أَيُوبَ 1 - أَتَّوْرَتْ دَ أَنَّبَاوَا

شَيْطَنْ يَجَرَّبْثِ أَيُوبَ

¹ أَݣَويْ وَنِ مُتُمْ عَثِكِنْ ڧَسَرْ عُظْ، مَيْ سُونَ أَيُوبَ؞ مُتُمِنَّنْ كُوَ مَرَرْ لَيْڢِے نٜىٰ كُمَ مَيْ غَسْكِيَ أَ ظُوثِ؞ يَنَ ڟُواْرُوانْ اللَّهْ، يَنَ كُمَ جُويَا وَمُغُنْتَا بَايَ؞

² يَنَ دَ یَیَ مَظَا غُدَا بَݣَويْ دَ یَیَ مَتَ غُدَا عُكُ؞

³ يَنَ دَ مَلَّكَ دَيَوَ، تُمَكِ دُبُو بَݣَويْ دَ رَاڧُمَ دُبُو عُكُ دَ شَانُنْ نُواْمَ دُبُو طَيَ دَ جَاكُنَ مَتَ طَرِے بِيَرْ، يَنَ كُمَ دَ مَاسُ يِمَسَ حِدِمَ مَاسُيَوَ ڨُورَيْ؞ سَبُواْدَ حَكَ، مُتُمِنَّنْ يَڢِ كُواْوَ غِرْمَ عَڧَسَرْ غَبَسْ؞

⁴ یَیَنْسَ مَظَا سُكَنْيِ بِكِ بِيدَبِے عَثِكِنْ غِدَاجٜىٰنْ جُونَنْسُ، سُكَنْ كُمَ غَيَّثِ یَنْعُوَنْسُ مَتَ غُدَا عُكُنَّنْ سُثِ سُشَا تَرٜىٰدَسُو؞

⁵ سَعَدَّ ݣُونَكِنْ بِكٍ سُنْ ڧَارٜىٰ، أَيُوبَ يَكَنْ كِرَا يَسَا أَڟَرْكَكٜىٰسُ؞ وَشٜىٰغَرِ دَ سَسَّڢٜىٰ شِے ذَيْ مِيڧَ هَدَايُ نَڧُواْنَاوَا دُواْمِنْ كُواْوَنٜىٰ طَيَنْسُ؞ غَمَا أَيُوبَ يَكَنْيِ ظَتُواْ ثٜىٰوَ ‏«‏وَتَڧِيلَ یَیَنَ سُنْيِ ذُنُوبِ، كُواْ سُنْيِ صَاٻُواْ غَ اللَّهْ عَثِكِنْ ذُوثِيَارْسُ؞»‏ حَكَ أَيُوبَ يَكَنْيِ كُلُّمْ؞

⁶ أَنَانً وَتَرَانَ حَلِتُّو أَ سَمَ سُكَ كَٰوُاْ كَنْسُ أَغَبَنْ يَهْوٜىٰهْ، شَيْطَنْ مَا يَذُواْ تَرٜىٰدَسُو؞

⁷ سَيْ يَهْوٜىٰهْ يَثٜىٰ وَ شَيْطَنْ ‏«‏كَيْ كُمَ دَغَ إِنَا نٜىٰ كَڢِتُواْ؟»‏ سَيْ شَيْطَنْ يَأَمْسَ وَ يَهْوٜىٰهْ يَثٜىٰ ‏«‏دَغَ ذَاغَاوَ عَثِكِنْ دُونِيَا دَغَ كُمَ كَيْوَ دَ كَٰوُاْوَ عَثِكِنْتَ؞»‏

⁸ يَهْوٜىٰهْ يَثٜىٰ وَ شَيْطَنْ ‏«‏كُواْ كَا لُورَ دَ بَاوَنَ أَيُوبَ؟ بَابُوَنِ مَيْ كَمَ دَشِ عَدُونِيَا، شِے مَرَرْ لَيْڢِے نٜىٰ كُمَ مَيْ غَسْكِيَ أَ ظُوثِ؞ يَنَ جِنْ ڟُواْرُواْنَ، يَنَ كُمَ جُويَا بَايَ غَ مُغُنْتَا؞»‏

⁹ سَيْ شَيْطَنْ يَأَمْسَا وَ يَهْوٜىٰهْ يَثٜىٰ ‏«‏أَيْ، بَعَبَنْظَ نٜىٰ أَيُوبَ يَكٜىٰ جِنْ ڟُواْرُوانْ اللَّهْ بَ!‏

¹⁰ أَيْ، يَنَ جِنْ ڟُواْرُوانْكَ غَمَا كَيْ كَكٜىٰوَيٜىٰشِ دَ كَتَنْ‌غَ دَ شِے دَ غِدَنْسَ دَ دُكَنْ أَبِنْدَ يَكٜىٰدَشِ عَكُواْوَنٜىٰ غٜىٰڢٜىٰ؞ كَا كُمَ أَلْبَرْكَثِ أَيُّكَنْ حَنُّوَنْسَ دُواْمِنْ أَبِنْدَ يَمَلَّكَ سُنْ يَطُ كُواْعِنَ عَڧَسَرْ؞

¹¹ عَمَّا يَنْذُ سَيْ كَمِيڧَ حَنُّنْكَ، كَرَبَشِ دَ دُكَنْ أَبِنْدَ يَكٜىٰدَشِ، ذَاكَ غَنِ لَلَّيْ ذَيْڢِتُواْ أَ ڢِيلِ يَيِ مَكَ صَاٻُواْ؞»‏

¹² سَيْ يَهْوٜىٰهْ يَثٜىٰ وَ شَيْطَنْ ‏«‏تُواْ شِ كٜىٰنَنْ، دُكَنْ أَبِنْدَ يَكٜىٰدَشِ أَ حَنُّنْكَ يَكٜىٰ، عَمَّا شِے كَنْسَ، كَدَ كَمِيڧَ حَنُّ كَتَٻَشِ!‏»‏ شَيْطَنْ كُوَ يَڢِتَ دَغَ غَبَنْ يَهْوٜىٰهْ؞

أَيُوبَ يَرَسَ أَرْزِڧِنْسَ دَ یَیَنْسَ

¹³ أَنَانً وَتَرَانَ كٜىٰنَنْ یَیَنْسَ مَظَا دَ مَاتَا سُنَثِ سُنَشَنْ ضُوً إِنَبِے عَثِكِنْ غِدَنْ طَنْعُوَنْسُ بَبَّ؞

¹⁴ سَيْغَا طَنْ عَيْكَ يَشِغُواْ وُرِنْ أَيُوبَ أَغُجٜىٰ يَثٜىٰ ‏«‏يَايِنْ دَمُكٜىٰ نُواْمَ دَ شَانُو، جَاكُنَ مَتَ كُمَ سُنَ كِيوُاْ كُسَدَمُو،

¹⁵ سَيْ مُتَنٜىٰنْ شٜىٰبَ سُكَ ڢَاطُواْ مُسُ ڢَرَتْ طَيَ، سُكَ ݣُوشٜىٰسُ سُكَ تَڢِے دَسُو، سُكَ كُمَ كَكَّشٜىٰ دُكَنْ مَكِيَايَ دَ بَاكِنْ تَكُواْبِے؞ نِنٜىٰ كَطَيْ نَڟِيرَا، نَذُواْ إِنْڢَطَا مَكَ؞»‏

¹⁶ يَنَ ثِكِنْ مَغَنَ كٜىٰنَنْ بَيْغَمَبَ، سَيْغَا وَنِ طَنْ عَيْكَ مَا يَشِغُواْ أَغُجٜىٰ يَثٜىٰ ‏«‏وُتَرْ اللَّهْ تَڢَاطُواْ دَغَ سَمَ تَثِنْيٜىٰ تُمَكِ دَ مَكِيَايَ دُكَ؞ نِنٜىٰ كَطَيْ نَڟِيرَا، نَذُواْ إِنْڢَطَا مَكَ؞»‏

¹⁷ يَنَ ثِكِنْ مَغَنَ كٜىٰنَنْ بَيْغَمَبَ، سَيْغَا وَنِ يَشِغُواْ أَغُجٜىٰ يَثٜىٰ ‏«‏ڧُنْ‌غِيَرْ كَلْدِيَاوَا غُدَا عُكُ سُكَ كَٰوُاْ مَنَ هَرِ سُكَ ݣُوشٜىٰ رَاڧُمَ سُكَ تَڢِے دَسُو، حَرْ مَا سُنْ كَكَّشٜىٰ دُكَنْ مَكِيَايَ دَ بَاكِنْ تَكُواْبِے؞ نِنٜىٰ كَطَيْ نَڟِيرَا، نَذُواْ إِنْڢَطَا مَكَ؞»‏

¹⁸ يَنَ ثِكِنْ مَغَنَ كٜىٰنَنْ بَيْغَمَبَ، سَيْغَا وَنِ يَشِغُواْ أَغُجٜىٰ يَثٜىٰ ‏«‏یَیَنْكَ مَظَا دَ مَاتَا سُنَثِ سُنَشَنْ ضُوً إِنَبِے أَغِدَنْ طَنْعُوَنْسُ بَبَّ،

¹⁹ سَيْغَا غُوغُوَ مَيْ ڧَرْڢِے دَغَ دَاجِ تَبُغِ دُكَنْ ݣُونَ حُطُ نَغِدَنْ، غِدَنْ كُوَ يَڢَاطِ عَكَنْ یَیَنْكَ يَكَشٜىٰسُ دُكَ؞ نِنٜىٰ كَطَيْ نَا ڟِيرَا، نَذُواْ إِنْڢَطَا مَكَ؞»‏

²⁰ سَيْ أَيُوبَ يَتَاشِ، يَيَيَّاغٜىٰ رِيغُنَنْسَ دُواْمِنْ بَڧِنْ ثِكِ، يَ أَسْكٜىٰ كَنْسَ، يَڢَاطِ دَ ڢُسْكَرْسَ حَرْ ڧَسَا؞

²¹ يَثٜىٰ ‏«‏ڟِرَرَ نَڢِتُواْ دَغَ ثِكِنْ مَامَاتَ، ڟِرَرَ كُمَ ذَنْ كُواْمَ؞ يَهْوٜىٰهْ يَابَايَرْ، شِينٜىٰ كُمَ يَا كَرْٻَ؞ يَبُواْ يَتَبَّتَا غَ سُونَنْ يَهْوٜىٰهْ!‏»‏

²² ثِكِنْ دُكَنْ وَنَّنْ أَيُوبَ بَيْيِ ذُنُوبِبَ، بَيْ كُوَ بَا اللَّهْ لَيْڢِے بَ؞