يُونُسَ 3 - أَتَّوْرَتْ دَ أَنَّبَاوَا

يُونُسَ يَيِ بِيَيَّ دَ عُمَرْنِنْ يَهْوٜىٰهْ

¹ أَنَانً سَيْ يَهْوٜىٰهْ يَيِ مَغَنَ دَ يُونُسَ سَوْ نَبِيُ ثٜىٰوَ

² ‏«‏تَاشِ، كَتَڢِے بَبَّنْ بِرْنِنَّنْ نِنٜىٰبَ، كَڟَاوَتَا مَتَ كَمَرْ يَدَّ نَڢَطَا مَكَ؞»‏

³ سَيْ يُونُسَ يَتَاشِ يَتَڢِے بِرْنِنْ نِنٜىٰبَ؞ بِرْنِنْ كُوَ يَنَدَ غِرْمَ سُواْسَيْ يَدَّ سَيْ مُتُمْ يَطَوْكِ ݣُونَ عُكُ كَاڢِنْ يَڧٜىٰتَرٜىٰ شِ؞

⁴ دَ يُونُسَ يَشِغَ بِرْنِنْ، سَيْ يَيِ تَڢِيَ يِنِ طَيَ عَثِكِنْسَ؞ سَعَنً يَڢَارَيِ مُسُ شٜىٰلَ دَ بَبَّرْ مُرْيَ ثٜىٰوَ ‏«‏سَوْرَنْ ݣُونَ أَرْبَعِنْ ذَاعَ هَلَّكَ نِنٜىٰبَ!‏»‏

⁵ سَيْ مُتَنٜىٰنْ نِنٜىٰبَ سُكَ غَسْكَتَ سَڧُوانْ اللَّهْ؞ سُكَسَا كُواْوَ يَيِ أَظُمِ؞ سَيْ دُكَنْ مُتَنٜىٰ دَغَ بَبَّ حَرْ ذُوَا ڧَرَمِ سُكَسَا رِيغُنَنْ نُونَ بَڧِنْ ثِكِ دَ تُوبَ؞

⁶ دَ مَغَنَرْ تَكَيْ كُنّٜىٰنْ سَرْكِنْ نِنٜىٰبَ، سَيْ يَتَاشِ دَغَ كُجٜىٰرَرْ مُلْكِنْسَ، يَتُوٻٜىٰ رِغَرْ مُلْكِنْسَ يَ أَجِيٜىٰ، يَطَوْكِ رِغَا تَنُونَ بَڧِنْ ثِكِ دَ تُوبَ يَسَا، يَذَوْنَ عَتُواْكَ؞

⁷ سَرْكِے يَسَا عَكَيِ شٜىٰلَ أَ نِنٜىٰبَ ثٜىٰوَ ‏«‏عُمَرْنِ نٜىٰ دَغَ وُرِنْ سَرْكِے دَ مَنْيَنْ مُتَنٜىٰنْ بِرْنِ؞ كَدَ مُتُمْ، كُواْ دَبَّ، كُواْ غَرْكٜىٰنْ شَانُو، كُواْ نَتُمَكِ يَطَنْطَنَ وَنِ أَبُ؞ كَدَ مَا سُثِ كُواْ سُشَا ضُوَ؞

⁸ بَرِ أَسَا وَكُواْوَنٜىٰ مُتُمْ دَ دَبَّ رِغَا تَنُونَ بَڧِنْ ثِكِ دَ تُوبَ؞ بَرِ كُمَ سُيِكِرَا غَ اللَّهْ دَ دُكَنْ ڧَرْڢِنْسُ؞ سَعَنً كُواْوَ يَجُويَ دَغَ مُوغَيٜىٰنْ هَنْيُواْيِنْسَ دَ كُمَ حَلِنْسَ نَتَادَ حَنْكَلِ؞

⁹ وَ يَسَنِ؟ وَتَڧِيلَ اللَّهْ ذَيْ ثَنْجَ نِيَّرْسَ يَدَيْنَ ڢُشِنْسَ، دُواْمِنْ كَدَ مُهَلَّكَ؞»‏

¹⁰ دَ اللَّهْ يَغَ ثٜىٰوَ سُنْ تُوبَ دَغَ مُوغَيٜىٰنْ هَنْيُواْيِنْسُ، سَيْ يَثَنْجَ نِيَّرْسَ، بَيْ هَلَكَاسُ كَمَرْ يَدَّ يَشِرْيَ ذَيْ يِبَ؞