أَيُوبَ 12 - أَتَّوْرَتْ دَ أَنَّبَاوَا

مَغَنَرْ أَيُوبَ تَهُطُ

¹ سَيْ أَيُوبَ يَأَمْسَ يَثٜىٰ،

² ‏«‏بَابُ شَكَّ، كُونٜىٰ كُواْمٜىٰ دَكُواْمٜىٰ!‏ عِدَنْ كُكَ مُتُ، حِكِمَ تَمُتُ تَرٜىٰدَكُو!‏

³ عَمَّا، نِے مَا إِنَدَ سَنِ، بَكُو كَطَيْبَ، بَنْ‌غَا يَدَّ كُنْڢِينِبَ؞ وَنٜىٰنٜىٰ بَيْ سَنْ إِرِنْ أَبِنْدَ كُكَ ڢَطَابَ؟

⁴ نَ ذَمَ أَبِنْ دَارِيَا غَ أَبُواْكَيْنَ؞ نِے وَنْدَ نَكَنْيِ أَدُّعَ غَ اللَّهْ يَكُمَ أَمْسَ مِنِ، نِے وَنْدَ نَكٜىٰ مَيْ أَدَلْثِے، مَرَرْ لَيْڢِے، نِنٜىٰ نَا ذَمَ أَبِنْ دَارِيَا؞

⁵ مَاسُ جِنْ دَاطِے سُكَنْيِ دَارِيَارْ رٜىٰنِ غَ وَطَنْدَ سُكٜىٰ ثِكِنْ مَسِيڢَ، غَ وَطَنْدَ سُكٜىٰ غَبْ دَ ڢَاطُوَ؞

⁶ یَنْ ڢَشِ سُنَ ذَمَنْ سَلَمَ أَوُرَارٜىٰنْ ٻُيَنْسُ، مَاسُ ڟُواْكَنَرْ اللَّهْ سُنَ ذَمَنْ لَاڢِيَ، اللَّهْ وَنْدَ سُكٜىٰ رِڧٜىٰوَ أَ حَنُّ شِينٜىٰ ڧَرْڢِنْسُ؞

⁷ ‏«‏عَمَّا دَيْ تَمْبَيِ دَبُّواْبِنْ دَاجِ، ذَاسُ كُواْيَرْ دَكَيْ، ڟُنْڟَيٜىٰنْ سَرَرِنْ سَمَ ذَاسُ كُواْيَ مَكَ؞

⁸ يِمَغَنَ دَ ڧَسَا، ذَاتَ كُواْيَرْ دَكَيْ، كِيڢَيٜىٰ نَثِكِنْ تٜىٰكُ مَا ذَاسُ سَنَرْ دَكَيْ؞

⁹ عَثِكِنْ دُكَنْ وَطَنَّنْ، وَنٜىٰنٜىٰ عَثِكِنْسُ بَيْ سَنِ ثٜىٰوَ حَنُّنْ يَهْوٜىٰهْ نٜىٰ يَيِسُبَ؟

¹⁰ عَثِكِنْ حَنُّنْسَ، كُواْوَنٜىٰ أَبُ مَيْ رَيْ يَكٜىٰ، أَ حَنُّنْسَ نٜىٰ نُمْڢَشِنْ دُكَنْ یَنْ أَدَمْ يَكٜىٰ؞

¹¹ يَدَّ هَرْشٜىٰ يَكَنْ طَنْطَنَ دَاطِنْ عَبِنْثِ، حَكَنَنْ كُنّٜىٰ يَكَنْ عَوْنَ كَلْمُواْمِنْ دَيَكٜىٰ جِ؞

¹² بَ أَوُرِنْ ڟُواْڢَڢِّ عَكٜىٰ سَامُنْ حِكِمَ بَ؟ بَعَثِكِنْ ڟَوُانْ ݣُونَكِے نٜىٰ عَكٜىٰ سَامُنْ ڢَهِمْتَ بَ؟

¹³ ‏«‏أَوُرِنْ اللَّهْ حِكِمَ دَ إِيكُواْ سُكٜىٰ، أَوُرِنْسَ نٜىٰ شَوَرَا دَ ڢَهِمْتَ سُكٜىٰ؞

¹⁴ غَاشِ، عِدَنْ يَا رُشٜىٰ، بَعَسَاكٜىٰ غِنَاوَا، عِدَنْ يَا كُلّٜىٰ مُتُمْ، بَا مَيْ بُوطٜىٰشِ؞

¹⁵ غَاشِ، عِدَنْ يَا حَنَ ضُوً سَمَ، وُرِنْ يَكَنْ بُوشٜىٰ، عِدَنْ يَا سَكٜىٰ ضُوً، سَيْ ضُوً يَهَلَّكَرْ دَ ڧَسَا؞

¹⁶ أَوُرِنْسَ عَيْنِحِنْ حِكِمَ دَ ڧَرْڢِے سُكٜىٰ، عَڧَرْڧَشِنْسَ مَيْ رُوطُ دَ وَنْدَ عَكَ رُوطٜىٰشِ سُكٜىٰ؞

¹⁷ يَكَنْ لَلَتَرْدَ تُنَانِنْ مَاسُ بَادَ شَوَرَا، يَكَنْ مَيْدَ أَلْڧَلَيْ وَوَيٜىٰ؞

¹⁸ يَكَنْ تُوٻٜىٰ رِغَرْ مُلْكِ دَغَ سَرَاكُنَ، يَطَوْرَا مُسُ ڟُمُّواْكِ؞

¹⁹ يَكَنْ تُوٻٜىٰ رِغَرْ حِدِمَ دَغَ ڢِرِسْتُواْثِے، يَكُمَ تُمْٻُكٜىٰ وَطَنْدَ سُكَ كَڢُ أَمَڟَيِنْسُ؞

²⁰ يَكَنْ رُڢٜىٰ بَاكِنْ وَطَنْدَ عَكَ دُواْغَضَ عَكَنْسُ، يَكَنْ كُمَ كَوَرْدَ ڢَهِمِنْ دَتَّاوَا؞

²¹ يَكَنْ كُنْيَتَرْدَ مَنْيَنْ مُتَنٜىٰ، يَتُوٻٜىٰ رِغَرْ دَرَجَ نَمَاسُ ڧَرْڢِے؞

²² يَكَنْ تُواْنَ أَسِيرِنْ دَ دُهُ يَٻُواْيٜىٰ، يَكَٰوُاْ ظُرْڢِنْ دُهُ غَ حَصْكٜىٰ؞

²³ يَكَنْ تَادَ أَلْعُمَّ تَيِ ڧَرْڢِے، يَكُمَ هَلَكَاتَ، يَكَنْ غِنَا أَلْعُمَّ تَيِ غِرْمَ، يَكُمَ كَوَرْدَ عِتَ؞

²⁴ يَكَنْ لَلَتَرْدَ تُنَانِنْ شُوغَبَنِّنْ ڧَسَا، يَسَا سُيِ يَٰوُاْ بَرْكَتَيْ أَدَاجِ عِنْدَ بَابُ حَنْيَ،

²⁵ سُيِ تَلَلُبَوَ ثِكِنْ دُهُ عِنْدَ بَابُ حَصْكٜىٰ، يَسَا سُيِ تَنْ‌غَطِ كَمَرْ وَطَنْدَ سُكَ بُغُ؞»‏