أَيُوبَ 20 - أَتَّوْرَتْ دَ أَنَّبَاوَا

أَمْسَرْ ذُواْڢَرْ تَبِيُ

¹ ذُواْڢَرْ مُتُمِنْ نَعَمَ يَأَمْسَ يَثٜىٰ،

² ‏«‏غَسْكِيَ ڢَا، تُنَانِنَ يَظُغَنِ إِنْبَاكَ أَمْسَ، غَمَا حَنْكَلِنَ بَيْ ݣُونْتَبَ؞

³ نَجِ مَغَنْ‌غَنُنْكَ نَرٜىٰنِ، بِسَغَ غَانٜىٰوَتَا كُوَ ذَنْ أَمْسَ مَكَ؞

⁴ بَكَ سَنْ وَنَّنْ تُنْ دَابَ؟ أَيْ، تُنْدَ عَكَسَا یَنْ أَدَمْ عَدُونِيَا،

⁵ ڢَضٍ ثِكِنْ مُوغَيٜىٰ بَايَ دَطٜىٰوَ، مُرْنَرْ مَرَسَ ڟُواْرُوانْ اللَّهْ نَطَنْ لُواْكَثِ نٜىٰ؞

⁶ كُواْ دَ غِرْمَنْسَ يَكَيْ حَرْ سَمَ، كَنْسَ كُمَ يَتَٻَ غِذَغِظَيْ،

⁷ ذَيْ ٻَثٜىٰ حَرْ أَبَدَا كَمَرْ كَاشِنْسَ، وَطَنْدَ سُكَ غَنْ شِ أَدَا ذَاسُثٜىٰ، ‏‹‏إِنَا يَكٜىٰ؟›‏

⁸ ذَيْ ٻَثٜىٰ كَمَرْ مَڢَرْكِ، بَذَاعَ سَامٜىٰشِبَ؞ ذَيْ شُوطٜىٰ كَمَرْ رُعُيَرْ دَرٜىٰ؞

⁹ عِدُوانْ دَ دَا يَغَنْ شِ بَذَيْ ڧَارَ غَنِنْسَبَ، عِنْدَ يَيِ رَايُوَرْسَ مَا بَذَاعَ ڧَارَ غَنِنْسَبَ؞

¹⁰ دُواْلٜىٰ یَیَنْسَ سُنٜىٰمِ أَلْحٜىٰرِ دَغَ تَلَكَاوَا، حَنُّنْسَ كُمَ سُمَيَرْدَ أَرْزِڧِنْدَ يَڨُوثٜىٰ؞

¹¹ كُواْدَيَكٜىٰ ڧَسُسُوَنْسَ سُنَ ثِكٜىٰ دَ ڧَرْڢِے، دُكْدَهَكَ، شِے دَ ڧَرْڢِنْسَ ذَاسُ ݣُونْتَ عَثِكِنْ ڧُورَا؞

¹² ‏«‏مُغُنْتَا ڢَا دَ ذَاڧِ تَكٜىٰ عَبَاكِنْ مُوغُ، حَرْ يَكَنْ ٻُواْيٜىٰتَ عَڧَرْڧَشِنْ هَرْشٜىٰنْسَ؞

¹³ مُوغُ بَايَ بَرِنْ مُغُنْتَا تَرَبُ دَشِ، عَبْكِنْسَ يَكَنْ رِڧٜىٰتَ نَدُواْغُوانْ لُواْكَثِ؞

¹⁴ عَمَّا عَبِنْثِنَّنْ ذَيْ جُويَا عَثِكِنْسَ، يَذَمَ كَمَرْ دَڢِنْ مَثِيجِ؞

¹⁵ أَرْزِڧِنْ دَ مُوغُ يَهَطِيٜىٰ، يَكَنْيِ أَمَنْسَ، اللَّهْ نٜىٰ يَكَنْسَا يَيِ أَمَنْسَ دَغَ ثِكِنْسَ؞

¹⁶ مُوغُ ذَيْ لَشٜىٰ دَڢِنْ مَثِيجِ، سَارَنْ مَثِيجِ ذَيْ كَشٜىٰشِ؞

¹⁷ بَذَيْسَاكٜىٰ غَنِنْ مَنْ ظَيْتُنْ عَيَلْوَثٜىٰبَ، بَذَيْجِ دَاطِنْ مَدَرَ دَ ظُمَ عَيَلْوَثٜىٰبَ؞

¹⁸ ذَيْ مَيَرْدَ أَبِنْدَ يَشَا وَهَلَ عَكَيْ، بَذَيْ عِيَ حَطِيٜىٰ كُواْمٜىٰبَ، رِيبَرْ كَاسُوَنْثِنْسَ بَذَاتَ كَٰوُاْ مَسَ ڢَضٍ ثِكِيبَ؞

¹⁹ غَمَا يَيِ وَتَلَكَ دَنِّيَ يَيَاشٜىٰشِ، دَ ڧَرْڢِے دَ يَجِ يَڨُوثٜىٰ غِدَنْ دَ بَ شِ يَغِنَابَ؞

²⁰ ‏«‏حَڧِيڧَ، ثِكِنْسَ بَيْتَٻَ ڧُواْشِ بَ، ݣُوطَيِنْسَ بَيْ كَٰوُاْ مَسَ ݣُونْثِيَرْ رَيْبَ؞

²¹ بَابُ أَبِنْدَ يَڟِيرَا دَغَ ݣُوطَيِنْسَ، رَايُوَرْسَ تَذَمَنْ لَاڢِيَ بَذَاتَ دَطٜىٰبَ؞

²² عَڟَكِيَرْ رَايُوَرْسَ تَيَلْوَتَ، ذَيْ كَسَنْثٜىٰ دَ بَڧِنْ ثِكِ، مَسِيڢَ إِرِ إِرِ ذَاسُ ڢَاطُواْ مَسَ دَ ڧَرْڢِے؞

²³ بَرِ مَسِيڢَرْ نَنْ تَثِكَ ثِكِنْسَ، بَرِ اللَّهْ يَظُبَ ذَاڢِنْ ڢُشِے عَكَنْسَ، ڢُشِنْ اللَّهْ كُمَ يَذَمَ عَبِنْثِنْسَ؞

²⁴ دَيَكٜىٰ ڧُواْڧَرِنْ غُدُ وَتَكُواْبِنْ ڧَرْڢٜىٰ، كِبِيَرْ تَغُلَّرْ دَ عَكَ هَرْبَ ذَاتَ هُودَ ثِكِنْسَ؞

²⁵ دَ عَكَ ذَارٜىٰ كِبِيَرْ دَغَ جِكِنْسَ، بَاكِنْ كِبِيَرْ مَيْ وَلْڧِيَ كُمَ دَغَ هَنْتَ، ڟُواْرُوانْ مُتُوَ ذَيْ كَامَشِ؞

²⁶ بَڧِنْ دُهُ يَنَ جِرَا يَهَطِيٜىٰ أَجِيَرْ دُوكِيَرْسَ، وُتَرْ دَ مُتُمْ بَيْ كُنَّبَ ذَاتَ ثِنْيٜىٰشِ، تَثِنْيٜىٰ دُكَنْ أَبِنْدَ يَضَغٜىٰ عَتٜىٰنْتِنْسَ؞

²⁷ سَمَّيْ ذَاسُ تُواْنَ أَسِيرِنْ لَيْڢِنْسَ، ڧَسَا كُمَ ذَاتَ تَاشِ غَابَادَشِ؞

²⁸ غِدَنْسَ أَمْبَلِيَرْ ضُوَ ذَاتَ ݣُوشٜىٰ كَكَڢْ، ذَيْ ٻَثٜىٰ أَ رَانَرْ ڢُشِنْ اللَّهْ؞

²⁹ ‏«‏وَنَّنْ شِينٜىٰ رَبُوانْ مُوغُ دَغَ وُرِنْ اللَّهْ، غَادُوانْسَ كٜىٰنَنْ وَنْدَ اللَّهْ يَڧَدَّرَ مَسَ؞»‏