أَيُوبَ 4 - أَتَّوْرَتْ دَ أَنَّبَاوَا

ڢَرْكُوانْ أَمْسَرْ عٜىٰلِڢَظْ

¹ سَيْ عٜىٰلِڢَظْ مُتُمِنْ تٜىٰمَنْ يَأَمْسَ يَثٜىٰ،

² ‏«‏عِدَنْ مُتُمْ يَيِ ذُوثِيَا يَيِ مَكَ مَغَنَ، ذَاكَ عِيَيِنْ حَڧُرِ؟ عَمَّا دَيْ، وَنٜىٰنٜىٰ ذَيْ عِيَ كَمٜىٰ كَلْمُواْمِنْ بَاكِنْسَ؟

³ غَاشِ، دَا كَهُواْرَرْ دَ مُتَنٜىٰ دَيَوَ، كَكُمَ ڧَرْڢَڢَ حَنُّوَ مَرَسَ ڧَرْڢِے؞

⁴ كَلْمُواْمِنْكَ سُنْ ڧَرْڢَڢَ وَنْدَ يَيِ تُنْتُٻٜىٰ، كَا ڧَرْڢَڢَ وَطَنْدَ ڠُوِوُاْيِنْسُ سُكَ مُتُ؞

⁵ تُواْ، يَنْذُ نَاكَ لُواْكَثِنْ وَهَلَ يَذُواْ، بَكَ عِيَيِنْ حَڧُرِبَ، دَ وَهَلَ تَتَٻَكَ، سَيْ كَڢِرْغِتَ؞

⁶ بَڟُواْرُوانْ اللَّهْ وَنْدَ كَكٜىٰ دَشِ شِينٜىٰ أَبِنْ دُواْغَضَرْكَبَ؟ بَرَايُوَرْكَ تَمُتُنْثِ كُمَ عِتَثٜىٰ أَبِنْ سَا ذُوثِيَارْكَبَ؟

⁷ ‏«‏يَنْذُ ڢَا سَيْ كَيِ تُنَانِ؞ أَݣَويْ وَنِ مَرَرْ لَيْڢِنْدَ يَتَٻَ هَلَّكَ؟ كُواْ أَݣَويْ عِنْدَ أَنْتَٻَ كَوَرْدَ مَيْ غَسْكِيَ أَ ظُوثِ؟

⁸ أَغَنِينَ، وَطَنْدَ سُكٜىٰ نُواْمَنْ غُواْنَرْ مُغُنْتَا، سُكَ كُمَ شُوكَ مُغُنْتَا، أَيْ، سُكَنْ غِرْبِے مُغُنْتَا؞

⁹ دَ اللَّهْ يَهُورَ نُمْڢَشِ سُكَنْ هَلَّكَ، دَ ٻَرْكٜىٰوَرْ ڢُشِنْسَ كُمَ سُكَنْ ڧُواْنٜىٰ ڧُرْمُسْ؞

¹⁰ سُنَ عِيَيِنْ رُورِ كَمَرْ ذَاكِ، مُرْيَرْ كُوكَنْسُ يَيِ ذَاڢِ كَمَرْ نَبَبَّنْ ذَاكِ؞ عَمَّا دَ أَنْكَكَّرْيَ هَڧُواْرَنْسُ مَاسُ ڧَرْڢِے،

¹¹ مَيْ ڧَرْڢِے عَثِكِنْسُ مَا يَكَنْ مُتُ، سَبُواْدَ رَشِنْ أَبِنْدَ ذَيْثِ، یَیَنْسَ كُمَ سُكَنْ وَڟٜىٰ؞

¹² ‏«‏وَتَرَانَ سَڧُواْ يَذُواْ مِنِ عَٻُواْيٜىٰ، كُنّٜىٰنَ كُوَ دَݣَرْ يَجِ سَڧُوانْ؞

¹³ يَذُواْ مِنِ ثِكِنْ دَامُوَرْ مَڢَرْكِنْ دَرٜىٰ، سَعَدَّ بَرْثِ مَيْ نَوْيِ يَڢَاطُواْ وَ یَنْ أَدَمْ،

¹⁴ سَيْ رَظَنَ تَڢَاطُواْ مِنِ حَرْ دَ ضَوَرْ جِكِے، تَسَا دُكَنْ ڧَسُسُوَنَ سُنَ ضَوَ دُواْمِنْ ڟُواْرُواْ؞

¹⁵ سَيْ وَتَ إِسْكَ تَوُثٜىٰ ڢُسْكَتَ، غَاشِنْ كَيْنَ يَتَاشِ؞

¹⁶ أَبِنْ يَڟَيَ ثِكْ، عَمَّا بَنْ عِيَ غَانٜىٰ كُواْ وَنٜىٰ إِرِنْ أَبُبَ؞ أَبِنْدَ نَ عِيَ غَنِ، وَتَ صِڢَّ ثٜىٰ أَغَبَنَ؞ عَثِكِنْ يَنَيِنْ شِضُنَّنْ، نَجِ مُرْيَ تَثٜىٰ،

¹⁷ ‏‹‏مُتُمْ ذَيْ عِيَ كَسَنْثٜىٰوَ دَ أَدَلْثِے أَغَبَنْ اللَّهْ كُوَ؟ طَنْ ءَادَمُ ذَيْ عِيَ كَسَنْثٜىٰوَ مَيْ ڟَبْتَرْ ذُوثِيَا أَغَبَنْ مَحَلِثِّنْسَ؟›‏

¹⁸ غَاشِ، اللَّهْ بَيْ أَمِنْثٜىٰ دَ بَايِنْسَبَ، يَكُمَ سَامِ مَلاَىِٕكُنْسَ دَ لَيْڢِے،

¹⁹ تَيَيَا ذَيْ أَمِنْثٜىٰ دَ وَطَنْدَ عَكَ صِڢَّتَادَغَ لَاكَ، وَطَنْدَ تُوشٜىٰنْسُ دَغَ ڧُورَا نٜىٰ، وَطَنْدَ أَنَ عِيَ مُرْڧُشٜىٰسُ كَمَرْ غَضَ؟

²⁰ مَيْ يِوُوَ مُتُمْ يَنَ رَايٜىٰ دَ سَڢٜىٰ، عَمَّا يَمُتُ بَاڟَمَّنِ كَاڢِنْ يَمَّ يَيِ، يَٻَثٜىٰ حَرْ أَبَدَا دَغَ تُنَانِنْ مُتُمْ؞

²¹ طَنْ أَبُ نٜىٰ كَوَيْ يَكَنْ ڟِنْكٜىٰ ظَرٜىٰنْ رَنْسُ، سُمُتُ ثِكِنْ رَشِنْ حِكِمَ؞»‏