يُونُسَ 4 - أَتَّوْرَتْ دَ أَنَّبَاوَا

ڢُشِنْ يُونُسَ عَكَنْ جِنْڧَنْ اللَّهْ

¹ عَمَّا أَبِنْ يَٻَاتَوَ يُونُسَ رَيْ ڨُورَيْ حَرْ يَيِ ڢُشِے؞

² سَيْ يَيِ أَدُّعَ غَ يَهْوٜىٰهْ يَثٜىٰ ‏«‏يَا يَهْوٜىٰهْ، أَشٜىٰ، بَا أَبِنْدَ نَڢَطَا تُنْ إِنَ ڧَسَاتَبَ كٜىٰنَنْ؟ شِيَسَا نَغُدُ ذَنْ تَڢِے سِڢٜىٰنْ!‏ غَمَا نَا سَنِ كَيْ اللَّهْ مَيْ أَلْحٜىٰرِنٜىٰ مَيْ جِنْڧَيْ كُمَ، مَرَرْ سَوْرِنْ ڢُشِے، ثِكٜىٰ دَ يَوَنْ ڧَوْنَ مَرَرْ ثَنْجَاوَا، كُلُّمْ كَنَ أَشِرْيٜىٰ كَثَنْجَ نِيَّ كَكُمَ جَنْيٜىٰ حُكُنْثِنْكَ؞

³ دُواْمِنْ حَكَ ڢَا، يَا يَهْوٜىٰهْ، إِنَ ضُواْڧُوانْكَ كَطَوْكِ رَيْنَ؞ غَمَا ڠُومَّ إِنْ مُتُ دَ إِنْ رَايُ؞»‏

⁴ سَيْ يَهْوٜىٰهْ يَتَمْبَيِ يُونُسَ يَثٜىٰ ‏«‏كَيِ دَيْدَيْنٜىٰ دَ كَكٜىٰ ڢُشِے؟»‏

⁵ يُونُسَ كُوَ يَڢِتَ دَغَ بِرْنِنْ يَيِ وَجٜىٰنْ غَبَسْ، يَذَوْنَ؞ أَوُرِنْ يَغِنَ یَرْ رُمْڢَ دُواْمِنْ تَبَا شِ إِنُوَ، سَيْ يَذَوْنَ يَنَ جِرَا يَغَ أَبِنْدَ ذَيْ ڢَرُ دَ بِرْنِنْ؞

⁶ سَيْ يَهْوٜىٰهْ اللَّهْ يَسَا وَنِ طَنْ ڟِرُواْ يَڢِتُواْ يَيِ غِرْمَ يَبَا يُونُسَ إِنُوَ دُواْمِنْ يَكُٻُتَرْ دَشِ دَغَ ذَاڢِنْ رَانَ؞ يُونُسَ يَيِ مُرْنَ سُواْسَيْ سَبُواْدَ وَنَّنْ طَنْ ڟِرُواْ؞

⁷ عَمَّا وَشٜىٰغَرِ دَ سَسَّڢٜىٰ اللَّهْ يَسَا وَتَ ڟُڟَ تَثِنْيٜىٰ طَنْ ڟِرُوانْ حَرْ يَبُوشٜىٰ؞

⁸ أَنَانً دَ رَانَ تَهَوْ سُواْسَيْ، سَيْ اللَّهْ يَسَا إِسْكَ مَيْ ذَاڢِ تَهُورَ دَغَ غَبَسْ، رَانَرْ كُمَ تَبُغِ يُونُسَ عَكَيْ سُواْسَيْ حَرْ يَسُمٜىٰ؞ سَيْ يَضُواْڧَا دُواْمِنْ يَمُتُ، يَثٜىٰ أَ رَنْسَ ‏«‏ڠُومَّ إِنْ مُتُ دَ إِنْ رَايُ؞»‏

⁹ عَمَّا اللَّهْ يَثٜىٰ وَ يُونُسَ ‏«‏كَيِ دَيْدَيْنٜىٰ دَ كَكٜىٰ ڢُشِے عَكَنْ أَبِنْدَ يَڢَرُ دَ طَنْ ڟِرُواْنَّنْ؟»‏ يُونُسَ يَأَمْسَ ‏«‏عِ، حَڧِيڧَ دَيْدَيْنٜىٰ إِنْيِ ڢُشِے، حَرْ مَا إِنْيِ ڢُشِنْدَ يَ إِسَ إِنْ مُتُ؞»‏

¹⁰ سَعَنً يَهْوٜىٰهْ يَا ثٜىٰ مَسَ ‏«‏دَيْدَيْ نٜىٰ كَجِ تَوْسَيِنْ وَنَّنْ طَنْ ڟِرُواْ وَنْدَ بَكَيْ كَشُوكَبَ؟ وَنْدَ بَ كَيْ كُمَ كَسَا يَيِ غِرْمَبَ؟ طَنْ ڟِرُوانْدَ يَڟِيرَا أَدَرٜىٰ طَيَ يَكُمَ ٻَثٜىٰ كَاڢِنْ دَرٜىٰ نَبِيُنْ؟

¹¹ أَشٜىٰ، نِے كُوَ بَذَنْجِ تَوْسَيِنْ نِنٜىٰبَ بَبَّنْ بِرْنِنَّنْ بَ؟ بِرْنِنْ دَ يَكٜىٰدَ یَنْ يَارَا مَرَسَ أَلْحَكِ ڢِيٜىٰدَ دُبُو طَرِے دَ دُبُو عَشِرِنْ عَثِكِنْسَ؟ كَيْ!‏ بَنْدَ مَا دَبُّواْبِنْ دَسُكٜىٰ عَثِكِ؞»‏