يَحْيَى 9 - أَتَّوْرَتْ دَ أَنَّبَاوَا

عِيسَىٰ يَوَرْكَرْدَ وَنْدَ عَكَ حَيْڢَ مَكَهُواْ

¹ عِيسَىٰ يَنَ وُثٜىٰوَ كٜىٰنَنْ، سَيْ يَغَ وَنِ مُتُمْ وَنْدَ تُنْ حَيْڢُوَرْسَ مَكَهُواْ نٜىٰ؞

² سَيْ أَلْمَجِرَنْسَ سُكَ تَمْبَيٜىٰشِ سُكَثٜىٰ ‏«‏مَلَمْ، ذُنُوبِنْ وَنٜىٰنٜىٰ يَسَا أَنْحَيْڢِ وَنَّنْ مُتُمْ مَكَهُواْ؟ ذُنُوبِنْسَ نٜىٰ، كُواْ ذُنُوبِنْ إِيَايٜىٰنْسَ؟»‏

³ عِيسَىٰ يَأَمْسَ يَثٜىٰ ‏«‏بَا وَيْ سَبُواْدَ مُتُمِنَّنْ كُواْ إِيَايٜىٰنْسَ سُنْيِ ذُنُوبِ بَنٜىٰ، عَمَّا أَنْحَيْڢٜىٰشِ مَكَهُواْ نٜىٰ دُواْمِنْ أَ نُونَ إِيكُوانْ عَيْكِنْ اللَّهْ عَكَنْسَ؞

⁴ دُواْلٜىٰنٜىٰ مُثِيغَبَدَ يِنْ عَيْكِنْ وَنْدَ يَعَيْكُواْ نِے تُنْدَ سَوْرَنْ رَانَ؞ أَيْ دَرٜىٰ يأَنَانً ذُوَا، أَ لُواْكَثِنْ دَ بَاوَنْدَ ذَيْ عِيَ عَيْكِ؞

⁵ مُدِّنْ إِنَانَنْ عَدُونِيَا، نِنٜىٰ حَصْكٜىٰنْ دُونِيَا؞»‏

⁶ دَ يَڢَطِ حَكَ سَيْ يَتُواْڢَ مِيَوْ عَڧَسَا، يَݣُوٻَ ڧَسَا دَشِ، سَيْ يَطٜىٰبِے ڧَسَرْ نَنْدَ يَݣُوٻَ، يَشَاڢَ أَعِدَانُنْ مُتُمِنْ؞

⁷ يَثٜىٰ وَمُتُمِنْ ‏«‏جٜىٰكَ، كَوَنْكٜىٰ عِدُواْ أَ ضُوً تَڢْكِنْ سِلُوَمْ؞»‏ وَنَّنْ كَلْمَ كُوَ تَنَ نُڢِنْ ‏«‏عَيْكَ»‏؞ سَيْ مُتُمِنْ يَجٜىٰ يَوَنْكٜىٰ عِدُواْ، يَدَاوُاْ عِدَنُونْسَ سُنَ غَنِ؞

⁸ مَڨُوبْتَنْسَ دَ وَطَنْدَ سُكَ سَابَا غَنِنْسَ يَنَ بَرَ أَدَا، سُكَثٜىٰ ‏«‏أَشٜىٰ، بَوَنَّنْ نٜىٰ يَكَنْ ذَوْنَ يَنَ بَرَبَ؟»‏

⁹ وَطَنْسُ سُكَثٜىٰ ‏«‏شِينٜىٰ مَنَ؞»‏ وَطَنْسُ كُوَ سُكَثٜىٰ ‏«‏أَعَ، سُنْ دَيْ يِكَمَ نٜىٰ كَوَيْ؞»‏ عَمَّا مُتُمِنْ دَ كَنْسَ يَثٜىٰ ‏«‏أَيْ، نِنٜىٰ مُتُمِنْ؞»‏

¹⁰ سَيْ سُكَ تَمْبَيٜىٰشِ سُكَثٜىٰ ‏«‏تُواْ، يَيَ عَكَيِ عِدَنُونْكَ سُكَ بُوطٜىٰ؟»‏

¹¹ يَأَمْسَ يَثٜىٰ ‏«‏مُتُمِنَّنْ دَ عَكٜىٰ ثٜىٰ دَشِ عِيسَىٰ نٜىٰ يَݣُوٻَ ڧَسَا يَشَاڢَ مِنِ أَعِدَانُو، يَثٜىٰ مِنِ، ‏‹‏جٜىٰكَ كَوَنْكٜىٰ عِدُواْ أَ ضُوً سِلُوَمْ؞›‏ نَا كُوَ جٜىٰ نَا وَنْكٜىٰ، سَيْ نَسَامِ غَنِ؞»‏

¹² سُكَ تَمْبَيٜىٰشِ سُكَثٜىٰ ‏«‏إِنَا مُتُمِنْ يَكٜىٰ؟»‏ سَيْ يَثٜىٰ ‏«‏بَنْ سَنِبَ؞»‏

ڢَرِسِيَاوَا سُنْيِ بِنْثِكٜىٰ عَكَنْ وَرْكٜىٰوَرْ مَكَهُوانْ

¹³ سَيْ مُتَنٜىٰنْ سُكَ كَيْ وَ ڢَرِسِيَاوَا مُتُمِنْ دَيَكٜىٰ مَكَهُواْ أَدَا؞

¹⁴ تُواْ، أَ رَانَرْ هُوتُ تَمَكُواْ نٜىٰ عِيسَىٰ يَݣُوٻَ ڧَسَا يَبُوطٜىٰ وَمُتُمِنْ عِدُواْ؞

¹⁵ سَبُواْدَ حَكَ ڢَرِسِيَاوَا سُكَ تَمْبَيٜىٰشِ يَدَّ عَكَيِ يَسَامِ غَنِ؞ سَيْ مُتُمِنْ يَثٜىٰ ‏«‏يَݣُوٻَ ڧَسَا نٜىٰ يَشَاڢَ مِنِ أَعِدُواْنَ، نَوَنْكٜىٰ، يَنْذُ إِنَ غَنِ؞»‏

¹⁶ وَطَنْسُ ڢَرِسِيَاوَا سُكَثٜىٰ ‏«‏مُتُمِنَّنْ بَ دَغَ وُرِنْ اللَّهْ يَڢِتُواْ بَ، دُوانْ بَايَ كِيَايٜىٰ رَانَرْ هُوتُ تَمَكُواْ؞»‏ عَمَّا وَطَنْسُ سُكَيِ تَمْبَيَ سُكَثٜىٰ ‏«‏يَيَ مُتُمْ مَيْ ذُنُوبِ ذَيْ عِيَيِنْ عَلَمُنْ بَنْ مَامَاكِ حَكَ؟»‏ سَيْ رَعَيِنْسُ يَرَبُ؞

¹⁷ سَيْ سُكَسَاكٜىٰ تَمْبَيِ مُتُمِنْ سُكَثٜىٰ ‏«‏مٜىٰنٜىٰنٜىٰ رَعَيِنْكَ غَمٜىٰدَ وَنَّنْ مُتُمْ، تُنْدَيَكٜىٰ كَيْنٜىٰ يَبُوطٜىٰ مَكَ عِدُواْ؟»‏ مُتُمِنْ يَأَمْسَ مُسُ يَثٜىٰ ‏«‏أَيْ، أَنَّبِے نٜىٰ شِ؞»‏

¹⁸ شُوغَبَنِّنْ يَهُودَاوَنْ كَمْ، بَسُ بَادَ غَسْكِيَابَ ثٜىٰوَ مُتُمِنَّنْ مَكَهُواْ نٜىٰ أَدَا، كُمَ يَنْذُ يَنَ غَنِ؞ سَبُواْدَ حَكَ سُكَ عَيْكَ عَكَ كِرَا إِيَايٜىٰنْسَ؞

¹⁹ سُكَ تَمْبَيٜىٰسُ سُكَثٜىٰ ‏«‏وَنَّنْ طَنْكُ نٜىٰ؟ كُنْثٜىٰ أَنْحَيْڢٜىٰشِ مَكَهُواْ؟ تُواْ، تَيَيَا يَ عِيَ غَنِ يَنْذُ؟»‏

²⁰ سَيْ إِيَايٜىٰنْ سُكَ أَمْسَ سُكَثٜىٰ ‏«‏مُنْ دَيْ سَنْ وَنَّنْ طَنْمُ نٜىٰ، كُمَ أَنْحَيْڢٜىٰشِ مَكَهُواْ نٜىٰ؞

²¹ عَمَّا مَا كَمْ، بَمُسَنْ يَدَّ عَكَيِ يَنَ غَنِ يَنْذُ بَ، بَمُ مَا سَنْ وَنْدَ يَبُوطٜىٰ مَسَ عِدُواْبَ؞ كُتَمْبَيٜىٰشِ، أَيْ، شِے بَ يَرُواْ بَنٜىٰ، ذَيْ ڢَطَا دَ بَاكِنْسَ؞»‏

²² إِيَايٜىٰنْسَ سُنْ ڢَطِ حَكَنٜىٰ دُواْمِنْ ڟُواْرُوانْ شُوغَبَنِّنْ يَهُودَاوَا، دُوانْ دَا مَا يَهُودَاوَا سُنْ شِرْيَ ثٜىٰوَ دُكْ وَنْدَ يَثٜىٰ عِيسَىٰ نٜىٰ أَلْمَسِيحُ، ذَاعَ كُواْرٜىٰشِ دَغَ مَجَمِعَ؞

²³ شِيَسَا إِيَايٜىٰنْسَ سُكَثٜىٰ ‏«‏أَيْ، شِے بَ يَرُواْ بَنٜىٰ، كُتَمْبَيٜىٰشِ؞»‏

²⁴ سَيْ ڢَرِسِيَاوَنْ سُكَسَاكٜىٰ كِرَا مُتُمِنَّنْ دَيَكٜىٰ مَكَهُواْ أَدَا، سُكَثٜىٰ مَسَ ‏«‏كَڢَطِ غَسْكِيَ دُوانْ كَطَوْكَكَا اللَّهْ؞ مُو كَمْ، مُنْسَنْ مُتُمِنَّنْدَ يَوَرْكَرْ دَكَيْ مَيْ ذُنُوبِ نٜىٰ؞»‏

²⁵ سَيْ يَأَمْسَ يَثٜىٰ ‏«‏كُواْ مَيْ ذُنُوبِ نٜىٰ، نِے بَنْ سَنِبَ؞ أَبُ طَيَ كَمْ نَسَنِ، دَا نِے مَكَهُواْ نٜىٰ، يَنْذُ كُوَ إِنَ غَنِ؞»‏

²⁶ سُكَ تَمْبَيٜىٰشِ كُمَ سُكَثٜىٰ ‏«‏مٜىٰيَيِ مَكَ؟ تَيَيَا يَبُوطٜىٰ مَكَ عِدُواْ؟»‏

²⁷ يَأَمْسَ مُسُ يَثٜىٰ ‏«‏نَارِغَا نَا ڢَطَا مُكُ، بَكُجِنِ بَنٜىٰ؞ دُوانْمٜىٰ كُكٜىٰسُواْ كُسَاكٜىٰجِ؟ كُواْ كُو مَا كُنَ سُواْ كُذَمَ أَلْمَجِرَنْسَ نٜىٰ؟»‏

²⁸ سَيْ سُكَ ذَاغِ مُتُمِنْ سُكَثٜىٰ ‏«‏كَيْ نٜىٰ دَيْ أَلْمَجِرِنْسَ، عَمَّا مُو كَمْ، أَلْمَجِرَنْ مُوسَٰى نٜىٰ؞

²⁹ مُنْ دَيْ سَنِ اللَّهْ يَيِ مَغَنَ دَ مُوسَٰى، عَمَّا وَنَّنْ مُتُمْ كَمْ بَمُسَنْ عِنْدَ يَڢِتُواْبَ؞»‏

³⁰ سَيْ مُتُمِنْ يَأَمْسَ مُسُ يَثٜىٰ ‏«‏يَوْ غَا أَبِنْ مَامَاكِ!‏ بَكُسَنْ عِنْدَ يَڢِتُواْ بَ، غَاشِ كُوَ يَبُوطٜىٰ مِنِ عِدُواْ!‏

³¹ مُنْ سَنِ اللَّهْ بَايَ سَوْرَرُوانْ مَاسُ ذُنُوبِ، عَمَّا يَنَ سَوْرَرُوانْ دُكْ وَنْدَ يَكٜىٰيِ مَسَ سُجَّدَ، يَنَ كُمَيِ مَسَ بِيَيَّ؞

³² تُنْ ڢَرْكُوانْ دُونِيَا بَعَتَٻَ جِنْ وَنِ يَبُوطٜىٰ عِدُوانْ وَنْدَ عَكَ حَيْڢَ مَكَهُواْبَ؞

³³ أَيْ دَ مُتُمِنَّنْ بَ دَغَ وُرِنْ اللَّهْ يَڢِتُواْ بَ دَ بَذَيْ عِيَيِنْ كُواْمٜىٰبَ؞»‏

³⁴ سُكَ أَمْسَ مَسَ سُكَثٜىٰ ‏«‏كَيْ دَ عَكَ حَيْڢٜىٰكَ ثِكِنْ ذُنُوبِ، كَنَ ڧُواْڧَرِ كَكُواْيَ مَنَ نٜىٰ؟»‏ سَيْ سُكَ كُواْرٜىٰشِ؞

مَكَنْتَ تَرُوحُ

³⁵ عِيسَىٰ يَجِ لَابَرِ ثٜىٰوَ سُنْ كُواْرِ مُتُمِنْ؞ دَ يَسَامٜىٰشِ، سَيْ يَتَمْبَيٜىٰشِ يَثٜىٰ ‏«‏كَبَادَ غَسْكِيَ غَ طَنْ اللَّهْ؟»‏

³⁶ مُتُمِنْ يَأَمْسَ يَثٜىٰ ‏«‏مَيْغِرْمَ، وَنٜىٰنٜىٰ شِ؟ كَڢَطَا مِنِ دُوانْ إِنْ بَادَ غَسْكِيَ غَرٜىٰشِ؞»‏

³⁷ عِيسَىٰ يَثٜىٰ مَسَ ‏«‏أَيْ، كَغَنْ شِ، شِينٜىٰ مَا مَيْ مَغَنَ دَكَيْ؞»‏

³⁸ سَيْ مُتُمِنْ يَثٜىٰ ‏«‏عُبَنْ‌غِجِ، نَبَادَ غَسْكِيَ؞»‏ يَكُمَيِ مَسَ سُجَّدَ؞

³⁹ عِيسَىٰ يَثٜىٰ ‏«‏نَشِغُواْ دُونِيَرْ نَنْ نٜىٰ دُواْمِنْ إِنْيِ شَرِيعَ، دُواْمِنْ وَطَنْدَ بَاسَ غَنِ سُسَامِ غَنِ، وَطَنْدَ سُكٜىٰ غَنِ كُمَ سُذَمَ مَكَڢِ؞»‏

⁴⁰ دَ ڢَرِسِيَاوَنْ دَسُكٜىٰ كُسَدَشِ سُكَجِ حَكَ، سَيْ سُكَثٜىٰ مَسَ ‏«‏وَتُواْ، كَنَ ثٜىٰوَ مُو مَا مَكَڢِ كٜىٰنَنْ؟»‏

⁴¹ عِيسَىٰ يَثٜىٰمُسُ ‏«‏أَيْ دَ مَكَڢِ نٜىٰ كُو دَ بَاكُ دَ أَلْحَكِنْ ذُنُوبِ؞ عَمَّا دَيَكٜىٰ كُنْثٜىٰ كُنَغَنِ، تُواْ، أَلْحَكِنْ ذُنُبَنْكُ يأَنَانً دَرَمْ؞