أَيُوبَ 15 - أَتَّوْرَتْ دَ أَنَّبَاوَا

أَمْسَرْ عٜىٰلِڢَظْ تَبِيُ

¹ سَيْ عٜىٰلِڢَظْ مُتُمِنْ تٜىٰمَنْ يَأَمْسَ يَثٜىٰ،

² ‏«‏أَيُوبَ، بَيْ كَمَاتَ مَيْ حِكِمَ يَأَمْسَ دَ مَغَنْ‌غَنُنْ بَنْظَبَ، كُواْ يَثِكَ بَاكِنْسَ دَ إِسْكَ كَوَيْ؞

³ بَيْ كَمَاتَ مَيْ حِكِمَ يَيِ مَغَنَرْ وُاْڢِ بَ، كُواْ يَيِ كَلْمُواْمِ مَرَسَ أَمْڢَانِبَ؞

⁴ غَاشِ، كَيْ كَنَ كَوَرْدَ ڟُواْرُوانْ اللَّهْ، كَنَ كُمَ حَنَ تُنَانِ عَكَنْ اللَّهْ؞

⁵ غَمَا لَيْڢِنْكَ نٜىٰ يَكٜىٰ كُواْيَوَ بَاكِنْكَ مَغَنَ، غَاشِ كَذَاٻِ مَغَنْ‌غَنُنْ وَيُواْ؞

⁶ بَاكِنْكَ نٜىٰ يَنُونَ لَيْڢِنْكَ، بَنِيبَ، هَرْشٜىٰنْكَ نٜىٰ يَنَ بَادَ شَيْدَ غَابَادَكَيْ؞

⁷ ‏«‏كَيْ مُتُمِنْ ڢَرْكُواْ عَثِكِنْ یَنْ أَدَمْ نٜىٰ؟ كُواْ أَنْحَيْڢٜىٰكَ كَاڢِنْ عَيِ تُدَّيْ نٜىٰ؟

⁸ كَتَٻَ جِنْ شَوَرَرْ تَارُوانْ حَلِتُّنْ اللَّهْ أَ سَمَ؟ كُواْ كَنَجِ كَيْ كَطَيْ نٜىٰ مَيْ حِكِمَ؟

⁹ مٜىٰ كَيْ كَا سَنِ وَنْدَ مُو بَمُسَنِبَ؟ مٜىٰ كَيْ كَا غَانٜىٰ وَنْدَ مُو بَمُغَانٜىٰبَ؟

¹⁰ مُنَدَ مَاسُ ڢُرْڢُرَ دَ ڟُواْڢَڢِّ تَرٜىٰدَمُو، ڟُواْڢَڢِّنْ دَ سُكَڢِے بَابَنْكَ مَا؞

¹¹ تَعَظِيَّرْ اللَّهْ يَيِ مَكَ كَطَنْ كُواْ؟ كُواْ كَلْمَرْسَ دَ عَكَڢَطَا أَ حَنْكَلِ تَكَاسَ مَكَ؟

¹² مٜىٰيَسَا كَبَرْ ذُوثِيَارْكَ تَشَا كَنْ تُنَانِنْكَ؟ مٜىٰيَسَا كَطَوْرَ ڢُسْكَرْكَ حَكَ؟

¹³ دَلِيلِنْ دَ رُوحُنْكَ يَيِ وَ اللَّهْ تَاوَيٜىٰ كٜىٰنَنْ، حَرْ كَكُمَ بَرْ إِرِنْ كَلْمُواْمِنَّنْ سُڢِتَ دَغَ بَاكِنْكَ!‏

¹⁴ وَنٜىٰ طَنْ أَدَمْ نٜىٰ ذَيْ عِيَ كَسَنْثٜىٰ مَرَرْ لَيْڢِے؟ كُواْ وَنْدَ مَثٜىٰ تَحَيْڢَ يَذَمَ مَيْ أَدَلْثِے؟

¹⁵ اللَّهْ بَيْ مَا أَمِنْثٜىٰ دَ حَلِتُّنْسَ مَاسُ ڟَرْكِے بَ، كُواْ سَمَّيْ مَا بَسُ كَسَنْثٜىٰ مَرَسَ لَيْڢِے أَغَبَنْسَبَ،

¹⁶ بَلّٜىٰ ڢَا مُتُمْ وَنْدَ يَكٜىٰ أَبِنْ ڨَمَ دَ ڧَظَنْتَا، وَنْدَ يَكٜىٰ حَطِيٜىٰ مُغُنْتَا كَمَرْ شَنْ ضُوَ!‏

¹⁷ ‏«‏كَسَوْرَرَتَ، ذَنْ ڢَطَا مَكَ، أَبِنْدَ نَغَنِ، شِ ذَنْ نُونَ مَكَ،

¹⁸ أَبِنْدَ مَاسُ حِكِمَ سُكَ ڢَطَا، أَبِنْدَ سُكَ كُواْيَ دَغَ وُرِنْ كَاكَنِّنْسُ، بَسُ كُوَ ٻُواْيٜىٰ أَسِيرِنْبَ؞

¹⁹ سُو كَطَيْ نٜىٰ عَكَبَاسُ ڧَسَرْ، بَابُوَنِ بَڧُوانْدَ يَشِغَ ثِكِنْسُ؞

²⁰ ‏«‏مُوغُنْ مُتُمْ يَكَنْ شَا عَذَابَ دُكَنْ ݣُونَكِنْ رَنْسَ، دُكَنْ شٜىٰكَرُنْ دَ عَكَ لِسَّڢْتَا وَ مَرَرْ تَوْسَيِ، عَذَابَنٜىٰ؞

²¹ ڧَارَرْ مُرْيُواْيِنْ بَنْ ڟُواْرُواْ تَثِكَ كُنّٜىٰنْسَ، عَݣُونَكِنْ ذَمَنْ لَاڢِيَرْسَ، ڟُواْرُوانْ مَيْ هَلَّكَرْوَ ذَيْ ڢَاطَ مَسَ؞

²² يَڢِدَّ ذُوثِيَا ثٜىٰوَ بَذَيْ كُٻُتَ دَغَ دُهُبَ، تَكُواْبِے كُمَ يَنَ جِضَانْسَ؞

²³ يَكَنْيِ يَٰوُاْ، يَذَمَ كَمَرْ عَبِنْثِنْ عُنْ‌غُلَيٜىٰ، يَسَنِ رَانَرْ بَڧِنْ ثِكِ تَنَ كُسَدَشِ؞

²⁴ دَامُوَ تَڟُواْرَتَرْ دَشِ، ڟَنَنِنْ عَذَابَ يَشَا كَنْسَ، سُنْيِ نَصَرَا عَكَنْسَ، كَمَرْ سَرْكِنْ دَيَكٜىٰ جِضَانْ مَاسُ كَٰوُاْ مَسَ هَرِ؞

²⁵ غَمَا يَمِيڧَ حَنُّنْسَ يَنَ غَابَادَ اللَّهْ، يَنَ تَاڧَمَ يَيِ وَ مَيْ إِيكُواْ دُكَ دَارِيَارْ رٜىٰنِ؞

²⁶ يَنَ طَوْكٜىٰ دَ غَرْكُوَرْ يَاڧِ، يَنَ طَغَ كَيْ حَرْ دَ تَاوَيٜىٰ غَابَادَشِ؞

²⁷ كُواْدَيَكٜىٰ يَكِڟٜىٰ يَرُڢٜىٰ ڢُسْكَرْسَ، يَكُمَيِ ڧِبَ سُواْسَيْ سَبُواْدَ أَرْزِڧِنْسَ،

²⁸ ذَيْ ذَوْنَ عَبِرَنٜىٰنْ دَ سُكَ ذَمَ كُڢَيْ، ثِكِنْ غِدَاجٜىٰنْ دَ بَا مَيْ ذَمَ عَثِكِ، غِدَاجٜىٰنْ دَسُكٜىٰ غَبْ دَ رُشٜىٰوَ؞

²⁹ بَذَيْ رِڧٜىٰ دُوكِيَرْسَبَ، أَرْزِڧِنْسَ بَذَيْ دَطٜىٰبَ، أَبِنْدَ يَمَلَّكَ بَذَيْ كَڢُ عَڧَسَرْبَ؞

³⁰ بَذَيْ ڟِيرَا دَغَ دُهُبَ، ذَيْ ذَمَ كَمَرْ إِتَاثٜىٰنْ دَ وُتَا تَڧُواْنٜىٰ رَسَّنْسَ، نُمْڢَشِنْ اللَّهْ كُمَ ذَيْ كَوَرْ دَشِ؞

³¹ كَدَ ڢَا يَرُوطِ كَنْسَ، يَدُواْغَرَ غَ أَبِنْ بَنْظَ، أَبِنْ بَنْظَ كُوَ ذَيْ ذَمَ سَكَمَكُوانْسَ؞

³² كَاڢِنْ ݣُونَكِنْسَ سُثِكَ ذَيْ بُوشٜىٰ، كَمَرْ رٜىٰشٜىٰ وَنْدَ بَيْتَٻَيِنْ غَنْيٜىٰبَ؞

³³ ذَيْ ذَمَ كَمَرْ إِتَاثٜىٰنْ إِنَبِنْدَ يَكَكَّٻٜىٰ یَیَنْسَ تُنْ بَسُ نُونَبَ، كَمَرْ ڢُلَوَرْ إِتَاثٜىٰنْ ظَيْتُنْ وَدَّ تَظُبٜىٰ؞

³⁴ ڧُنْ‌غِيَرْ مَرَسَ ڟُواْرُوانْ اللَّهْ بَذَاسُ سَامِ ذُرِيَبَ؞ وُتَا ذَاتَ ثِنْيٜىٰ وُرِنْ ذَمَنْ مَاسُثِنْ حَنْثِ؞

³⁵ سُنَ طَوْكٜىٰ دَ وَهَلَ، سُنَ حَيْڢَرْ دَ مُغُنْتَا كُلُّمْ ثِكِنْسُ يَنَ حَيْڢَرْ دَ رُوطُ؞»‏