰمُ؞

¹⁷ ذَامُيِ بِيَيَّ دَكَيْ، كَمَرْ يَدَّ كُلُّمْ مُكَيِ بِيَيَّ دَ مُوسَٰى ثِكِنْ دُكَنْ أَبُبُوَ؞ عَمَّا دَيْ بَرِ مُغَ ثٜىٰوَ يَهْوٜىٰهْ اللَّهْ نْكَ يَنَ تَرٜىٰدَكَيْ كَمَرْ يَدَّ يَكَسَنْثٜىٰ تَرٜىٰدَ مُوسَٰى؞

¹⁸ دُكْ وَنْدَ يَتَيَرْوَ عُمَرْنِنْكَ، بَيْ كُوَيِ بِيَيَّ دَ عُمَرْنِنْكَبَ، ذَاعَ كَشٜىٰشِ؞ كَيْ دَيْ كَڧَرْڢَڢَ!‏ كَيِ ڧَرْڢِنْ حَلِ!‏»‏