أَيُوبَ 26 - أَتَّوْرَتْ دَ أَنَّبَاوَا

مَغَنَرْ أَيُوبَ تَتَرَ

¹ سَيْ أَيُوبَ يَأَمْسَ يَثٜىٰ،

² ‏«‏دُوبَ دَيْ يَدَّ كَتَيْمَكِ مَرَرْ ڧَرْڢِے!‏ أَشٜىٰ، ثٜىٰتُوانْدَ كَيِ وَمَرَرْ ڧَرْڢِے كٜىٰنَنْ!‏

³ دُوبَ يَدَّ كَبَادَ شَوَرَا مَرَرْ حِكِمَ، عَيَلْوَثٜىٰ كَيِ شٜىٰلَرْ عَيْنِحِنْ حِكِمَرْكَ!‏

⁴ دَ تَيْمَكُوانْ وَنٜىٰنٜىٰ كَڢَطَا كَلْمُواْمِنَّنْ؟ دَ وَنٜىٰ رُوحُ نٜىٰ كَيِ إِرِنْ مَغَنَرْ نَنْ؟

⁵ عَثَنْ ڧَرْڧَشِ، مَتَتُّو سُنَ ضَوَرْ جِكِے، دُكْ دَ ضُوَيٜىٰنْ دَ مَذَوْنَنْسُ؞

⁶ وُرِنْ ذَمَنْ مَتَتُّو ڟِرَرَ يَكٜىٰ أَغَبَنْ اللَّهْ، حَكَمَا وُرِنْ هَلَّكَ يَكٜىٰ أَغَبَنْسَ؞

⁷ اللَّهْ يَشِمْڢِطَا سَرَرِنْ أَرٜىٰوَ بَابُ أَبِنْدَ يَرِڧٜىٰشِ، يَكُمَ رَاتَيَ دُونِيَا بَابُ كُواْمٜىٰ عَڧَرْڧَشِنْتَ؞

⁸ يَنَطٜىٰ ضُوَ عَثِكِنْ غِذَغِظَنْسَ مَاسُ دُهُ، نَوْيِنْ ضُوً بَيْ ڢَشٜىٰسُبَ؞

⁹ يَرُڢٜىٰ كُجٜىٰرَرْ مُلْكِنْسَ دَ غِرْغِجٜىٰ، يَشِمْڢِطَا غِرْغِجٜىٰنْسَ عَبِسَنْ وُرِنْ ذَمَنْسَ؞

¹⁰ يَظَانَ لَيِنْ إِيَاكَ عَكَنْ ڢُسْكَرْ ضُوَيٜىٰ، دَ كُمَ عَكَنْ إِيَاكَرْ حَصْكٜىٰ دَ دُهُ؞

¹¹ غِنْشِڧَنْ سَمَ سُنْ غِرْغِظَ، سُنْ ڢِرْغِتَ دَ جِنْ ڟَاوَتَرْوَرْسَ؞

¹² دَ إِيكُوانْسَ تٜىٰكُ تَݣُونْتَ ڟِتْ، دَ ڠُونِنْتَرْسَ يَبُغِ دُواْدُوانْ ضُوًنَنْ رَاهَڢْ؞

¹³ دَ نُمْڢَشِنْسَ يَحَصْكَكَا سَرَرِنْ سَمَ، دَ حَنُّنْسَ يَڢَسَ رَاهَڢْ، مَثِيجِنَّنْ مَيْ غُدُ؞

¹⁴ غَاشِ، وَطَنَّنْ كَطَنْ كٜىٰنَنْ كَوَيْ دَغَ أَيُّكَنْسَ، طَنْ ڧِسْ كٜىٰنَنْ مُكَجِ غَمٜىٰدَشِ!‏ عَمَّا عَيْنِحِنْ ڟَاوَرْ إِيكُوانْسَ، وَظَيْ عِيَ غَانٜىٰوَ؟»‏